Ooze sebre
14 “Yãmb a Israyɛll neba, lebg-y n wa-y y Wẽnnaam a Zeova nengẽ,+
bala yaa yãmb kongrã n kɩt tɩ y lak n lʋɩ.
2 Lebg-y n wa-y a Zeova nengẽ n yeel-a yaa:
‘Kõ-y tõnd sugr d kongrã yĩnga,+ la y reeg d bõn-sõma wã.
Dẽ, tõnd no-bɩmsã na n pẽga yãmba,+ tɩ yɩ wa d sẽn kõt lol-poala.*
3 Asiiri pa na n fãag tõnd ye.+
Tõnd pa na n zomb wed-moos ye.+
Tõnd pa na n le bool d nusã tʋʋm me tɩ “d Wẽnnaam” ye.
Bala yaa yãmb maasem yĩng la kɩɩbs* paamd tɩ b zoet b nimbãanega.’+
4 Mam na n sãoog-b lame tɩ b ra le yɩ neb sẽn pa maand sɩd ye.+
5 Mam na n lebga wa meenem Israyɛll yĩnga.
A na n ninga puud wa rulg-lelemde,
la a tão a yẽgã wa Libã tɩɩsã.
6 A wil-poalã na n yɛdgame,
t’a neermã yɩ wa oliiv tɩɩga,
t’a yũugã me yɩ wa Libã yũugã.
7 Mam nebã na n le zĩnda mam maasmẽ wã.
B na n woma biis la b tob wa viyn tɩɩga.+
Mam yʋʋrã na n yii wa Libã divẽ wã yʋʋr sẽn yi wã.
8 Efrayim na n yeelame yaa: ‘Mam na n le maana bõe ne bõn-naandse?’+
La mam na n leok-a lame, la m ges a yelle.+
Mam na n lebga wa zenevirie tɩɩg sẽn tar pãnga.
Maam n na n kɩt t’a wom biisi.”
9 Ãnda n tar yam? Bɩ a wʋm bõn-kãensã võore.
Ãnda n tar bãngre? Bɩ a bãng bõn-kãensã.