Bʋ-kaoodbã sebre

18 Wakat kãng tɩ rĩm da pa be Israyɛll ye.+ Dan buudã+ neb me ra baooda zĩig* n na n tilgi, bala hal n tãag wakat kãnga, b ra ket n nan pa paam pʋɩɩr Israyɛll buud toɛy-toɛyã sʋk ye.+

2 Dan buudã neb yãka rap a nu bãmb buudã sʋka, Zora la Ɛstawoll+ rap sẽn tar minim, n tʋm-b tɩ b tɩ soos n ges tẽngã, la b yuus n bãng a sẽn yaa to-to. Bãmb yeel-b lame: “Kẽng-y n tɩ yuus-y tẽngã pʋgẽ n bãng a sẽn yaa to-to.” Rapã sẽn ta Efrayim soolmã zĩig ning sẽn yaa tãensã, a Mise zakẽ wã,+ b paa be yʋngã tõre. 3 Bãmb sẽn wa n kolg a Mise zakã, b wʋma bi-bɩɩgã sẽn da yaa Levi buudã nedã koɛɛg* n bãnge. Woto, b kẽnga a nengẽ n sok-a yaa: “Ãnd n wa ne foo ka? Bõe tʋʋm la fo tʋmd zĩ-kãngã? Bõe yĩng tɩ fo be ka?” 4 A togsa bãmb bũmb nins fãa a Mise sẽn maan n kõ-a wã, n yeele: “A rɩka maam tɩ m yaa a maan-kʋʋda, t’a yaood-ma.”+ 5 Dẽ, bãmb yeel-a lame yaa: “D bõos tɩ f sok Wẽnnaam n ges tõnd so-toakã sã n na n yãka nenga.” 6 Maan-kʋʋdã leoka bãmb yaa: “Kẽng-y ne laafɩ. A Zeova yãagd-y lame.”

7 Woto, rap a nu wã kẽngame n ta Layisi.+ Bãmb tɩ yãame t’a nin-buiidã ra teega b mense, wa Sɩdõ nebã sẽn yaa to-to wã. B ra vɩɩ bãane, n pa yɛɛsd bũmb na wa n maan-b ye.+ Ned sẽn so bãmb n weoogd-b ra pa be ye. Bãmb sẽn beẽ wã zãra ne Sɩdõ, la b ra pa tar lagem-n-taar ne neb a taabã ye.

8 Bãmb sẽn leb b ba-biisã nengẽ Zora ne Ɛstawollã,+ b sok-b lame: “Y kẽnd maana wãna?” 9 Tɩ b leok yaa: “Wa-y tɩ d kẽng n tɩ zab ne-ba, bala tõnd yãame tɩ tẽngã yaa sõma wʋsgo. Bõe yĩng tɩ yãmb yam ket n yuusdẽ? Ra bas-y tɩ kaoos tɩ y yaool n kẽng n tɩ reeg tẽngã n soog ye. 10 Yãmb sã n ta, y na n yãa nin-buiid sẽn pa yɛɛsd bũmb na wa n maan-ba,+ la tẽng sẽn yaa yalenga. Wẽnnaam ninga tẽngã yãmb nugẽ. Bũmb pa be dũniyã zug sẽn pa be zĩ-kãng ye.”+

11 Woto, Dan buudã rap kobs-yoob sẽn bob zab-teed zabr yĩng yii Zora ne Ɛstawolle.+ 12 Bãmb kẽngame n tɩ tilg b sikã Kiryat-yeyarim+ Zida soolmẽ wã. Yaa rẽ n so tɩ b boond zĩ-kãng sẽn be Kiryat-yeyarim nin-taoorã tɩ Mahane-dan*+ hal tɩ ta rũndã. 13 Bãmb yii be n kẽng Efrayim soolmã zĩig ning sẽn yaa tãensã, n ta a Mise zakẽ.+

