Zeremi sebre
32 Zida rĩm a Sedesiyaas naamã yʋʋm piig soabã sẽn yaa a Nebukadnezaar* naamã yʋʋm piig la a nii-n-soabã, a Zeova goma ne a Zeremi.+ 2 Wakat kãng tɩ Babilon rĩmã tãb-biisã ra gũbga Zerizalɛm n na n zabe. Rẽ tɩ b yõka no-rɛɛs a Zeremi n pag Gũudbã samandẽ,+ Zida rĩmã zakẽ.* 3 Bala Zida rĩm a Sedesiyaas ra yõk-a lame n page,+ n yeele: “Bõe yĩng tɩ fo togsd bãngr-goam a woto? Fo yeelame: ‘Ad a Zeova sẽn yeele: “Mam na n dɩka tẽn-kãngã n ning Babilon rĩmã nugẽ. A na n deeg-a lame.+ 4 Zida rĩm a Sedesiyaas pa na n põs Kalde nebã nusẽ ye. Sãmbg sẽn kae, b na n dɩk-a lame n ning Babilon rĩmã nugẽ. A na n goma ne-a neng ne nenga, la a yã a mengã.”’+ 5 ‘A na n talla a Sedesiyaas n kẽng Babilonne, t’a pa be n tãag m sẽn na n tẽeg a yelle.’ Yaa a Zeova n yeele. ‘Baa yãmb sẽn ket n zabd ne Kalde nebã, yãmb pa na n tõog ye.’”+
6 A Zeremi yeelame: “A Zeova goma ne maam n yeele: 7 ‘Fo ba wã ba-biig a Salum biig a Hanameyɛll na n waa fo nengẽ n yeele: “Ra mam pʋʋgã sẽn be Anatotã,+ bala foo n tar sor n na n deng n da-a.”’”*+
8 A Hanameyɛll sẽn yaa mam ba wã ba-biig biigã waa mam nengẽ Gũudbã samandẽ, wa a Zeova sẽn da yeelã, n yeel maam yaa: “M bõos tɩ f ra mam pʋʋgã sẽn be Anatote, Bẽnzame soolmẽ wã, bala foo n tar sor n na n deeg-a n sooge, la f ra-a.* Woto wã, bɩ f ra-a.” Yaa rẽ la mam bãng tɩ sɩd yaa a Zeova gomde.
9 Dẽ, mam daa pʋʋgã sẽn be Anatotã mam ba wã ba-biigã biig a Hanameyɛll nengẽ. Mam maka ligdã+ n na n kõ-a. Yɩɩ sɩkl* a yopoe, ne wanzuri ligd-koeems piiga. 10 Mam gʋlsa rẽ raabã sebr zug+ n ning bãnde, la m bool kaset rãmba.+ Mam maka ligdã zɩslem makdg zugu. 11 Mam dɩka raabã sɛbã, soab ning m sẽn ning bãnd wa sẽn zems tõogã la noyã sẽn wilgã, n paas m sẽn bas a soab n pa ning bãndã. 12 Mam dɩka raabã sebr n kõ a Maseya biig a Neriya+ biig a Baruki,+ mam ba wã ba-biigã biig a Hanameyɛll taoore, kaset rãmb nins sẽn gʋls raabã sebrã pʋgẽ wã, la Zʋɩf-rãmb nins fãa sẽn da zĩ Gũudbã samandẽ+ wã taoore.
