Tʋʋm sebre
25 Dẽ, a Fɛstus+ sẽn ta soolmẽ wã n deeg naamã rasem a tãab poore, a yii Sezaare n kẽng Zerizalɛm. 2 Maan-kʋʋdbã taoor dãmb ne Zʋɩf-rãmbã nin-kãsemsã togs-a lame tɩ bãmb tara yell ne a Polle.+ B sɩnga a Fɛstus bõosgo, 3 n yetẽ t’a sak b kosgã la a kɩt tɩ b tall a Poll n wa Zerizalɛm. La b ra magdame n na n solg n gũ a Poll n kʋ sorã zugu.+ 4 La a Fɛstus leokame n yeel t’a Poll segd n paa Sezaare, la tɩ pa na n kaoos la yẽ mengã lebg n leb be ye. 5 A paasame: “Woto wã, bɩ neb nins sẽn yaa taoor dãmb yãmb sʋkã tũ maam, tɩ sã n mikame t’a sɩd maana bũmb sẽn yaa wẽng bɩ b togs a taoore.”+
6 La a sẽn zĩnd bãmb sʋk rasem a nii bɩ piig bal poore, a lebg n leba Sezaare. Vẽkembeoogã, a zĩnda bʋʋdã kaoob geer zugu, n yeel tɩ b tall a Poll n wa. 7 A sẽn kẽ wã, Zʋɩf-rãmb nins sẽn yi Zerizalɛm n wa wã yikame n gũbg-a, n dõt-a bõn-wẽns wʋsgo. La b ra pa tõe n wilg tɩ b sẽn yetã yaa sɩd ye.+
8 La sẽn na yɩl n wilg t’a pa tar taale, a Poll yeelame: “Mam pa maan bũmb n kɩɩs Zʋɩf-rãmbã Tõogã, wall n paoog wẽnd-doogã, bɩ n kɩɩs a Sezaar ye.”+ 9 A Fɛstus sẽn da rat n noog Zʋɩf-rãmbã sũurã,+ a soka a Poll yaa: “Fo rat n kẽnga Zerizalɛm tɩ b tɩ kao fo bʋʋd yel-kãensã wɛɛngẽ mam taoor bɩ?” 10 La a Poll yeelame: “Mam yasa a Sezaar bʋ-kaoor geerã taoore, zĩig ning b sẽn segd n kao mam bʋʋdã. Mam pa maan Zʋɩf-rãmbã wẽng ye. Yãmb meng bãnga bõn-kãng vẽeneg masã. 11 Mam sã n sɩd yaa nin-wẽnga, la m sã n maana bũmb sẽn segd ne kũum,+ mam kõn zãgs tɩ b ra kʋ-m ye. La nin-kãensã sẽn dõd maam bũmb ninsã sã n pa tar tikri, ned baa a ye pa tar sor n na n ning maam bãmb nusẽ, a sẽn dat n noog b sũy yĩng bal ye. Mam kotame t’a Sezaar meng ges yel-kãngã yelle!”+ 12 Dẽ, a Fɛstus sẽn gom ne sagendbã sullã poore, a yeelame: “Fo sẽn dat t’a Sezaar kao fo bʋʋdã, yaa a Sezaar n na n kao fo bʋʋdã.”
13 Rasem a wãn loogr poore, rĩm a Agripa ne a Berenis waa Sezaare, n na n pʋʋs a Fɛstusi. 14 B sẽn kaoos rasem wʋsg be wã yĩnga, a Fɛstus goma a Poll yell ne rĩmã n yeele:
“Rao a ye la a Feligs bas bãensã roogẽ, 15 la mam sẽn wa n be Zerizalɛmmã, maan-kʋʋdbã taoor dãmb ne Zʋɩf-rãmbã kãsem-dãmb goma a yell ne maam,+ n kos tɩ b kao a bʋʋd n ning-a taale. 16 La mam leokame tɩ pa zems ne Rom nebã minung tɩ b ning ned baa a ye a rõatb nugẽ, b sũur na yɩ noog bal yĩng ye. B sẽn dõt a soabã segd n deng n yalsa a rõatbã taoore, tɩ b kõ-a sor t’a gom n wilg t’a pa tar taal yellã pʋgẽ ye.+ 17 Dẽ, b sẽn ta ka wã, m pa bas tɩ kaoos ye. La vẽkembeoogã, m zĩnda bʋ-kaoor geerã zugu, la m yeel tɩ b tɩ tall raoã n wa. 18 A rõatbã sẽn yikã, b pa rõd-a bõn-wẽns nins mam sẽn da tẽed t’a maaname wã baa a yembr ye.+ 19 B ra wẽeda no-koɛɛm bal ne-a b tũudmã yɛl wɛɛngẽ,+ la rao yʋʋr sẽn boond t’a Zeezi zugu. Ra-kãng kiime, la a Poll yetame t’a vɩɩme.+ 20 Mam sẽn da pa mi m sẽn maandg no-koeemdã wɛɛngẽ wã yĩnga, m sok-a-la a sã n na n sak n kẽnga Zerizalɛm tɩ b tɩ kao a bʋʋd yɛl-kãensã wɛɛngẽ.+ 21 La a Poll sẽn yeel t’a ratame tɩ b bas-a bãensã roogẽ n gũ Rom rĩm-kãsengã+ sẽn na n yãk yam ningã, m yeelame tɩ b kell n pag-a hal tɩ m wa kɩt tɩ b tall-a n kẽng a Sezaar nengẽ.”
22 Rẽ la a Agripa yeel a Fɛstus yaa: “Mam da nongẽ lame n kelg raoã m toore.”+ T’a Fɛstus yeele: “Beoogo, yãmb na n kelg-a lame.” 23 Dẽ, a Agripa ne a Berenis naga ne wilg-m-meng wʋsg n wa vẽkembeoogã, tɩ bãmb ne sodaas nanambs la tẽngã nin-kãsemsã kẽ bʋʋdã kaoob roogẽ. Rẽ poore, a Fɛstus yeela sodaasã tɩ b tɩ tall a Poll n wa bʋʋdã kaoob zĩigẽ. 24 A Fɛstus yeelame: “Rĩm a Agripa, n paas yãmb fãa sẽn be ka ne tõndã, ges-y ra-kãngã. Zʋɩf-rãmbã nin-buiidã fãa kosa maam Zerizalɛm ne ka me, n da zẽkd b koees n yetẽ t’a pa segd n le vɩɩmd yɛs ye.+ 25 La mam mikame t’a pa maan baa fʋɩ sẽn segd ne kũum ye.+ Rẽ n so tɩ yẽ mengã sẽn yeel t’a ratame tɩ Rom rĩm-kãsengã kao a bʋʋdã, mam yãka yam n na n kɩt tɩ b tall-a n kẽng a nengẽ. 26 La m pa tar bũmb takɩ n na n gʋls yẽ zug n tool m Zu-soabã ye. Woto wã, m tall-a lame n wa yãmb fãa taoore, sẽn yɩɩda, yãmb a rĩm a Agripa taoore, sẽn na yɩl tɩ y sã n sok-a sogsgã n sa, bɩ m tõog n paam n gʋls bũmbu. 27 Bala mam tagsdame tɩ pa zems tɩ m kɩt tɩ b tall ned b sẽn kẽes bãens roog n kẽng Romme, n yaool n pa wilg bũmb ning b sẽn dõt-a wã me ye.”