Tõod sebre

28 “Yãmb sã n sak n kelg yãmb Wẽnnaam a Zeova koɛɛgã, n tũ noy nins fãa mam sẽn togsd yãmb rũndã wã neere, yãmb Wẽnnaam a Zeova na n zẽka yãmb n yɩɩg buud a taabã fãa sẽn be tẽngã zugã.+ 2 Ad bark nins fãa yãmb sẽn na n paam hal tɩ seke,+ yãmb sẽn kell n kelg y Wẽnnaam a Zeova wã yĩnga:

3 “Yãmb na n paama bark tẽngã pʋgẽ, la y paam bark me weoogã pʋgẽ.+

4 “Yãmb kambã na n paama barka.+ Y tẽngã bõn-koaadlã biisi, n paas y rũmsã kamba, y nag-bi wã la y pe-bi wã na n paama barka.+

5 “Y peoogã+ ne y zom-nagdgã laag+ na n paama barka.

6 “Yãmb na n paama bark y kõom wakate, la y paam bark y yiib wakate.

7 “A Zeova na n kɩtame tɩ y tõog y bɛɛb nins fãa sẽn na n yik n zab ne yãmbã.+ Bãmb na n tũu sor a ye n wa zab ne yãmba, la b na n tũu soay toɛy-toɛy a yopoe n zoe.+ 8 A Zeova na n kɩtame tɩ yãmb baoã+ ne bũmb nins fãa y sẽn maandã paam barka. Yãmb Wẽnnaam a Zeova na n ninga yãmb bark soolem ning a sẽn na n kõ yãmbã pʋgẽ. 9 A Zeova na n kɩtame tɩ y lebg buud sẽn welg toor yẽ yĩnga,+ wa a sẽn da pʋlem yãmbã,+ bala y kell n saka y Wẽnnaam a Zeova noyã, la y tũ a soayã neere. 10 Buud nins fãa sẽn be tẽngã zugã segd n yãame tɩ b boonda yãmb ne a Zeova yʋʋre,+ la b zoe yãmba.+

11 “A Zeova na n kɩtame tɩ yãmb paam kamb wʋsgo, la y paam rũms la bõn-koaadl tɩ gale,+ tẽng ning a Zeova sẽn pʋlem y yaab-rãmbã t’a na n kõo yãmbã pʋgẽ.+ 12 A Zeova na n paka a baoorã sẽn yaa sõma wã, rat n yeel tɩ saasã, tɩ saagã ni a wakat+ yãmb soolmã pʋgẽ, la a ning-y bark y sẽn maandã fãa pʋgẽ. Buud wʋsg na n wa penga yãmba, la pa na n yɩ tɩlɛ tɩ y peng bũmb ye.+ 13 Yãmb sã n kell n sak yãmb Wẽnnaam a Zeova noy nins mam sẽn taasd yãmb rũndã wã, la y tũ-ba, a Zeova na n ninga yãmb taoor lakae, pa poorẽ ye.* Yãmb na n zĩnda zugẽ+ lakae, pa tẽngr ye. 14 Y pa segd n bʋdg rɩtg wall goabga,+ n bas goam nins fãa mam sẽn togsd yãmb rũndã wã, n tũ wẽnnaam-dãmb a taab n waoog-b ye.+

15 “La yãmb sã n pa kelg y Wẽnnaam a Zeova koɛɛgã, n gũus neer n tũ a noyã la a tõodã fãa mam sẽn taasd yãmb rũndã wã, ad kãab-wẽns nins fãa sẽn na n wa yãmb zugu, hal tɩ wʋm-yã:+

16 “Kãab-wẽng na n zĩnda yãmb zug tẽngã pʋgẽ, la a zĩnd yãmb zug weoogẽ wã.+

17 “Kãab-wẽng na n zĩnda ne y peoogã+ la ne y zom-nagdgã laaga.+

18 “Kãab-wẽng na n zĩnda y kambã zutu.+ Kãab-wẽng na n zĩnda y tẽngã bõn-koaadlã biis zugu, ne y nag-bi wã la y pe-bi wã zutu.+

19 “Kãab-wẽng na n zĩnda yãmb zug y kõom wakate, la a zĩnd y zug y yiib wakate.

