Yɩɩn-sõamyã sebre
א [Aleph]
3 B pa maand sẽn pa tɩrg ye.
B kẽnda Wẽnnaam soayã zutu.+
4 Yãmb kõo noore,
n yeel tɩ b segd n tũu yãmb noyã sõma.+
6 Dẽ, mam sã n wa tagsd yãmb noyã fãa yelle,
yãnd pa na n yõk-m ye.+
7 Mam sã n wa zãmsd yãmb bʋ-kaoor toor-toorã sẽn yaa tɩrsã,
mam na n pẽga yãmb ne sũur sẽn yaa tɩrga.
8 Mam na n tũu yãmb noyã.
Bɩ y ra tol n daag-m n bas zãng ye.
ב [Beth]
9 Bi-bɩɩg na n maana wãn t’a sor kell n yɩ yɩlemde?
Yaa a sẽn na n gũus a menga, la a kẽn wa sẽn zems yãmb gomdã.+
10 Mam baooda yãmb ne m sũur fãa.
Ra bas-y maam tɩ m bʋdg n bas yãmb noyã ye.+
12 Zeova, bɩ y paam pẽgre.
Zãms-y maam yãmb noyã.
13 Ne mam no-bɩmsã, mam moonda
tõodã fãa yãmb sẽn togsã.
16 Mam sũur nooma wʋsg ne yãmb noyã.
Mam pa na n yĩm yãmb gomdã ye.+
ג [Gimel]
17 Maan-y y tʋm-tʋmdã neere,
sẽn na yɩl tɩ m vɩɩmde, la m tũ y gomdã.+
18 Puk-y m ninã, tɩ m tõog n yã
bõn-sõma wã sẽn be yãmb tõogã pʋgẽ wã vẽenega.
19 Soolmã pʋgẽ, mam yaa sãan bala.+
Ra solg-y maam y noyã ye.
20 Yãmb tõodã ratem
dɩta maam* wa bugum wakat fãa.
21 Yãmb tãsda tɩtaam dãmbã,
rat n yeel tɩ kãab-wẽns rãmbã sẽn bʋdg n bas yãmb noyã.+
22 Zãag-y maam ne yaalg la paoogre,
bala mam tũu yãmb saglsã.
23 Baa nanambs sã n wa tigim taab n zĩ n gomd mam yell wẽnga,
yãmb tʋm-tʋmdã bʋgsda yãmb noyã zutu.*
ד [Daleth]
Kogl-y mam vɩɩmã wa sẽn zems y gomdã.+
26 Mam togsa yãmb m tʋʋm-tʋmdɩ wã, tɩ yãmb leok maam.
Zãms-y maam yãmb noyã.+
28 Sũ-sãangã kɩtame tɩ m* da pa tõe n gũs ye.
Keng-y mam daood wa sẽn zems yãmb gomdã.
29 Zãag-y maam ne zãmb sore,+
la y maan-m lohorem, n kɩt tɩ m bãng y tõogã.
30 Mam yãka kɩs-sɩdã sore.+
Mam sak n deegame tɩ yãmb bʋ-kaoor toor-toorã yaa tɩrse.
31 Mam gãda yãmb saglsã sõma.+
Zeova, ra bas-y tɩ yãnd yõk-m ye.*+
ה [He]
34 Kõ-y maam yam-vẽenem
sẽn na yɩl tɩ m sak yãmb tõogã,
la m tũ-a ne m sũur fãa.
36 Kɩt-y tɩ mam sũurã nong yãmb saglsã,
la a ra nong sẽn nafd maam bal ye.+
39 Zãag-y maam ne paoogr ning mam sẽn zoetã,
bala yãmb bʋ-kaoor toor-toorã yaa sõma.+
40 Ges-y mam sẽn tʋll n sak yãmb noyã to-to wã.
Kogl-y mam vɩɩmã yãmb tɩrlmã pʋgẽ.
