Tõod sebre
8 “Yãmb segd n gũusa neer n tũ bũmb nins fãa mam sẽn yet yãmb rũndã wã, sẽn na yɩl n kell n vɩɩmde,+ n lebg wʋsgo, la y tɩ kẽ soolem ning a Zeova sẽn pʋlem yãmb yaab-rãmbã pʋgẽ,+ n soog-a. 2 Tẽeg-y yãmb Wẽnnaam a Zeova sẽn kɩt tɩ y kẽn so-wok zug we-raoogẽ wã yʋʋm pis-naasã yelle.+ Yaa sẽn na n zãms yãmb sik-m-menga, la a mak yãmb+ n bãng bũmb ning sẽn be yãmb sũyẽ wã,+ rat n yeel tɩ n bãng y sã n na n tũu a noyã bɩ y pa na n tũ. 3 A zãmsa yãmb sik-m-menga, la a bas tɩ kom yõk yãmb+ t’a rɩlg yãmb ne mannã+ sẽn yaa rɩɩb yãmb ne y ba-rãmbã fãa sẽn da pa mi wã, sẽn na yɩl tɩ y bãng tɩ ninsaal pa vɩ ne rɩɩb bal ye. A vɩɩ ne gomd ning fãa sẽn yit a Zeova noorẽ wã me.+ 4 Yʋʋm pis-naasã pʋgẽ, fut nins yãmb sẽn yeelgã pa ki, tɩ y naoã me pa mod ye.+ 5 Yãmb mii vẽeneg tɩ yãmb Wẽnnaam a Zeova ra remsda yãmb wa rao sẽn demsd a biig to-to wã.+
6 “Masã, yãmb segd n tũu yãmb Wẽnnaam a Zeova soayã, la y zoe-a, sẽn na yɩl n sak a noyã. 7 Bala yãmb Wẽnnaam a Zeova tara yãmb n dabd tẽn-noogẽ.+ Yaa tẽng sẽn tar kʋɩls la ko-bunds* sẽn bund tẽn-nabrẽ, la tãensã zutu. 8 Yaa tẽng sẽn tar bɩle ne orze,* viyn biisi, kankamse, gernaad tɩɩse,+ oliiv kaam la sɩɩdo.+ 9 Rɩɩb pa na n paoog tẽn-kãng pʋgẽ ye. Bũmb pa na n paoog yãmb me ye. Tẽngã kugã tara kutu. Yãmb na n yãkda zũud a tãensã pʋsẽ.
10 “Yãmb sã n wa rɩ n tɩge, yãmb segd n pẽga y Wẽnnaam a Zeova, a sẽn kõ yãmb tẽn-noogã yĩnga.+ 11 Gũus-y neer n da wa bas yãmb Wẽnnaam a Zeova goamã, a noyã la a tõodã mam sẽn togsd yãmb rũndã wã tũubu, n yĩm a yell ye. 12 Yãmb sã n wa rɩ n tɩge, n me ro-neeb n be b pʋsẽ,+ 13 tɩ y rũm-bɛdã la y rũm-bõonegã fɩɩge, tɩ y wanzuri wã la y sãnemã paase, tɩ y tar bũmb fãa wʋsgo, 14 bɩ y ra wuk y mense,+ tɩ kɩt tɩ y yĩm yãmb Wẽnnaam a Zeova yell ye. Yẽ n yaa soab ning sẽn yiis yãmb Ezɩpt soolmẽ wã, tẽng ning pʋgẽ y sẽn da yaa yembsã.+ 15 Yẽ n kɩt tɩ y kẽn we-rao-kẽengã sẽn kẽesd rabeemã pʋgẽ.+ Yaa we-raoog sẽn tar wag-toos ne namse, la tẽn-koɛɛng sẽn pa tar koom. A kɩtame tɩ koom yi kug-bedrẽ wã,+ 16 la a rɩlg yãmb we-raoogẽ wã ne mannã+ sẽn yaa rɩɩb yãmb ba-rãmbã sẽn pa bãngã, n na n zãms yãmb sik-m-meng+ la a mak yãmba, y beoog neer yĩnga.+ 17 Yãmb sã n wa yet y sũurẽ yaa: ‘Yaa ne tõnd mensã pãnga, la d mensã nus tʋʋm la d paam paoong-kãngã fãa,’+ 18 bɩ y tẽeg tɩ yaa yãmb Wẽnnaam a Zeova n kõt yãmb pãng tɩ y paamd paoongo,+ n na n pids a kaoolã a sẽn maan ne yãmb yaab-rãmbã, wa sẽn yaa to-to rũndã wã.+
19 “Yãmb sã n saag n yĩm yãmb Wẽnnaam a Zeova yelle, n tũ wẽnnaam-dãmb a taaba, n waoog-b la y wõgemd b taoore, mam keoogda yãmb rũndã tɩ y na n sãamame.+ 20 Yãmb na n sãama wa buud nins a Zeova sẽn sãamd yãmb taoorã. Bala yãmb pa kelg yãmb Wẽnnaam a Zeova koɛɛgã ye.+