20 “Bũmb ning fãa y sẽn maandã pʋgẽ, a Zeova na n kɩtame tɩ kãab-wẽng wa y zutu, la a kɩt tɩ y yirbi. A na n sɩbg-y lame me hal n wa menes-yã, n sãam-y tao-tao, y tʋʋm-wẽnsã la y sẽn bas yẽ wã* yĩnga.+ 21 A Zeova na n kɩtame tɩ bãag yõk yãmb n pa satẽ, n tãag a sẽn na n sãam yãmb zãng soolem ning y sẽn dabd n na n tɩ soogã pʋgẽ.+ 22 A Zeova na n kɩtame tɩ kõs-kʋdgo, yĩn-wɩngre,+ bã-motem la tʋʋlg* yõk yãmba. A na n kɩtame tɩ b kʋ yãmb ne sʋʋse,+ la a kɩt tɩ pems-tʋʋlg la kood bãas+ sãam y bõn-koaadlã. Bõn-kãens na n diga yãmb hal n wa sãam-yã. 23 Sa-gãnã sẽn be yãmb zugẽ wã na n lebga wa zũudu, tɩ tẽngã y sẽn tabdã lebg wa kutu.+ 24 A Zeova na n kɩtame tɩ saagã sẽn niid y soolmẽ wã lebg bĩisr la wubsgu, n yi saasẽ n sig yãmb zutu, hal tɩ y wa sãam zãnga. 25 A Zeova na n kɩtame tɩ y bɛɛbã tõog-yã.+ Yãmb na n tũu sor a ye n tɩ zab ne-ba, la y na n tũu soay toɛy-toɛy a yopoe n zoe. Soolem toɛy-toɛyã fãa sẽn be tẽngã zugã na n yɛɛsame,+ yel-beed ning sẽn paam yãmbã yĩnga. 26 Yãmb kũ-rãmbã na n lebga liuul buud fãa sẽn yɩgd yĩngri, ne rũng buud fãa sẽn be tẽngã zug rɩɩbo, tɩ ned kae n na n yɛɛs-b tɩ b loog ye.+

27 “A Zeova na n kɩtame tɩ Ezɩpt nod-tãoodsã, se-noada, sʋlga, la zageng yõk yãmba, hal tɩ pa tõe n sãoog ye. 28 A Zeova na n kɩtame tɩ gãeemd la zond yõk yãmba,+ la a kɩt tɩ y yirbi. 29 Yãmb na n babla wĩnto-sʋk wa zoang sẽn babend likẽ.+ Bũmb ning fãa y sẽn maandã pa na n yãk neng ye. B na n zãmbda yãmb la b fãad yãmb wakat fãa, tɩ ned kae n na n fãag yãmb ye.+ 30 Yãmb na n baoo pagb n na n kẽ kãadem, la rap a taab n na n yõg-ba. Yãmb na n mee zagse, la y pa na n zĩnd b pʋsẽ ye.+ Yãmb na n sela viyn tɩɩse, la y pa na n sɩng b biisã rɩɩb ye.+ 31 B na n kooda y lolsã y nifẽ, la y kõn wãb b nemd ye. B na n wẽneg n zuu y bõensã y taoore, la y kõn le paam-b ye. B na n dɩka y piisã n kõ y bɛɛbã, la y pa na n paam fãagd ye. 32 B na n dɩka y kom-dibli wã la y kom-pugli wã n kõ buud a to+ y nifẽ. Wakat fãa, yãmb na n dat n le yã-b lame, la y pa na n tõog n maan baa fʋɩ. 33 Buud yãmb sẽn pa mi n na n dɩ yãmb tẽngã tɩɩsã biis la y sẽn ko n paamã fãa.+ B na n zãmbda yãmb la b namsd-y wakat fãa. 34 Bũmb nins yãmb ninã sẽn na n yã wã na n kɩtame tɩ y gãeeme.

35 “A Zeova na n kɩtame tɩ nod-tãoods sẽn zabd wʋsg la sẽn pa tõe n maag yi y rũmẽ wã la y karsẽ wã, sẽn sɩng y nao-sɩlpamã n tãag y zug tẽn-sʋka. 36 A Zeova na n diga yãmb ne rĩm ning y sẽn na n yãk t’a soog-yã, tɩ y kẽng soolem yãmb ne y yaab-rãmbã sẽn pa mi pʋgẽ.+ Yãmb na n waooga wẽnnaam-dãmb a taab be, wẽnnaam-dãmb b sẽn maan ne raad la kuga.+ 37 Bũmb ning sẽn paam yãmbã na n kɩtame tɩ buud nins fãa pʋgẽ a Zeova sẽn dig yãmb tɩ y kẽngã neb kisg yãmba, n yaal-y* la b paoog-yã.+

