Bʋ-kaoodbã sebre

7 Dẽ, a Zerubaalle, rat n yeel t’a Zedeyõ+ ne neb nins fãa sẽn da be ne-a wã yika yibeoog pĩnda, n tɩ tilg b tãb-sikã Harood ko-bundgã noore, tɩ Madiyã nebã tãb-sikã be nug-rɩtgo, Moore kunkubrã sẽn be tẽn-nabrẽ wã. 2 A Zeova yeela a Zedeyõ yaa: “Nebã sẽn be ne foomã sã n yaa wʋsgo, mam pa na n ning Madiyã nebã yãmb nugẽ ye.+ Sã n pa rẽ, Israyɛll nebã na n wuka b mens ne maam, n yeele: ‘Yaa ne tõnd meng nug pãng la d fãag d mense.’+ 3 Rẽ wã, m bõos tɩ f moon nin-buiidã taoor n yeel yaa: ‘Ned ning fãa sẽn zoet rabeem n digda, bɩ a lebg n kuili.’”+ Woto, a Zedeyõ maka nin-buiidã, la bãmb tus-pisi la a yiib n lebg n kuili, tɩ tus-piig pa.

4 La a Zeova le yeela a Zedeyõ: “Nin-buiidã ket n yaa wʋsgo. Tall-b n sig koomẽ wã, tɩ mam mak bãmb be n kõ-fo. Mam sã n yeel foo: ‘Yãoã na n tũu foo,’ a na n tũume. La m sã n yeel foo: ‘Yãoã pa na n tũ foo,’ a pa na n tũ-f ye.” 5 Dẽ, a Zedeyõ talla nin-buiidã n sig koomẽ wã.

A Zeova yeela a Zedeyõ yaa: “Welg ned ning fãa sẽn na n lɛg koomã ne a zɩlemd wa baaga, ne neb nins sẽn na n yĩgimd b rũmã zug n yũ wã.” 6 Neb nins sẽn da kaad koomã ne b nus n lɛgdã sõor yɩɩ rap kobs-tã. Sẽn ket-bã fãa yĩgimda b rũmã zug n yũ.

7 Rẽ poore, a Zeova yeela a Zedeyõ: “Yaa ne rap kobs-tã wã sẽn lɛg koomã la mam na n fãag yãmba. Mam na n ninga Madiyã nebã fo nugẽ.+ La bɩ f kuils nin-buiidã fãa sẽn ketã.” 8 Rap kobs-tã wã sẽn deeg rɩɩbã ne bardã nin-buiidã nengẽ n sa, a Zedeyõ kuilsa Israyɛll rap nins fãa sẽn da ketã yiri, la a tall rap kobs-tã wã bala. A Zedeyõ tãb-sikã ra bee zugẽ, tɩ Madiyã nebã tãb-sikã be tẽn-nabrẽ wã.+

9 Baraar yʋngo, a Zeova yeela a Zedeyõ yaa: “Yik n zab ne Madiyã nebã tãb-sikã, bala mam ninga bãmb fo nugẽ.+ 10 La fo sã n zoeta rabeem n pa rat n zab ne-ba, bɩ f peeg f tʋm-tʋmd a Pura tɩ y kẽng b tãb-sikẽ wã. 11 Kelg b sẽn na n yeelã tɩ na n kenga f raood* tɩ f zab ne b tãb-sikã.” Dẽ, a Zedeyõ ne a tʋm-tʋmd a Pura sigame n ta tãb-biisã sikã noore.

