Ezekɩyɛll sebre

47 Rẽ poore, a talla maam n leb wẽnd-doogã rignoorẽ.+ Mam yãame tɩ koom n yit wẽnd-doogã rigno-koakã tẽngre, n zoet n teesd yaang sẽnese.+ Bala wẽnd-doogã noor da teesa yaanga. Koomã ra zoeta wẽnd-doogã rɩtg kɩrengã tẽngr n sigda, tẽn-kugrã goabga.

2 Dẽ, a talla maam n tũ rɩtg rignoorã n yi.+ A talla maam n yi n gilg n kẽng yɩng rignoor ning sẽn tees yaangã.+ Be, mam yãa koom sẽn bund rɩtg kɩrengẽ wã.

3 Raoã zãa wĩ-makdg n tees yaang sẽnese.+ A maka kãntɩɩg* tusri, la a kɩt tɩ mam pasg koomã. Koomã zulmã ra zemsa nao-sẽbã.

4 A leb n maka kãntɩɩg tusri, la a kɩt tɩ mam pasg koomã. Koomã zulmã ra zẽk n taa rũma.

Rẽ poore, a maka kãntɩɩg tusri, la a kɩt tɩ mam pasg koomã. Koomã zulmã ra zẽk n taa sɛɛga.

5 A sẽn le mak kãntɩɩg tusrã, koomã lebga kʋɩlg mam sẽn da pa tõe n kẽn n pasge. Bala koomã ra yaa zulung tɩ yaa tɩlɛ tɩ ned rug n tõog n pasge. Yaa kʋɩlg ned sẽn pa tõe n kẽn ne nao n pasge.

6 A soka maam yaa: “Ninsaal biiga, fo yãame bɩ?”

Rẽ poore, a kɩtame tɩ mam kẽn n lebg n wa kʋɩlgã noore. 7 Mam sẽn lebg n wa wã, mam yãame tɩ tɩɩs wʋsg n da be kʋɩlgã noy a yiibã fãa.+ 8 Dẽ, a yeela maam yaa: “Ko-kãngã zoet n teesda yaang soolmã, n na n kell n pasg Araba wã*+ n tɩ kẽ mogrẽ wã. A sã n kẽ mogrẽ wã,+ mogrã koom na n lebga noogo. 9 Bõn-vɩɩs* wʋsg na n tõog n zĩnda zĩig ning fãa koomã* sẽn zoete. Be, zĩm wʋsg na n zĩndame, bala ko-kãngã zoeta be. Mogrã koom na n lebga noogo. Bũmb fãa na n vɩɩmda zĩig ning fãa kʋɩlgã sẽn zoet n kẽngdẽ.

10 “Zĩm-yõgdb n na n yals mogrã noore, sẽn sɩng Ɛn-gedi+ n tɩ tãag Ɛn-eglayim. Zĩm-gãmba kʋɩɩsg zĩig na n zĩnda be. Zĩm buud toor-toor na n zĩnda be wʋsgo, wa Mog-kãsengã* zĩmã.+

11 “Mogrã na n talla bãt la bɛgd zĩis sẽn pa na n toeeme. Yamsem n na n kell n zĩnd zĩ-kãense.+

12 “Tɩɩs buud fãa sẽn womd biis b sẽn dɩt na n yii kʋɩlgã noy a yiibã fãa. B vãadã pa na n zelg ye. B pa na n kong biis me ye. Kiuug fãa, b na n womda biisi, bala koom ning b sẽn fõogdã yita wẽnd-doogẽ wã.+ B biisã na n yɩɩ rɩɩbo, tɩ b vãadã yɩ bãas tɩɩm.”+

13 Ad a Zeova sẽn yaa Zu-soab sẽn ka to wã sẽn yeele: “Ad soolem ning yãmb sẽn na n kõ Israyɛll buud piig la a yiibã tɩ yɩ b rogem-pʋɩɩre. La Zozɛf buudã na n paama pʋɩ a yiibu.+ 14 Yãmb na n soog-a lame. Y na n paama pʋɩɩr sẽn zem taaba.* Mam da wẽename tɩ m na n kõo y yaab-rãmbã soolem-kãngã.+ Masã, m dɩk-a lame n kõ yãmb tɩ yaa y rogem-pʋɩɩre.

15 “Ad soolmã rɩtg sẽnes toadgã: A sɩngda Mog-kãsengẽ wã, n tũ Ɛtlon sorã+ n tees Zedaade,+ 16 Hamate,+ Berota,+ la Sibrayim sẽn be Damaas soolmã ne Hamat soolmã sʋkã, n tãag Hazɛɛr-hatikon sẽn be Horan toadgã sɛɛgã.+ 17 Rẽnd toadgã na n sɩnga mogrã n yɛg Damaas soolmã toadgã sẽn be rɩtgã, ne Hamat toadgã+ n tãag Hazaar-enonne.+ Woto yaa rɩtg sẽnes toadgã.

18 “Yaang sẽnes toadgã tũuda Horan ne Damaas soolmã sʋka, n yɛg Zʋrdẽ kʋɩlgã sẽn be Galaad+ ne Israyɛll soolmã sʋkã. Yãmb segd n sɩnga toadgẽ wã n mak n tãag yaang mogrã.* Woto yaa yaang sẽnes toadgã.

19 “Goabg sẽnes toadgã na n sɩnga Tamaar n tãag Meriba-kadɛɛs koomã,+ la a sãag n ta Kosoogã* ne Mog-kãsengã.+ Woto yaa goabg sẽnes toadgã.

20 “Nin-taoor sẽnes toadgã yaa Mog-kãsengã, n sɩng ne goabg toadgã n tãag zĩig a ye sẽn tees Lebo-hamate.*+ Woto yaa nin-taoor sẽnes toadgã.”

21 “Yãmb segd n pʋɩɩ taab soolmã, Israyɛll buud piig la a yiibã sʋka. 22 Yãmb segd n pʋɩɩ taab tɩ yɩ y rogem-pʋɩɩre, la y kõ sãamb nins sẽn be ne yãmb n dog kamb yãmb sʋkã me. Yãmb nifẽ, b na n yɩɩ wa Israyɛll tẽng-n-biisi. B na n naaga yãmb n paam rogem-pʋɩɩr Israyɛll buud toor-toorã sʋka. 23 Yãmb segd n kõo sãan rogem-pʋɩɩr buud ning sʋk a sẽn be wã soolmẽ.” Yaa a Zeova sẽn yaa Zu-soab sẽn ka to wã n yeele.