Bʋ-kaoodbã sebre

20 Dẽ, Israyɛll nebã fãa yii sẽn sɩng ne Dan+ n tãag Bɛɛr-seba, la Galaad+ soolmã tõre, tɩ nin-buiidã fãa tigim taab wa nin-yend Mizpa,+ a Zeova taoore. 2 Nin-buiidã ne Israyɛll buud toɛy-toɛyã taoor dãmb ra bee Wẽnnaam nin-buiidã tigingã pʋgẽ. Ra yaa sodaas tus-kobs-naas sẽn kẽnd nao la sẽn bob sʋʋse.+

3 Bẽnzame buudã neb wʋmame tɩ Israyɛll nebã kẽnga Mizpa.

Dẽ, Israyɛll nebã yeelame yaa: “Togs-y tõnd sẽn sɩng to-to tɩ yel-beed a woto wa maandẽ!”+ 4 Tɩ Levi buudã nedã,+ soab ning pʋg-rɩkdg* b sẽn kʋ wã, leok yaa: “Mam taa Gibeya+ sẽn be Bẽnzame buudã soolmẽ wã ne m pʋg-rɩkdgã,* n na n gãand ne yʋngo. 5 La Gibeya nebã* yikame n dat n maan maam wẽnga, n gũbg roogã ne yʋngã. Bãmb da rat n kʋʋ maam, la mam pʋg-rɩkdgã* la b baas n yõg t’a ki.+ 6 Woto, mam dɩka a kũumã n pas n tool Israyɛll soolmã zĩis fãa.+ Bala bãmb maana bũmb sẽn yaa yãnde, la sẽn yaa wɩɩbd Israyɛlle. 7 Masã, Israyɛll nin-buiidu, yẽs-y ne taaba, la y togs d sẽn segd n maan+ yel-kãngã wɛɛngẽ.”

8 Woto, nin-buiidã fãa yika wa nin-yend n yeele: “Tõnd ned baa a ye pa na n leb a fu-roogẽ wall a kuil a yir ye. 9 Ad tõnd sẽn na n maan Gibeya bũmb ninga: Tõnd na n maana bãnd n yãk neb tɩ b tɩ zab ne Gibeya.+ 10 Tõnd na n yãka rap piig neb koabg sʋk Israyɛll buud toɛy-toɛyã pʋgẽ, la d yãk rap koabg neb tusr sʋka, rap tusr neb tus-piig sʋka, tɩ b bao rɩɩb tãb-biisã yĩnga, sẽn na yɩl tɩ b tɩ zab ne Gibeya sẽn be Bẽnzame soolmẽ wã, bãmb sẽn tʋm wɩɩbd Israyɛllã yĩnga.” 11 Woto, Israyɛll nebã fãa tigma taab wa nin-yend n na n zab ne tẽngã.

12 Israyɛll buud toɛy-toɛyã tʋma rap tɩ b tɩ sok Bẽnzame buudã rapã yaa: “Yel-beed ning sẽn maan yãmb sʋkã võor yaa bõe? 13 Masã, wa-y ne Gibeya+ rap nins sẽn ka barkã tɩ d kʋ-ba, n yiis bõn-wẽngã Israyɛlle.”+ La Bẽnzame buudã neb pa kelg Israyɛll nebã sẽn yaa b ba-biisã ye.

14 Dẽ, Bẽnzame buudã neb yii tẽnsã pʋsẽ n tigim taab Gibeya n na n tɩ zab ne Israyɛlle. 15 Baraare, Bẽnzame buudã neb tigma b tẽnsã rap tus-pisi la a yoob sẽn bob sʋʋse, Gibeya tãb-biis kobs-yopoe sẽn mi zabr sõma wã sẽn pa naage. 16 Tãb-biis kobs-yopoe sẽn yaa gobs n da be tãb-biisã sʋka. Bãmb ned kam fãa ra pa lobgd bũmb ne loaabg n yõsge, baa yaa fĩ-fĩi wa zoobg ye.

