Ezekɩyɛll sebre

38 A Zeova le goma ne maam n yeele: 2 “Ninsaal biiga, wẽnemd f neng n tees a Goog sẽn yit Magoog soolmẽ wã,+ rat n yeel tɩ Mesɛk la Tuball+ na-kãsengã, n togs bãngr-gomd n ning-a taale.+ 3 Yeel yaa: ‘Ad a Zeova sẽn yaa Zu-soab sẽn ka to wã sẽn yeele: “Foom a Goog sẽn yaa Mesɛk la Tuball na-kãsengã, mam na n zaba ne foo. 4 Mam na n kɩtame tɩ f lebg n leb poorẽ. Mam na n gaaga fo yɛyã ne bãense,+ n tall foo n yi ne f tãb-biisã fãa,+ wed-moos la wed-rʋʋdba, tɩ b fãa yer fu-neeba. Yaa tãb-biis kʋʋng sẽn zãad gãn-bɛd la gãn-bõonego.* B fãa zabda ne sʋʋse. 5 Pɛrs ne Etiyopi la Put+ nebã bee ne-ba. B fãa zãada gãn-bõoneg la b fõg kut pugli. 6 A Gomeer ne a tãb-biisã fãa, la a Togarma yagensã+ sẽn yit rɩtg zĩis nins sẽn zãr n yɩɩdã ne b tab-biisã fãa me bee ne-ba. Buud wʋsg n be ne foo.+

7 “‘“Segl-y y mens n sa. Segl-y y mense, foo ne f tãb-biisã fãa sẽn tigim fo nengẽ wã. Fo na n yɩɩ b taoor soaba.*

8 “‘“Rasem wʋsg poore, b na n gesa fo yelle.* Yʋʋmã baasgẽ, fo na n piga soolem ning neb b sẽn da kʋ ne sʋʋse, la b sẽn lebs n tall n wa wã. B tigma a nebã buud wʋsg pʋgẽ n tall-b n wa Israyɛll tãensẽ wã, tãens nins sẽn yɩ zĩ-vɩɩd n kaoosã. B yiisa soolem-kãng nebã buud toɛy-toɛyã pʋsẽ n tall-b n wa, tɩ b fãa zĩ ne bãane.+ 9 Foo ne f tãb-biisã fãa la buud wʋsgã sẽn be ne foomã na n waa wa sob-kãseng n zab ne-ba. Yãmb na n luda soolmã wa sawato.”’

10 “Ad a Zeova sẽn yaa Zu-soab sẽn ka to wã sẽn yeele: ‘Baraare, tagsa n na n wa fo yamẽ wã, tɩ fo mag mag-wẽnga. 11 Fo na n yeelame yaa: “Mam na n piga soolem sẽn tar tẽns sẽn pa tar koglgo.+ Mam na n zaba ne neb nins sẽn zĩ bãan n pa maand yɩɩrã. B fãa bee tẽns sẽn pa tar lalse, sogds la kʋɩlens pʋsẽ.” 12 Yaa sẽn na n zɛ teed wʋsgo, n zab ne raboodã sẽn tar neb masã wã,+ la ne neb nins b sẽn tigim n yiis buud toɛy-toɛyã sʋka,+ tɩ b paamd arzɛk la paoong wʋsgã,+ sẽn be-b dũniyã tẽn-sʋkã.

13 “‘Saba+ ne Dedan nebã,+ la Tarsiis toandbã+ ne a zabr gãndaadã fãa* na n soka foo yaa: “Fo pigda soolmã sẽn na yɩl n zɛ teed wʋsg la? Fo tigma f tãb-biisã sẽn na yɩl tɩ b wʋk wanzuri la sãnem, tɩ b fã arzɛk la paoongo, la b kãag te-zɛɛdem wʋsg la?”’

14 “Woto wã, ninsaal biiga, togs bãngr-gomd n yeel a Goog yaa: ‘Ad a Zeova sẽn yaa Zu-soab sẽn ka to wã sẽn yeele: “Daar ning Israyɛll nebã sẽn yaa mam nin-buiidã sẽn na n zĩnd ne bãanã, fo pa na n bãng sɩda?+ 15 Fo na n yii f zĩigẽ wã, rɩtg zĩis nins sẽn zãr n yɩɩdã,+ foo ne buud wʋsgo, tɩ b fãa zao wed-moos n yaa neb ka tɛka, n yaa tãb-biis wʋsgo.+ 16 Yãmb na n wa zaba ne Israyɛll sẽn yaa mam nin-buiidã wa sawat sẽn lut soolmã. Foom a Googe, saabã wakate, mam na n kɩtame tɩ fo wa zab ne mam soolmã,+ sẽn na yɩl tɩ buud toɛy-toɛyã bãng maam, mam sã n wa tũnug ne foom n kɩt tɩ b yã tɩ mam yaa sõngo.”’+

17 “Ad a Zeova sẽn yaa Zu-soab sẽn ka to wã sẽn yeele: ‘Pa foo la mam sẽn kɩt tɩ Israyɛll no-rɛɛsdbã sẽn yaa m tʋm-tʋmdbã gom f yell hal pĩnd wẽndẽ, n togs bãngr-goam yʋʋm wʋsg pʋgẽ tɩ m na n kɩtame tɩ fo wa zab ne-bã sɩda?’

18 “A Zeova sẽn yaa Zu-soab sẽn ka to wã yeelame: ‘Baraare, daar ning a Goog sẽn na n pig Israyɛll soolmã, mam sũurã na n puuga wʋsgo.+ 19 Mam na n goma ne yẽesem la sũ-puugr sẽn wit wa bugum. Baraare, tẽn-digimdg sẽn yaa kãseng n na n zĩnd Israyɛll soolmẽ wã. 20 Mam yĩnga, mogrã zĩmã, liuuli wã sẽn yɩgd yĩngrã, we-rũmsã sẽn be weoogẽ wã, bõn-vuudsã fãa sẽn vuud tẽngã, la ninsaalbã fãa sẽn be tẽn-gãongã zugã na n digame. Sẽn paase, tãensã na n siigame,+ tɩ kug-zãntsã lʋɩ. Lalg buud fãa na n lʋɩɩ tẽnga.’

21 “‘Mam na n kɩtame tɩ b wa zab ne-a mam tãensã fãa zut ne sʋʋse.’ Yaa a Zeova sẽn yaa Zu-soab sẽn ka to wã n yeele. ‘Ned kam fãa na n wẽneg n kʋʋ a ba-biig ne a sʋʋga.+ 22 Mam na n sɩbg-a-la ne bã-loangdga,+ la ne zɩɩm daagre. Mam na n kɩtame tɩ sa-kẽeng ni ne sapɩlma,+ bugum+ la kidbr+ a zugu, la a tãb-biisã ne buud wʋsgã sẽn be ne-a wã zutu.+ 23 Hakɩɩka, mam na n wilgame tɩ m yaa kãsenga, la tɩ m yaa sõngo, la m kɩt tɩ buud wʋsg bãng maam. Woto, b na n bãngame tɩ mam yaa a Zeova.’