Tõod sebre
15 “Yʋʋm a yopoe fãa baasgẽ, y segd n basa y sam-dãmbã taale.+ 2 Ad y sẽn segd n maan dẽ to-to: Ned ning fãa sẽn peng a to bũmb na n basa taale. A pa segd n kɩt t’a to wã bɩ a saam-biigã yao bũmb ye. Bala b na n moona taal basg a Zeova yĩnga.+ 3 Yãmb tõe n kɩtame tɩ sãan yao yãmb y samde,+ la sẽn yaa bũmb ning fãa la y peng y saam-biiga, y segd n basa taale. 4 Yãmb sʋkã ned baa a ye pa segd n lebg naong soab ye. Bala a Zeova na n ninga yãmb bark+ soolem ning y Wẽnnaam a Zeova sẽn na n kõ-y tɩ y soog tɩ yɩ y pʋɩɩrã pʋgẽ. 5 La yaa yãmb sẽn na n sak y Wẽnnaam a Zeova koɛɛgã neere, la y tũ no-kãensã fãa mam sẽn taasd yãmb rũndã wã.+ 6 Bala yãmb Wẽnnaam a Zeova na n ning-y-la bark wa a sẽn pʋlem yãmbã. Buud wʋsg na n wa penga yãmba,* la pa na n yɩ tɩlɛ tɩ y peng bũmb ye.+ Y na n sooga buud wʋsgo, la b pa na n soog-y ye.+
7 “Soolem ning yãmb Wẽnnaam a Zeova sẽn na n kõ yãmbã tẽng a yembr pʋgẽ, y saam-biig sã n lebg naong soaba, bɩ y ra riglim y sũyã, wall y pa tẽeg y nug n sõng-a ye.+ 8 Yãmb segd n tẽega y nug n sõng y saam-biigã,+ n peng-a bũmb ning fãa a sẽn datã, bɩ sẽn paoog-a wã. 9 Gũus-y n da bas-y tɩ tags-wẽns kẽ y sũyã tɩ y yeele: ‘Yʋʋm a yopoe-n-soabã sẽn yaa bas-taal yʋʋmdã kolgame,’+ tɩ rẽ kɩt tɩ y pa maan y saam-biig sẽn yaa naong soab neere, la y pa kõ-a bũmb ye. A sã n bool a Zeova y sẽn pa sõng-a wã yĩnga, y na n paama yel-wẽnd taale.+ 10 Y segd n kõ-a-la ne yamleoogo.+ Y pa segd n kõ-a ne nen-gãneng ye. Yaa rẽ yĩng la yãmb Wẽnnaam a Zeova na n ning y tʋʋmã, la y sẽn maandã fãa barka.+ 11 Naong rãmb na n zĩnda soolmã pʋgẽ wakat fãa.+ Rẽ n so tɩ mam yet yãmb yaa: ‘Y segd n tẽega y nug n sõng y saam-biig sẽn namsde, la sẽn yaa naong soab y soolmã pʋgẽ wã ne yamleoogo.’+
12 “B sã n koos f saam-biig sẽn yaa Ebre ne foo, yaa pag tɩ yaa raoa, t’a tʋm yʋʋm a yoob n kõ foo, yʋʋm a yopoe-n-soabã fo segd n bas-a lame t’a looge.+ 13 La fo sã n na n bas-a t’a looge, bɩ f ra kɩt t’a loog nug-zaal ye. 14 Fo segd n yãka f rũm-bõonegã, f koodã, f kaamã ne f divẽ wã n kõ-a. Fo segd n kõ-a lame tɩ zems ne yãmb Wẽnnaam a Zeova sẽn ning foo bark to-to wã. 15 Tẽeg tɩ yãmb me ra yaa yembs Ezɩpt soolmẽ wã, la tɩ y Wẽnnaam a Zeova fãaga yãmba. Yaa rẽ yĩng la mam sẽn yet yãmb rũndã tɩ y maan woto wã.
16 “La a sã n yeel yaa: ‘Mam pa na n loog n bas foo,’ a sẽn nong foo ne f zakã rãmb yĩnga, la a sũur sẽn noom a sẽn be ne foomã yĩnga,+ 17 fo segd n dɩka pĩim n dɩdg a tʋbrã ne kʋɩlengã n vʋdge. La a na n lebga fo yamb a yõor tɛka. Fo segd n maana woto me ne f yem-poaka. 18 Fo sã n na n kõ-a lohorem t’a loog n bas-fo, bɩ f ra ges tɩ rẽ yaa toog ye. Bala a sẽn tʋm n kõ foo yʋʋm a yoob pʋgẽ wã yɩɩda ned b sẽn dɩk tʋʋm sẽn segd n tʋmã naoor a yiibu. Sẽn paase, fo Wẽnnaam a Zeova ninga foo bark bũmb ning fãa f sẽn maanã yĩnga.
19 “Y segd n welga y rũm-bõonegã ne y rũm-bɛdã kom-dẽems nins fãa sẽn yaa raadã n kõ y Wẽnnaam a Zeova.+ Y pa segd n tall y rũm-bɛdã* kom-dẽemsã n tʋme, wall y wõrs y rũm-bõonegã kom-dẽemsã kõbd ye. 20 Yãmb ne y zakã rãmb segd n wãba rẽ y Wẽnnaam a Zeova taoor yʋʋmd fãa, zĩig ning a Zeova sẽn na n yãkã.+ 21 La rũngã sã n tar zanga, wala makre, a sã n yaa woabga, zoanga, bɩ n tar zang a to, yãmb pa segd n dɩk-a n maan maoong n kõ yãmb Wẽnnaam a Zeova ye.+ 22 Yãmb segd n wãb-a-la y tẽnsẽ wã,* neb nins sẽn yaa rẽgdã ne sẽn yaa-b yɩlmã fãa, wa y sẽn wãbd yãk bɩ walg to-to wã.+ 23 La yãmb pa segd n dɩ a zɩɩmã ye.+ Y segd n daag-a-la tẽng wa koom.+