14 Rap a nu wã sẽn da kẽng n na n tɩ gũus Layis tẽngã+ yeela b ba-biisã yaa: “Yãmb miime tɩ efood* ne bõn-naandse,* n paas bõn-naandg b sẽn pees ne bõn-naandg b sẽn dõog+ n be ro-kãensã pʋsẽ sɩda? Bãng-y y sẽn na n maanega.” 15 Woto, bãmb yalsa be tɩ rap a nu wã kẽng bi-bɩɩgã sẽn yaa Levi buudã nedã+ nengẽ a Mise zakẽ wã, n sok a keelem. 16 Rẽ tɩ Dan buudã+ rap kobs-yoobã fãa sẽn bob zab-teed zabr yĩngã yasa zakã rignoorẽ. 17 Rap a nu wã sẽn da tɩ soos n ges tẽngã+ kẽeme n na n dɩk bõn-naandgã b sẽn peesã, efoodã+ ne bõn-naandsã*+ la bõn-naandgã b sẽn dõogã.+ (Maan-kʋʋdã+ ra yasa zakã rignoorẽ ne rap kobs-yoobã sẽn bob zab-teed zabr yĩngã.) 18 Bãmb kẽe a Mise zakẽ wã n dɩk bõn-naandgã b sẽn peesã, efoodã ne bõn-naandsã* la bõn-naandgã b sẽn dõogã. Maan-kʋʋdã sok-b lame yaa: “Bõe la yãmb sẽn maandã?” 19 La bãmb leoka yẽ yaa: “Mum f noorã, la f ra yeel tɩ bũmb ye. Wa loog n tũ tõndo, n tɩ yɩ tõnd ba* la d maan-kʋʋda. Bõe n yaa sõma ne foo n yɩɩda: Fo sẽn na n yaa nin-yend maan-kʋʋd bɩ,+ bɩ fo sẽn na n lebg Israyɛll buud a ye la Israyɛll roog tõr neb maan-kʋʋda?”+ 20 Maan-kʋʋdã sũur yɩɩ noogo, t’a rɩk bõn-naandgã b sẽn peesã, efoodã ne bõn-naandsã* la bõn-naandgã b sẽn dõogã+ n tũ nin-buiidã n looge.

21 Woto, bãmb rɩka b sor n lebg n loogdẽ, n lʋɩɩs kambã, rũmsã ne te-sõma wã b taoore. 22 Dan buudã nebã sẽn zãag a Mise zakã bilfu, a yagsã tigma taab n na n pʋg-ba, n wa tɩ paam-ba. 23 Bãmb sẽn zẽk b koees n gom ne Dan buudã nebã, b wẽnemdame n tees-b n sok a Mise yaa: “Yaa noogo? Bõe yĩng tɩ fo wa ka ne neb kʋʋngo?” 24 T’a Mise leok yaa: “Yãmb rɩka wẽnnaam-dãmbã mam sẽn maanã, la y loog ne maan-kʋʋdã me. Bõe n kell ne maam? Bõe yĩng masã tɩ yãmb sokdẽ tɩ yaa noogo?” 25 Dan buudã nebã leokame yaa: “Ra gom tõnd woto ye. Sã n pa rẽ, sũ-to-neb* n na n zab ne foo tɩ foo ne f zakã rãmb bõn y yõore.”* 26 Woto, Dan buudã neb rɩka b sor n looge. La a Mise sẽn yã tɩ b pãngã yɩɩda yẽ wã, a lebgame n dɩk a yir sore.

27 Bãmb sẽn dɩk wẽnnaam-dãmb nins a Mise sẽn maanã ne maan-kʋʋdã poore, b kẽnga Layisi,+ nin-buiid sẽn zĩ bãan la sẽn pa yɛɛsd bũmb na wa n maan-b+ nengẽ. Bãmb kʋ-b-la ne sʋʋga, la b yõog tẽngã ne bugum. 28 Ned da kae n na n fãag Layis nebã ye. Bala a ra zãra ne Sɩdõ, t’a nin-buiidã ra pa tar lagem-n-taar ne ned baa a yembr ye. Layis ra bee Bɛt-rewoob+ tẽn-nabrẽ wã. Rẽ poore, bãmb lebs n mee tẽngã n tilg be. 29 Sẽn paase, b pʋda tẽngã yʋʋr tɩ Dan+ wa b yaab a Dan sẽn yaa a Israyɛll bi-riblã+ yʋʋre. La tẽngã yʋʋr ra boondame tɩ Layisi.+ 30 Rẽ poore, Dan buudã neb vigla bõn-naandgã+ a Mise sẽn maanã beenẽ. A Moyiiz biig a Gɛrsom+ yageng a Zonatã+ ne a yagensã lebga Dan buudã maan-kʋʋdba, hal n tãag daar ning tẽngã nebã sẽn kẽng yembdã. 31 Woto, bãmb vigla bõn-naandgã a Mise sẽn maanã. Yaa bõn-naandg b sẽn peese. A kell n paa be wakat ning fãa Wẽnnaam roog sẽn da ket n be Sɩlo+ wã.