Ezekɩyɛll sebre

48 “Ad buud toɛy-toɛyã yʋya, sẽn sɩng ne rɩtg kɩrengã: Dan buudã pʋɩɩr+ yɛgda Ɛtlon sorã n tãag Lebo-Hamate,*+ n sãag n ta Hazaar-enanne, Damaas toadgã sẽn be rɩtg sẽnesã, la a sãag n ta Hamat sɛɛga.+ A sɩngda yaang toadgã n tãag nin-taoor toadgã. 2 Asɛɛr buudã pʋɩɩr+ tonga Dan buudã toadgã, sẽn sɩng ne yaang toadgã n tãag nin-taoor toadgã. 3 Naftali buudã pʋɩɩr+ tonga Asɛɛr buudã toadgã, sẽn sɩng ne yaang toadgã n tãag nin-taoor toadgã. 4 Manase buudã pʋɩɩr+ tonga Naftali buudã toadgã, sẽn sɩng ne yaang toadgã n tãag nin-taoor toadgã. 5 Efrayim buudã pʋɩɩr tonga Manase buudã toadgã,+ sẽn sɩng ne yaang toadgã n tãag nin-taoor toadgã. 6 Rubɛn buudã pʋɩɩr tonga Efrayim buudã toadgã,+ sẽn sɩng ne yaang toadgã n tãag nin-taoor toadgã. 7 Zida buudã pʋɩɩr tonga Rubɛn buudã toadgã,+ sẽn sɩng ne yaang toadgã n tãag nin-taoor toadgã. 8 Zida buudã toadgẽ wã, sẽn sɩng ne yaang toadgã n tãag nin-taoor toadgã, kũun ning yãmb sẽn segd n welg toorã yalem segd n yɩɩ kãntɩɩg* tus-pisi la a nu.+ A segd n zemsa buud a taabã pʋɩɩr woglem, sẽn sɩng ne yaang toadgã n tãag nin-taoor toadgã. Wẽnd-doogã na n zĩnda a tẽn-sʋka.

9 “Kũun ning yãmb sẽn segd n welg toor a Zeova yĩngã woglem na n yɩɩ kãntɩɩg tus-pisi la a nu, t’a yalmã yɩ kãntɩɩg tus-piiga. 10 Rẽ na n yɩɩ kũun sẽn yaa sõng maan-kʋʋdbã yĩnga.+ A rɩtg kɩrengã na n yɩɩ kãntɩɩg tus-pisi la a nu, tɩ nin-taoor kɩrengã yɩ kãntɩɩg tus-piiga. A yaang kɩrengã na n yɩɩ kãntɩɩg tus-piiga, tɩ goabg kɩrengã yɩ kãntɩɩg tus-pisi la a nu. A Zeova roogã na n zĩnda a tẽn-sʋka. 11 A na n yɩɩ maan-kʋʋdb nins b sẽn welg toor a Zadok yagensã+ sʋkã yĩnga, rat n yeel tɩ neb nins sẽn da get mam tʋʋmã yelle, la sẽn pa zãag b mens ne maam, Israyɛll nebã ne Levi buudã neb sẽn wa n zãag ne maamã.+ 12 B na n paama pʋɩɩr zĩigã b sẽn welg toor n kõ tɩ yaa bũmb sẽn yaa sõng wʋsgã pʋgẽ, Levi buudã neb toadgẽ.

13 “Levi buudã neb na n paama pʋɩɩr maan-kʋʋdbã zĩigã sɛɛga. A woglmã na n yɩɩ kãntɩɩg tus-pisi la a nu, t’a yalmã yɩ kãntɩɩg tus-piiga. (Woglmã tõr na n yɩɩ kãntɩɩg tus-pisi la a nu, t’a yalmã yɩ kãntɩɩg tus-piiga.) 14 B pa segd n yãk soolmã pʋɩ-kãng sẽn yaa sõma wʋsgã zĩig baa a ye n koose, n tek wall b kõ ned a to ye. Bala yaa bũmb sẽn yaa sõng a Zeova yĩnga.

15 “Zĩig ning sẽn kell t’a yalmã yaa kãntɩɩg tus a nu wã, n yɛgd toadgã woglem sẽn yaa kãntɩɩg tus-pisi la a nu wã na n yɩɩ tẽngã tʋʋm a taabã yĩnga,+ rot meeb la rũms wãbneg zĩiga. Galʋ-tẽngã na n zĩnda a tẽn-sʋka.+ 16 Ad galʋ-tẽngã woglem la a yalem: Rɩtg kɩrengã yaa kãntɩɩg tus a naas la kobs-nu, tɩ goabg kɩrengã yaa kãntɩɩg tus a naas la kobs-nu. Yaang kɩrengã yaa kãntɩɩg tus a naas la kobs-nu, tɩ nin-taoor kɩrengã me yaa kãntɩɩg tus a naas la kobs-nu. 17 Galʋ-tẽngã rũms wãbneg zĩigã rɩtg kɩrengã na n yɩɩ kãntɩɩg kobs-yi la pis-nu, tɩ goabg kɩrengã yɩ kãntɩɩg kobs-yi la pis-nu. Yaang kɩrengã na n yɩɩ kãntɩɩg kobs-yi la pis-nu, tɩ nin-taoor kɩrengã me yɩ kãntɩɩg kobs-yi la pis-nu.

