Ezekɩyɛll sebre

40 Tõnd yembdã kẽngr yʋʋm pisi la a nu soabã,+ yʋʋmdã sɩngrẽ, kiuugã rasem piigã daare, tẽngã sãoongã yʋʋm piig la a naas-n-soabã, + daar-n-kãng bala, a Zeova nugã zĩnda mam zugu. A rɩka maam n kẽng galʋ-tẽngẽ wã.+ 2 Wẽnnaam dɩka maam ne vẽnegr maasem, n kẽng Israyɛll soolmẽ wã, n tɩ sik maam tãng sẽn yaa lug-lug wʋsg zugu.+ Tãn-kãng zugu, bũmb sẽn yaa wa galʋ-tẽng n da be a goabgã.

3 A sẽn tall maam n kẽng be wã, mam yãa rao yalẽ sẽn wõnd zũudu.+ A ra zãada lẽ* wĩiri, la tãnwĩig sẽn tar n makdẽ.*+ A ra yasa rignoorẽ wã. 4 Raoã yeela maam yaa: “Ninsaal biiga, ges neer la f kelg sõma. Maag f yĩng n ges bũmb nins fãa mam sẽn na n wilg foomã, bala yaa rẽ yĩng la b sẽn tall foo n wa ka wã. Togs Israyɛll buudã neb bũmb nins fãa fo sẽn na n yã wã.”+

5 Mam yãa lalg sẽn gũbg wẽnd-doogã.* Raoã ra zãada tãnwĩig sẽn tar n makdẽ, t’a woglmã yaa kãntɩɩg a yoobe. (B paasa nug-biis a naas kãntɩɩg fãa zugu.)* A sɩnga lalgã makre. Lalgã taglmã ra yaa tãnwĩig a ye, t’a zãntlmã yaa tãnwĩig a yembre.

6 Rẽ poore, a kẽnga rignoor ning sẽn tees yaangã,+ n dʋ a rʋʋdsã. A sẽn mak rigno-koakã, a mikame t’a yalmã yaa tãnwĩig a ye, tɩ rigno-koak a to wã me yalmã yaa tãnwĩig a yembre. 7 Gũudbã roog fãa woglem ra yaa tãnwĩig a ye, t’a yalmã yaa tãnwĩig a yembre. Gũudbã roog fãa ne a to zãrem ra yaa kãntɩɩg a nu.+ Rigno-koakã sẽn be rignoorã zãongã* sɛɛg n tees pʋgẽ wã ra yaa tãnwĩig a ye.

8 A maka rignoorã zãongã sẽn tees pʋgẽ wã, n mik tɩ yaa tãnwĩig a yembre. 9 Rẽ poore, a maka rignoorã zãongã sẽn da yaa kãntɩɩg a nii wã. A maka lugã sẽn be a kɩremsẽ wã, n mik tɩ lugr fãa yaa kãntɩɩg a yiibu. Rignoorã zãongã ra bee kɩreng ning sẽn tees pʋgẽ wã.

10 Gũudbã rot a tãab n da be yaang rignoorã kɩreng fãa. Rot a tãabã fãa ra zema taaba. Lugã sẽn da be kɩremsã fãa wã ra zema taaba.

11 Rẽ poore, a maka rignoorã yalem n mik tɩ yaa kãntɩɩg piiga. Rignoorã woglem ra yaa kãntɩɩg piig la a tãabo.

12 Gũudbã roog fãa sẽn da be kɩremsã noore, zĩig n da be be, tɩ b me lal-pãar n gɩdge, t’a yalmã yaa kãntɩɩg a yembre. Gũudbã rot sẽn da be kɩremsã ra yaa kãntɩɩg a yoob-yoobe.

13 Rẽ poore, a maka rignoorã, sẽn sɩng ne gũudbã roog a yembr zug* n tãag a to wã zugu. A yalmã ra yaa kãntɩɩg pisi la a nu. Rignoor fãa ra teesa a to.+ 14 A maka lugã sẽn be kɩremsã woglem n mik tɩ yaa kãntɩɩg pis-yoob-yoobe, la a mak rignoy a taabã lugã sẽn be b kɩremsã. Yaa rignoy nins sẽn gilg samandã. 15 Sẽn sɩng ne rignoorã taoor n tãag rignoorã zãongã sẽn tees pʋgẽ wã taoorã, ra yaa kãntɩɩg pis-nu.

