Ezekɩyɛll sebre

44 A talla maam n lebg n kẽng wẽnd-doogã yɩng rignoor ning sẽn tees yaangã,+ n mik t’a pagame.+ 2 Dẽ, a Zeova yeela maam yaa: “Rigno-kãngã na n kell n pagame. B pa segd n pak-a ye. Ninsaal baa a ye pa na n tũ be n kẽ ye. Israyɛll Wẽnnaam a Zeova sẽn tũ be n kẽ wã yĩnga,+ a segd n kell n pagame. 3 La naabã na n zĩndida rignoorẽ wã n dɩt rɩɩb* a Zeova taoore,+ bala a yaa naaba. A na n tũuda rignoorã zãongẽ* wã n wat be, la a lebg n tũ zãongã n yi.”+

4 Dẽ, a talla maam n tũ rɩtg rignoorã n kẽng wẽnd-doogã noore. Mam sẽn gesã, mam yãame t’a Zeova ziirã pida a Zeova roogã.+ Rẽ n so tɩ mam lʋɩ n fõgen m neng tẽnga.+ 5 A Zeova yeela maam yaa: “Ninsaal biiga, maag f yĩng n gese. Ges neer la f kelg bũmb nins fãa mam sẽn na n yeel foo noy la tõod nins mam sẽn gãneg a Zeova roogã wɛɛngẽ wã sõma. Maag f yĩng n ges wẽnd-doogã rignoorã la zĩ-sõngã zĩis nins b sẽn tũud n yitã fãa.+ 6 Fo segd n yeela Israyɛll buudã neb sẽn yaa tõatbã yaa: ‘Ad a Zeova sẽn yaa Zu-soab sẽn ka to wã sẽn yeele: “Yãmb a Israyɛll buudã neba, yãmb tʋʋm-wẽnsã yaa n sekame. 7 Yãmb sẽn talld sãamb sẽn pa kẽ bãongo, tɩ b sũyã me pa kẽ bãong n wat mam doogẽ wã, b rẽgemda mam doogã. Yãmb kõta maam m dɩɩbã, rat n yeel tɩ maoongã kaamã la a zɩɩmã, n yaool n sãamd mam kaoolã ne tʋʋm-wẽns nins fãa y sẽn tʋmdã. 8 Yãmb pa ges mam bõn-sõma wã yell ye.+ Yãmb pʋd n yãka neb a taab tɩ b get mam doogã tʋʋm yelle.”’

9 “‘Ad a Zeova sẽn yaa Zu-soab sẽn ka to wã sẽn yeele: “Sãan sẽn be Israyɛll n pa kẽ bãongo, t’a sũurã me pa kẽ bãong pa tõe n kẽ mam doogẽ wã ye.”’

10 “‘La Levi buudã neb sẽn zãag ne maamã+ kongrã biis na n wẽneg n waa b zutu. B zãaga ne maam wakat ning Israyɛll nebã sẽn zãag ne maam, n tɩ tũud b bõn-naandsã sẽn yaa bõn-yoodã.* 11 B na n lebga mam doogã tʋm-tʋmdba, n get mam doogã kʋɩlensã yelle,+ la b tʋmd a pʋgẽ. B na n kʋʋda maand sẽn yõogd bugmã rũmsi, ne nin-buiidã maand a taabã rũmsi. B na n yasa nin-buiidã taoore, n tʋmd b yĩnga. 12 Levi buudã neb ra tʋmda nin-buiidã yĩng b bõn-naandsã sẽn yaa bõn-yoodã taoore, n lebg bũmb sẽn kɩtd tɩ ned lak n lʋɩ, n kɩt tɩ Israyɛll nebã maan yel-wẽna.+ Rẽ n so tɩ mam zẽk m nug n wẽene, n yeel tɩ b kongrã biis na n wẽneg n waa b zutu.’ Yaa a Zeova sẽn yaa Zu-soab sẽn ka to wã n yeele. 13 ‘B pa na n yɩ mam maan-kʋʋdb n kolg maam n tʋme, wall b kolg mam bõn-sõma wã, bɩ m bõn-sõma sẽn yɩɩdã baa a yembr ye. B na n paama yãnde, bõn-wẽns nins b sẽn maanã yĩnga. 14 La mam na n kɩtame tɩ b lebg wẽnd-doogã tʋʋm yel-gɛtba, n get a tʋʋmã yelle, la bũmb nins fãa b sẽn segd n maan a pʋgẽ wã yelle.’+

