Ezekɩyɛll sebre

36 “Sã n yaa ne foom a ninsaal biiga, togs bãngr-gomd Israyɛll tãensã wɛɛngẽ n yeele: ‘Yãmb a Israyɛll tãense, kelg-y-yã a Zeova goama. 2 Ad a Zeova sẽn yaa Zu-soab sẽn ka to wã sẽn yeele: “Bɛɛbã yeela yãmb wɛɛngẽ yaa: ‘N-faa! Baa pĩnd wẽndẽ zĩ-zãntsã lebga tõnd soolem!’”’+

3 “Woto wã, togs bãngr-gomd n yeel yaa: ‘Ad a Zeova sẽn yaa Zu-soab sẽn ka to wã sẽn yeele: “B kɩtame tɩ yãmb lebg zĩ-vɩɩdo. B yii zĩig fãa n wa zab ne yãmba, sẽn na yɩl tɩ y lebg sẽn põs-b* buud toɛy-toɛyã sʋkã soolem, la sẽn na yɩl tɩ nebã gomd yãmb yell la b kãnegd yãmba.+ 4 Woto yĩnga, yãmb a Israyɛll tãense, kelg-y-yã a Zeova sẽn yaa Zu-soab sẽn ka to wã goama! Ad a Zeova sẽn yaa Zu-soab sẽn ka to wã sẽn yet tãensã, kunkubã, kʋɩlsã, londã, raboodã ned sẽn kae b pʋsẽ wã,+ la tẽns nins b sẽn daag n base, tɩ buud nins sẽn gũbg-bã neb nins sẽn põsã zɛ la b yaalã.+ 5 Ad a Zeova sẽn yaa Zu-soab sẽn ka to wã sẽn yet-ba: ‘Mam yẽesmã sẽn dɩt wa bugmã pʋgẽ,+ mam na n gomame n ning buud toɛy-toɛyã neb nins sẽn põsã, la Edom fãa taale. Yaa neb nins sẽn deeg mam soolmã ne sũ-no-kãseng la ne paoogr wʋsgo,+ sẽn na yɩl n soog a rũms wãbneg zĩisã la b zɛ-a wã.’”’+

6 “Woto wã, togs bãngr-gomd Israyɛll soolmã wɛɛngẽ n yeel tãensã, kunkubã, kʋɩlsã, la londã yaa: ‘Ad a Zeova sẽn yaa Zu-soab sẽn ka to wã sẽn yeele: “Kelg-y-yã! Mam na n goma ne yẽesem la ne sũ-puugri, bala buud toɛy-toɛyã paooga yãmba.”’+

7 “Woto wã, ad a Zeova sẽn yaa Zu-soab sẽn ka to wã sẽn yeele: ‘Mam mengã zẽka m nug n wẽen tɩ buud nins sẽn karg n gũbg yãmbã na n wẽneg n paama yãnde.+ 8 La yãmb a Israyɛll tãense, yãmb tɩɩsã na n tãoo wila, n wom biis Israyɛll sẽn yaa mam nin-buiidã yĩnga,+ bala b na n lebg n waa ka la bilfu. 9 Bala mam bee ne yãmba. Mam na n wẽnemd n teesa yãmba. B na n koo yãmba, la b bʋd bõn-buud y zutu. 10 Mam na n kɩtame tɩ y nin-buiidã fɩɩge, rat n yeel tɩ Israyɛll buudã tõre, b fãa zãnga. Neb na n le zĩnda tẽnsẽ wã.+ B na n lebs n mee raboodã.+ 11 Hakɩɩka, mam na n kɩtame tɩ y nin-buiidã ne y rũmsã fɩɩge.+ B na n lebga wʋsgo. B na n doga kamba. Mam na n kɩtame tɩ neb le zĩnd y pʋsẽ wa pĩndã,+ la m kɩt tɩ y yɛlã yɩ sõma n yɩɩg pĩndã.+ Woto, yãmb na n bãngame tɩ mam yaa a Zeova.+ 12 Mam na n kɩtame tɩ neb le kẽn yãmb zutu. Yaa Israyɛll nebã sẽn yaa mam nin-buiidã. B na n sooga yãmba.+ Yãmb na n lebga b pʋɩɩre. Yãmb pa na n tol n le kɩt tɩ b kong kamb ye.’”+