12 Madiyã ne Amalɛk nebã la Yaang nebã fãa+ wa n pida tẽn-nabrã wa kalwaar sulli, tɩ b yʋgma wã pa tõe n sõd n sa,+ n yaa wʋsg wa bĩisrã sẽn be mogrã noorã. 13 A Zedeyõ sẽn kolgã, a wʋma rao sẽn togsd a tũud-n-taag a zãmsdo, n yetẽ: “Ad mam zãmsdã: Mam yãa bur sẽn yaa gilg sẽn maan ne orze,* sẽn bilimd n wat Madiyã nebã tãb-sikẽ wã. A wa n taa fu-roogo, n fão-a ne pãng hal t’a lʋɩ.+ A zũndga fu-roogã la fu-roogã sirgame.” 14 A tũud-n-taagã sẽn wʋm dẽ, a leokame: “Yãoã yaa a Zowaas biig a Zedeyõ+ sẽn yaa Israyɛll nedã sʋʋgã bala. Wẽnnaam ninga Madiyã nebã ne b tãb-sikã fãa a nugẽ.”+

15 A Zedeyõ sẽn wʋm zãmsdã ne a bilgrã bala,+ a yĩgimdame n waoog Wẽnnaam. Rẽ poore, a leba Israyɛll nebã tãb-sikẽ wã n tɩ yeele: “Yik-y-yã! Bala a Zeova ninga Madiyã nebã tãb-sikã yãmb nugẽ.” 16 Dẽ, yẽ welga rap kobs-tã wã sul a tãabo, n kõ-b fãa bard+ ne rʋg-yalemse, tɩ bug-vɩlens be b pʋsẽ. 17 Sẽn paase, a Zedeyõ yeela rapã yaa: “Ges-y maam n maan wa mam sẽn na n maanã bal kɛpɩ. Mam sã n ta tãb-sikã noor bɩ y maan wa mam sẽn na n maanã. 18 Maam ne neb nins fãa sẽn be ne maamã sã n peeb bardã, yãmb me sẽn karg n gũbg tãb-sikã segd n peeba y bardã la y kaas n yeele: ‘A Zeova ne a Zedeyõ rẽnda!’”

19 A Zedeyõ ne rap koabgã sẽn da be ne yẽ wã taa tãb-sikã noor nand tɩ yʋn-sʋkã* ta, gũudbã toeeng poor bala. Bãmb peeba bardã+ la b wã rʋg-yalemsã b sẽn da zãad b nusẽ wã.+ 20 Sul a tãabã peeba bardã la b wã rʋg-yalemsã. Bãmb zãa bug-vɩlensã ne goabga, la b peeb bardã ne rɩtgo, n zẽk b koees n yeele: “A Zeova ne a Zedeyõ sʋʋga!” 21 Sasa kãnga, bãmb fãa sẽn da gũbg sikã kell n yalsa b zĩisẽ, tɩ Madiyã tãb-biisã fãa kaasdẽ la b zoetẽ.+ 22 Rap kobs-tã wã kell n peeba bardã, t’a Zeova kɩt tɩ Madiyã tãb-sikã ned kam fãa wẽnemd ne a sʋʋga, n zab ne a to.+ Madiyã tãb-biisã fãa zoeeme n tãag Bɛt-sita, Zerera sẽnese, n kolg Abɛll-mehola+ sẽn be Tabat sɛɛgẽ wã.

23 B boola Israyɛll nebã tɩ b yi Naftali, Asɛɛr la Manase+ tɩ b naag taab n dig Madiyã nebã. 24 A Zedeyõ tʋma koe-taasdb tɩ b kẽng Efrayim soolmã zĩig ning sẽn yaa tãensã n tɩ yeele: “Kẽng-y n tɩ zab-y ne Madiyã. Reng-y-b Bɛt-baara ne Zʋrdẽ kʋɩlgẽ wã, n gɩdg-b tɩ b ra rʋʋg ye.” Woto, Efrayim buudã neb fãa tigma taab n gɩdg-b Bɛt-baara ne Zʋrdẽ kʋɩlgẽ wã. 25 Bãmb yõka Madiyã nanambs a yiibã, a Orɛɛb ne a Zeebe. Bãmb kʋʋ a Orɛɛb a Orɛɛb pĩigã zugu,+ la b kʋ a Zeeb a Zeeb vẽ wẽkr bokẽ wã. Bãmb kell n diga Madiyã nebã,+ la b tall a Orɛɛb ne a Zeeb zutã n tɩ kõ a Zedeyõ Zʋrdẽ kʋɩlgã soolmẽ.