15 “‘Sã n yaa ne maan-kʋʋdbã sẽn yaa Levi buudã nebã, rat n yeel t’a Zadok yagensã+ sẽn da get mam doogã tʋʋm yelle, Israyɛll nebã sẽn wa n zãag ne maamã,+ b na n kolga maam n tʋm mam tʋʋmã. B na n yalsda mam taoor n kõt maam maoongã kaamã+ la a zɩɩmã.’+ Yaa a Zeova sẽn yaa Zu-soab sẽn ka to wã n yeele. 16 ‘Yaa bãmb n na n kẽed mam doogẽ wã. B na n kolgda mam taablã n tʋmd mam tʋʋmã.+ B na n tʋmda tʋʋm nins b sẽn segd n tʋm mam yĩngã.+

17 “‘B sã n wa na n tũ saman-bilã rignoyẽ n kẽ, b segd n yeelga lẽ gĩs futu.+ B sã n wa be saman-bilã rignoyẽ wall a pʋgẽ n tʋmdẽ, b pa segd n yeelg rũms kõbd fut ye. 18 B segd n vila b zutã ne lẽ gĩs zu-vindsi, la b sẽgen lẽ gĩs kur-koeese.+ B pa segd n ning bũmb sẽn na n kɩt tɩ b yĩngã midg ye. 19 Nand tɩ b yi saman-kãsengẽ wã, saman-kãseng ning nin-buiidã sẽn be wã, b segd n yeesa fut nins b sẽn da ning n tʋmdẽ wã,+ n bĩng rɩɩbã rot sẽn yaa sõamyã wã* pʋsẽ.+ Rẽ poore, b segd n yeelga fut a taaba, sẽn na yɩl tɩ nin-buiidã ra wa lebg sõamyã, b futã maasem yĩng ye. 20 B pa segd n põng b zutã,+ wall b bas tɩ b zoobdã lebg wogd ye. B segd n wõrsda b zutã. 21 Maan-kʋʋdbã sã n wa na n kẽ saman-bilẽ wã, b pa segd n yũ divẽ ye.+ 22 B pa segd n kẽ kãadem ne pʋg-kõore, wall ne pag a sɩd sẽn bas ye.+ B segd n kẽe kãadem ne Israyɛll buudã pʋg-sad sẽn pa mi raoa, wall ne maan-kʋʋd pʋg-kõore.’+

23 “‘B segd zãmsa mam nin-buiidã tɩ b bãng bũmb ning sẽn yaa sõng ne sẽn pa sõng n bake, la b zãms-b tɩ b bãng bũmb ning sẽn yaa rẽgd la sẽn yaa yɩlemd n bake.+ 24 Bʋʋd kaoob wakate, bãmb n segd n lʋɩ taoore.+ B segd n kaooda bʋʋd tɩ zemsd ne mam noyã.+ B segd n tũuda tõod la noy nins mam sẽn gãneg m tigã fãa wɛɛngẽ wã,+ la b kɩt tɩ mam vʋʋsg rayã yɩ sõamyã. 25 B pa segd n pẽneg ned baa a ye kũum ye. Sã n pa rẽ, b na n lebga rẽgdo. La b tõe n dẽgma b mens b ba yĩnga, b ma, b bi-ribla, b bi-pugla, b ba-biiga, wall b tão sẽn nan pa kẽ kãadem yĩnga.+ 26 Maan-kʋʋd sã n yɩlg a menga, a segd n gũu rasem a yopoe n yaool n le sɩng tʋʋma. 27 Daar ning a sẽn na n kẽ saman-bilẽ wã n tʋm zĩ-sõngã pʋgẽ, a segd n kõo yel-wẽnd maoongo.’+ Yaa a Zeova sẽn yaa Zu-soab sẽn ka to wã n yeele.

28 “‘Ad maan-kʋʋdbã pʋɩɩr sẽn na n yɩ a soaba: Maam n yaa b pʋɩɩre.+ Yãmb pa segd n kõ-b zĩig Israyɛll ye. Bala yaa maam n yaa b pʋɩɩre. 29 Yaa bãmb n segd n dɩt kood biis kũunã,+ yel-wẽn maoongã la taal maoongã.+ Bũmb ning fãa b sẽn dɩk n kõ Wẽnnaam Israyɛll soolmẽ wã na n lebga bãmb dẽnda.+ 30 Yãmb dẽenem biis nins sẽn yaa sõma n yɩɩdã fãa, la kũun buud fãa y sẽn na n kõ na n yɩɩ maan-kʋʋdbã rẽnda.+ Yãmb segd n kõo maan-kʋʋdã y dẽenem koodã biis y sẽn pãrã.+ Rẽ na n kɩtame tɩ bark zĩnd y zagsã pʋsẽ.+ 31 Maan-kʋʋdbã pa segd n wãb bõn-yɩgdg wall rũng sẽn ki a toore, bɩ rũng sẽn kʋ ye.’+