13 Mam yeela a Baruk b taoor yaa: 14 “Ad Israyɛll Wẽnnaam a Zeova sẽn yaa tãb-biis naabã sẽn yeele: ‘Reeg raabã seb-kãensã, sẽn ning-a bãndã la sẽn pa ning-a bãndã, n sagl tãnd laok pʋgẽ, sẽn na yɩl tɩ b tõog n kaoos wʋsgo.’ 15 Bala ad Israyɛll Wẽnnaam a Zeova sẽn yaa tãb-biis naabã sẽn yeele: ‘B na n le raa roto, pʋt la viyn pʋt soolem-kãngã pʋgẽ.’”+
16 Mam sẽn kõ a Neriya biig a Baruk raabã sebrã poore, mam pʋʋsa a Zeova n yeele: 17 “Kayto! Zu-soab sẽn ka to a Zeova, yaa ne yãmb pãn-kãsengã,+ la ne y kangã sẽn tar pãngã maasem la y maan saasã la tẽngã. Bũmb kae n yaa kãseng ne yãmb 18 sẽn yaa soab ning sẽn maand neb tusa neere, la sẽn sɩbgd kamb b ba-rãmb kongr yĩngã ye.+ Yãmb n yaa Wẽnnaam sɩd-sɩdã, Wẽnnaam sẽn yaa kãseng la sẽn yaa pãn-kãseng soabã, soab ning yʋʋr sẽn yaa tãb-biis naab a Zeova wã. 19 Yãmb raabã* yaa kãsenga. Yãmb tʋmda ne pãnga.+ Yãmb ninã geta ninsaalbã fãa manesem,+ sẽn na yɩl n keo ned kam fãa wa sẽn zems a manesem, la wa sẽn zems a sẽn maande.+ 20 Yãmb maana bõn-bãn ne yel-soalem Ezɩpt soolmẽ wã, tɩ nebã mi rẽ hal n tãag rũndã. Rẽ kɩtame tɩ yãmb yʋʋrã yi Israyɛlle, la ninsaalbã fãa sʋka,+ wa sẽn yaa to-to rũndã-rũndã wã. 21 Yãmb tũnuga ne bõn-bãna, yel-soalma, nug sẽn tar pãnga, kang sẽn tar pãnga, la ne tʋʋm-kãsems sẽn kẽesd rabeem, n yiis Israyɛll nebã sẽn yaa yãmb nin-buiidã Ezɩpt soolmẽ wã.+
22 “Yãmb wa n kõ-b-la soolem-kãngã yãmb sẽn da wẽen tɩ y na n kõo b yaab-rãmbã.+ Yaa tẽng sẽn pid ne bĩisim la sɩɩdo.+ 23 B kẽe a pʋgẽ n soog-a, la b pa sak yãmb koɛɛgã, wall b tũ yãmb tõogã ye. B pa maan bũmb nins yãmb sẽn yeel tɩ b maanã baa a yembr ye. Yaa rẽ yĩng la yãmb sẽn kɩt tɩ yel-be-kãensã fãa paam-bã.+ 24 Ade! Neb n wa n zam tãnd n gũbg tẽngã n na n deeg-a.+ Zabrã,+ komã la ba-loangdgã*+ yĩnga, tẽngã na n lʋɩɩ Kalde nebã sẽn zabd ne-a wã nusẽ. Yãmb sẽn yeel bũmb ninsã fãa pidsame, wa yãmb sẽn ne masã wã. 25 Zu-soab sẽn ka to a Zeova, baa sẽn yaa vẽeneg tɩ Kalde nebã na n deega tẽngã, yãmb yeela maam yaa: ‘Ra pʋʋgã ne ligdi, la f bool kaset rãmba.’”
26 Rẽ la a Zeova yeel a Zeremi yaa: 27 “Mam yaa a Zeova sẽn yaa ninsaalbã fãa* Wẽnnaamã. Bũmb beeme n yaa kãseng wʋsg ne maam sɩda? 28 Woto wã, ad a Zeova sẽn yeele: ‘Mam na n dɩka tẽn-kãngã n ning Kalde nebã nusẽ, la Babilon rĩm a Nebukadnezaar* nugẽ. A na n deeg-a lame.+ 29 Kalde nebã sẽn zabd ne tẽn-kãnga wã na n kẽe a pʋgẽ n ning-a bugum. B na n yõoga tẽngã+ ne rot nins zut nebã sẽn maan maand n kõ a Baalle, la b kɩrg divẽ kũun n kõ wẽnnaam-dãmb a taab sẽn na yɩl tɩ mam sũurã yikã.’+
