Zeremi sebre
19 Ad a Zeova sẽn yeele: “Kẽng yagd nengẽ n tɩ ra yʋʋre.+ Tall nin-buiidã kãsem-dãmb a wãna, ne maan-kʋʋdbã kãsem-dãmb a wãn 2 tɩ y yi n kẽng a Hinom bi-riblã longẽ wã,+ Sa-peesã rignoorẽ. Be, moon goam nins mam sẽn na n togs foomã. 3 Fo na n yeelame: ‘Yãmb a Zida rĩm-dãmb ne Zerizalɛm neba, kelg-y-yã a Zeova goamã. Ad Israyɛll Wẽnnaam a Zeova sẽn yaa tãb-biis naabã sẽn yeele:
“‘“Mam na n kɩtame tɩ yel-beed wa zĩ-kãngã ka la bilfu. Ned ning fãa sẽn na n wʋm rẽ yell na n yɛɛsame.* 4 Bala b basa maam+ la b kɩt tɩ zĩigã toeem fasɩ.+ B kʋʋda maand n kõt wẽnnaam-dãmb a taab zĩ-kãngã. Yaa wẽnnaam-dãmb bãmb ne b yaab-rãmbã la Zida rĩm-dãmbã sẽn da pa mi. Sẽn paase, b pidsa zĩ-kãngã ne neb sẽn pa tar taal zɩɩm.+ 5 B mee a Baal zĩ-zãntsã sẽn na yɩl n yõogd b kambã bugmẽ, tɩ yɩ maand b sẽn yõogd bugum n kõt a Baalle.+ Rẽ yaa bũmb mam sẽn pa kos wall m gom a yelle, la bũmb mam sẽn zɩ n tags m sũurẽ a bada.”’*+
6 “‘A Zeova yeelame: “Rẽ n so tɩ daar n wat tɩ b pa na n le bool zĩ-kãngã tɩ Tofɛte, wall t’a Hinom bi-riblã long ye. B na n bool-a lame tɩ Kʋʋb longo.+ 7 Mam na n kɩtame tɩ Zida ne Zerizalɛm nebã magbã ra yãk neng zĩ-kãngã ye. Mam na n kɩtame tɩ b bɛɛbã ne neb nins sẽn baood n na n yãk b yõyã* kʋ-b ne sʋʋse. Mam na n dɩka b kũ-rãmbã n kõ bõn-yɩgdɩ wã sẽn yɩgd yĩngrã ne tẽngã we-rũmsã tɩ yɩ b rɩɩbo.+ 8 Mam na n kɩtame tɩ tẽn-kãngã lebg bũmb sẽn kẽesd rabeem, la bũmb b sẽn na n yaandẽ.* Ned ning fãa sẽn na n loog be na n ges-a-la ne rabeem, la a yaal-a tood nins fãa sẽn paam-a wã yĩnga.+ 9 Mam na n kɩtame tɩ b wãb b kom-dibli wã ne b kom-pugli wã nemdo. B ned kam fãa na n wãba a to nemdo, b sẽn gũbg-b n na n zab ne-b tɩ b pa mi b sẽn maandgã yĩnga. Na n yɩɩ wakat ning b bɛɛbã ne neb nins sẽn baood n na n yãk b yõyã* sẽn wat n karg n gũbg-bã.”’+
10 “Rẽ poore, bɩ f wãag yʋʋrã neb nins sẽn tũ foo n kẽngã taoore, 11 la f yeel-b yaa: ‘Ad a Zeova sẽn yaa tãb-biis naabã sẽn yeele: “Yaa woto la mam na n wã bu-kãngã ne tẽn-kãngã, wa ned sẽn wãad yagd laoko, tɩ pa le tol n tõe n manegã. B na n muma kũ-rãmbã Tofɛte, hal tɩ vɩʋʋg wa pa le be n na n mum-b ye.”’+
12 “A Zeova yeelame: ‘Yaa woto la m na n maan zĩ-kãngã ne a nebã, n kɩt tɩ tẽn-kãngã lebg wa Tofɛte. 13 Zerizalɛm rotã ne Zida rĩm-dãmbã rot na n lebga rẽgd wa zĩ-kãngã, rat n yeel tɩ Tofɛte.+ Yaa rot nins fãa zut b sẽn maan maand n kõ wĩntoogã ne kiuugã la ãdsã,*+ la b sẽn pʋdg divẽ kũun n kõ wẽnnaam-dãmb a taabã.’”+
14 A Zeremi sẽn yi Tofɛt sẽn yaa zĩig ning a Zeova sẽn tʋm-a t’a tɩ togs bãngr-goamã n lebg n wa wã, a tɩ yaasa a Zeova roogã samandẽ, n yeel nin-buiidã fãa yaa: 15 “Ad Israyɛll Wẽnnaam a Zeova sẽn yaa tãb-biis naabã sẽn yeele: ‘Mam na n kɩtame tɩ yel-beed nins yell mam sẽn gomã wa tẽn-kãngã zugu, la a tẽn-kɩremsã fãa zutu, bala b riglma b sũyã* n zãgs tɩ b kõn sak mam goamã ye.’”+