Ezekɩyɛll sebre
43 Rẽ poore, raoã talla maam n kẽng rignoor ning sẽn tees yaangã.+ 2 Be, mam yãa Israyɛll Wẽnnaamã ziir sẽn yit yaang n watẽ,+ t’a koɛɛgã yaa wa koom sẽn zoet ne pãng rãamde.+ A ziirã ra kõta tẽngã vẽenem.+ 3 Bũmb ning mam sẽn yã wã ra wõnda vẽnegr ning mam sẽn paame, mam* sẽn wa n kẽng n na n tɩ kɩt tɩ galʋ-tẽngã lebg raboogã. A yalẽ wã ra yaa wa bũmb ning mam sẽn yã Kebaar kʋɩlgã noorã.+ Dẽ, mam lʋɩɩme n fõgen m neng tẽnga.
4 A Zeova ziirã tũu rignoor ning sẽn tees yaangã n kẽ wẽnd-doogẽ wã.*+ 5 Vʋʋsem* n zẽk maam, n tall maam n kẽ saman-bilẽ wã. Mam yãame tɩ wẽnd-doogã ra pida ne a Zeova ziirã.+ 6 Rẽ poore, mam wʋma ned sẽn be wẽnd-doogẽ wã n gomd ne maam, tɩ raoã wa yals mam sɛɛgẽ.+ 7 Raoã yeela maam yaa:*
“Ninsaal biiga, ka yaa mam geerã zĩiga,+ la zĩig ning mam sẽn dɩgend m naoã.+ Yaa zĩig ning mam sẽn na n zĩnd Israyɛll nebã sʋk wakat fãa yĩngã.+ Israyɛll buudã neb pa na n le sãam mam yʋʋrã sẽn yaa sõngã ye.+ Bãmb ne b rĩm-dãmbã pa na n le sãam mam yʋʋrã ne b sẽn yood ne wẽnnaam-dãmb a taabã* ye. B pa na n le sãam-a me ne b rĩm-dãmbã kũ-rãmb ye.* 8 B ninga b rigno-koakã mam rigno-koakã sɛɛga, la b ning b kʋɩlengã ra-luk mam kʋɩlengã ra-luk sɛɛga, tɩ yaa lalg bal n be maam ne bãmb sʋka.+ B sãama mam yʋʋrã sẽn yaa sõngã, bõn-wẽns nins b sẽn maanã yĩnga. Dẽ, mam sãam-b-la zãng ne sũ-puugri.+ 9 Masã, bɩ b bas b sẽn yood ne wẽnnaam-dãmb a taabã,* la b tall b rĩm-dãmbã kũ-rãmb n zãag ne maam. Dẽ, mam na n zĩnda b sʋk wakat fãa yĩnga.+
10 “Sã n yaa ne foom a ninsaal biiga, bilg Israyɛll buudã neb wẽnd-doogã sẽn yaa to-to wã,+ sẽn na yɩl tɩ yãnd yõk-b b kongrã yĩnga.+ B segd n bao n bãnga a pãlã wã sẽn yaa to-to.* 11 Bũmb nins fãa b sẽn maanã yãnd sã n yõk-ba, fo segd n kɩtame tɩ b bãng wẽnd-doogã pãlã wã, a yalẽ wã, zĩis nins b sẽn tũud n yitã la a rignoyã.+ Wilg-b a pãlã-rãmbã fãa ne noy nins m sẽn gãneg a wɛɛngẽ wã, a pãlã-rãmbã la a tõodã, la f gʋls-b sebr zug b nifẽ, sẽn na yɩl tɩ b yã a pãlã-rãmbã fãa, la b tũ a noyã.+ 12 Ad wẽnd-doogã tõogã: Zĩig ning sẽn gilg tãngã zugã tõr yaa sõng wʋsgo.+ Kelge! Woto yaa wẽnd-doogã tõogo.
