Ezekɩyɛll sebre
26 Yʋʋm piig la a ye soabã, kiuugã pipi daare, a Zeova goma ne maam n yeele: 2 “Ninsaal biiga, Tɩɩr yeela Zerizalɛm wɛɛngẽ yaa:+ ‘N-faa! buud toɛy-toɛyã rignoorã sãamame!+ A sẽn sãam masã wã, bũmb fãa na n tũuda mam nengẽ n loogdẽ. Mam na n lebga arzɛk soaba.’ 3 Woto wã, ad a Zeova sẽn yaa Zu-soab sẽn ka to wã sẽn yeele: ‘Foom a Tɩɩre, m na n zaba ne foo. Mam na n kɩtame tɩ buud wʋsg yik n wa zab ne foo, wa mogrã ko-pɛmã sẽn yikd to-to wã. 4 B na n sãama Tɩɩr lalgã la b tus a gasdã n lubi.+ Mam na n kõoga a tẽn-gãongã, n kɩt t’a lebg kug-bɩlemd sẽn pɩnda. 5 A na n lebga zĩm-gãmba kʋɩɩsg zĩig mogrã sʋka.’+
“‘Bala yaa mam mengã n gome. A na n lebga te-zɛɛdem buud toɛy-toɛyã yĩnga.’ Yaa a Zeova sẽn yaa Zu-soab sẽn ka to wã n yeele. 6 ‘B na n kʋʋ a tẽn-bõonesã sẽn be weoogẽ wã neb ne sʋʋse. Woto, nebã na n bãngame tɩ mam yaa a Zeova.’
7 “Bala ad a Zeova sẽn yaa Zu-soab sẽn ka to wã sẽn yeele: ‘Mam na n kɩtame tɩ Babilon rĩm a Nebukadnezaar* yi rɩtg n wa zab ne Tɩɩre.+ A yaa rĩm-dãmb rĩma,+ n tar wed-moose,+ zabr saar-dãmba,*+ wed-rʋʋdba, la sodaas* wʋsgo. 8 A na n sãama fo tẽn-bõonesã sẽn be weoogẽ wã ne sʋʋga. A na n mee lalg n gũbg foo, n zam tãnd sẽn na yɩl n zab ne foo, la a tall gãong sẽn yaa bedr n zab ne foo. 9 A na n tãa fo lalgã ne a zab-teoog ning sẽn tar n lubd lalsã, la a lub fo gasdã ne a layã.* 10 A wed-moosã na n yɩɩ wʋsgo, hal tɩ b wubsgã bui foo. A sã n wa kẽed fo rignoyẽ wã wa neb sẽn fõrd n kẽed tẽng sẽn tar lalg sẽn sãam pʋgẽ, wed-rʋʋdbã ne saar-dãmbã* sẽn yaa wʋsgã rãamd na n kɩtame tɩ fo lalgã rigimdi. 11 A wed-moosã nao-bendã na n taba fo soayã fãa.+ A na n kʋʋ fo nebã ne sʋʋga. Fo kug-bɛdã b sẽn lug tɩ yas sellã na n lʋɩɩ tẽnga. 12 B na n deesa fo paoongã, n zɛ f teed nins f sẽn koosdã,+ n tus f lalgã n lubi, la b lub f ro-neebã. Rẽ poore, b na n wʋka f kugã, f teed nins sẽn maan ne raadã, la f tãndã n lob koomã pʋgẽ.’
13 “‘Mam na n kɩtame tɩ f yɩɩlã bʋʋr sa, la m kɩt tɩ b ra le wʋm f pendsã rãamd ye.+ 14 Mam na n kɩtame tɩ fo lebg kug-bɩlemd sẽn pɩnda. Fo na n lebga zĩm-gãmba kʋɩɩsg zĩiga.+ B pa na n tol n le me foo ye. Bala yaa maam a Zeova meng n gome.’ Yaa a Zeova sẽn yaa Zu-soab sẽn ka to wã n yeele.
15 “Ad a Zeova sẽn yaa Zu-soab sẽn ka to wã sẽn yet Tɩɩre: ‘Fo lʋɩɩsã rãamd sã n wa yi, sẽn dat n ki-bã* sã n wa wõosdẽ, b sã n wa kʋʋd neb wʋsg fo pʋgẽ, ko-sʋk tẽnsã pa na n dig sɩda?+ 16 Mogrã nanambsã fãa na n siga b gɛyã zutu, n yees b kasaabsã,* la b yees b fut nins sẽn gʋlã. Rabeem n na n yõk-b tɩ b rigi. B na n zĩnda tẽng n digd n pa satẽ, la b get foo ne lingri.+ 17 B na n yɩɩla sũ-sãang yɩɩll*+ fo yĩnga, n yeel foo yaa:
“Foom a tẽng ning neb sẽn yit mogrẽ wã, la sẽn yaa tẽng b sẽn pẽgdã, ad fo sɩd sãamame!+
Foo ne f nebã* ra yaa pãens rãmb mogrã zugu,+
n kẽesd dũniyã nebã fãa rabeem!
18 Ko-sʋk tẽnsã na n diga fo lʋɩɩsã daare.
Fo sã n wa lʋɩ, mogrã sʋk tẽnsã sũy na n sãamame.”’+
19 “Bala, ad a Zeova sẽn yaa Zu-soab sẽn ka to wã sẽn yeele: ‘Mam sã n wa kɩt tɩ f lebg raboog wa tẽns nins sẽn pa tar nebã, mam sã n wa kɩt tɩ koomã sẽn zoet ne pãngã lim foo, la m kɩt tɩ mogrã lim foo,+ 20 mam na n kɩtame tɩ foo ne neb nins sẽn na n naag foo n sig bokẽ wã* tɩ bʋʋg sẽn ki-b hal daar zãrã. Mam na n kɩtame tɩ foo ne neb nins sẽn sigd bokẽ wã+ zĩnd zĩig ning sẽn yaa zulung n yɩɩdã, wa pĩnd wẽndẽ zĩis nins b sẽn sãamã, sẽn na yɩl tɩ ned ra le tõog n zĩnd fo pʋgẽ ye. Rẽ poore, mam na n kõo nin-vɩɩsã soolem ziiri.
21 “‘Mam na n kɩtame tɩ rabeem yõk foo zĩig pʋgẽ. Fo pa na n le zĩnd ye.+ B na n gẽesa foo, la b pa na n tol n le yã foo ye.’ Yaa a Zeova sẽn yaa Zu-soab sẽn ka to wã n yeele.”