Zoob sebre
23 A Zoob leokame n yeel yaa:
2 “Baa rũndã, mam na n maneg n yẽgmame.+
Mam pãngã saa m sidgrã yĩnga.
3 Mam sã n da mi Wẽnnaam sẽn beẽ,+
m da na n kẽnga a yirã.+
4 M da na n kẽnga a taoor ne m yellã,
n togs bũmb toor-toor n bao bʋʋm.
5 Mam da na n bãnga yẽ sẽn na n leok-m to-to,
la m kelg a sẽn na n yeel maam bũmb ningã neere.
6 Yẽ na tall a pãn-kãsengã n zab ne maam sɩda?
Ayo! Hakɩɩka, a na n kelga maam.+
7 Beenẽ, nin-tɩrg na n tõog n manega a yell ne yẽ,
la m Bʋ-kaoodã na n kõ-m-la bʋʋm wakat fãa yĩnga.
8 La mam sã n kẽng yaanga, a pa be beenẽ ye.
Mam lebgdame n pa tõe n yã-a ye.
9 Yẽ sã n tʋmd nug-goabga, mam pa tõe n ges-a ye.
A wẽnemdedame n tees nug-rɩtgo, tɩ mam ket n pa ne-a ye.
10 La yẽ mii sor ning mam sẽn dɩkã.+
A sã n wa mak maam n sa, mam na n lebga wa sãnem halaale.+
11 Mam naoã tũu yẽ na-bogdã kɛpɩ.
Mam paa a sorã zug n pa bʋdg ye.+
12 Mam pa bas tõogã sẽn yit a noorẽ wã tũub ye.
Mam bĩnga yẽ goamã m sũurẽ sõma+ tɩ zʋʋg m sẽn da segd n maanã.
13 A sã n yãk yam n na n maan bũmbu, ãnd n tõe n gɩdg-a?+
Yẽ sã n dat n maan bũmbu, a maandame.+
14 Bala a na n pidsa bũmb ning fãa a sẽn yãk yam n na n maan mam yĩngã,
la bũmb wʋsg a woto n be a yamẽ.
15 Rẽ n so tɩ yẽ kɩt tɩ mam maand yɩɩre.
Mam sã n tags a yelle, m rabeemã paasdame.
16 Wẽnnaam kɩtame tɩ mam yɛɛsdẽ,
Sẽn-tõe-a-fãa wã kẽesa maam rabeem.
17 La likã nan pa tõog tɩ mam sĩndi,
lik bida wã me sẽn lud m nengã pa tõog ye.