Ezekɩyɛll sebre

8 Yʋʋm a yoob-n-soabã kiuug a yoob-n-soabã rasem a nu wã daare, mam sẽn wa n zĩ m doogẽ wã, tɩ Zida kãsem-dãmbã zĩ mam taoore, a Zeova sẽn yaa Zu-soab sẽn ka to wã nug gãda maam be. 2 Mam sẽn wa n getẽ wã, mam yãa bũmb sẽn wõnd bugum. Bugum n da be zĩig ning sẽn wõnd yaa a sɛɛgã tẽngre.+ A sɛɛgã tɛk n tar n dʋʋdã ra pɩndame, n yaa wa elɛgtrom* sẽn pɩnd to-to wã.+ 3 Dẽ, a tẽega bũmb sẽn wõnd nug n gãd mam zugã zoobd n zẽk maam. Vʋʋsem* n zẽk maam yĩngri.* A talla maam ne Wẽnnaam vẽnegr toor-toor maasem n kẽng Zerizalɛm, pʋgẽ rignoorã+ sẽn tees rɩtgẽ wã, zĩig ning sũ-kiir bõn-naandgã sẽn wat ne sũ-kiirã sẽn be wã.+ 4 Mam yãa Israyɛll Wẽnnaamã ziirã be,+ tɩ wõnd bũmb ning mam sẽn da yã tẽn-nabrẽ wã.+

5 Wẽnnaam yeela maam yaa: “Ninsaal biiga, m bõos tɩ f zẽk f neng n ges rɩtg sẽnese.” Dẽ, mam zẽka m neng n ges rɩtg sẽnese, n yã tɩ sũ-kiir bõn-naandgã be rignoorã sɛɛga, tẽn-kugrã rignoorã rɩtgo. 6 Rẽ poore, a yeela maam yaa: “Ninsaal biiga, fo nee bõn-wẽns la bõn-yood nins Israyɛll buudã neb sẽn maand ka wã bɩ?+ Yaa bõn-kãensã n kɩt tɩ m zãag ne m doogã.+ La fo na n yãa bõn-yood sẽn yaa wẽns n yɩɩd woto.”

7 Dẽ, a talla maam n kẽng samandã rignoorẽ. Mam sẽn gesã, m yãa võor sẽn be lalgẽ wã. 8 A yeela maam yaa: “Ninsaal biiga, m bõos tɩ f poog lalgã.” Mam pooga lalgã, n yã rignoore. 9 A yeela maam yaa: “Kẽ n ges bõn-wẽnsã, la bõn-yood nins b sẽn maand ka wã.” 10 Mam kẽeme n gese, n yã bõn-vuuds la rũms sẽn yaa rẽgd buud fãa bõn-naandse,+ la Israyɛll buudã bõn-naandsã fãa sẽn yaa bõn-yoodã.*+ B ra pees-b-la lalgã zug n gilgi. 11 Israyɛll buudã kãsem-dãmb pis-yopoe n da yas b taoore, t’a Safan+ biig a Yaazaniya ra be b sʋka. B ned kam fãa ra zãada a wisd yõogr laaga, tɩ wisdã bug-zõosã sẽn tar yũ-noogã zẽkdẽ.+ 12 A yeela maam yaa: “Ninsaal biiga, fo nee Israyɛll buudã kãsem-dãmb sẽn maand bũmb nins likẽ wã, ned kam fãa a ro-pʋg ning a bõn-naandsã sẽn dɩgã bɩ? Bala b yetame: ‘A Zeova pa ne tõnd ye. A Zeova loog n basa soolmã.’”+

13 A le yeela maam yaa: “Fo na n yãa b sẽn maand bõn-yood sẽn yaa wẽns n yɩɩd woto.” 14 Dẽ, a talla maam n kẽng a Zeova roogã rɩtg rignoorẽ wã. Be, mam yãa pagb sẽn zĩ n yãbd wẽnnaam a Tamuuz yĩnga.

15 A paasame: “Foom a ninsaal biiga, fo nee bõn-kãngã bɩ? Fo na n yãa bõn-yood sẽn yaa wẽns wʋsg n yɩɩd woto.”+ 16 A talla maam n kẽng a Zeova roogã saman-bilẽ wã.+ Na maan rap pisi la a nu n da be a Zeova roogã noore, zãongã* ne tẽn-kugrã sʋka. B ra wẽnemda b poay n tees a Zeova roogã, tɩ b nensã tees yaanga. B ra wõgemded n waoogda wĩntoogã sẽn be yaangã.+

17 A yeela maam yaa: “Ninsaal biiga, fo nee bõn-kãngã bɩ? Zida buudã neb sẽn maan bõn-yo-kãensa wã, b sẽn kɩt tɩ soolmã pid ne nen-kɛglmã,+ la b kɩtdẽ tɩ mam sũur yikd wakat fãa wã yaa bũmb sẽn pa zem baa fʋɩ sɩda? Ad b sẽn lɩgd mam yõorã ne tɩɩgã willi.* 18 Rẽ n so tɩ mam na n kiig m sũ-puugrã b zutu. Mam pa na n sãam m sũur b yĩnga, wall m zoe b nimbãaneg ye.+ Baa b sã n zẽk b koees n kaas sẽn na yɩl tɩ mam wʋme, m pa na n kelg-b ye.”+