Kibayã pipi sebre

28 Dẽ, a Davɩɩd tigma Israyɛll nanambsã fãa Zerizalɛm: Yaa buud toɛy-toɛyã nanambse, sul toɛy-toɛyã sẽn da tʋmd rĩmã tʋʋmã nanambse,+ tãb-biis tusr-tusr nanambs ne tãb-biis koabg-koabg nanambse,+ nanambs nins sẽn da get rĩmã paoongã fãa ne rũmsã+ la a kom-dibli+ wã yelle, n paas na-yirã tʋm-tʋmdbã, ne gãndaoog la nin-daoog fãa.+ 2 Rẽ poore, Rĩm a Davɩɩd yik n yalsa yĩngr n yeele:

“M ba-biis la m nin-buiidu, kelg-y-yã. Mam da rata ne m sũur fãa n me roog tɩ yɩ a Zeova kaoolã koglgã vʋʋsg zĩiga, la tõnd Wẽnnaamã nao-roagendga.+ Mam segla bũmb toor-toor meebã yĩnga.+ 3 La Wẽnnaam yeela maam yaa: ‘Pa foo n na n me roog mam yʋʋrã yĩng ye.+ Bala fo yaa ned sẽn zab zaba, la fo raaga zɩɩm.’+ 4 La Israyɛll Wẽnnaam a Zeova yãka maam m ba wã roogã neb fãa sʋka, tɩ m na n yɩ Israyɛll rĩm wakat fãa.+ Bala a yãka Zida t’a na n yɩ taoor soaba,+ la Zida buudã neb sʋka, a yãka mam ba wã roogo,+ la mam bã wã kom-dibli sʋka, yaa maam la a yãk n kɩt tɩ m lebg Israyɛll fãa rĩma.+ 5 La mam kom-dibli wã fãa sʋka, (bala a Zeova kõo maam kom-dibli wʋsgo,)+ a yãka m bi-ribl a Salomo+ t’a na n zĩnd a Zeova naam geerã zug n soog Israyɛlle.+

6 “A yeela maam yaa: ‘Yaa fo biig a Salomo n na n me mam doogã la m samanã, bala mam yãka yẽ t’a yɩ m biiga, la mam na n lebga yẽ ba.+ 7 A sã n kell n tũ mam noyã la m bʋ-kaoor toor-toorã ne a sũur fãa+ wa a sẽn maandã, mam na n vigla a naamã kãn-kãe wakat fãa yĩnga.’+ 8 Woto yĩnga, mam yeta Israyɛll nebã fãa taoore, a Zeova nin-buiidã taoor la tõnd Wẽnnaamã taoor yaa: Maag-y y yĩng n bao n bãng yãmb Wẽnnaam a Zeova noyã fãa la y tũ-a, tɩ y soog tẽn-noogã,+ la tɩ y yagensã me wa soog-a tɩ yɩ b pʋɩɩr wakat fãa yĩng yãmb loogr poore.

9 “La foom, m biig a Salomo, bao n bãng fo ba wã Wẽnnaamã la f tũ-a ne f sũur fãa,+ la ne yam-sõngo. Bala a Zeova feesda sũyã fãa+ la a mii ned kam fãa tagsgo.+ Fo sã n bao-a, a na n basame tɩ fo yã-a.+ La fo sã n bas-a, yẽ me na n daaga foo n bas wakat fãa yĩnga.+ 10 Gese! Masã, a Zeova yãka foom tɩ f na n me roog sẽn yaa wẽnd-doogo. Bɩ f tall raoodo, la f kẽng n tʋme.”

11 Dẽ, a Davɩɩd kõo a biig a Salomo zãongã*+ ne a rotã mamsgo,+ teedã bĩngr zĩis ne yĩngr dotã la sugr kũun roogã* mamsgo.+ 12 A kõ-a-la bũmb nins fãa b sẽn segd n maanã mamsg Wẽnnaam sẽn vẽneg-a t’a gʋlã: Yaa a Zeova roogã samanã+ ne rɩɩbã rot sẽn gũbg-a wã fãa, la Wẽnnaam doogã laog bĩngr zĩis ne bũmb nins fãa b sẽn welg toorã* bĩngr zĩisi.+ 13 A kõo a Salomo noy maan-kʋʋdbã sulã,+ la Levi buudã nebã sulã me wɛɛngẽ, n paas a Zeova roogã tʋʋmã fãa la a Zeova roogã tʋʋm-teed fãa wɛɛngẽ. 14 A leb n wilg-a-la sãnemã zɩslem, tʋʋm toor-toorã teed sãnem zɩslem, wanzuri wã teed fãa zɩslem, rat n yeel tɩ tʋʋm toor-toorã teed wanzuri zɩslem, 15 n paas sãnem fɩtl-dogendsã ne b sãnem fɩtl-dãmbã zɩslem, fɩtl-dogends+ toor-toorã ne b fɩtl-dãmbã zɩslem, wanzuri fɩtl-dogendsã zɩslem, la fɩtl-doagendg fãa ne a fɩtl zɩslem wa sẽn zems ne a tʋʋmde. 16 A Davɩɩd leb n wilga a Salomo sãnemã b sẽn na n tall n maan taabl nins zut b sẽn na n dogl bur b sẽn dogend taab zugã*+ zɩslem, taabl fãa ne a sãnem, la wanzuri wã b sẽn na n tall n maan wanzuri taabl-dãmbã zɩslem, 17 n paas yaagdsã, laasã, la yubli wã b sẽn na n maan ne sãnem halaalã zɩslem, ne sãnem la-bil fãa ne a zɩslem,+ la wanzuri la-bil fãa ne a zɩslem. 18 A leb n wilg-a-la sãnemã b sẽn yɩlgã b sẽn na n tall n maan wisd yõogr tẽn-kugrã+ zɩslem, la b sẽn na n tall n maan saarã*+ mamsgã, rat n yeel tɩ sãnem seribẽ-rãmbã+ sẽn tẽeg b pɩgsã n lud a Zeova kaoolã koglgã. 19 A Davɩɩd yeelame yaa: “A Zeova kõo maam tõogo, la a wek m yam tɩ m gʋl+ meebã mamsg+ toor-toorã ball-balle.”

20 Rẽ poore, a Davɩɩd yeela a biig a Salomo yaa: “Keng f sũur la f tall raood n kẽng n tʋme. Ra zoe rabeem wall f yɛɛs ye. Bala Wẽnnaam a Zeova, mam Wẽnnaamã bee ne foo.+ A pa na n zãag ne foo wall a raag-f n bas ye.+ Yẽ na n zĩnda ne foo hal tɩ f tʋm a Zeova roogã tʋʋm fãa n sa. 21 Ad maan-kʋʋdbã+ ne Levi buudã+ neb sulã sẽn na n tʋm Wẽnnaam doogã tʋʋmã fãa wã. Fo tara tʋm-tʋmdb sẽn kõ b mens ne yamleoogo, la sẽn tar minim n na n tʋm tʋʋmd buud fãa,+ n paas nanambse,+ la nin-buiidã fãa sẽn na n maan bũmb ning fãa fo sẽn na n yeel-ba.”