17 Israyɛll nebã tigma rap tus-kobs-naas sẽn bob sʋʋse,+ Bẽnzame buudã sẽn pa naage. Bãmb ned kam fãa ra yaa zabr gãndaoogo. 18 Bãmb yikame n kẽng Betɛll n na n tɩ kos Wẽnnaam saglse.+ Israyɛll nebã sokame yaa: “Tõnd sʋkã, ãnd n segd n lʋɩ taoor tɩ d tɩ zab ne Bẽnzame buudã nebã?” T’a Zeova leoke: “Zida buudã neb n segd n lʋɩ taoore.”

19 Rẽ poore, Israyɛll nebã yika ne yibeoog n tɩ tilg b sikã n na n zab ne Gibeya.

20 Israyɛll nebã kẽngame n na n tɩ zab ne Bẽnzame buudã nebã. Bãmb tonga taab ned fãa ne a zĩig n na n tɩ zab ne-b Gibeya. 21 La baraare, Bẽnzame buudã neb yii Gibeya, n kʋ Israyɛll rap tus-pisi la a yiibu. 22 La Israyɛll tãb-biisã kenga b mense, n le tong taab ned fãa ne a zĩiga, n kẽng zĩig ning b sẽn kẽng pipi daarã. 23 Israyɛll nebã kẽngame n tɩ yãb a Zeova taoor hal n tãag zaabre. Bãmb soka a Zeova yaa: “Tõnd segd n tɩ zaba ne Bẽnzame buudã neb sẽn yaa d ba-biisã bɩ?”+ T’a Zeova leoke: “Kẽng-y n tɩ zab-y ne-ba.”

24 Dẽ, rasem a yiib-n-soabã daare, Israyɛll nebã kẽngame n kolg Bẽnzame buudã nebã. 25 La baraar me, Bẽnzame buudã nebã yii Gibeya n seg Israyɛll nebã, n kʋ bãmb neb tus-piig la a nii.+ B sẽn kʋ b rãmbã fãa ra yaa rap sẽn bob sʋʋse. 26 Dẽ, Israyɛll rapã fãa kẽnga Betɛll n tɩ yãbe, la b zĩnd a Zeova taoor+ n loe noor+ baraar n tãag zaabre. Bãmb maana maand sẽn yõogd bugum+ la zems-n-taar maand+ a Zeova taoore. 27 Rẽ poore, Israyɛll rapã kosa a Zeova saglse,+ bala Wẽnnaam kaoolã koglg ra bee Betɛll wakat kãnga. 28 Wakat kãng tɩ yaa a Aarõ biig a Eleazaar biig a Fineyaas+ n da tʋmd* kaoolã koglg taoore. Bãmb sokame yaa: “Tõnd segd n le kẽngame n tɩ zab ne Bẽnzame buudã nebã sẽn yaa d ba-biisã bɩ? D kẽng bɩ d ra kẽnge?”+ T’a Zeova leok n yeele: “Kẽng-y-yã, bala beoogo, mam na n ninga bãmb yãmb nugẽ.” 29 Dẽ, Israyɛll nebã yãka rap tɩ b tɩ gũbg Gibeya n solg n gũudẽ.+

30 Israyɛll nebã kẽngame n tɩ zab ne Bẽnzame buudã nebã rasem a tãab-n-soabã daare. Bãmb tonga taab ned fãa ne a zĩiga n na n zab ne Gibeya wa raasenkamã.+ 31 Bẽnzame buudã nebã sẽn yi n seg Israyɛll tãb-biisã, Israyɛll nebã basame tɩ b rig-b n zãag ne tẽnga.+ Dẽ, wa sẽn yɩ to-to pĩndã, Bẽnzame buudã nebã sɩnga Israyɛll rap kẽer kʋʋb so-kãsemsã zutu, rat n yeel tɩ so-kãseng ning sẽn teesd Betɛllã, la a soab ning sẽn teesd Gibeya wã zutu. Bãmb kʋʋ Israyɛll rap na maan bãmb pis-tã beenẽ.+ 32 Bẽnzame buudã nebã yeelame: “Tõnd na n le tõoga bãmb wa pĩndã.”+ La Israyɛll nebã ra zemsa taab n yeele: “Tõnd na n wẽnemdame n zoe, n tall-b n zãag ne tẽngã n tees so-kãsemsã zutu.” 33 La Israyɛll rapã fãa yika b zĩisẽ wã Baal-tamaar n tong taab ned fãa ne a zĩig n na n zabe. Wakat kãng tɩ Israyɛll rap nins sẽn da solg Gibeya kɩremsẽ wã yii b zĩisẽ wã. 34 Dẽ, tãb-biis tus-piig sẽn mi zabr sõma yii Israyɛll soolmã fãa pʋgẽ n wa Gibeya taoore. Zabrã ra yaa toog wʋsgo. La Bẽnzame buudã nebã ra pa mi tɩ yel-beed n yɛgd-b ye.