38 “Yãmb na n bʋda kood wʋsgo, la y na n tigsa bilf bala,+ sʋyã sẽn na n dɩ-b zãngã yĩnga. 39 Yãmb na n sela viyn tɩɩs la y ko, la y pa na n paam divẽ n yũ, bɩ n tigs bũmb ye.+ Bala zũnzũy wã na n dɩ-b lame. 40 Oliiv tɩɩs na n zĩnda yãmb soolmã zĩig fãa, la y pa na n paam kaam n zɛ ye. Bala y oliiv biisã na n sʋʋgame. 41 Yãmb na n doga kom-dibli la kom-pugli, la b pa na n kell n yɩ yãmb dẽnd ye. Bala b na n yõg-b lame n kẽng yembdo.+ 42 Sʋy* wʋsg n na n wa sãam yãmb tɩɩsã, la y tẽngã bõn-koaadlã biisi. 43 Sãan sẽn be yãmb sʋkã na n paamda pãnga, tɩ y pãngã boogdẽ. 44 A na n penga yãmba, la yãmb pa na n peng-a bũmb ye.+ A na n bee taoore, tɩ yãmb be poorẽ.*+

45 “Kãab-wẽn-kãensã fãa+ na n waa yãmb zut hal tɩ wʋm-yã, n tãag y sẽn na n sãam zãnga,+ bala yãmb pa kelg y Wẽnnaam a Zeova koɛɛgã, n tũ a noyã la a tõodã a sẽn taas yãmbã ye.+ 46 Kãab-wẽnsã na n kell n paa yãmb ne y kambã la y yagensã zugu, tɩ yɩ bãnde, la keoogr wakat fãa,+ 47 bala y pa waoog y Wẽnnaam a Zeova ne kɩdeng la sũ-noogo, yãmb sẽn wa n tar bũmb fãa wʋsgã sasa ye.+ 48 A Zeova na n kɩtame tɩ y bɛɛbã wa zab ne yãmba, la yãmb na n tʋmd n kõt-b lame+ tɩ kom+ la ko-yũud yaool n tar-yã, tɩ y pa tar fu-tɩrse, la tɩ bũmb fãa paoog-yã. A na n balga yãmb yublã ne kutu, n tãag a sẽn na n sãam-y zãnga.

49 “A Zeova na n kɩtame tɩ buud sẽn zãr ne yãmb wa zab ne-yã,+ sẽn sɩng ne tẽngã kɩreng a ye n tɩ tãag kɩreng a to. Bãmb na n waa ne tʋʋlem n zab ne yãmb wa sɩlg+ sẽn dɩkd bũmbu. Yaa buud yãmb sẽn pa na n wʋm b buudã gomde,+ 50 buud neb sẽn yaa wẽnem dãmba, n pa na n zoe nin-kẽem nimbãanega, wall b maan biig lohorem ye.+ 51 Bãmb na n wãba y rũmsã kamba, la b rɩ y bõn-koaadlã biis hal n wa sãam yãmb zãnga. B pa na n bas kood baa a yembre, divẽ-paalg wall kaam, nag-bil wall pesg yãmb yĩnga, n tãag b sẽn na n sãam yãmb zãnga.+ 52 Bãmb na n gũbga yãmba, n pag yãmb y tẽnsã fãa pʋsẽ,* yãmb soolmã tõr pʋgẽ hal tɩ y lalsã sẽn yaa bɛd la zãntsã y sẽn teegã siigi. B na n sɩd gũbga yãmb y tẽnsã fãa pʋsẽ, soolem ning yãmb Wẽnnaam a Zeova sẽn na n kõ yãmbã tõr pʋgẽ.+ 53 Dẽ, yãmb na n wãba y mens kamba, y kom-dibli la y kom-pugli+ nins yãmb Wẽnnaam a Zeova sẽn kõ yãmbã, bɛɛbã sẽn gũbg yãmbã sẽn wa ne yel-beed ningã yĩnga, la b sẽn weoogd yãmb wʋsgã yĩnga.

