Ezekɩyɛll sebre
30 A Zeova le goma ne maam n yeele: 2 “Ninsaal biiga, togs bãngr-gomd n yeel yaa: ‘Ad a Zeova sẽn yaa Zu-soab sẽn ka to wã sẽn yeele:
“Wiis-y-yã, n yeel yaa: ‘Kayto! Daarã watame!’
3 Bala daarã kolgame. N-ye! A Zeova daar n kolge.+
Na n yɩɩ sawat daare.+ Na n yɩɩ buud toɛy-toɛyã bʋʋd kaoob wakate.+
4 B na n talla sʋʋg n wa zab ne Ezɩpt nebã. Neb nins b sẽn kʋ wã sã n wa lʋɩt Ezɩpti, rabeem wʋsg n na n yõk Etiyopi nebã.
B wʋka Ezɩpt arzɛkã, la b sãam a yẽbgrã.+
5 B na n talla sʋʋg n kʋ
Etiyopi,+ Put+ la Luud nebã, ne buud toor-toorã neb sẽn kalem taabã fãa,*
n paas Kuub nebã la kaoolã soolem nebã.”’*
6 Ad a Zeova sẽn yeele:
‘Ezɩpt tɛɛndbã me na n lʋɩɩme.
A pãngã ne a wuk-m-mengã na n saame.’+
“‘B na n kʋ-b-la ne sʋʋs soolmẽ wã, sẽn sɩng ne Migdoll+ n tãag Sɩyɛnne.’+ Yaa a Zeova sẽn yaa Zu-soab sẽn ka to wã n yeele. 7 ‘B na n lebga zĩ-vɩɩd n yɩɩd soolem a taabã. Ezɩpt galʋ-tẽnsã na n lebga zĩ-vɩɩd n yɩɩd b taabã.+ 8 Mam sã n wa ning Ezɩpt bugum la m wã tẽns nins fãa sẽn sõngd-a wã, b na n bãngame tɩ mam yaa a Zeova. 9 Baraare, mam na n tʋma koe-taasdb tɩ b kẽ koom-kogend n tɩ kɩt tɩ Etiyopi sẽn teeg a mengã rigi. Rabeem wʋsg na n yõk-b-la daar ning sẽn wat Ezɩpt zugã daare, bala a sɩd na n waame.’
10 “Ad a Zeova sẽn yaa Zu-soab sẽn ka to wã sẽn yeele: ‘Mam na n kɩtame tɩ Babilon rĩm a Nebukadnezaar* menes Ezɩpt tãb-biisã.+ 11 Yẽ ne a tãb-biisã sẽn yaa buud ning neb sẽn yaa toos n yɩɩdã+ na n wa sãama soolmã. B na n wõo b sʋʋsã n zab ne Ezɩpt nebã, n kʋ neb n pids soolmã.+ 12 Mam na n kɩtame tɩ Nill ko-soayã+ lebg zĩ-koeemse. M na n koosa soolmã ne nin-wẽnse. Mam na n kɩtame tɩ sãamb sãam soolmã ne bũmb nins fãa sẽn be a pʋgẽ wã.+ Yaa maam a Zeova meng n gome.’
13 “Ad a Zeova sẽn yaa Zu-soab sẽn ka to wã sẽn yeele: ‘Mam na n sãama bõn-naandsã sẽn yaa bõn-yoodã* me, la m menes Noof* wẽn-faadã.+ Naab pa na n le zĩnd Ezɩpt soolmẽ wã ye. Mam na n kẽesa Ezɩpt soolmã neb rabeem.+ 14 M na n kɩtame tɩ Patroos+ lebg raboogo, n ning Zowan bugum, la m sɩbg No.*+ 15 Mam na n kiiga m sũ-puugrã Sin sẽn yaa Ezɩpt pãng zĩigã zugu, la m sãam No nebã. 16 M na n ninga Ezɩpt bugum. Rabeem wʋsg n na n yõk Sin. B na n kẽe No ne pãnga. B na n zaba ne Noof* wĩnto-sʋka! 17 B na n kʋʋ Onn* la Pibesɛt kom-bɩɩsã ne sʋʋse. B na n talla galʋ-tẽnsã neb n kẽng yembdo. 18 Mam sã n wa kao Ezɩpt yubl-balgdgã Tapanɛɛse, wĩndgã na n lebga lik be.+ Ezɩpt pãngã ne a wuk-m-mengã na n saame,+ tɩ sawat lud-a. B na n talla Tapanɛɛs tẽnsã neb n kẽng yembdo.+ 19 Mam na n sɩbga Ezɩpt nebã. Woto, b na n bãngame tɩ mam yaa a Zeova.’”
20 Yʋʋm piig la a ye soabã, pipi kiuugã rasem a yopoe wã daare, a Zeova goma ne maam n yeele: 21 “Ninsaal biiga, mam kaooga Ezɩpt rĩm a Farawõ kangã. B pa na n sẽb-a sẽn na yɩl t’a maage, wall b vil-a ne peend n kɩt t’a paam pãng sẽn sek a na gãd sʋʋg ye.”
22 “Woto wã, ad a Zeova sẽn yaa Zu-soab sẽn ka to wã sẽn yeele: ‘Mam na n zaba ne Ezɩpt rĩm a Farawõ.+ M na n kaoo a kamsã, a kang ning sẽn tar pãngã ne sẽn kaoog-a wã fãa.+ Mam na n kɩtame tɩ sʋʋgã yi a nugẽ wã n lʋɩ.+ 23 Rẽ poore, m na n sãeega Ezɩpt nebã buud toɛy-toɛyã sʋka, la m sãeeg-b soolem toor-toorã sʋka.+ 24 Mam na n paasa Babilon rĩmã kams pãnga,+ la m ning m sʋʋgã a nugẽ.+ M na n kaoo a Farawõ kamsã, t’a wõos wʋsg a taoor* wa ned sẽn dat n ki. 25 Mam na n paasa Babilon rĩmã kams pãnga, la a Farawõ kamsã na n kiime n pa le tar pãng ye. M sã n wa ning m sʋʋgã Babilon rĩmã nugẽ, t’a tar n zabd ne Ezɩpt soolmã neba, b na n bãngame tɩ mam yaa a Zeova.+ 26 M na n sãeega Ezɩpt nebã buud toɛy-toɛyã sʋka, la m sãeeg-b soolem toor-toorã sʋka.+ Woto, b na n bãngame tɩ mam yaa a Zeova.’”