13 “Ad a Zeova sẽn yaa Zu-soab sẽn ka to wã sẽn yeele: ‘Nebã yeta yãmb yaa: “Yãmb yaa soolem sẽn dɩt neb la sẽn kɩtd tɩ y buud toɛy-toɛyã kongd kamba.”’ 14 ‘Woto yĩnga, yãmb pa na n le rɩ neba, wall y kɩt tɩ y buud toɛy-toɛyã kong kamb ye.’ Yaa a Zeova sẽn yaa Zu-soab sẽn ka to wã n yeele. 15 ‘Mam pa na n le bas tɩ bu-zẽmsã tʋ yãmba, wall m bas tɩ nebã paoog yãmb ye.+ Yãmb pa na n le kɩt tɩ y buud toɛy-toɛyã lak n lʋɩ ye.’ Yaa a Zeova sẽn yaa Zu-soab sẽn ka to wã n yeele.”

16 A Zeova le goma ne maam n yeele: 17 “Ninsaal biiga, Israyɛll buudã neb sẽn wa n be b soolmẽ wã, b kɩtame t’a lebg rẽgd ne b manesmã la b tʋʋm-tʋmdɩ wã.+ Mam nifẽ, b manesmã ra yaa rẽgd wa pag pekr rẽgdo.+ 18 Rẽ n so tɩ mam kiig m sũ-puugrã b zutu, b sẽn daag zɩɩm soolmã pʋgẽ wã yĩnga,+ la b sẽn kɩt tɩ soolmã lebg rẽgd ne b bõn-naandsã sẽn yaa bõn-yoodã* yĩnga.+ 19 Dẽ, mam sãeeg-b-la buud toɛy-toɛyã sʋka, la m sãeeg-b soolem toor-toorã sʋka.+ Mam kaoo b bʋʋd wa sẽn zems b manesmã la b tʋʋm-tʋmdɩ wã. 20 La b sẽn ta buud toɛy-toɛyã sʋkã, nebã sãama mam yʋʋrã sẽn yaa sõngã,+ n gomd b yell n yetẽ yaa: ‘Nin-kãensã yaa a Zeova nin-buiidu, la yɩɩ tɩlɛ tɩ b yi soolem ning b sẽn kõ-bã pʋgẽ.’ 21 Woto wã, mam na n tʋma m yʋʋrã sẽn yaa sõngã yĩnga, yʋʋr ning Israyɛll buudã neb sẽn sãam buud nins sʋk b sẽn kẽngã.”+

22 “Woto yĩnga, yeel Israyɛll buudã neb yaa: ‘Ad a Zeova sẽn yaa Zu-soab sẽn ka to wã sẽn yeele: “Yãmb a Israyɛll buudã neba, pa yãmb yĩng la mam sẽn na n tʋmã ye. Yaa m yʋʋrã sẽn yaa sõngã yĩnga, yʋʋr ning yãmb sẽn sãam buud nins sʋk y sẽn kẽngã.”’+ 23 ‘Hakɩɩka, mam na n waooga m yʋ-kãsengã+ sẽn sãam bu-zẽmsã sʋka, yʋʋr ning yãmb sẽn sãam b sʋkã. Mam sã n wa paam waoogr yãmb sʋk bu-zẽmsã nifẽ, b na n bãngame tɩ mam yaa a Zeova.’+ Yaa a Zeova sẽn yaa Zu-soab sẽn ka to wã n yeele. 24 ‘Mam na n yiisa yãmb buud toɛy-toɛyã sʋka, la m tigim yãmb soolem toɛy-toɛyã fãa pʋsẽ, n tall-y n wa y soolmẽ wã.+ 25 Mam na n mesa yãmb ko-yɩlemde, tɩ y lebg yɩlma.+ Mam na n yɩlga yãmb n yiis y rẽgdã fãa,+ la m yiis y bõn-naandsã sẽn yaa bõn-yoodã.+ 26 Mam na n kõo yãmb sũ-paalle,+ la m kõ-y yam-paalga.+ Mam na n yãka y sũyã sẽn yaa kãn-kãe wa kugã+ y yĩnsẽ wã, la m kõ-y sũy sẽn yaa bʋgsgo.* 27 Mam na n ninga m vʋʋsmã yãmb pʋsẽ, la m kɩt tɩ y tũ mam noyã.+ Yãmb na n saka mam tõodã, la y tũ. 28 Woto, yãmb na n zĩnda soolem ning mam sẽn kõ yãmb yaab-rãmbã pʋgẽ. Yãmb na n yɩɩ mam nin-buiidu, tɩ mam yɩ yãmb Wẽnnaam.’+