18 “Pʋɩɩr ning sẽn kellã woglem na n zemsa kũun sẽn yaa sõngã woglem.+ Yaang kɩrengã na n yɩɩ kãntɩɩg tus-piiga, tɩ nin-taoor kɩrengã me yɩ kãntɩɩg tus-piiga. A na n zemsa kũun sẽn yaa sõngã. Bũmb nins sẽn na n wom be wã na n yɩɩ neb nins sẽn tʋmd tẽngã yĩngã rɩɩbo. 19 Neb nins sẽn yit Israyɛll buud toɛy-toɛyã fãa pʋsẽ n tʋmd tẽngã yĩngã na n kooda be.+

20 “Kũunã tõr woglmã ne a yalmã zema taaba, n yaa kãntɩɩg tus-pisi la a nu. Yãmb segd n welg-a-la toor tɩ yɩ kũun sẽn yaa sõngo, n paas galʋ-tẽngã soolmã.

21 “Bũmb ning sẽn kell kũun sẽn yaa sõngã kɩrems a yiibã fãa wã, ne galʋ-tẽngã soolmẽ wã na n yɩɩ naabã rẽnda.+ A na n zĩnda tods nins woglem sẽn yaa kãntɩɩg tus-pisi la a nu, n be kũunã yaang la a nin-taoorã wogelle. A na n zemsa pʋɩ nins sẽn yɛg-a wã. A na n yɩɩ naabã rẽnda. Kũun sẽn yaa sõngã ne wẽnd-doogã na n zĩnda a tẽn-sʋka.

22 “Levi buudã neb soolem ne galʋ-tẽngã soolem na n zĩnda naabã sẽn so wã sʋka. Naabã zĩig na n zĩnda Zida buudã toadg+ ne Bẽnzame buudã toadg sʋka.

23 “Sã n yaa ne buud nins sẽn ketã, Bẽnzame buudã pʋɩɩr sɩnga yaang toadgã n tãag nin-taoor toadgã.+ 24 Sɩmeyõ buudã pʋɩɩr tonga Bẽnzame buudã toadgã,+ sẽn sɩng ne yaang toadgã n tãag nin-taoor toadgã. 25 Isakaar buudã pʋɩɩr+ tonga Sɩmeyõ buudã toadgã, sẽn sɩng ne yaang toadgã n tãag nin-taoor toadgã. 26 Zabulõ buudã pʋɩɩr tonga Isakaar buudã toadgã,+ sẽn sɩng ne yaang toadgã n tãag nin-taoor toadgã.+ 27 Gaad buudã pʋɩɩr tonga Zabulõ buudã toadgã,+ sẽn sɩng ne yaang toadgã n tãag nin-taoor toadgã. 28 Goabg toadgã sẽn be Gaad buudã toadgẽ wã na n sɩnga Tamaar+ n tãag Meriba-kadɛɛs koomã,+ n sãag n ta Kosoogã*+ la Mog-kãsengã.*

29 “Yaa soolem-kãngã la yãmb segd n pʋɩ n kõ Israyɛll buud toor-toorã tɩ yɩ b rogem-pʋɩɩre.+ Woto n na n yɩ b pʋɩya.”+ Yaa a Zeova sẽn yaa Zu-soab sẽn ka to wã n yeele.

30 “Ad galʋ-tẽngã noy nins nebã sẽn na n tũud n yitã: Rɩtg kɩrengã woglem na n yɩɩ kãntɩɩg tus a naas la kobs-nu.+

31 B na n dɩka Israyɛll buud toor-toorã yʋy n pʋd galʋ-tẽngã rignoyã. Rignoy a tãabã sẽn be rɩtgã sʋka, a yembr yaa Rubɛn buudã yĩnga, t’a yembr yaa Zida buudã yĩnga, t’a yembr yaa Levi buudã yĩnga.

32 Yaang kɩrengã woglem na n yɩɩ kãntɩɩg tus a naas la kobs-nu. Rignoy a tãab n be be: A yembr yaa Zozɛf buudã yĩnga, t’a yembr yaa Bẽnzame buudã yĩnga, t’a yembr yaa Dan buudã yĩnga.

33 Goabg kɩrengã woglem na n yɩɩ kãntɩɩg tus a naas la kobs-nu. A tara rignoy a tãabo: A yembr yaa Sɩmeyõ buudã yĩnga, t’a yembr yaa Isakaar buudã yĩnga, t’a yembr yaa Zabulõ buudã yĩnga.

34 Nin-taoor kɩrengã woglem na n yɩɩ kãntɩɩg tus a naas la kobs-nu. A tara rignoy a tãabo: A yembr yaa Gaad buudã yĩnga, t’a yembr yaa Asɛɛr buudã yĩnga, t’a yembr yaa Naftali buudã yĩnga.

35 “Galʋ-tẽngã kɩrems fãa sẽn naag taab woglem na n yɩɩ kãntɩɩg tus-piig la a nii. Daar-n-kãng tɛka, galʋ-tẽngã yʋʋr na n yɩɩ a Zeova bee ka.”+