ו [Waw]
41 Zeova, bɩ y kɩt tɩ m paam y maan-neerã,+
la m paam tɩ y fãag-m wa y sẽn pʋlmã.*+
42 Dẽ, mam na n leoka sẽn tʋʋd-a maamã,
bala mam kɩsa sɩd ne yãmb gomdã.
43 Ra yiis-y sɩdã goam zãng m noorẽ wã,
bala mam teega* yãmb bʋ-kaoorã.
44 Mam na n saka yãmb tõogã wakat fãa,
wakat sẽn kõn sa yĩnga.+
47 Mam sũur nooma wʋsg ne yãmb noyã.
Hakɩɩka, mam nong-b lame.+
ז [Zayin]
50 Yaa rẽ n belsd maam m toogã pʋgẽ,+
bala yãmb goamã kogenda mam vɩɩmã.
53 Mam sũurã puuda wʋsg ne nin-wẽnsã
sẽn basd yãmb tõogã.+
54 Yãmb noyã yaa yɩɩl ne maam,
m sẽn be zĩig ning fãa.*
55 Yʋngo, m tẽegda yãmb yʋʋrã yelle, Zeova,+
sẽn na yɩl n sak yãmb tõogã.
56 Yaa woto la mam minim n maandẽ,
bala mam tũuda yãmb noyã.
ח [Heth]
59 Mam feesa m tʋʋm-tʋmdɩ wã,
sẽn na yɩl n wẽnemd m naoã n le tees yãmb saglsã.+
60 Mam yãgdame n na n tũ yãmb noyã.+
Mam pa maand maas-maas ye.
62 Yʋn-sʋka, mam yikdame n na n pʋʋs yãmb barka,+
y bʋ-kaoor toor-toorã sẽn yaa tɩrsã yĩnga.
64 Zeova, yãmb maan-neerã pida tẽngã.+
Zãms-y maam yãmb noyã.
ט [Teth]
65 Zeova, yãmb maana y tʋm-tʋmdã neere,
wa sẽn zems y gomdã.
68 Yãmb yaa sõma,+ tɩ y tʋʋmã me yaa sõma.
Zãms-y maam y noyã.+
69 Tɩtaam dãmbã rõta maam wʋsgo,
la mam sakda y noyã ne m sũurã fãa.
י [Yod]
73 Yaa yãmb nusã n maan maam la b yag maam.
Kõ-y maam yam-vẽenem
sẽn na yɩl tɩ m bãng yãmb noyã.+
75 Zeova, mam miime tɩ yãmb bʋ-kaoor toor-toorã yaa tɩrse,+
la tɩ yaa y kɩs-sɩdã pʋgẽ la yãmb sẽn kɩt tɩ mam paam toogã.+
La mam na n bʋgsa yãmb noyã zutu.*+
79 Bɩ neb nins sẽn zoet yãmbã lebg n wa mam nengẽ,
rat n yeel tɩ neb nins sẽn mi yãmb saglsã.
כ [Kaph]
82 Mam gũu yãmb pʋlengã pidsg hal tɩ m ninã pãng sa,+
tɩ m sokdẽ yaa: “Wakat bʋg la yãmb na n bels maam?”+
84 Yãmb tʋm-tʋmdã na n gũu rasem a wãna?
Wakat bʋg la yãmb na n kao sẽn namsd-b maamã bʋʋdo?+
85 Tɩtaam dãmbã tuuda bogd mam yĩnga,
rat n yeel tɩ sẽn kɩɩsd-b yãmb tõogã.
86 Nebã tõe n kɩsa yãmb noyã fãa sɩda.
Neb n namsd maam zaalem bala. Sõng-y-ma!+
87 Kellẽ-la bilf tɩ b menes maam dũniyã zugu,
la mam pa bas yãmb noyã sakr ye.
88 Kogl-y mam vɩɩmã y maan-neerã yĩnga,
sẽn na yɩl tɩ m sak sagls nins y sẽn kõ wã.
