Zeremi sebre
36 A Zoziyas biig a Zowakim+ sẽn yaa Zida rĩmã naamã yʋʋm a naas-n-soabã pʋgẽ, a Zeova goma ne a Zeremi n yeele: 2 “Rɩk seb-pindem n gʋls goam nins fãa mam sẽn togs foom Israyɛll la Zida+ ne buud toɛy-toɛyã fãa+ wɛɛngẽ wã, sẽn sɩng ne pipi daarã mam sẽn gom ne foo a Zoziyas wakatẽ wã n tãag rũndã wã.+ 3 Tõe tɩ Zida buudã neb sã n wʋm yel-beed nins fãa mam sẽn magd n na n kɩt tɩ wa b zutã, bɩ b bas b manesem-wẽnsã, tɩ ma-me kõ-b sugr b kongrã la b yel-wẽndã yĩnga.”+
4 Dẽ, a Zeremi boola a Neriya biig a Baruki,+ n togs-a goam nins fãa a Zeova sẽn yeel yẽ wã, t’a Baruk gʋls seb-pindmã pʋgẽ.+ 5 A Zeremi yeela a Baruk yaa: “B paga maam tɩ m pa tõe n kẽng a Zeova roogẽ wã ye. 6 Woto wã, yaa foo n segd n kẽng n tɩ zẽk f koɛɛg n karem a Zeova goamã mam sẽn togs foom tɩ f gʋls seb-pindmã pʋgẽ wã. Kẽng no-loeer daar n tɩ karem tɩ neb nins sẽn be a Zeova roogẽ wã kelge. Woto, fo na n karmame tɩ Zida nebã fãa sẽn yi b tẽnsẽ wã n wa wã kelge. 7 Tõe tɩ b na n basa b manesem-wẽnsã, la b pʋʋs a Zeova n kos t’a zoe b nimbãanega, bala a Zeova yeelame t’a sũ-puugrã la a sũ-kãbrã ne nin-kãensa wã yaa kãsenga.”
8 Dẽ, a Neriya biig a Baruk maana bũmb nins fãa no-rɛɛs a Zeremi sẽn yeel-a wã. A zẽka a koɛɛg n karem a Zeova goamã sẽn be seb-pindmã* pʋgẽ wã, a Zeova roogẽ wã.+
9 A Zoziyas biig a Zowakim+ sẽn yaa Zida rĩmã naamã yʋʋm a nu soabã kiuug a wɛ soabã pʋgẽ, Zerizalɛm nebã fãa, la neb nins fãa sẽn yi Zida tẽnsẽ wã n wa Zerizalɛmmã moona no-loeer a Zeova taoore.+ 10 Dẽ, a Baruk zẽka a koɛɛg n karem a Zeremi goamã sẽn be seb-pindmã* pʋgẽ wã, a Zeova roogẽ wã tɩ nebã fãa kelge. Yɩɩ seb-gʋlsd a Safan biig+ a Gemariya+ roogẽ* wã sẽn be samand ning sẽn zãntẽ wã, a Zeova roogã rigno-paallã sɛɛga.+
11 A Safan biig a Gemariya biig a Mikaya sẽn wʋm a Zeova goamã b sẽn karem seb-pindmã* pʋgẽ wã, 12 a kẽnga rĩmã zakẽ,* seb-gʋlsdã roogẽ. Nanambsã* fãa ra zĩi be. Yaa seb-gʋlsd a Elisama,+ a Semaya biig a Delaya, a Akboor biig a Ɛlnatanne,+ a Safan biig a Gemariya, a Hananiya biig a Sedesiyaase, la nanambs a taabã fãa. 13 A Mikaya togs-b-la goam nins fãa a sẽn wʋme, a Baruk sẽn wa n karemd seb-pindmã* tɩ nebã kelgdẽ wã.
14 Dẽ, nanambsã fãa tʋma a Kuusi biig a Selemiya biig a Netaniya biig a Yehuudi a Baruk nengẽ, t’a tɩ yeel-a yaa: “Tall seb-pindem ning fo sẽn karem tɩ nebã kelgã n wa.” A Neriya biig a Baruk talla seb-pindmã n kẽng b nengẽ. 15 B yeel-a lame yaa: “D bõos tɩ f zĩnd n zẽk f koɛɛg n karem tɩ d kelge.” Dẽ, a Baruk karmame tɩ b kelge.
