Kibayã pipi sebre

22 A Davɩɩd yeelame: “Ad Wẽnnaam a Zeova roogã, la maoong sẽn yõogd bugum tẽn-kugr Israyɛll nebã yĩnga.”+

2 A Davɩɩd kɩtame tɩ b tigim sãamb+ nins sẽn da be Israyɛll soolmẽ wã, tɩ yẽ yãk-b tɩ b lebg kug-pɛɛsdb n na n vigsd kug la b peesd kug Wẽnnaam doogã meeb yĩnga.+ 3 A Davɩɩd baoo kut wʋsg kʋɩlensã põents la sogdsã yĩnga, la a bao zũud wʋsg b sẽn pa tõe n mak a zɩslem,+ 4 ne sɛɛdr tɩɩs raad+ ka tɛka. Bala Sɩdõ nebã+ ne Tɩɩr nebã+ waa ne sɛɛdr tɩɩs raad wʋsg n kõ a Davɩɩde. 5 A Davɩɩd yeelame yaa: “Mam biig a Salomo nan yaa yãaga, n pa mi bũmbu,+ tɩ roogã b sẽn segd n me a Zeova yĩngã yaool n tog n tall ziir sẽn yaa kãsenga,+ sẽn na yɩl tɩ nebã gomd a yʋʋrã ne a neermã+ yell tẽnsã fãa pʋsẽ.+ Woto wã, mam na n segla bũmb toor-toor n kõ-a.” Dẽ, nand t’a maan kaalem, a segla teed wʋsg zem bala.

6 Sẽn paase, a Davɩɩd boola a biig a Salomo n yeel-a t’a me roog Israyɛll Wẽnnaam a Zeova yĩnga. 7 A yeela a biig a Salomo yaa: “Mam da rata ne m sũur fãa n me roog mam Wẽnnaam a Zeova yʋʋrã yĩnga.+ 8 La a Zeova goma ne maam n yeele: ‘Fo raaga zɩɩm wʋsgo, la fo zaba zab-toose. Fo pa na n me roog mam yʋʋrã yĩng ye.+ Bala fo raaga zɩɩm wʋsg tẽngã zug mam nifẽ. 9 Gese! Fo na n paama biig+ sẽn na n yɩ laafɩ* soaba, la mam na n kɩtame t’a paam a meng ne bɛɛbã fãa sẽn gũbg-a wã.+ Bala a yʋʋr na n yɩɩ a Salomo*+ la mam na n kõo yẽ laafɩ la bãan Israyɛlle, a naamã wakate.+ 10 Yaa yẽ n na n me roog mam yʋʋrã yĩnga.+ A na n lebga mam biiga, la mam na n yɩɩ yẽ ba.+ Mam na n vigla a naamã geer Israyɛll wakat fãa yĩnga.’+

11 “Masã m biiga, bɩ a Zeova zĩnd ne-fo, la bɩ f paam tõogre, n me fo Wẽnnaam a Zeova roogã, wa a sẽn da togs fo wɛɛngẽ wã.+ 12 A Zeova sã n wa kɩt tɩ f soog Israyɛlle, bɩ a kõ foo bãngr la a kɩt tɩ f yɩ gũus-m-meng soaba,+ sẽn na yɩl tɩ f tõog n tũ fo Wẽnnaam a Zeova tõogã.+ 13 Fo sã n tũ a Zeova noyã+ ne a bʋ-kaoor toor-toorã a sẽn kɩt t’a Moyiiz kõ Israyɛll nebã neere,+ fo na n paama tõogre. Keng f sũur la f tall raoodo. Ra zoe rabeem wall f yɛɛs ye.+ 14 A Zeova roogã yĩnga, mam modga wʋsg n segl sãnem talã* tus-koabga, ne wanzuri talã milyõ a ye, la zũud ne kut wʋsg+ b sẽn pa tõe n mak b zɩslem. Sẽn paase, mam segla raad ne kuga,+ la fo tog n bao n paasame. 15 Tʋm-tʋmdb wʋsg n be n na n sõng foo: Kug-pɛɛsdba, ro-metba,+ ra-wãadba, la tʋʋm-mitb toor-toore.+ 16 Sãnemã, wanzuri wã ne zũudã la kutã pa tõe n mak ye.+ Yik n sɩng tʋʋmdã, la bɩ a Zeova zĩnd ne-fo.”+

17 A Davɩɩd yeela Israyɛll nanambsã fãa tɩ b sõng a biig a Salomo. A yeelame: 18 “Yãmb Wẽnnaam a Zeova pa be ne yãmb sɩda? A pa kɩt tɩ yãmb paam bãan zĩig fãa sɩda? Bala a ninga soolmã nebã mam nugẽ, la soolmã lebga a Zeova ne a nin-buiidã rẽnda. 19 Masã, bɩ y yãk yam ne y sũur fãa la y sɩɩg* fãa n bao yãmb Wẽnnaam a Zeova,+ la y sɩng Wẽnnaam a Zeova roogã meebo,+ sẽn na yɩl n tall a Zeova kaoolã koglgã ne Wẽnnaam te-sõamyã,+ n wa ning roog ning b sẽn na n me a Zeova yʋʋrã yĩngã pʋgẽ.”+