16 Rignoorã pʋgẽ, kɩremsã fãa, võy n da be be gũudbã rot yĩnga, la lugã sẽn be kɩremsã yĩnga. Võyã pʋgẽ wã yalem yɩɩda yɩngã.+ Zãongã pʋgẽ me, võy n da be kɩreng fãa. B ra maana koms naand+ lugã sẽn be kɩremsẽ wã zutu.

17 Rẽ poore, a talla maam n kẽ saman-kãsengẽ wã. Mam yãa rɩɩb roto,*+ la zĩig b sẽn pam n gilg samandã. Rɩɩb rot pis-tã n da be zĩig ning b sẽn pamã. 18 Zĩig ning b sẽn pam rignoyã seesã ra zemsa rignoyã woglem. Rẽ n da yaa zĩig ning b sẽn pam tɩ be tẽngrã.

19 Rẽ poore, a maka saman-kãsengã yalmã,* sẽn sɩng ne rignoor ning sẽn be tẽngrã n tãag rignoor ning sẽn tũud n kẽed saman-bilẽ wã. A yalmã ra yaa kãntɩɩg koabga, yaang ne rɩtg fãa.

20 Saman-kãsengã ra tara rignoor sẽn tees rɩtgo, t’a mak a woglmã la a yalmã. 21 Gũudb rot a tãab n da be kɩreng fãa. Lugã sẽn be b kɩremsã ne zãongã ra zema pipi rignoorã rẽndã. A woglmã ra yaa kãntɩɩg pis-nu, t’a yalmã yaa kãntɩɩg pisi la a nu. 22 A võyã, a zãongã la a komsã naandã+ ra zema sẽn be-b yaang rignoorẽ wã. Yaa rʋʋds a yopoe la f segd n dʋ n yaool n ta-a. A zãongã ra bee rʋʋdsã taoore.

23 Rignoor n da be saman-bilẽ wã n tees rɩtg rignoorã, t’a to tees yaang rignoorã. A maka sẽn sɩng rignoor a ye n tãag a to, n mik tɩ yaa kãntɩɩg koabga.

24 Rẽ poore, a talla maam n kẽng goabg sẽnese. Mam yãa rignoor sẽn be goabga.+ A maka lugã sẽn be a kɩremsẽ wã ne a zãongã. B ra zema b taabã. 25 Võy n da be rignoorã kɩreng fãa ne a zãongẽ wã, n yaa wa võy a taabã. A woglmã ra yaa kãntɩɩg pis-nu, t’a yalmã yaa kãntɩɩg pisi la a nu. 26 Rʋʋds a yopoe n da tar n dabd rignoorẽ wã,+ t’a zãongã be rʋʋdsã taoore. Koms naand n da be a lugã sẽn be kɩremsẽ wã, a yembr lugr kɩreng fãa zugu.

27 Saman-bilã ra tara rignoor sẽn tees goabga. Raoã makame n tees goabga, sẽn sɩng rignoor a ye n tãag a to wã, n mik tɩ yaa kãntɩɩg koabga. 28 Rẽ poore, a talla maam n tũ goabg rignoorã n kẽ saman-bilẽ wã. A sẽn mak goabg rignoorã, mikame t’a zema rignoy a taabã. 29 A gũudbã rotã, a lugã sẽn be kɩremsã ne a zãongã ra zema b taabã. Võy n da be a kɩreng fãa la a zãongẽ wã. A woglmã ra yaa kãntɩɩg pis-nu, t’a yalmã yaa kãntɩɩg pisi la a nu.+ 30 Zãong toor-toor n da karg n gũbg be, tɩ zãong fãa woglem yaa kãntɩɩg pisi la a nu, t’a yalem yaa kãntɩɩg a nu. 31 A zãongã ra teesa saman-kãsengã, tɩ koms naand be a lugã sẽn be kɩremsẽ wã.+ Rʋʋds a nii n da tar n dabd rignoorẽ wã.+

32 A sẽn wa n tall maam n tũ yaang sẽnes n kẽ saman-bilẽ wã, a maka rignoorã n mik t’a zema rignoy a taabã. 33 A gũudbã rotã, a lugã sẽn be kɩremsã ne a zãongã ra zema b taabã. Võy n da be a kɩreng fãa la a zãongẽ wã. A woglmã ra yaa kãntɩɩg pis-nu, t’a yalmã yaa kãntɩɩg pisi la a nu. 34 A zãongã ra teesa saman-kãsengã, tɩ koms naand be a lugã sẽn be a kɩremsã zutu. Rʋʋds a nii n da tar n dabd rignoorẽ wã.

