Ezekɩyɛll sebre

7 A Zeova le goma ne maam n yeele: 2 “Foom a ninsaal biiga, ad a Zeova sẽn yaa Zu-soab sẽn ka to wã sẽn yet Israyɛll soolmã: ‘Saabã taame! Saabã waa soolmã kɩrems a naasã. 3 Saabã waa fo zug masã. Mam na n kiiga m sũ-puugrã fo zugu. Mam na n kaoo fo bʋʋd wa sẽn zems f manesmã, la m sok foom f tʋʋm-wẽnsã fãa yĩnga. 4 Mam pa na n sãam m sũur f yĩnga, wall m zoe f nimbãaneg ye.+ Bala mam na n kɩtame tɩ f manesmã biis wa f zugu. Fo na n namsa f tʋʋm-wẽnsã biis yĩnga.+ Woto, fo na n bãngame tɩ mam yaa a Zeova.’+

5 “Ad a Zeova sẽn yaa Zu-soab sẽn ka to wã sẽn yeele: ‘Yel-beed n wate. Yaa yel-beed sẽn pa wõnd a taaba.+ 6 Saab n wate. Saabã na n waame. A na n waa fo zug zĩig pʋgẽ. Gese! A watame. 7 Foom a soolmã neda, fo saabã taame. Wakatã watame. Daarã kolgame.+ Zũnd-zãnd n be tãensã zut lakae, pa sũ-noog kaasg ye.

8 “‘Ka la bilfu, mam na n pʋdga m sũ-puugrã fo zugu.+ Mam na n kiiga m sũ-puugrã fãa fo zugu.+ Mam na n kaoo fo bʋʋd wa sẽn zems f manesmã, la m sok foom f tʋʋm-wẽnsã fãa yĩnga. 9 Mam pa na n sãam m sũur f yĩnga, wall m zoe f nimbãaneg ye.+ Bala mam na n kɩtame tɩ f manesmã biis wa f zugu. Fo na n namsa f mengã tʋʋm-wẽnsã biis yĩnga. Woto, fo na n bãngame tɩ yaa maam a Zeova n sɩbgd foo.+

10 “‘Ad daarã! A watame!+ Fo saabã taame. Rasaarã ninga puudu, tɩ wuk-m-meng tobe. 11 Nen-kɛglem lebga wẽnem dasaare.+ Fo mengã, f paoongã, f neb kʋʋngã wall f ziirã pa na n põs ye. 12 Wakatã na n taame. Daarã na n taame. Bɩ sẽn daad-a ra maan sũ-noogo, tɩ sẽn koosd-a me ra maan sũ-sãang ye. Bala sũ-yikr n be kʋʋngã tõr yĩnga.*+ 13 Baa sẽn koos-a a zĩigã sã n põse, a pa na n lebg n wa a zĩigẽ wã ye. Bala vẽnegrã yaa kʋʋngã tõr yĩnga. Ned baa a ye pa na n lebg n wa ye. Ned baa a ye pa na n kogl a vɩɩm a kongrã yĩng ye.*

14 “‘B peeba tãntãoog+ tɩ ned fãa segl n sa, la ned baa a ye pa rabd zabrã ye. Bala mam sũurã yika wʋsg ne kʋʋngã tõre.+ 15 Yɩng yaa sʋʋga,+ tɩ pʋgẽ yaa bã-loangdg la kom. Sʋʋg n na n kʋ ned ning fãa sẽn be weoogẽ wã. Kom la bã-loangdg n na n kʋ sẽn be-b tẽngã pʋgẽ wã.+ 16 B neb nins sẽn põsã sẽn na n tõog n zoe wã na n kẽnga tãensẽ wã. B ned kam fãa na n wẽeda sir a kongrã yĩng wa marwalã sẽn be londẽ wã.+ 17 B nusã fãa na n kiime n pa le tar pãng ye. B rũmã fãa na n sodgda koom.*+ 18 B yera boto,+ n digd ne rabeem. Ned kam fãa na n paama yãnde. Zutã fãa na n kõogame.*+

19 “‘B na n loba b wanzuri wã soayã zutu. B sãnemã na n lebga bũmb b sẽn kisi. B wanzuri wã wall b sãnemã pa na n tõog n fãag-b a Zeova sũ-puugrã daar ye.+ B* pa na n paam dɩɩb n dɩ n yiis b kom, wall b pids b pʋsã ye. Bala yaa bõn-kãens* n da lebg bũmb sẽn kɩtd tɩ ned lak n lʋɩ, n da kɩtdẽ tɩ b kongdẽ. 20 B wuka b mens ne b fan-teedã neermã. B rɩk-b lame* n maan wẽnnaam-dãmba, bõn-naands sẽn yaa bõn-yoodo.+ Rẽ n so tɩ mam na n kɩt tɩ bõn-kãens* lebg bũmb b sẽn kisi. 21 Mam na n basa bõn-kãens sãambã nusẽ tɩ b zɛ. Mam na n dɩk-b lame n kõ dũniyã nin-wẽnsã tɩ yɩ te-zɛɛdem. B na n dẽgm-b lame.

22 “‘Mam na n wẽnemda m nengã kɛɛng n bas-ba.+ B na n dẽgma mam zĩ-soalgdgã.* Fãadb n na n kẽ a pʋgẽ n dẽgm-a.+

23 “‘Maan-y bãense,*+ bala soolmã pida ne neb b sẽn kao bʋʋd kɛgr n kʋ zɩɩm,+ tɩ galʋ-tẽngã pid ne nen-kɛglem.+ 24 Mam na n kɩtame tɩ buud ning sẽn yaa wẽng n yɩɩdã neb wa.+ B na n deesa b rotã,+ la b kɩt tɩ b pãens rãmbã wuk-m-mengã sa. B na n dẽgma b zĩ-sõamyã wã.+ 25 B toogã sasa b na n baoo laafɩ, la b pa na n paam ye.+ 26 Na n yɩɩ yel-beed woo yel-beedo, la koe-beed woo koe-beedo. Nebã na n baoo vẽnegr no-rɛɛs nengẽ,+ la tõogã* pa na n le be maan-kʋʋd nengẽ, tɩ saglg me pa le be kãsem-dãmbã nengẽ ye.+ 27 Rĩmã na n yãba kʋʋre.+ Naabã sũur na n sãama wʋsgo, tɩ soolmã neb nus rigd rabeemã yĩnga. Mam na n maan-b-la wa sẽn zems b manesmã, la m kao b bʋʋd wa b sẽn kao bʋʋd to-to wã. Woto, b na n bãngame tɩ mam yaa a Zeova.’”+