Ezayi sebre
36 Rĩm a Ezekɩyaas naamã yʋʋmd piig la a naas-n-soabã, Asiiri+ rĩm a Senakeriib wa n zaba ne Zida tẽns nins fãa sẽn gũbg ne lalsã, n deeg-ba.+ 2 Asiiri rĩmã tʋma Rabsake wã,*+ ne tãb-biis kʋʋng tɩ b yi Lakiis+ n na n kẽng rĩm a Ezekɩyaas nengẽ Zerizalɛm. Bãmb tɩ yalsa yĩngr bãkã+ ko-sorã noore, so-kõodr ning sẽn dabd gar-loasdã pʋʋgẽ wã noore.+ 3 Dẽ, a Hilkiya biig a Eliyakim+ sẽn get na-yirã yellã, ne a Sebna+ sẽn yaa seb-gʋlsdã, la a Azaf biig a Yowa sẽn yaa seb-bĩngdã yiime n seg-a.
4 Rabsake wã* yeel-b lame yaa: “Mam kotame tɩ y yeel a Ezekɩyaas yaa: ‘Ad Asiiri rĩmã sẽn yaa rĩm-kãsengã sẽn yeele: “Yaa bõe la fo teeg-yã?+ 5 Fo yetame tɩ f tara yam la pãng n tõe n zabe. La yaa gom-vɩɩd bala. Fo teega ãnda, n dat n tõdg maam?+ 6 Gese! Fo teega Ezɩpt sẽn yaa wa tãnwĩig sẽn kao wã. Ned sã n tik-a, a kõsda a nug-pʋgã n sãage. Ezɩpt rĩm a Farawõ yaa woto ne neb nins fãa sẽn teeg-a wã.+ 7 La yãmb sã n yeel maam tɩ yaa yãmb Wẽnnaam a Zeova la y teeg-yã, rẽ yĩnga, pa yẽ zĩ-zãntsã* ne a tẽn-kugã la a Ezekɩyaas sẽn sãame,+ n yaool n yeel Zida ne Zerizalɛm nebã tɩ yaa tẽn-kug-kãngã taoor la b segd n wõgemdã sɩda?”+ 8 Masã, m bõos tɩ f par ne Asiiri+ rĩmã sẽn yaa m zu-soabã: Mam na n kõo foo wed-moos tus a yi, tɩ d ges f na paam neb sẽn na n zomb-ba. 9 Baa Ezɩpt sã n sõng foo ne saar-dãmb* la wed-rʋʋdba, fo tõe n zaba ne mam zu-soabã guvɛrneer a ye sẽn yaa a tʋm-tʋmd ning sẽn yaa bilf n yɩɩd a taabã n tõog-a sɩda? 10 Sẽn paase, fo tẽedame tɩ mam sooga m meng n na n wa zab ne tẽn-kãngã n sãam-a tɩ pa tũ ne a Zeova raab la? Yaa a Zeova meng n yeel maam yaa: ‘Kẽng n tɩ zab ne tẽn-kãngã n sãam-a.’”
11 A Eliyakim ne a Sebna+ la a Yowa sẽn wʋm Rabsake wã+ goamã, bãmb leok-a lame yaa: “D kotame tɩ y gom ne y tʋm-tʋmdbã ne Arameyẽ*+ tɩ tõnd wʋmdame. Ra n gom-y ne tõnd ne Zʋɩf-rãmbã goam tɩ neb nins sẽn be lalgã zugã wʋm ye.”+ 12 La Rabsake wã yeelame yaa: “Yaa yãmb ne y zu-soabã bal la mam zu-soabã tʋm maam tɩ m wa taas koe-kãngã la? Yaa neb nins sẽn zĩ lalgã zugã me. Bãmb ne yãmb fãa na n dɩɩ y bĩndã la y yũ y rʋʋd-koomã.”
13 Dẽ, Rabsake wã yalsame n zẽk a koɛɛg n gom ne Zʋɩf-rãmbã buud-gomdã+ n yeel yaa: “Kelg-y Asiiri rĩmã sẽn yaa rĩm-kãsengã koɛɛga!+ 14 Ad rĩmã sẽn yeele: ‘Ra n bas-y t’a Ezekɩyaas belg-y ye. Bala a pa tõe n fãag yãmb ye.+ 15 Ra n bas-y t’a belg-y me tɩ y teeg a Zeova,+ n yeel-y t’a Zeova na n fãaga yãmba, la tɩ Asiiri rĩmã pa na n tõog n deeg tẽn-kãngã ye. 16 Ra n kelg-y-yã a Ezekɩyaas ye. Bala ad Asiiri rĩmã sẽn yeele: “Bao-y laafɩ ne maam la y sak tɩ m soog-yã. Woto, yãmb ned kam fãa na n dɩɩ a viyn tɩɩs biisi, a kankang biisi, la a yũ a bulg koom, 17 hal tɩ m wa tall-y n kẽng tẽng sẽn wõnd yãmb tẽngã.+ Yaa tẽng sẽn tar kood ne divẽ-paalga, tẽng sẽn pid ne bur la viyn pʋto. 18 Ra n bas-y t’a Ezekɩyaas belg-yã, n yetẽ t’a Zeova na n fãaga yãmb ye. Buud a taabã wẽnnaam-dãmb tõog n fãaga bãmb Asiiri rĩmã nugẽ sɩda?+ 19 Hamat ne Arpaad+ wẽnnaam-dãmbã bee yɛ? Sefarvayim+ wẽnnaam-dãmbã bee yɛ? Bãmb tõog n fãaga Samari mam nugẽ sɩda?+ 20 Tẽnsã fãa wẽnnaam-dãmbã sʋka, bʋs n tõog n fãag b tẽng mam nugẽ, t’a Zeova na n wa tõog n fãag Zerizalɛm mam nugẽ?”’”+
21 La bãmb sĩnda b noor n pa leok-a tɩ bũmb ye. Bala rĩmã ra yeelame tɩ b ra leok-a ye.+ 22 La a Hilkiya biig a Eliyakim sẽn get na-yirã yellã, ne a Sebna+ sẽn yaa seb-gʋlsdã la a Azaf biig a Yowa sẽn yaa seb-bĩngdã pãrsa b futã, n kẽng a Ezekɩyaas nengẽ n tɩ togs-a Rabsake wã goamã.