ל [Lamed]
90 Yãmb kɩs-sɩdã yaa zãmaan fãa yĩnga.+
Yãmb lugla tẽngã kãn-kãe, hal t’a ket n yasẽ.+
91 Yãmb bʋ-kaoor toor-toorã maasem yĩnga, b* kell n yalsame n tãag rũndã,
bala b fãa yaa yãmb tʋm-tʋmdba.
93 Mam pa na n tol n yĩm yãmb noyã lae-lae.
Bala yaa ne bãmb la yãmb kogl mam vɩɩmã.+
95 Nin-wẽnsã gũudame n na n sãam maam,
la mam maagda m yĩng n get yãmb saglsã.
מ [Mem]
97 Ad mam sɩd nonga yãmb tõogã!+
Mam bʋgsda a zug* daarã tõre.+
98 Yãmb noyã kɩtdame tɩ mam tar yam n yɩɩd m bɛɛbã,+
bala b bee ne maam wakat fãa yĩnga.
100 Mam tʋmda ne yam n yɩɩd nin-kẽemba,
bala mam tũuda yãmb noyã.
101 Mam zãgsame tɩ m kõn kẽn so-wẽng baa a ye zugu,+
sẽn na yɩl n tõog n sak yãmb gomdã.
102 Mam pa bʋdg n bas yãmb tõodã,
bala yãmb zãmsa maam.
104 Ne yãmb noyã maasem, mam tʋmda ne yam.+
Yaa rẽ yĩng la mam sẽn kis so-wẽng buud fãa wã.+
נ [Nun]
106 Mam wẽename tɩ m na n saka yãmb tõodã sẽn yaa tɩrsã,
la m na n pidsa m pʋlengã.
107 Mam paama toog wʋsgo.+
Zeova, kogl-y mam vɩɩmã wa sẽn zems yãmb gomdã.+
112 Mam yãka yam* n na n sak yãmb noyã
wakat fãa, n tãag m yõor tɛka.
ס [Samekh]
115 Yãmb a nin-wẽnse, zãag-y y mens ne maam,+
tɩ m tõog n tũ m Wẽnnaamã noyã.
116 Teel-y maam wa yãmb sẽn pʋlmã,*+
sẽn na yɩl tɩ m kell n vɩɩmde.
Mam teega yãmba, ra bas-y tɩ m paam yãnd ye.+
118 Yãmb basda neb nins fãa sẽn bʋdgd n basd yãmb noyã,+
bala b yaa zirẽ-be-neb la zãmb dãmba.
119 Yãmb lobda tẽngã nin-wẽnsã fãa wa sagd* sẽn pa tar yõodã.+
Yaa rẽ yĩng la mam sẽn nong yãmb noyã.
ע [Ayin]
121 Mam maanã sẽn yaa tɩrg la sẽn zemse.
Ra bas-y maam neb nins sẽn weoogd maamã nusẽ ye!
122 Pʋlm-y tɩ y na n kɩtame tɩ y tʋm-tʋmdã yɛl yɩ sõma.
Bɩ tɩtaam dãmbã ra weoog-m ye.
125 Mam yaa yãmb tʋm-tʋmda. Kõ-y maam yam-vẽenem+
sẽn na yɩl tɩ m wʋm y saglsã võore.
126 Wakat taame t’a Zeova na n maan bũmbu,+
bala b kɩɩsa yãmb tõogã.
פ [Pe]
129 Yãmb saglsã yaa sõma wʋsgo.
Yaa rẽ yĩng la mam sẽn tũud-bã.*
132 Wẽnemd-y n tees-y maam la y zoe m nimbãanega,+
wa yãmb sẽn yeel bũmb ning sẽn nong-b yãmb yʋʋrã wɛɛngẽ wã.+
133 Wilg-y maam sor ne y goamã maasem, sẽn na yɩl tɩ m kẽn bãan sor zugu.
Bɩ bũmb sẽn yaa wẽng baa a ye ra soog maam ye.+
134 Fãag-y maam nin-toosã nusẽ,
tɩ m na n tũu yãmb noyã.