30 “‘Yaa sẽn yaa wẽng mam nifẽ bal la Israyɛll ne Zida nebã maand hal b yãadmẽ.+ Israyɛll nebã ket n yikda mam sũurã ne b nusã tʋʋma.’ Yaa a Zeova n yeele. 31 ‘Sã n yaa ne tẽn-kãngã, b sẽn me-a wã tɛk n tãag rũndã, a yaa bũmb sẽn wat ne mam sũ-yikr la m sũ-puugr bala.+ Rẽ n so tɩ b segd n menes-a mam taoore,+ 32 wẽng ning fãa Israyɛll ne Zida nebã sẽn maan n yik mam sũurã yĩnga. Yaa bãmba, b rĩm-dãmbã,+ b nanambsã,+ b maan-kʋʋdbã, b no-rɛɛsdbã,+ la Zida ne Zerizalɛm nebã. 33 Wakat fãa, b ra wẽnemdeda b kãy n teesd maam lakae, pa b nensã ye.+ Baa mam sẽn mak n na n zãms-b naoor wʋsgã,* b baa a ye pa kelg sẽn na yɩl n paam kiblg ye.+ 34 B ninga b bõn-naandsã sẽn yaa bõn-yoodã roog ning zug mam yʋʋrã sẽn be wã pʋgẽ, sẽn na yɩl n dẽgm-a.+ 35 Sẽn paase, b mee a Baal zĩ-zãntsã a Hinom bi-riblã longẽ* wã,+ sẽn na yɩl n dɩkd b kom-dibli wã la b kom-pugli wã n yõogd bugum n kõt a Molɛke.+ Mam pa yeel-b tɩ b maan woto ye.+ Mam zɩ n tags m sũurẽ* n na n kos-b tɩ b maan bũmb sẽn yaa wẽng a woto, n kɩt tɩ Zida nebã maan yel-wẽnd ye.’
36 “Woto wã, ad Israyɛll Wẽnnaam a Zeova sẽn yeel tẽn-kãngã wɛɛngẽ, tẽng ning yãmb sẽn yeel tɩ b na n tũnuga ne zabre, kom la bã-loangdg n kɩt tɩ Babilon rĩmã soogã: 37 ‘Mam na n tigm-b-la soolem nins fãa pʋsẽ mam sẽn sãeeg-b m sũ-pu-kãsengã la m sũ-kãbrã sẽn yaa wʋsgã pʋgẽ wã.+ Mam na n tall-b lame n lebg n wa zĩ-kãngã, n kɩt tɩ b zĩnd bãane.+ 38 B na n yɩɩ mam nin-buiidu, tɩ mam yɩ b Wẽnnaam.+ 39 Mam na n kõ-b-la sũur a yembr+ la m kɩt tɩ b tũ so-yɛnga, sẽn na yɩl tɩ b zoe maam wakat fãa, bãmb mensã neer yĩnga, la b kambã sẽn na n pʋgl bãmbã neer yĩnga.+ 40 M na n maana kaool sẽn paad wakat fãa ne-ba,+ kaool sẽn wilgd tɩ m na n maand-b-la neer n pa basdẽ ye.+ Mam na n ninga wẽn-zoeer b sũyẽ wã, sẽn na yɩl tɩ b ra wa bas maam ye.+ 41 Mam na n maana sũ-noog b yĩng la m maan-b neere.+ Mam na n lugl-b-la kãn-kãe soolem-kãngã pʋgẽ+ ne m sũur fãa, la ne m sɩɩgã* fãa.’”
42 “Bala ad a Zeova sẽn yeele: ‘Mam na n kõo nin-kãensã bõn-sõma* nins fãa mam sẽn pʋlemd-bã, wa mam sẽn kɩt tɩ yel-be-kãensã fãa sẽn yaa kãsemsã wa b zutã.+ 43 Nebã na n le raa pʋt soolem-kãngã pʋgẽ,+ baa yãmb sẽn yete: “Yaa zĩ-vɩʋʋgo, tɩ ned la rũng pa be a pʋgẽ ye. B ning-a-la Kalde nebã nusẽ.”’
44 “‘B na n daa pʋt ne ligdi, n gʋls raab sɛb n ning bãnde, la b bool kaset rãmb Bẽnzame soolmẽ wã,+ Zerizalɛm tẽn-kɩremsẽ wã, Zida tẽnsẽ wã,+ tẽns nins sẽn be soolmã zĩig ning sẽn yaa tãensã, tẽns nins sẽn be tẽn-nabrẽ wã+ la goabg tẽnsẽ wã, bala mam na n talla b neb nins sẽn yaa yembsã n lebg n wa.’+ Yaa a Zeova n yeele.”