Tõod sebre
21 “B sã n yã ned sẽn ki n dɩg pʋʋgẽ, soolem ning yãmb Wẽnnaam a Zeova sẽn kõ yãmb tɩ y soogã pʋgẽ, tɩ b pa mi sẽn yaa ned ning n kʋ-a, 2 yãmb kãsem-dãmbã ne bʋ-kaoodbã+ segd n yiime n tɩ mak kũumã sẽn dɩg zĩig ningã zãrem ne tẽns nins sẽn gũbg-a wã. 3 Rẽ poore, tẽng ning sẽn pẽ kũumã n yɩɩdã kãsem-dãmb segd n gesa rũm-bɛdã sʋka, n yãk nag-sadg b sẽn nan pa tall n tʋme, la b sẽn zɩ n balge. 4 Tẽn-kãng kãsem-dãmbã segd n talla nag-sadgã n kẽng kosoog* sẽn tar ko-zoetem pʋgẽ, tɩ b zɩ n ko be, bɩ n bʋd bũmb be ye. B segd n kaooga nag-sadgã yubl kosoogẽ wã.+
5 “Maan-kʋʋdbã sẽn yaa Levi buudã nebã na n kolgame, bala yãmb Wẽnnaam a Zeova yãk-b lame tɩ b tʋmd a tʋʋmã,+ n ningd nebã bark ne a Zeova yʋʋre.+ Bãmb n na n wilg b sẽn segd n welg nen-kɛglem yell fãa to-to.+ 6 Rẽ poore, tẽng ning sẽn pẽ kũumã n yɩɩdã kãsem-dãmb segd n pɛgsa b nus+ nag-sadgã b sẽn kaoog a yublã kosoogẽ wã zugu, 7 la b yeel yaa: ‘Tõnd nus pa raag nin-kãngã zɩɩm, d nin me pa yã a zɩɩmã raagr ye. 8 Zeova, bɩ y ra ning Israyɛll nebã sẽn yaa yãmb nin-buiid y sẽn fãagã+ taal yel-kãngã yĩng ye. Ra bas-y tɩ bʋʋm soab zɩɩm taal zĩnd Israyɛll nebã sẽn yaa y nin-buiidã zug ye.’+ Dẽ, zɩɩmã taal pa na n zĩnd b zug ye. 9 Woto, yãmb maana sẽn yaa tɩrg a Zeova nifẽ, n na n yiis bʋʋm soab zɩɩm taal yãmb sʋka.
10 “Yãmb sã n tɩ zab ne y bɛɛb tɩ yãmb Wẽnnaam a Zeova sõng-y n zab tɩ y tõog-ba, tɩ y yõg-b n looge,+ 11 tɩ fo yã pʋg-neer b sʋk tɩ f yam kẽ-a, n dat t’a lebg f paga, 12 f tõe n tall-a lame n kuili. A segd n põnga a zugã, n maneg a nug-yẽesã, 13 la a yeeg a yembdã futã n zĩnd fo zakẽ wã. A na n yãba a ba wã ne ma a wã yĩng kiuug tõre,+ la rẽ poore f tõe n kẽe ne-a. Fo na n lebga a sɩda, t’a lebg fo paga. 14 La a sã n pa ta fo yam, f segd n bas-a lame t’a kẽng a sẽn datẽ.+ La f pa segd n koos-a n deeg ligdi, bɩ n weoog-a, fo sẽn ning-a yãndã yĩnga.
15 “Rao sã n tar pagb a yiibu, n nong a ye wã n yɩɩd a to wã,* tɩ b yiibã fãa rog kom-dibli n kõ-a, tɩ pipi bi-riblã yaa pʋg-beoogã biiga,+ 16 daar ning a sẽn na n kõ a kom-dibli wã b rogem-pʋɩɩrã, a pa tar sor n na n maan pʋg-nongrã bi-riblã wa a pipi biiga, n wẽg pʋg-beoogã bi-ribl sẽn yaa a pipi biigã ye. 17 A segd n sak n deegame tɩ yaa pʋg-beoogã bi-ribl la a pipi biiga, n pʋɩ bũmb nins fãa a sẽn tarã n kõ-a pʋɩɩr a yiibu, bala yaa yẽ la pipi biiga.* Yẽ n tar sor n na n deeg pʋɩɩr ning pipi biig sẽn segd n paamã.+
18 “Rao sã n tar bi-ribl sũur sẽn diglim la sẽn yaa tõata, n pa sakd a ba wã bɩ a ma wã,+ tɩ b mak n na n kibl-a t’a pa sak n kelg-ba,+ 19 a ba wã ne a ma wã segd n tall-a lame n kẽng kãsem-dãmbã nengẽ a tẽngã rignoorẽ, 20 n yeel a tẽngã kãsem-dãmbã yaa: ‘Tõnd bi-kãngã sũurã riglmame, a yaa tõata, n zãgs t’a kõn sak tõnd ye. A yaa yão-be-ned+ la rã-yũud-kãaga.’+ 21 Dẽ, a tẽngã nebã fãa segd n lob-a-la kug n kʋ. Yaa woto la yãmb segd n yiis bũmb ning fãa sẽn yaa wẽng yãmb sʋka. La Israyɛll nebã fãa na n wʋmame n yɛɛse.+
22 “Ned sã n maan yel-wẽnd n segd ne kũum, tɩ b kʋ-a+ n yagl ra-luk zugu,+ 23 a kũumã pa segd n pa ra-lukã zug yʋngã tõr ye.+ Yãmb segd n maana y sẽn tõe fãa n mum-a baraare, bala b sẽn yagl a soab ra-luk zug yaa bũmb Wẽnnaam sẽn kãab wẽnga.+ Yãmb pa segd n dẽgem soolem ning yãmb Wẽnnaam a Zeova sẽn na n kõ yãmb tɩ yɩ y pʋɩɩrã ye.+