35 A Zeova kɩtame tɩ Israyɛll nebã tõog Bẽnzame buudã nebã.+ Baraare, Israyɛll nebã kʋʋ Bẽnzame buudã neb tus-pisi la a nu la neb koabga. Bãmb fãa ra yaa rap sẽn bob sʋʋse.+

36 Bẽnzame buudã nebã tagsame tɩ Israyɛll nebã sẽn lebg n zoet bãmb taoorã, b na n tõog-b lame.+ La Israyɛll nebã sẽn lebg n zoetẽ wã, yaa b sẽn teeg neb nins sẽn da solg n na n zab ne Gibeya wã yĩnga.+ 37 Neb nins sẽn solgã yii tao-tao n zoet n teesd Gibeya. Bãmb sãeegame n kẽ tẽngã tõr n kʋ a nebã zãng ne sʋʋga.

38 Israyɛll nebã ra zemsa ne rap nins sẽn da solgã, n yeel-b tɩ b sã n kẽ tẽngã, bɩ b yõog-a bugum t’a bug-zõosã ruk tɩ yɩ bãnde.

39 Israyɛll nebã sẽn wa n wẽnemd n zoet zabrẽ wã, Bẽnzame buudã nebã sɩnga zabr ne bãmba, n kʋ Israyɛll rap pis-tã,+ la b yeele: “Hakɩɩka, tõnd na n le tõoga bãmb wa pĩnd zabrã sasa wã.”+ 40 La bug-zõosã sɩnga rukr tẽngã pʋgẽ tɩ yaa bãnde. Bẽnzame buudã nebã sẽn wẽnemde, b yãame tɩ tẽngã tõr dɩta bugum t’a bug-zõosã zẽkd yĩngri. 41 Dẽ, Israyɛll nebã wẽnemdame n sɩng zabr ne Bẽnzame buudã nebã. Bẽnzame buudã nebã pelens yɩkame, bala b yãame tɩ yel-beed n paam-ba. 42 Bãmb wẽnemdame n tees we-raoogẽ wã, la tãb-biisã kell n dɩdga bãmb wʋsgo. Rap nins sẽn yi tẽngã pʋgẽ wã wa n naagame tɩ b na n kʋ Bẽnzame buudã nebã. 43 Bãmb gũbga Bẽnzame buudã nebã n dig-b n pa tol n bas-b ye. Bãmb tõog-b-la Gibeya taoore, yaang sẽnesã. 44 Bẽnzame buudã rap tus-piig la a nii n ki. Bãmb fãa ra yaa zabr gãndaado.+

45 Bẽnzame buudã nebã wẽnemdame n zoe n tees we-raoogã n tɩ solg Rimon pĩigẽ wã.+ La Israyɛll nebã kʋʋ* Bẽnzame buudã rap tus a nu so-kãsemsã zutu. Bãmb kell n dig-b lame hal n ta Gidom n kʋ rap tus a yi n paase. 46 Bẽnzame buudã neb nins fãa b sẽn kʋ baraarã yɩɩ rap tus-pisi la a nu sẽn bob sʋʋse.+ B fãa ra yaa zabr gãndaado. 47 La rap kobs-yoob n zoe n kẽng we-raoogẽ wã n tɩ solg Rimon pĩigẽ wã, n pa be kiis a naase.

48 La Israyɛll nebã wẽnemdame n zab ne Bẽnzame buudã nebã, n kʋ sẽn kell-b tẽngã pʋgẽ wã fãa ne sʋʋga, sẽn sɩng ne nebã n tãag rũmsã. Bãmb sã n da ta tẽng fãa, b ningd-a-la bugum.