16 B sẽn wʋm gom-kãensã fãa wã, rabeem yõk-b lame tɩ b ges taaba, la b yeel a Baruk yaa: “Hakɩɩka, tõnd segd n togsa rĩmã gom-kãensã fãa.” 17 B soka a Baruk yaa: “D bõos tɩ f togs tõnd fo sẽn gʋls gom-kãensã fãa to-to wã. Yaa a Zeremi n da togsd foo tɩ f gʋlsdẽ bɩ?” 18 T’a Baruk leok-b yaa: “A togsa maam gom-kãensã fãa, tɩ mam gʋls-b ne gʋls-koom seb-pindmã* pʋgẽ.” 19 Nanambsã yeela a Baruk yaa: “Kẽng tɩ foo ne a Zeremi tɩ solge. Ra maan-y tɩ ned baa a ye bãng yãmb sẽn beẽ ye.”+
20 Dẽ, b kẽnga rĩmã nengẽ, samandẽ wã. La b rɩgla seb-pindmã seb-gʋlsd a Elisama roogẽ wã. B tɩ togsa rĩmã bũmb nins fãa b sẽn wʋmã.
21 Dẽ, rĩmã tʋma a Yehuudi+ t’a yi n tɩ rɩk seb-pindmã. A kẽnga seb-gʋlsd a Elisama roogẽ wã n tɩ rɩk-a n wa. A Yehuudi sɩnga seb-pindmã karengo, tɩ rĩmã ne nanambsã fãa sẽn yas rĩmã taoorã kelgdẽ. 22 Rẽ tɩ rĩmã ra zĩi waood wakat roogẽ wã, kiuug a wɛ soabã,* tɩ bũmb b sẽn yõgen bugum a pʋgẽ be a taoore. 23 A Yehuudi sã n da karem rulg a tãab bɩ a naas n sa, rĩmã wõrgda bab-kãng ne seb-gʋlsdã sʋʋgã n lob bugmã sẽn dɩtã pʋgẽ, hal tɩ seb-pindmã tõr wa rɩ bugmẽ wã zãnga. 24 Rĩmã ne a tʋm-tʋmdbã sẽn wʋm gom-kãensã fãa wã pa zoe rabeem ye. B ned baa a ye pa pãrg a fuug me ye. 25 Baa a Ɛlnatan+ ne a Delaya+ la a Gemariya+ sẽn yõk rĩmã sɛɛg t’a ra yõog seb-pindmã, a pa kelg-b ye. 26 Sẽn paase, rĩmã yeela a biig* a Yerameyɛll ne a Azriyɛll biig a Seraya la a Abdɛll biig a Selemiya tɩ b tɩ yõk seb-gʋlsd a Baruk ne no-rɛɛs a Zeremi, la a Zeova solg-b lame.+
27 Rĩmã sẽn yõog seb-pindem ning sẽn da tar goam nins a Zeremi sẽn togs a Baruk t’a gʋlsã poore, a Zeova le goma ne a Zeremi+ n yeele: 28 “Rɩk seb-pindem a to, n gʋls goam nins fãa sẽn da be pipi seb-pindmã pʋgẽ wã, seb-pindem ning Zida rĩm a Zowakim sẽn yõogã.+ 29 Sẽn paase, fo segd n yeela Zida rĩm a Zowakim yaa: ‘Ad a Zeova sẽn yeele: “Fo yõoga seb-pindmã la f yeele: ‘Bõe yĩng tɩ fo gʋls a pʋgẽ n yeele: “Sãmbg sẽn kae, Babilon rĩmã na n waame, n sãam soolem-kãngã la a yiis ninsaalbã la rũmsã a pʋgẽ”?’+ 30 Woto wã, ad a Zeova sẽn yeel Zida rĩm a Zowakim wɛɛngẽ: ‘A pa na n paam t’a ned zĩnd a Davɩɩd geerẽ wã ye.+ B na n basa a kũumã yɩng tɩ wĩntoogã pãb-a wĩndga, tɩ waoodã wʋm-a yʋngo.+ 31 Mam na n soka yẽ ne a kambã la a yagensã ne a tʋm-tʋmdbã b beegrã yĩnga. Mam na n kɩtame tɩ yel-beed nins fãa mam sẽn da yeel tɩ na n waa bãmb ne Zerizalɛm la Zida nebã zutã paam-ba,+ b sẽn pa kelg maamã yĩnga.’”’”+
32 Dẽ, a Zeremi rɩka seb-pindem a to n kõ a Neriya biig a Baruk sẽn yaa seb-gʋlsdã.+ A Zeremi togs-a-la goam nins fãa sẽn da be seb-pindem* ning Zida rĩm a Zowakim sẽn yõogã pʋgẽ wã, t’a gʋlse.+ B paasa goam wʋsg sẽn wõnd pipi rãmbã.