Zoob sebre
4 Rẽ la Teman rao a Elifaaz+ leok-a n yeel yaa:
2 “Ned sã n mak n na n gom ne foo, f na n tõog n maaga f yĩng n kelg-a bɩ?
Bala ãnd n tõe n sĩnd n pa gome?
3 Yaa sɩd tɩ fo zãmsa neb wʋsg bũmbu,
la f ra kengd nus sẽn ka pãnga.
4 Fo goamã ra roogda ned ning fãa sẽn dat n lʋɩ,
la f ra kengd neb nins rũm sẽn gõdã raoodo.
5 La masã, taa foo tɩ f pa mi f sẽn maandg ye.*
Paama foom tɩ f koms raood zãnga.
6 Fo wẽn-zoeerã pa kɩt tɩ f pɛlg yaa kãn-kãe la?
Fo burkĩndã+ pa kɩt tɩ f tẽed manegre?
7 M bõos tɩ f tẽege: Ned sẽn pa tar taal zoe n kiime t’a wakat pa ta sɩda?
Dabʋr la b zoe n sãam nin-tɩrse?
8 Mam sẽn yã yaa tɩ neb nins sẽn kood* wẽngã na n kẽeba wẽnga,
la neb nins sẽn bʋt yɛlã na n kẽeba rẽ.
9 Wẽnnaam fʋʋsd-b lame tɩ b menem,
la a sũ-puugrã kʋʋd-b lame.
10 Gɩgemd kelemdame, tɩ gɩgem-poll gõgendẽ,
la baa gɩgma sẽn tar pãng yẽn kaoome.
11 Gɩgemd kiida kom a sẽn pa paam bũmb n yõk yĩnga,
la gɩgemd kamb sãeega taaba.
12 B soos n togsa maam gomde,
la a walengã rãamd lʋɩɩ m tʋbrẽ.
13 Ne yʋngo, mam paama vẽnegr tɩ m tagsa wã namsd-ma.
Rẽ tɩ nebã gõee tamm.
14 Mam rigimda hal wʋsgo,
tɩ rabeem pid m kõabã.
15 Bũmb* n pɩʋʋg mam nengã taoore,
tɩ m yĩn-kõabnengã yiki.
16 A yalsame,
la m pa bãng a sẽn wõnd a soab ye.
Mam nifã ra nee sulunsuku.
Yɩɩ sɩɩ, la rẽ poore m wʋma koɛɛg sẽn yeele:
17 ‘Ninsaal sẽn yaa kiid tɩrlem tõe n yɩɩg Wẽnnaam?
Ninsaal tõe n yɩɩ yɩlemd n yɩɩg a Naandã sɩda?’
18 Gese! A pa kɩs a tʋm-tʋmdbã sɩd ye.
A nifẽ a malɛgsã* yaa koangdba.
20 B bedsd-b-la fasɩ yibeoog n tãag zaabre.
B kiida wakat fãa yĩng tɩ ned baa a ye toog kae ye.
21 Bãmb pa wa fu-roog wĩir b sẽn tak n fãsg sɩda?
Bãmb kiidame n pa paam yam ye.