35 A talla maam n kẽng rɩtg rignoorẽ wã,+ n mak-a, n mik t’a zema rignoy a taabã. 36 A gũudbã rotã, a lugã sẽn be kɩremsã ne a zãongã ra zema b taabã. Võy n da be a kɩreng fãa. A woglmã ra yaa kãntɩɩg pis-nu, t’a yalmã yaa kãntɩɩg pisi la a nu. 37 A lugã sẽn be kɩremsã ra teesa saman-kãsengã, tɩ koms naand be a lugã sẽn be a kɩremsã zutu. Rʋʋds a nii n da tar n dabd rignoorẽ wã.

38 Rɩɩb roog sẽn tar rignoor a ye n da be lugã sẽn be rignoyã kɩremsã sɛɛga, zĩig ning b sẽn pegd maand sẽn yõogd bugmã.+

39 Taabl-dãmb a yiib n da be rignoorã zãongã kɩreng fãa, tɩ b koot maand sẽn yõogd bugmã,+ yel-wẽnd maandã+ la taal maandã+ rũms b zutu. 40 Zĩig ning b sẽn tũud n kẽed rɩtg rignoorẽ wã, taabl-dãmb a yiib n da be yɩngã. Taabl-dãmb a yiib me n da be pʋgẽ wã, rignoorã zãongã sɛɛga. 41 Taabl-dãmb a naas n da be rignoorã kɩreng fãa. Fãa sẽn naag taab yaa taabl-dãmb a nii, tɩ b koot maandã rũms b zutu. 42 Maoong sẽn yõogd bugmã taabl-dãmb a naasã maana ne kug b sẽn peese. B woglmã ra yaa kãntɩɩg a ye la pʋɩ-sʋka, tɩ b yalmã yaa kãntɩɩg a ye la pʋɩ-sʋka, tɩ b zãntlmã yaa kãntɩɩg a yembre. B ra bĩngda teed nins b sẽn tar n kʋʋd maand sẽn yõogd bugmã ne maand a taabã b zutu. 43 B ra maana kogs yalem sẽn yaa nug-biis a naas n gilg pʋgẽ lalsã. B ra rogenda maandã nemd taabl-dãmbã zutu.

44 Yɩɩn-yɩɩndbã rɩɩbã rot ra bee pʋgẽ rignoorã sɛɛga.+ B ra bee saman-bilẽ wã, rɩtg rignoorã sɛɛga, tɩ b rignoyã tees goabga. Rɩɩb roog a to n da be yaang rignoorã sɛɛga, t’a rignoorã tees rɩtgo.

45 Raoã yeela maam yaa: “Rɩɩbã roog ning sẽn tees goabgã yaa maan-kʋʋdb nins sẽn get wẽnd-doogã tʋʋm yellã rẽnda.+ 46 Rɩɩbã roog ning sẽn tees rɩtgã yaa maan-kʋʋdb nins sẽn get tẽn-kugrã tʋʋm yellã rẽnda.+ Maan-kʋʋdb-kãens yaa a Zadok kom-dibli wã,+ rat n yeel tɩ Levi buudã neb nins b sẽn yãk tɩ b kolgd a Zeova n tʋmd a tʋʋmã.”+

47 Rẽ poore, a maka saman-bilã, n mik t’a woglmã yaa kãntɩɩg koabga, t’a yalmã yaa kãntɩɩg koabga. A woglmã ne a yalmã ra zema taaba. Tẽn-kugrã ra bee wẽnd-doogã noore.

48 A talla maam n kẽ wẽnd-doogã zãongẽ wã.+ A maka zãongã lugã sẽn be kɩremsã a yembre, n mik t’a kɩreng a ye yaa kãntɩɩg a nu, t’a kɩreng a to wã me yaa kãntɩɩg a nu. Rignoorã kɩreng a ye yalem ra yaa kãntɩɩg a tãabo, t’a kɩreng a to wã me yaa kãntɩɩg a tãabo.

49 Zãongã woglem ra yaa kãntɩɩg pisi, t’a yalmã yaa kãntɩɩg piig la a ye.* Yaa rʋʋds la f segd n dʋ n yaool n ta-a. Ra-lugs n da be lugã sẽn be kɩremsã sɛɛga. Kɩreng fãa ra yaa ra-luk a yembre.+