Zã sebr a yiib-n-soaba
1 Maam a nin-kẽemã* n gʋls seb-kãngã n tool pag ning Wẽnnaam sẽn yãkã ne a kambã mam sẽn sɩd nongã. La pa maam bal n nong-b ye. Neb nins fãa sẽn bãng sɩdã nong-b lame, 2 sɩdã sẽn be tõnd pʋsẽ, n na n kell n pa ne tõnd wakat fãa wã yĩnga. 3 Bark* ne nimbãan-zoeer la laafɩ sẽn yit Wẽnnaam sẽn yaa Ba wã nengẽ, la a Zeezi Kirist sẽn yaa Ba wã Bi-riblã nengẽ na n zĩnda ne tõndo, n paas sɩd la nonglem.
4 Mam kɩdemda sũ-noog wʋsgo, bala mam mikame tɩ fo kambã kẽer kẽnda sɩdã pʋgẽ,+ wa sẽn zems noor ning d sẽn deeg Ba wã nengẽ wã. 5 La paga, mam kota foo tɩ d nong taaba. (Mam pa gʋlsd foom tõ-paalg ye. Mam gʋlsda foom tõog ning d sẽn paam hal sɩngrẽ wã.)+ 6 La ad nonglmã sẽn dat n yɛɛlga: Yaa tɩ tõnd kell n kẽn wa sẽn zems a noyã.+ A noorã yaa tɩ yãmb segd n kell n kẽna nonglmã pʋgẽ, wa y sẽn wʋm hal sɩngrẽ wã. 7 Bala bɛlgdb wʋsg n kẽ dũniyã pʋgẽ:+ Yaa neb nins sẽn pa sakd n deeg t’a Zeezi Kirist waa tẽngã zug n yɩ ninsaalã.+ Bãmb n yaa bɛlgdã, la Kiristã kɩɩsdã.+
8 Gũus-y y mense, n da wa bõn tʋʋmd ning tõnd sẽn tʋm yãmb sʋkã biis ye. La bɩ y modg n paam keoor tɩ pidi.+ 9 Ned ning fãa sẽn pa tũud Kiristã zãmsgã, la a zãmsd a taabã zãmsg a to pa tat Wẽnnaam yam ye.+ Ned ning sẽn sɩd paad zãms-kãng pʋgẽ, yaa yẽ soab n tat Ba wã ne Bi-riblã yam.+ 10 Ned sã n wa yãmb nengẽ n pa tar zãms-kãnga, bɩ y ra reeg-a y zagsẽ+ wall y pʋʋs-a ye. 11 Bala ned ning sẽn pʋʋsd-a naagd-a-la a tʋʋm-wẽnsã pʋsẽ.
12 Baa mam sẽn tar bũmb wʋsg n na n gʋls yãmbã, mam pa rat n maan dẽ ne seb-vãoog la ne gʋls-koom ye. La mam saagdame tɩ m na n waa yãmb nengẽ n gom ne yãmb neng ne nenga, sẽn na yɩl tɩ y sũ-noogã pidi.
13 Fo saam-bi-poak ning Wẽnnaam sẽn yãkã kambã toonda foo b pʋʋsem.