54 “Baa yãmb sʋkã rao ning sẽn nong a meng la sẽn yaa nimbãan-zoɛt n yɩɩdã pa na n zoe a ba-biiga, a pʋg-nongre, wall a kamb nins sẽn ketã nimbãaneg ye. 55 A pa na n yãk a kamb nins a sẽn na n wãbã nemd n kõ-b ye. Bala a pa le tar baa fʋɩ, bɛɛbã sẽn gũbg yãmb tẽngã tɩ wa ne yel-beed ningã yĩnga, la b sẽn weoogd yãmb tẽnsã yĩnga.+ 56 Baa yãmb sʋkã pag ning sẽn nong a meng la sẽn yaa nimbãan-zoɛt n yɩɩdã, n pʋd n pa tagsd t’a na n tabga a naoor tẽng a sẽn nong a meng yĩngã+ pa na n zoe a sɩdã a sẽn nongã nimbãanega, wall a bi-ribl bɩ a bi-pugl nimbãaneg ye. 57 A pa na n zoe baa zãr ning sẽn yit a karsã sʋkã, la kamb nins a sẽn dogã me nimbãaneg ye. Bala a na n soos n wãb-b lame, bɛɛbã sẽn gũbg yãmb tẽngã tɩ wa ne yel-beed ningã yĩnga, la b sẽn weoogd yãmb tẽnsã yĩnga.

58 “Yãmb sã n pa sak n tũ Tõ-kãngã goamã fãa sẽn gʋls seb-kãngã pʋgẽ wã,+ la y pa zoe yʋʋr ning sẽn tar ziir tɩ nebã segd n zoe-a la b waoog-a wã,+ rat n yeel tɩ yãmb Wẽnnaam a Zeova yʋʋrã,+ 59 a Zeova na n kɩtame tɩ yel-beed wʋsg paam yãmb ne y kambã la y yagensã. Na n yɩɩ yel-be-kãsems sẽn kaoosde,+ ne bã-kɛgems sẽn tõt saabo. 60 A na n kɩtame tɩ bãas nins fãa yãmb sẽn da zoet Ezɩpt soolmẽ wã yõk-yã. La bã-kãens kõn tol n bas yãmb ye. 61 Sẽn paase, a Zeova na n pʋd n kɩtame tɩ bãas la tood nins fãa b sẽn pa gʋls Tõ-kãngã sebr pʋgẽ wã yõk-yã, hal n wa sãam-y zãnga. 62 Baa yãmb sõorã sẽn lebg wʋsg wa ãdsã sẽn be saasẽ wã,+ y sõorã na n wa lebga bilfu,+ y sẽn pa kelg y Wẽnnaam a Zeova koɛɛgã yĩnga.

63 “Yɩɩ ne sũ-noog la a Zeova kɩt tɩ bũmb fãa yaa sõma ne yãmba, la a kɩt tɩ y lebg wʋsgo. Woto me, yaa ne sũ-noog la a Zeova na n sãam yãmba, n menes-y zãnga. B na n yiisa yãmb soolem ning yãmb sẽn na n soogã pʋgẽ.

64 “A Zeova na n kɩtame tɩ y sãeeg n kẽ buudã fãa, sẽn sɩng ne tẽngã kɩreng a ye n tɩ tãag a to.+ Beenẽ, yãmb na n waooga wẽnnaam-dãmb b sẽn maan ne raad la kuga, wẽnnaam-dãmb yãmb ne y yaab-rãmbã sẽn pa mi.+ 65 Yãmb pa na n paam laafɩ bu-kãens sʋka,+ wall y paam vʋʋsg zĩig y naoor yĩng ye. A Zeova na n pʋd n kɩtame tɩ y sũyã pid ne yɩɩre,+ tɩ y ninã pãng booge, la tɩ y koms raoodo.+ 66 Yãmb vɩɩmã na n bee yell pʋgẽ, tɩ y zoet rabeem wĩndg la yʋngo, n pa mi y sã n na n põsame ye. 67 Yãmb sũyã sẽn na n pid ne rabeemã yĩnga, la bũmb nins yãmb ninã sẽn na n yã wã yĩnga, yibeoogo, yãmb na n yeelame yaa: ‘Sã n da yaa zaabr n são!’ La zaabre, yãmb na n yeelame yaa: ‘Sã n da yaa yibeoog n são!’ 68 A Zeova na n talla yãmb ne koom-koglg n kɩt tɩ y tũ sor ning m sẽn da yeel yãmb tɩ ‘y pa na n tol n le yã-a’ wã, n leb Ezɩpt soolmẽ wã. La beenẽ, yãmb na n koosda y mens ne y bɛɛbã, n dat n lebg yem-daad la yem-pogse, tɩ ned sẽn na n da yãmb kae ye.”