Zeremi sebre
9 M da nongẽ lame tɩ m zugã yɩ ko-bundg zĩiga,
tɩ m ninã yɩ nintãm bulsi!+
Dẽ, mam da na n yãba wĩndg la yʋngo,
mam buudã neb nins b sẽn kʋ wã yĩnga.
2 M da nongẽ lame n tar so-toagdb gãag zĩig we-raoogẽ wã!
Dẽ, m da na n loog n basa m buudã neba, n zãag m meng ne-ba,
bala b fãa yaa yoaadba.+
B yaa zãmb dãmb sulli.
3 B segl n saame n na n yag ziri, wa b sẽn yãag tãp tɩ kell tãoobo.
Soolmã pida ne zirẽ-beedo. Maan-sɩd pa be a pʋgẽ ye.+
“B wẽnemã tara paasgo.
B toog pa be ne maam ye.”+ Yaa a Zeova n yeele.
4 “Bɩ ned fãa gũus a meng ne a to.
Ra kɩs f ba-biig meng sɩd ye.
5 Ned kam fãa wẽgda a to.
Ned baa ye pa togsd sɩd ye.
B zãmsa b zɩlma wã ziri yagbo.+
B maanda wẽng hal n wa ya.
6 Fo bee zãmb dãmb sʋka.
B zãmbã yĩnga, b zãgsame tɩ b kõn bao n bãng maam ye.” Yaa a Zeova n yeele.
7 Woto yĩnga, ad a Zeova sẽn yaa tãb-biis naabã sẽn yeele:
“Mam na n yẽneg-b lame, n mak-ba.+
Sã n pa rẽ, bõe me la m tõe n maan m nin-buiidã?
8 B zɩlma wã yaa wa pɛɛm sẽn kʋʋde, n gomd zãmb goama.
Ned noor gomda laafɩ goam ne a to,
la a sũurẽ wã, a segenda bẽdg a yĩnga.”*
9 A Zeova sokame yaa: “Mam pa segd n sok-b bõn-kãensã poorẽ sɩda?
Mam* pa segd n dok m sũur ne buud a woto sɩda?+
10 Mam na n yãbame la m wiis tãensã yĩnga,
la m yɩɩl sũ-sãang yɩɩll* rũmsã wãbneg zĩis sẽn be we-raoogẽ wã yĩnga,
bala b rɩɩ bugum tɩ ned pa le pɩʋʋgd be ye.
B pa le wʋmd rũms rãamd be me ye.
Bõn-yɩgdɩ wã sẽn yɩgd yĩngrã ne we-rũmsã zoeeme. B loogame.+
11 Mam na n kɩtame tɩ Zerizalɛm lebg kug-rʋya,+ la we-baas zĩiga,+
la m kɩt tɩ Zida tẽnsã lebg raboodo, tɩ ned pa le be b pʋsẽ ye.+
12 Ãnda n tar yam sẽn sek a na wʋm bõn-kãngã võore?
Yaa ne ãnda la a Zeova gom-yã, t’a soab tõe n togs rẽ?
Bõe yĩng tɩ soolmã sãam zãnga?
Bõe yĩng t’a yõog n lebg wa we-raoogo,
tɩ ned baa a ye pa le pɩʋʋgd be?”
13 A Zeova leokame yaa: “Yaa b sẽn zãgs mam tõogã* m sẽn kõ-bã, la b sẽn pa tũ-a la b pa sak mam koɛɛgã yĩnga. 14 B pʋd n diglma b sũyã n tũ b sũyã raabo.+ B tũu a Baal bõn-naandsã wa b ba-rãmbã sẽn zãms-bã.+ 15 Woto wã, ad Israyɛll Wẽnnaam a Zeova sẽn yaa tãb-biis naabã sẽn yeele: ‘Mam na n kɩtame tɩ nin-kãensã wãb absẽnte,* la b yũ koom sẽn yaa zẽnem.+ 16 Mam na n kɩtame tɩ b sãeeg n kẽ buud toɛy-toɛy bãmb ne b yaab-rãmbã sẽn da pa mi.+ M na n kɩtame tɩ b rig-b ne sʋʋs hal tɩ b wa menem zãnga.’+
17 Ad a Zeova sẽn yaa tãb-biis naabã sẽn yeele:
‘Bʋgs-y bũmb ning sẽn maandã zugu.
Bool-y pagb sẽn yɩɩnd sũ-sãang yɩɩl*+ tɩ b wa,
la y tʋm tɩ b bool pagb nins sẽn mi kʋʋr yãbr sõma wã,
18 sẽn na yɩl tɩ b wa tao-tao, n zẽk b koees n wiis tõnd yĩnga,
tɩ nintãm tõog n yi d ninẽ wã,
tɩ koom sodg d nin-pagdẽ wã.+
19 Bala wiisg rãamd n yit Siyõ.+ B wiisdame n yetẽ:
“Ad b sɩd sãama tõndo!
D yãndã sɩd yaa wʋsgo!
Bala tõnd yii soolmẽ wã. B tusa d rotã n lubi.”+
20 Yãmb a pagba, kelg-y-yã a Zeova goamã.
Bɩ y tʋbã reeg a noorã goama.
21 Bala kũum tũu tõnd feneta wã n kẽ.
A kẽe tõnd gasd nins sẽn tar pãngã pʋsẽ,
sẽn na yɩl n nog kambã sẽn be soayã zutã,
la kom-bɩɩsã sẽn be zãma wã zĩisẽ wã.’+
22 Yeel yaa: ‘Ad a Zeova sẽn yeele:
“Nebã kũ-rãmbã na n dʋʋga pʋtẽ wã wa birga,
wa ka-rulg ned sẽn nan kɛ n dʋʋge,
tɩ ned ka be n na n wʋk-b ye.”’”+
23 Ad a Zeova sẽn yeele:
“Bɩ yam soab ra pẽg a meng a yamã yĩng ye.+
Bɩ pãng soab ra pẽg a meng a pãngã yĩng ye.
Bɩ arzɛk soab me ra pẽg a meng a arzɛgsã yĩng ye.”+
24 “La ned ning sẽn pẽgd a menga, ad bũmb ning yĩng a sẽn segd n pẽg a mengã:
Yaa a sẽn tar yam-vẽenem la a mi maam yĩnga,+
n miẽ tɩ mam yaa a Zeova, soab ning sẽn yaa maan-neer soaba, sẽn maand sẽn yaa tɩrg la sẽn zems tẽngã zugu,+
bala yaa bõn-kãensã n noom maam.”+ Yaa a Zeova n yeele.
25 A Zeova yeelame yaa: “Ade! Daar n wate, tɩ mam na n sok ned ning fãa sẽn kẽ bãong tɩ yaool n pa bãong hakɩɩkã,+ 26 rat n yeel tɩ Ezɩpt+ nebã, Zida+ nebã, Edom+ nebã, Amon+ nebã la Mowaab+ nebã, n paas neb nins fãa sẽn põng b zutã kɩremsã n be we-raoogẽ+ wã. Bala buud toɛy-toɛyã fãa pa kẽ bãongo, tɩ Israyɛll nebã fãa me sũyã pa kẽ bãong ye.”+