Bʋ-kaoodbã sebre

17 Rao a ye n da be Efrayim soolmã zĩig ning sẽn yaa tãensã+ t‘a yʋʋr la a Mise. 2 A yeela a ma wã yaa: “Yãmb wanzuri ligd-koeems tusr la koabgã b sẽn da rɩk tɩ y kãab tɩ mam wʋmã, ad b bee ne maam. Maam n da rɩke!” Rẽ la a ma wã yeel-yã: “Bɩ a Zeova ning m biigã barka.” 3 Dẽ, yẽ rɩka wanzuri ligd-koeems tusr la koabgã n lebs a ma wã, la a ma wã yeel-a lame yaa: “Mam na n dɩka wanzuri wã n kõ a Zeova.* M datame tɩ f rɩk-a n yao tɩ b maan bõn-naandg b sẽn peese, la bõn-naandg b sẽn dõoge.+ Woto wã, wanzuri wã lebga fo rẽnda.”

4 A sẽn dɩk wanzuri wã n lebs a ma wã, a ma wã yãka ligd-koeems kobs-yi n kõ yõaka. Yõakã maana bõn-naandg b sẽn peese, la bõn-naandg b sẽn yẽneg n dõoge, tɩ b rɩk-b n bĩng a Mise zakẽ wã. 5 Rao a Mise ra tara bõn-naands roogo. A maana efood*+ la bõn-naandse.*+ A yãka a bi-ribl a ye n kɩt t’a lebg a maan-kʋʋda.+ 6 Wakat kãng tɩ Israyɛll nebã ra pa tar dĩm ye.+ Ned kam fãa ra maanda sẽn yaa tɩrg a meng nifẽ.*+

7 La bi-bɩɩg a ye n da be Betlehɛm+ Zida soolmẽ wã, n yaa Levi buudã neda.+ Yẽ ra zĩnda Zida buudã neb sʋk wakat bilfu. 8 Raoã yii Betlehɛm Zida soolmẽ wã, n na n tɩ bao zĩig n tilgi. A sẽn yi a sorã, a wa n taa Efrayim soolmã zĩig ning sẽn yaa tãensã, a Mise+ zakẽ wã. 9 A Mise sok-a lame yaa: “Fo yita yɛɛnẽ?” T’a leoke: “Mam yaa Levi buudã neda, n yit Betlehɛm Zida soolmẽ wã. La mam yika be n baood zĩig n na n tilgi.” 10 Dẽ, a Mise yeel-a lame yaa: “Zĩnd ne maam n yɩ mam ba* la m maan-kʋʋda. Mam na n kõta foom wanzuri ligd-koeems piig yʋʋmd fãa, n paas fut la rɩɩbo.” Woto, Levi nedã kẽe zakẽ wã. 11 Dẽ, Levi nedã sẽn yaa bi-bɩɩgã sakame n na n zĩnd ne a Mise. La a lebga wa a Mise bi-ribla. 12 Sẽn paase, a Mise kɩtame tɩ Levi nedã lebg a maan-kʋʋda,+ la a kell n zĩnda a Mise zakẽ wã. 13 Rẽ la a Mise yeel-yã: “Masã, mam miime t’a Zeova na n maana maam neere, bala Levi buudã nedã lebga mam maan-kʋʋda.”