13 “Ad b sẽn mak tẽn-kugrã to-to. B mag-a-la ne kãntɩɩga.+ (B paasa nug-biis a naas kãntɩɩg fãa zugu.)* A tẽngrã yaa kãntɩɩg a ye, t’a yalmã me yaa kãntɩɩg a ye. Kogr n gilg a kɩremsã fãa t’a yalmã yaa nug-yakemde.* Tẽn-kugrã tẽngrã yaa woto. 14 Sẽn sɩng ne a sɛɛgã sẽn be tẽngã n tãag tẽngr kogrã sẽn gũbg-a wã yaa kãntɩɩg a yiibu, t’a yalmã yaa kãntɩɩg a yembre. Sẽn sɩng ne kogrã sẽn yaa bilfã sẽn gũbg-a wã, n tãag kogrã sẽn yaa bedrã sẽn gũbg-a wã yaa kãntɩɩg a naase, t’a yalmã yaa kãntɩɩg a ye. 15 Tẽn-kugrã bug-toaalg zãntlem yaa kãntɩɩg a naase, tɩ yɩɩl a naas be tẽn-kugrã bug-toaalgã zugu.+ 16 Tẽn-kugrã bug-toaalg kɩremsã zema taaba. A woglmã yaa kãntɩɩg piig la a yiibu, t’a yalmã me yaa kãntɩɩg piig la a yiibu.+ 17 Kogrã sẽn gilg-a wã kɩrems a naasã woglem yaa kãntɩɩg piig la a naase, t’a yalmã me yaa kãntɩɩg piig la a naase. Kogrã sẽn gilg a noorã yaa kãntɩɩg pʋɩ-sʋka, t’a sɛɛgã kɩreng fãa yaa kãntɩɩg a ye.
“A rʋʋdsã teesa yaanga.”
18 Rẽ poore, raoã yeela maam yaa: “Ninsaal biiga, ad a Zeova sẽn yaa Zu-soab sẽn ka to wã sẽn yeele: ‘B sã n wa maan tẽn-kugrã n sa, ad noy nins b sẽn segd n tũ, sẽn na yɩl n maand maand sẽn yõogd bugmã, la b mesd zɩɩmã a zugu:’+
19 “‘Yãmb segd n yãka lol-poll rũm-bɛdã sʋk n kõ a Zadok yagensã+ sẽn yaa Levi buudã neb n yaa maan-kʋʋdbã, tɩ yɩ yel-wẽnd maoongo.+ Bãmb n kolgd maam n tʋmd mam tʋʋmã.’ Yaa a Zeova sẽn yaa Zu-soab sẽn ka to wã n yeele. 20 ‘Yãmb segd n yãka a zɩɩmã n ning tẽn-kugrã yɩɩl a naasã zutu, kogrã sẽn gilg-a wã kɩrems a naasã zutu, la kogrã sẽn gilg a noorã zugu, sẽn na yɩl n yɩlg-a ne yel-wẽndã la y maan paasg* a yĩnga.+ 21 Rẽ poore, rɩk-y lol-pollã sẽn yaa yel-wẽnd maoongã, sẽn na yɩl tɩ maan-kʋʋdbã yõog-a wẽnd-doogã zĩig ning b sẽn yãk rẽ yĩngã, wẽnd-doogã yɩnga.+ 22 Rasem a yiib-n-soabã, yãmb na n kõo boɛɛg sẽn pa tar zang tɩ yɩ yel-wẽnd maoongo. B na n yɩlga tẽn-kugrã ne yel-wẽndã, wa b sẽn tall lol-pollã n yɩlg-a ne yel-wẽndã to-to wã.’
23 “‘Yãmb sã n wa yɩlg-a ne yel-wẽndã n sa, y segd n yãka rũm-bɛdã sʋk lol-poll sẽn pa tar zanga, la rũm-bõonegã sʋk pe-raoog sẽn pa tar zang n maan maoongo. 24 Yãmb segd n dɩk-b lame n kõ a Zeova. Maan-kʋʋdbã segd n yugl-b-la yamsem+ la b rɩk-b n maan maoong sẽn yõogd bugum n kõ a Zeova. 25 Rasem a yopoe pʋgẽ, daar fãa yãmb segd n kõo boɛɛg tɩ yɩ yel-wẽnd maoongo,+ n paas lol-poll y sẽn yãk rũm-bɛdã sʋka, la pe-raoog y sẽn yãk rũm-bõonegã sʋka. Yãmb segd n kõo rũms sẽn pa tar zanga.* 26 Rasem a yopoe pʋgẽ, b segd n maana paasg tẽn-kugrã yĩnga. B segd n yɩlg-a lame, n yaool n sɩng maand kũun a zugu. 27 Rayã sõor sã n wa pidi, rasem a nii-n-soabã tɛka,+ maan-kʋʋdbã na n yõogda yãmb* maand sẽn yõogd bugmã la y zems-n-taar maandã tẽn-kugrã zugu. Woto, yãmb na n taa mam yam.’+ Yaa a Zeova sẽn yaa Zu-soab sẽn ka to wã n yeele.”