Ezekɩyɛll sebre

17 A Zeova le goma ne maam n yeele: 2 “Ninsaal biiga, gom ne pagdo, la f wẽ yel-bũnd Israyɛll buudã wɛɛngẽ.+ 3 Fo segd n yeelame yaa: ‘Ad a Zeova sẽn yaa Zu-soab sẽn ka to wã sẽn yeele: “Sɩl-bedr+ sẽn tar pɩgs sẽn yaa bɛd n wa Libã.+ A kõbdã yaa wogd la b sẽg taaba, n yaa kõbg toor-toore. A kaooga sɛɛdr tɩɩgã will ning sẽn be yĩngrã.+ 4 A kʋʋga tobeng ning sẽn be zugẽ-zugẽ wã, n tall n kẽng toandbã soolmẽ.* A tɩ rɩgl-a-la toandbã galʋ-tẽng a ye pʋgẽ.+ 5 Rẽ poore, a yãka soolmã bõn-buud kẽere,+ n bʋd pʋʋg sẽn sakd kood pʋgẽ. A bʋd-a-la koom wʋsg noor wa soll tɩɩga. 6 Dẽ, a bul n yiime, n lebg viyn tɩɩg sẽn yaa pãare, la sẽn yɛdgde.+ A vãadã ra wẽneg n tees-a lame, t’a yẽgã ra kɩɩd a tẽngrã. Yaa woto la a lebg viyn tɩɩg sẽn tobd t’a willã tãoodẽ.+

7 “‘“Sɩl-bedr a to n wa.+ Yaa sɩlg sẽn tar pɩgs sẽn yaa bɛda, la kõbd sẽn yaa yalemse.+ Viyn tɩɩgã tãoo a yẽgã tao-tao n tees-a, n bas zẽedã zĩig ning b sẽn da bʋd-a wã. Sẽn paase, a tees-a-la a vãadã sẽn na yɩl t’a zãgs-a koom.+ 8 La b yaool n da bʋd-a-la pʋʋg sẽn yaa sõma pʋgẽ, koom wʋsg noor sẽn na yɩl t’a tão wila, n wom biisi, la a lebg viyn tɩɩg sẽn tar ziiri.”’+

9 “Yeel yaa: ‘Ad a Zeova sẽn yaa Zu-soab sẽn ka to wã sẽn yeele: “A na n lebga bedr sɩda? Ned pa na n wa yãgs a yẽgã,+ n kɩt t’a biisã põoge, la a kɩt t’a tobendã kʋɩ sɩda?+ A na n kʋɩɩme, hal t’a võogr pa baood kang sẽn tar pãnga, wall neb wʋsg ye. 10 Baa b sẽn võog-a n tɩ sel zĩig a to wã, a na n lebga bedr sɩda? Yaang sobgã sã n wa fug a zugu, a pa na n kʋɩ zãng sɩda? A na n kʋɩɩ zẽedã zĩig ning a sẽn tobã.”’”

11 A Zeova le goma ne maam n yeele: 12 “M bõos tɩ f yeel buud ning neb sẽn yaa tõatbã yaa: ‘Yãmb pa wʋmd bõn-kãensã võor sɩda?’ Yeel yaa: ‘Kelg-y-yã! Babilon rĩmã waa Zerizalɛm n yõk a rĩmã la a nanambsã n tall n kẽng Babilonne.+ 13 Sẽn paase, a yãka na-biig a ye,+ n maan kaool ne-a la a kɩt t’a wẽene.+ Rẽ poore, a talla soolmã nin-kãsemsã n looge,+ 14 sẽn na yɩl tɩ rĩungã pãng booge, n pa le tõe n paam pãnga, tɩ yaa tɩlɛ tɩ b sak a kaoolã tɩ rĩungã kell n zĩndi.+ 15 La rĩmã wa n kɩɩs-a lame,+ n tʋm a koe-taasdbã Ezɩpti, sẽn na yɩl n paam wed-moos+ la tãb-biis wʋsg Ezɩpt nebã nengẽ.+ A na n tõogame sɩda? Sẽn maand-a bõn-kãensa wã na n põsa sɩbgr sɩda? A tõe n sãama kaoolã n baas n põs sɩda?’+

16 “‘A Zeova sẽn yaa Zu-soab sẽn ka to wã yeelame: “M wẽenda ne m meng t’a na n kii Babilonne, zĩig ning rĩm* ning sẽn kɩt t’a* lebg rĩmã sẽn be wã, rat n yeel tɩ rĩm ning wẽeneg a sẽn paooge, la a sãam a kaoolã.+ 17 B sã n wa gũbg tẽngã ne tãn-dʋya, la b me lals n gũbg-a n na n zab n kʋ neb* wʋsgo, a Farawõ tãb-biis wʋsgã la a tãb-biis sul ka tɛkã pa na n tõog n sõng-a baa bilf zabrã sasa ye.+ 18 A paooga wẽenego, la a sãam kaoole. Baa a sẽn sak n pʋlmã,* a maana bõn-kãensã fãa. A pa na n põs ye.”’

19 “‘Woto wã, ad a Zeova sẽn yaa Zu-soab sẽn ka to wã sẽn yeele: “M wẽenda ne m menga, tɩ m na n kɩtame t’a sẽn paoog mam wẽenegã+ la a sãam mam kaoolã biis wa a zugu. 20 Mam na n loba m gãmbrã a zugu. Mam tãoosgã gãmbr na n yõk-a lame.+ Mam na n tall-a lame n kẽng Babilon n tɩ kao a bʋʋd be, a sẽn pa maan sɩd ne maamã yĩnga.+ 21 Sʋʋg n na n kʋ a tãb-biis sulã neb nins fãa sẽn zoet n solgdẽ wã. Sẽn kell-bã na n sãeega ween-vɩɩsã fãa.*+ Dẽ, yãmb na n bãngame tɩ yaa maam a Zeova meng n gome.”’+

22 “‘Ad a Zeova sẽn yaa Zu-soab sẽn ka to wã sẽn yeele: “Mam na n yãka tobeng sɛɛdr tɩɩg sẽn yaa wok zug+ n sele. Yaa a wil-bõonegã zug la m na n kʋʋg tobeng sẽn yaa polle.+ Maam m toor n na n sel-a tãng sẽn yaa lug-lug wʋsg zugu.+ 23 Yaa Israyɛll tãn-lug-lug zug la m na n sel-a. A wilã na n tãoome. A na n woma biisi, n lebg sɛɛdr tɩɩg sẽn tar ziiri. Liuuli buud fãa na n zĩnda a tẽngre, la b soond a vãadã maasmẽ. 24 Weoogã tɩɩsã fãa na n bãngame tɩ maam a Zeova paooga tɩɩg ning sẽn yaa wokã, la m zẽk sẽn yaa-a pãarã.+ Mam kʋɩɩsa tɩɩg ning sẽn yaa maasrã, la m kɩt tɩ sẽn kʋɩ-a wã ning puudu.+ Yaa maam a Zeova meng n gome, la m kɩt tɩ rẽ yɩ.”’”