135 Kɩt-y tɩ y nengã vẽenem yãg yãmb tʋm-tʋmdã zugu.+
Zãms-y maam yãmb noyã.
136 Nintãm n yit mam ninẽ wã n dʋʋgd wʋsgo,
bala nebã pa tũud yãmb tõogã ye.+
צ [Tsade]
138 Yãmb sẽn kõt sagls ninsã yaa tɩrse.
B tõe n teeg-b-la zãnga.
139 Mam yẽesmã rɩta maam wa bugum,+
bala mam zabd-n-taasã yĩma yãmb goamã.
143 Baa mam sẽn paamd toog la zu-loeesã,
mam sũur ket n nooma ne yãmb noyã.
144 Yãmb saglsã tɩrlem paada wakat sẽn kõn sa.
Kõ-y maam yam-vẽenem,+ sẽn na yɩl tɩ m kell n vɩɩmde.
ק [Qoph]
145 Mam boonda ne m sũur fãa. Zeova, leok-y maam.
Mam na n tũu yãmb noyã.
146 Mam boonda yãmba. Fãag-y maam!
Mam na n saka yãmb saglsã.
149 Kelg-y mam koɛɛgã y maan-neerã yĩnga.+
Zeova, kogl-y mam vɩɩmã wa sẽn zems yãmb tɩrlmã.
150 Neb nins sẽn tʋmd yãn-tʋʋmã* kolgdame.
B zãra ne yãmb tõogã.
152 Hal daar zãra, mam bãngame
tɩ yãmb lugla y noyã sẽn na yɩl tɩ b pa wakat fãa yĩnga.+
ר [Resh]
153 Ges-y mam namsgã la y fãag-ma,+
bala mam pa yĩm yãmb tõogã ye.
155 Fãagr zãra ne nin-wẽnsã,
bala b pa bao yãmb noyã ye.+
156 Zeova, yãmb nimbãan-zoeerã yaa wʋsgo.+
Kogl-y mam vɩɩmã wa sẽn zems y tɩrlmã.
157 Sẽn namsd-b maamã ne m zabd-n-taasã yaa wʋsgo,+
la mam pa bʋdg n bas yãmb saglsã ye.
158 Mam geta zãmb dãmbã ne yam-yiisgu,
bala b pa sakd yãmb goamã ye.+
159 Ges-y mam sẽn nong yãmb noyã to-to wã!
Zeova, kogl-y mam vɩɩmã y maan-neerã yĩnga.+
160 Yãmb gomdã halhaalã yaa sɩda,+
tɩ yãmb tõodã fãa sẽn yaa tɩrsã me paad wakat fãa yĩnga.
ש [Sin] bɩ [Shin]
162 Mam kɩdemda sũ-noog ne yãmb goamã+
wa ned sẽn yã te-zɛɛdem wʋsgo.
164 Mam pẽgda yãmb naoor a yopoe daar fãa,
yãmb bʋ-kaoor toor-toorã sẽn yaa tɩrsã yĩnga.
166 Zeova, mam gũuda yãmb fãagrã,
la m sakd yãmb noyã.
168 Mam sakda yãmb noyã la y saglsã,
bala yãmb mii mam sẽn maand bũmb ninsã fãa.+
ת [Taw]
169 Zeova, bɩ mam sẽn kelemd n kot sõngrã ta yãmba.+
Kɩt-y tɩ m paam yam-vẽenem ning sẽn yit yãmb gomdã pʋgẽ wã.+
170 Bɩ mam sẽn kot tɩ y zoe m nimbãanegã ta yãmba.
Fãag-y maam wa yãmb sẽn pʋlmã.*
171 Bɩ mam noorã pid ne pẽgre,+
bala yãmb zãmsda maam y noyã.
172 Bɩ mam zɩlemdã yɩɩl n gom yãmb goamã yelle,+
bala yãmb noyã fãa yaa tɩrse.
174 Zeova, mam gũuda yãmb fãagrã ne m sũur fãa.
Mam sũur nooma wʋsg ne yãmb tõogã.+