29 “‘Mam na n fãaga yãmb n yiis y rẽgdã fãa pʋgẽ. Mam na n yeela koodã tɩ b wom wʋsgo. M pa na n le kɩt tɩ kom wa y sʋk ye.+ 30 Mam na n kɩtame tɩ tɩɩsã biis ne pʋtã kood yɩ wʋsgo, sẽn na yɩl tɩ y ra le tol n paam yãnd buud toɛy-toɛyã sʋk komã yĩng ye.+ 31 Dẽ, yãmb na n tẽega y manesem-wẽnsã la y tʋʋm nins sẽn pa sõma wã yelle. Yãmb na n kisga y mense, taal ning y sẽn tarã yĩnga, la y tʋʋm-wẽnsã yĩnga.+ 32 La bãng-y yãoã: Pa yãmb yĩng la mam na n maan woto ye.’+ Yaa a Zeova sẽn yaa Zu-soab sẽn ka to wã n yeele. ‘Yãmb a Israyɛll buudã neba, bɩ y sulg y zug ne yãnd la paoogre, y manesmã yĩnga.’

33 “Ad a Zeova sẽn yaa Zu-soab sẽn ka to wã sẽn yeele: ‘Daar ning mam sẽn na n yɩlg yãmb n yiis y taalã fãa wã, mam na n kɩtame tɩ neb le zĩnd tẽnsẽ wã,+ la m kɩt tɩ b lebs n me raboodã.+ 34 B na n koo zĩ-vɩʋʋg ning b sẽn da bas tɩ so-loaadbã fãa getẽ wã. 35 Nebã na n yeelame yaa: “Soolem ning sẽn da yaa vɩʋʋgã lebga wa Edɛn zẽedã zĩiga,+ tɩ tẽns nins b sẽn da tus n lub tɩ lebg rabood la zĩ-vɩɩdã yaa tẽns b sẽn gũbg ne lals masã, tɩ neb be b pʋsẽ.”+ 36 Woto, buud nins sẽn kellã sẽn karg n gũbg yãmbã na n bãngame tɩ yaa maam a Zeova n me bũmb ning b sẽn tus n lubã, la m sel tɩɩs soolem ning sẽn da yaa vɩʋʋgã pʋgẽ. Yaa maam a Zeova meng n gome, la m kɩt tɩ rẽ yɩ.’+

37 “Ad a Zeova sẽn yaa Zu-soab sẽn ka to wã sẽn yeele: ‘Mam na n basame me tɩ Israyɛll buudã neb kos maam tɩ m kɩt tɩ b lebg wʋsg wa rũmsi. 38 Tẽns nins sẽn da yaa raboodã na n pida ne neb wʋsg wa nin-sõamyã kʋʋngo,+ wa Zerizalɛm tigã wakat rũmsi.*+ Woto, b na n bãngame tɩ mam yaa a Zeova.’”