Zeremi sebre
13 Ad bũmb ning a Zeova sẽn yeel maam: “Kẽng n tɩ ra lẽ gĩs sẽbdg n sẽb f sɛɛgã, la f ra los-a koomẽ ye.” 2 Dẽ, mam daa sẽbdgã wa a Zeova sẽn yeelã, n sẽb m sɛɛgã. 3 A Zeova goma ne maam naoor a yiib-n-soab n yeele: 4 “Rɩk sẽbdgã fo sẽn da n sẽb f sɛɛgã, n yik n kẽng Efrat kʋɩlgẽ wã, n tɩ solg-a pĩigã bokẽ.” 5 Dẽ, mam kẽng n tɩ solg-a-la Efrat kʋɩlgã noor wa a Zeova sẽn yeel maamã.
6 Rasem wʋsg loogr poore, a Zeova yeela maam yaa: “Yik n kẽng Efrat kʋɩlgẽ wã, n tɩ rɩk sẽbdgã mam sẽn yeel foo tɩ f tɩ solg be wã.” 7 Dẽ, mam kẽnga Efrat kʋɩlgẽ wã n tɩ buk sẽbdgã, n yiis-a zĩig ning mam sẽn da solg-a wã. M mikame tɩ sẽbdgã sãamame. A ra pa le tar yõod baa bilf ye.
8 Rẽ la a Zeova yeel maam yaa: 9 “Ad a Zeova sẽn yeele: ‘Yaa woto la m na n sãam Zida wuk-m-mengã, la Zerizalɛm wuk-m-mengã sẽn yaa wʋsgã.+ 10 Nin-wẽn-kãensã sẽn zãgsd tɩ b kõn sak mam goamã,+ sẽn diglim b sũy n tũud b sũyã,+ la sẽn tũud wẽnnaam-dãmb a taaba, n waoogd-b la b wõgemded b taoorã na n lebga wa sẽbdgã sẽn pa le tar yõod baa bilfã.’ 11 A Zeova yeelame: ‘Bala mam dɩka Israyɛll buudã tõr ne Zida buudã tõr n sẽbg m menga, wa sẽbdg sẽn sẽbd ninsaal sɛɛg to-to wã, sẽn na yɩl tɩ b yɩ buudu,+ yʋʋre,+ waoogre, la bũmb sẽn yaa neer mam yĩnga. La b pa sak maam ye.’+
12 “Fo segd n taas-b-la koe-kãngã me: ‘Ad Israyɛll Wẽnnaam a Zeova sẽn yeele: “Yʋ-bedr fãa segd n pida ne divẽ.”’ La b na n leoka foo yaa: ‘Tõnd zoe n miime tɩ yʋ-bedr fãa segd n pida ne divẽ.’ 13 Dẽ, yeel-b yaa: ‘Ad a Zeova sẽn yeele: “Mam na n kɩtame tɩ soolmã neb fãa tɩg rãam.+ Yaa rĩm-dãmbã sẽn zĩ a Davɩɩd geerã zugã, maan-kʋʋdbã, no-rɛɛsdbã, la Zerizalɛm nebã fãa. 14 M na n dɩgs-b lame n pãb taab tɩ b bedse. M na n maana woto ne ba-rãmbã la kambã me.” Yaa a Zeova n yeele.+ “M pa na n zoe b nimbãanega, wall m sãam m sũur b yĩnga, bɩ n kʋm-b ye. Baa fʋɩ pa na n kɩt tɩ m bas n pa sãam-b ye.”’+
15 Kɩll-y y tʋb n kelg neere.
Ra yɩ-y tɩtaam dãmb ye. Bala a Zeova gomame.
16 Kõ-y yãmb Wẽnnaam a Zeova ziiri,
nand t’a kɩt tɩ lik wa,
la nand tɩ y naoã lags tãensã zut zĩ-sobdo.
17 Yãmb sã n zãgs tɩ y kõn kelge,
mam* na n solgame n yãb yãmb wuk-m-mengã yĩnga.
Mam na n daaga nintãm wʋsgo. Nintãm na n yita m ninẽ wã n sodgdẽ.+
Bala b talla a Zeova piisã+ n loog yembdo.
18 Yeel rĩmã ne rĩmã ma wã yaa:+ ‘Zĩnd-y paoogr zĩigẽ,
bala yãmb maanf-rãmbã sẽn yaa neebã na n yii y zutẽ wã n lʋɩ.’
19 Goabg tẽnsã pagame,* tɩ ned kae n pakd-b ye.
B talla Zida nebã fãa n kẽng yembdo. B fãa zãnga.+
20 Zẽk f neng n ges neb nins sẽn yi rɩtg n watẽ wã.+
Rũms nins b sẽn da kõ foomã, rat n yeel tɩ fo piisã sẽn yaa neebã bee yɛ?+
21 Sã n yaa neb nins fo sẽn sɩng n get wa f zo-rãmb hakɩɩkã n sɩbgd foo,+
fo na n yeelame tɩ bõe?
Rogem toog pa na n yõk foo, wa pag sẽn wat n dogdẽ toog sɩda?+
22 Fo sã n wa tags f sũurẽ yaa: ‘Bõe yĩng tɩ bõn-kãensã wa mam zugu?’+
Yaa fo kong-kãsengã yĩng la b sẽn tak fo fuugã tẽngr n pãrge,+
tɩ fo nao-kãsenkãyã me paam toog wʋsgã.
23 Kuus tẽngã ned* tõe n toeema a yĩngã kõbg bɩ, bɩ ãbg tõe n toeema a gãongã sẽn tẽgsã?+
Sã n tõe, rẽnd yãmb a neb nins b sẽn zãms wẽng maanegã me
tõe n maana sẽn yaa sõma.
24 Rẽ n so tɩ m na n sãeeg-b wa we-rasempʋɩɩgã sobg sẽn sãeeg moodo.+
25 Yaa bõn-kãngã n na n paam foo. Rẽ n yaa pʋɩɩr ning mam sẽn kõ foomã.” Yaa a Zeova n yeele.
26 Woto yĩnga, mam na n zẽka fo fuugã n pil f nengã,
tɩ b yã f yãndã,+
27 f yoobã,+ la fo sẽn yãbd wa wed-moaag sẽn dat n dʋ wã,
rat n yeel tɩ fo sẽn koosd f meng n tʋmd tʋʋm-dẽgdã.*
Mam yãa fo manesem-yoogã+
kunkubã zut la weoogẽ wã.
Foom a Zerizalɛm, toog bee fo zugu!
Fo na n kell n yɩɩ rẽgd n ta dabʋre?”+