Zeremi sebre
15 Rẽ poore, a Zeova yeela maam yaa: “Baa a Moyiiz ne a Sãmwɛll sã n da yas mam taoore,+ mam pa na n zoe nin-buiidã nimbãaneg ye.* Rig-b tɩ b yi mam taoore. Bɩ b looge. 2 B sã n sok foo yaa: ‘Yɛ la tõnd segd n kẽnge?’ Fo segd n leok-b lame yaa: ‘Ad a Zeova sẽn yeele:
“Ned ning sẽn segd ne bã-toaaga, bɩ a kẽng tɩ bã-toaagã kʋ-a!
Ned ning sẽn segd tɩ b kʋ-a ne sʋʋga, bɩ a kẽng tɩ b kʋ-a ne sʋʋga!+
Ned ning sẽn segd n ki kom, bɩ a kẽng tɩ komã kʋ-a!
Ned ning sẽn segd ne yembdo, bɩ a kẽng yembdo!”’+
3 “A Zeova yeelame: ‘Sẽn paase, mam na n kɩtame tɩ yel-beed a naas* wa b zutu.+ Sʋʋs n na n kʋ-ba, tɩ baas vu-ba, tɩ bõn-yɩgdɩ wã sẽn yɩgd yĩngrã ne tẽngã we-rũmsã rɩ sẽn ketã.+ 4 Mam na n kɩtame tɩ b lebg bũmb sẽn kẽesd rabeem tẽngã soolem toɛy-toɛyã fãa nifẽ,+ a Ezekɩyaas biig a Manase sẽn yɩ Zida rĩmã sẽn maan bũmb ning Zerizalɛmmã yĩnga.+
5 Zerizalɛm, ãnda n na n zoe fo nimbãanega?
Ãnda n na n kʋm foo?
Ãnda n na n yals n sok fo keelem?’
6 A Zeova yeelame yaa: ‘Fo basa maam.+
Fo kell n wẽnemda f poor n tees maam.*+
Woto wã, mam na n tẽega m nug n zab ne foo, n sãam-fo.+
Mam zoee fo nimbãaneg* n ya.
7 Mam na n yelg-b-la soolmã tẽns pʋsẽ* wa b sẽn yelgd koodo.
M na n kɩtame tɩ b kong b kambã.+
M na n sãama m nin-buiidã,
b sẽn zãgs tɩ b kõn toeem b manesmã yĩnga.+
8 B pʋg-kõapã na n lebga wʋsg mam taoor n yɩɩd mogrã bĩisri.
Mam na n kɩtame tɩ sãamd zab ne-b wĩnto-sʋka. A na n zaba ne ma-rãmbã la kom-bɩɩsã.
Mam na n kɩtame tɩ yɩɩr la rabeem yõk-b zĩig pʋgẽ.
9 Pag ning sẽn dog kamb a yopoe wã pãng saame.
A* vʋʋsmã lebga toogo.
A wĩndgã lʋɩɩme tɩ zĩigã nan pa sobge,
tɩ wat ne yãnd la paoogre.’
A Zeova yeelame: ‘B sʋkã neb bilfã sẽn ketã,
mam na n kɩtame tɩ b bɛɛbã kʋ-b ne sʋʋse.’”+
10 M ma, toog bee mam zugu, fo sẽn dog maamã yĩnga.+
Soolmã neb fãa zabda ne maam la b wẽed no-koɛɛm ne maam.
Mam pa peng neda, ned me pa peng maam ye.
La b fãa kãabda maam wẽnga.
11 A Zeova yeelame: “Hakɩɩka, mam na n sõnga foo.
Toogã wakate, mam na n gom n sõnga foo bɛyã taoore,
rat n yeel tɩ yel-pakrã wakate.
12 Ned tõe n kaoo kutu,
kut sẽn yit rɩtgo, la zũud sɩda?
13 Mam na n kɩtame tɩ b zɛ yãmb paoongã ne y bõn-sõmã wã+
n pa yao ligdi, yel-wẽnã y sẽn maan y soolmã fãa pʋgẽ wã yĩnga.
14 Mam na n dɩk-b lame n kõ y bɛɛbã,
tɩ b tall n kẽng soolem y sẽn pa mi pʋgẽ.+
Bala mam sũ-puugrã widga bugum
sẽn na n dɩ yãmba.”+
15 Zeova, yãmb meng mii mam namsgã.
Tẽeg-y m yelle, la y ges m yelle.
Rok-y m sũur ne sẽn namsd-b maamã.+
Ra maan-y sũ-mar ne-ba, n bas-m tɩ m ki ye.*
Bãng-y tɩ yaa yãmb yĩng la b sẽn paoogd maamã.+
16 Yãmb gomdã sẽn ta maamã, mam dɩ-a-la wa rɩɩbo.+
Wẽnnaam a Zeova sẽn yaa tãb-biis naaba, yãmb gomdã lebga bũmb sẽn kõt maam sũ-noogo, la sẽn kɩtd tɩ m kɩdemdẽ,
bala mam zãada yãmb yʋʋrã.
17 Mam pa zĩndid ne sẽn nong-b yõ-noogrã n kɩdemdẽ ye.+
Yãmb nugã sẽn be mam zugã yĩnga, mam zĩi m yembre,
bala yãmb kɩtame tɩ mam sũur yiki,*+ bõn-wẽnsã b sẽn maanã yĩnga.
18 Bõe yĩng tɩ mam toogã tõt saabo, tɩ mam nodrã pa tõe n tɩpe?
Mam nodrã zãgsa maagre.
Yãmb na n lebga wa ko-bundg zĩig sẽn pa bund koom,
tɩ ned pa tõe n teegã bɩ?
19 Woto wã, ad a Zeova sẽn yeele:
“Fo sã n lebg n wa, m na n kɩtame tɩ f le paam laafɩ.
Fo na n yalsa mam taoore.
Fo sã n welg bũmb nins sẽn yaa sõma wã ne bũmb nins sẽn ka yõodã,
fo na n lebga mam koe-taasda.*
Na n yɩɩ tɩlɛ tɩ b bao fo zĩiga,
la fo pa na n bao b zĩig ye.”
20 A Zeova yeelame yaa: “Mam na n kɩtame tɩ fo lebg zũud lalg sẽn tar pãng nin-kãensã nifẽ.+
Sãmbg sẽn kae, b na n zaba ne foo,
la b pa na n tõog-f ye.+
Bala mam bee ne foo, n na n fãag-fo, la m kɩt tɩ f paam f meng ne-ba.
21 Mam na n yiisa foo nin-wẽnsã nusẽ,
la m fãag-f nin-toosã nusẽ.”