Zeremi sebre
12 Zeova, yãmb yaa tɩrlem soaba.+ Mam sã n wa togsd yãmb bũmb sẽn sãamd m sũuri,
la baa mam sã n wa gomd bʋ-kaoor yell ne yãmba, yãmb yaa tɩrlem soaba.
La bõe yĩng tɩ nin-wẽnsã yɛl yãkd nenga?+
Bõe yĩng tɩ zãmb dãmbã pa maand yɩɩre?
2 Yãmb sel-b lame, tɩ b kɩ yẽga.
B bɩɩme n wom biisi.
B wae n gomda yãmb yelle, la b sũyã zãra ne yãmba.+
3 La yãmb mii maam sõma, Zeova.+ Yãmb nee maam.
Yãmb feesa mam sũurã, n miẽ tɩ mam nonga yãmb ne m sũur fãa.+
Ning-y-b kɛɛng wa piis b sẽn welg koodg yĩnga.
Welg-y-b toor kʋʋbã daar yĩnga.
4 Soolmã na n kell n kʋɩɩme n ta dabʋre?
Wetã moodã la b tɩɩsã na n kell n kʋɩɩme n ta dabʋre?+
Neb nins sẽn vɩ be wã wẽnemã yĩnga,
we-rũmsã ne bõn-yɩgdɩ wã menemame.
Bala b yeelame yaa: “Wẽnnaam pa ne bũmb ning sẽn na n paam tõndã ye.”
Fo yamã gãee bãan soolem sẽn be laafɩ pʋgẽ.
La fo sã n wa be Zʋrdẽ kʋɩlgã wogellã kãgrẽ, fo na n maana wãna?
6 Bala baa fo ba-biisã, fo ba-roakã zak rãmb
zãmba foo.+
B zẽka b koees n kãab foo wẽnga.
Ra kɩs-b sɩda,
baa b sã n wa gomd gom-nood ne-fo.
7 “Mam loog n basa m doogã.+ Mam zoe n basa m pʋɩɩrã.+
Mam dɩka m sẽn nong a soab wʋsgã* n ning a bɛɛbã nusẽ.+
8 Mam nifẽ, mam pʋɩɩrã lebga wa gɩgemd sẽn be kãgrẽ.
A kelmame n zab ne maam.
Rẽ n kɩt tɩ m wa baas n kisg-a.
9 Ne maam, mam pʋɩɩrã yaa wa sɩlg sẽn tar kõbg toor-toore.*
Sɩls a taabã gũbg-a lame n na n zab ne-a.+
Yãmb a we-rũmsã fãa, wa n tigm-y taaba.
Wa n dɩ-y-yã.+
B kɩtame tɩ mam pʋʋgã sẽn da yaa neerã lebg we-raoog tɩ bũmb pa le be a pʋgẽ ye.
11 A lebga zĩ-vɩʋʋgo.
B kɩtame tɩ soolmã tõr lebg raboogo,
la ned baa a ye pa maand yɩɩr rẽ yĩng ye.+
12 Sãamdbã tũu soay nins fãa sẽn pasgd we-raoogã n wa,
bala a Zeova sʋʋgã kʋʋda neb soolmã kɩreng a ye n tãag
a to wã.+
Ned baa a ye* pa zĩ bãan ye.
13 B bʋda bɩle, la b kẽeba gõose.+
B tʋmame n ya, la pa naf-b ye.
A Zeova sũ-pu-kãsengã yĩnga,
b koodã yãnd na n yõk-b lame.”
14 Ad bũmb ning a Zeova sẽn yeele: “Sã n yaa ne mam yagsã fãa sẽn yaa nin-wẽnsã, rat n yeel tɩ neb nins sẽn sɩɩsd mam pʋɩɩrã m sẽn kɩt tɩ Israyɛll sẽn yaa mam nin-buiidã soogã,+ mam na n võ-b-la b soolmã pʋgẽ.+ Mam na n võo Zida buudã neb n yiis b sʋka. 15 La m sã n võ-b poore, m na n le zoee b nimbãanega, n tall b ned kam fãa n lebg n wa a rogem-pʋɩɩrẽ, la a soolmẽ.”
16 “B sã n zãms mam nin-buiidã manesmã n dɩk b togs-n-taare, la b wẽend ne mam yʋʋrã n yetẽ tɩ b ‘wẽenda ne a Zeova sẽn vɩ wã,’ wa b sẽn zãms mam nin-buiidã tɩ b wẽen ne a Baallã, b na n paama zĩig mam nin-buiidã sʋka. 17 La buud sã n zãgs t’a kõn sake, m na n võoga bu-kãng me. M na n võog-a lame la m sãam-a.” Yaa a Zeova n yeele.+