Koɛɛg soab sebre

4 Mam leb n tagsa weoogr ning fãa b sẽn weoogd nebã tẽngã zug* ka wã yelle. Mam yãa b sẽn weoogd b rãmbã nintãm, la ned ra pa be n na n bels-b ye.+ Neb nins sẽn weoogd-bã ra tara pãnga, la ned ra pa be n na n bels-b ye. 2 Mam pʋʋsa neb nins sẽn da zoe n ki wã ne b zu-noogo, la pa sẽn ket n vɩ-bã ye.+ 3 La sẽn são-a bãmb fãa yaa ned ning sẽn nan pa roge,+ la sẽn nan pa yã tʋʋm-wẽns nins fãa b sẽn tʋmd tẽngã zug ka wã.+

4 Mam yãa nebã sẽn modgd to-to la b sẽn tʋmd ne minim to-to b sẽn wagsd taabã yĩngã.+ Rẽ me yaa zaalem. Yaa wa f sẽn digd sobgo.

5 Yalem kalemdeda a nus tɩ wat ne a wãabo.*+

6 Vʋʋsg sẽn zems nug-pidingu, n são tʋʋm-toog sẽn pid nug-pʋs a yiibu, la f sẽn na n digd sobgo.+

7 Mam gũus n yãa bũmb a to me sẽn ka yõod tẽngã zug ka: 8 Ned n be n yaa a yembre, n pa tar tũud-n-taag ye. A pa tar biig wall ba-biiga, la a tʋʋm-toogã pa tar saab ye. Arzɛk pa sekd-a ye.+ La rẽ yĩnga, a sokda a meng n get yaa ãnd yĩng la a tʋmd wʋsg woto la a mongd a meng bõn-sõma sɩda?+ Woto me yaa zaalem la tʋʋm sẽn ka yõodo.+

9 Neb a yiib n são nin-yende,+ bala b paamda b tʋʋm-toogã yõod* sõma. 10 Bala b nin-yend sã n lʋɩ, a to wã tõe n sõng-a lame t’a yiki. La bõe n na n paam ned sẽn lʋɩ, n yaool n pa tar ned sẽn na n sõng-a t’a yiki?

11 Sẽn paase, neb a yiib sã n gãe ne taaba, b wɩngda taab yĩnsi. La nin-yend na n maana a wãn n wɩng a yĩnga? 12 Ned tõe n tõoga nin-yende, la neb sã n yaa b yiibu, a pa tõe n tõog-b ye. Wĩir sẽn kal a tãab pa tõe n tõsg tao-tao* ye.

13 Biig sẽn yaa naong soab n yaool n tar yam, n são rĩm sẽn yaa nin-kẽem n yaool n yaa yalma,+ n pa le rat n deeg saglg ye.+ 14 Bala a* yii bãens roogẽ n na n lebg rĩma,+ baa a sẽn dog ne naong nin-kãngã naamẽ wã.+ 15 Mam yãa nin-vɩɩsã sẽn saagd tẽngã zug ka wã, n paas bi-bɩɩg ning sẽn ledg ned a to wã yɛl sẽn yaa to-to. 16 Baa ne a tɛɛndbã sõor sẽn ka tɛkã, neb nins sẽn na n yaool n wa wã sũur pa na n yɩ noog ne-a ye.+ Rẽ me yaa zaalem. Yaa wa f sẽn digd sobgo.