A Davɩɩd yɩɩlle.
103 Bɩ m pẽg a Zeova.
Bɩ bũmb nins fãa sẽn be mam pʋgẽ wã pẽg a yʋʋrã sẽn yaa sõngã.
2 Bɩ m pẽg a Zeova.
Bɩ m ra tol n yĩm bũmb nins fãa a sẽn maanã ye.+
3 A kõta foom sugr f kongrã fãa yĩnga,+
la a sãoogd fo bãasã fãa.+
4 A fãagda fo vɩɩmã bokã pʋgẽ,+
la a fõgend foom a maan-neerã la a nimbãan-zoeerã wa maanfo.+
5 Fo vɩɩmã tõre, a kõt-f-la bõn-sõma tɩ sekd-fo,+
sẽn na yɩl tɩ f kell n yɩ bi-bɩɩg n tar keelem wa sɩlga.+
6 A Zeova tʋmda ne tɩrlem+ la ne zemsgo,
neb nins fãa b sẽn weoogdã yĩnga.+
7 A kɩtame t’a Moyiiz bãng a soayã,+
la a kɩt t’a Israyɛll yagensã bãng a tʋʋmã.+
8 A Zeova yaa nimbãan-zoɛt la sõmblem soaba.+
A sũur pa yikd tao-tao ye. A pida ne maan-neere.+
9 A pa ningd ned taal wakat fãa ye.+
A sũur pa yikd wakat fãa yĩng n pa sigd ye.+
10 A pa maand tõnd wa sẽn zems tõnd yel-wẽnã,+
wall a lebsd tõnd wa sẽn zems d kongrã ye.+
11 Bala a maan-neerã sẽn zoet-b yẽ wã yĩngã yaa kãsenga,+
wa saasã sẽn zãnt ne tẽngã to-to wã.
12 A zãagda tõnd ne d beegrã,+
wa yaang sẽn zãr ne nin-taoor to-to wã.
13 A Zeova zoeta neb nins sẽn zoet yẽ wã nimbãanega,+
wa ba sẽn zoet a kamb nimbãaneg to-to wã.
14 Bala a mii a sẽn naan tõnd ne bũmb ningã sõma.+
A tẽrame tɩ tõnd yaa tom.+
15 Sã n yaa ne ninsaal sẽn yaa kiidã, a vɩɩmã yaa koɛɛg wa mood vɩɩm.+
A yaa wa puug sẽn be pʋʋg pʋgẽ.+
16 Sobg sã n fugi, a menemdame,
tɩ yaa wa a zɩ n zĩnd a zĩigẽ wã ye.
17 La a Zeova maan-neerã yaa wakat fãa yĩnga,
neb nins sẽn zoet yẽ wã yĩnga.+
A tɩrlmã tata nin-kãens kambã kamba,+
18 la a tat neb nins sẽn tũud a kaoolã,+
ne neb nins sẽn sakd a noyã sõma wã.
19 A Zeova lugla a naamã geer kãn-kãe saasẽ.+
A rɩta naam bũmb fãa zugu.+
20 Pẽg-y-yã a Zeova, yãmb a malɛgsã+ fãa sẽn tar pãng wʋsgã,
sẽn pidsd a gomdã+ la sẽn sakd a koɛɛgã.
21 Pẽg-y-yã a Zeova, yãmb a tãb-biisã fãa+
sẽn yaa yẽ tʋm-tʋmdb sẽn maand a raabã.+
22 Yãmb a bõn-naandsã fãa, pẽg-y-yã a Zeova
zĩis nins fãa a sẽn dɩt naamã.
Bɩ mam mengã tõr pẽg a Zeova.