Zeremi sebre
21 A Zeova goma ne a Zeremi. Yɩɩ wakat ning rĩm a Sedesiyaas+ sẽn tʋm a Malkiya biig a Pasʋʋre,+ ne a Maaseya biig a Sofoni+ sẽn yaa maan-kʋʋdã a Zeremi nengẽ wã, tɩ b tɩ yeel yaa: 2 “D bõos tɩ f sok a Zeova tõnd yĩnga, bala Babilon rĩm a Nebukadnezaar* yika zabr ne tõndo.+ Tõe t’a Zeova na n tʋma a tʋʋm-kãsemsã a yembr tõnd yĩnga, sẽn na yɩl t’a loog n bas tõndo.”+
3 T’a Zeremi yeel-b yaa: “Ad yãmb sẽn segd n tɩ yeel a Sedesiyaase: 4 ‘Ad Israyɛll Wẽnnaam a Zeova sẽn yeele: “Mam na n kɩtame tɩ zab-teed nins sẽn be yãmb nusẽ wã wẽneg n sãam yãmba. Yaa zab-teed nins yãmb sẽn tar n zabd ne Babilon rĩmã,+ la ne Kalde nebã sẽn be lalgã poor n gũbg yãmb n na n zabã. Mam na n tigm-b-la tẽngã tẽn-sʋka. 5 Mam mengã na n zaba ne yãmb+ ne nug sẽn tẽege, la ne kang sẽn tar pãnga. Na n yɩɩ ne sũ-pu-kãseng la sũ-kãbr sẽn yaa wʋsgo.+ 6 Mam na n sãama tẽn-kãngã nebã ne a rũmsã fãa. Bã-loangdg* sẽn yaa toaag n na n kʋ-ba.”’+
7 “‘A Zeova yeelame yaa: “Rẽ poore, mam na n dɩka Zida rĩm a Sedesiyaas ne a tʋm-tʋmdbã la tẽn-kãngã nebã, rat n yeel tɩ neb nins sẽn na n põs bã-loangdgã, zabrã la komã sasa wã, n ning Babilon rĩm a Nebukadnezaar* nugẽ, b bɛɛbã nusẽ, la neb nins sẽn baood n na n yãk b yõyã* nusẽ.+ A na n kʋʋ bãmb ne sʋʋga. A pa na n sãam a sũur b yĩnga, wall a zoe b nimbãanega, pa rẽ bɩ n kʋm-b ye.”’+
8 “Fo segd n yeela nin-buiidã yaa: ‘Ad a Zeova sẽn yeele: “Mam ningda vɩɩm sor la kũum sor yãmb taoore. 9 Zabr ne kom la bã-loangdg n na n kʋ neb nins sẽn na n pa tẽn-kãngã pʋgẽ wã. La ned ning fãa sẽn na n yi n tɩ sak Kalde nebã sẽn gũbg yãmb n na n zabã na n kell n vɩɩmdame. B na n kogla a vɩɩmã.”’*+
10 “‘“Bala mam wẽnemda m neng n tees tẽn-kãngã, la pa a neer yĩng ye. Yaa sẽn na n wa ne yel-beedo.”+ Yaa a Zeova n yeele. “Mam na n dɩk-a lame n ning Babilon rĩmã nugẽ.+ A na n yõog-a-la bugum.”+
11 “‘Yeel Zida rĩmã zak rãmb yaa: Kelg-y-yã a Zeova goamã. 12 Yãmb a Davɩɩd yagense, ad a Zeova sẽn yeele:
“Kao-y bʋʋd ne tɩrlem yibeoog fãa,
la y fãag b sẽn fãad a soabã fãadbã nusẽ,+
tɩ mam sũ-puugrã ra wa widg wa bugum+
yãmb tʋʋm-wẽnsã yĩnga,
n dɩtẽ tɩ ned kae n kiisd-a ye.”’+
13 A Zeova yeelame yaa: ‘Mam zabda ne yãmb a neb nins sẽn be tẽng sẽn be longẽ,*
tẽng sẽn be tẽn-nabrã pĩig kugr zugã.
La sã n yaa ne yãmb a neb nins sẽn sokde: “Ãnda rãmb n na n wa zab ne tõndo?
Ãnda rãmb n na n wa maan pãng n kẽ d zagsẽ wã?”
14 Mam na n sɩbga yãmb
wa sẽn zems y tʋʋmã.’+ Yaa a Zeova n yeele.
‘Mam na n ninga y kãgrã bugum,
t’a rɩ bũmb nins fãa sẽn karg n gũbg-a wã.’”+