Bʋ-kaoodbã sebre

16 Daar a yembre, a Sãmsõ kẽnga Gaaza n tɩ yã pʋg-yoodr be, n kẽ a nengẽ. 2 B togsa Gaaza nebã yaa: “A Sãmsõ waa ka.” Woto, bãmb tɩ gũbga zĩigã n gũ-a tẽngã rignoor yʋngã tõre. Yʋngã tõre, bãmb pa maan bũmb ye. Bala b ra yeta b sũurẽ yaa: “Beoogã sã n vẽege, d na n kʋ-a lame.”

3 La a Sãmsõ kell n gãanda be n tãag yʋn-sʋka. Yʋn-sʋkã sẽn wa n ta, a yikame n gãd tẽngã rignoor kʋɩlensã ne a ra-lugs a yiibã la a soagdgã n viki. A palg-b-la a bãgdẽ n tall-b n tɩ rʋ tãng ning sẽn teesd Ebrõ wã.

4 Rẽ poore, a Sãmsõ yamã kẽe pag a yembr sẽn da be Sorɛk longã* pʋgẽ. A yʋʋr la a Dalila.+ 5 Filisti nanambs pẽnega a Dalila n yeel-a yaa: “Belg-a*+ n bãng a pãn-kãsengã sẽn yitẽ, la d sẽn tõe n maan to-to n tõog-a, n sẽb-a. Fo sã n sõng-do, tõnd ned kam fãa na n kõo foo wanzuri ligd-koeems tusr la koabga.”

6 A Dalila wa n yeela a Sãmsõ yaa: “M bõos tɩ f wilg maam fo pãn-kãsengã sẽn yitẽ, la b sẽn tõe n tall bũmb ning n sẽb foo n tõog-fo.” 7 T’a Sãmsõ leok-a yaa: “B sã n sẽb maam ne tãp wĩ-maas* a yopoe sẽn nan pa kʋɩ, mam pãngã na n boogame tɩ m lebg wa neb a taabã.” 8 Filisti nanambsã talla tãp wĩ-maas a yopoe sẽn nan pa kʋɩ, n wa kõ a Dalila t’a sẽb a Sãmsõ. 9 Neb n da tɩ solg ro-pʋg a yembrẽ n gũudẽ, t’a Dalila bool a Sãmsõ n yeele: “Sãmsõ, Filisti nebã waame!” La a Sãmsõ kaoo wĩyã nana-nana wa bugum sẽn dɩt lẽ* gĩs to-to wã.+ La b pa tõog n bãng a pãngã sẽn yitẽ ye.

10 Rẽ la a Dalila yeel a Sãmsõ yaa: “Gese! Fo belga* maam n pa togs-m sɩd ye. Masã, m bõos tɩ f togs maam b sẽn tõe n tall bũmb ning n sẽb foo.” 11 T’a Sãmsõ leok-a: “B sã n sẽb maam ne wĩ-paal b sẽn zɩ n tall n sẽb bũmbu, mam pãngã na n boogame tɩ m lebg wa neb a taabã.” 12 Woto, a Dalila rɩka wĩ-paal n sẽb a Sãmsõ, n yeel-a: “Sãmsõ, Filisti nebã waame!” (Rẽ tɩ b ra solga ro-pʋg a yembrẽ.) La zĩig pʋgẽ, a Sãmsõ kaoo wĩyã sẽn da sẽb a nusã wa gĩsi.+

13 La a Dalila yeela a Sãmsõ yaa: “Hal n tãag masã, fo belga maam n pa togs-m sɩd ye.+ Togs maam bũmb ning b sẽn tõe n tall n sẽb foo.” T’a Sãmsõ leok-a yaa: “Fo sã n pãnem mam zugã gɛm a yopoe wã ne gĩsi, mam pãngã na n boogame.” 14 A Dalila sẽba a Sãmsõ gɛmã ne kãn-tĩigã,* n bool-a n yeele: “Sãmsõ, Filisti nebã waame!” La a Sãmsõ nekame n tak kãn-tĩigã ne gĩsã n gʋsge.

15 A Dalila yeela a Sãmsõ yaa: “Fo na n yɩɩ wãn n yet tɩ f nonga maam,+ n yaool n pa kɩs maam sɩda? Fo belga maam naoor a tãabo, n pa wilg maam f pãn-kãsengã sẽn yitẽ ye.”+ 16 Pagã ra pẽdgda a Sãmsõ n namsd-a daar fãa hal t’a yamã wa yi a menga.+ 17 A Sãmsõ wa n kong n pelga a pʋg ne-a n yeel-a yaa: “Barg zɩ n sɩɩs mam zugã ye. Bala mam yaa Wẽnnaam Nazireyẽ* m dogem tɛka.*+ B sã n wõrs mam zugã, mam pãngã na n loog m bas-m lame tɩ m lebg wa neb a taabã.”

18 A Dalila sẽn bãng t’a pelga a pʋg ne yẽ wã, zĩig pʋgẽ, a boola Filisti nanambsã+ n yeel-ba: “Wa-y tɩ so-kãngã, a pelga a pʋg ne maam.” Dẽ, Filisti nanambsã talla ligdã n kẽng a Dalila nengẽ. 19 A Dalila kɩtame t’a Sãmsõ gãand a rũmã zug n gũsi, t’a bool rao t’a wa wõrs a gɛm a yopoe wã. Rẽ poore, pagã sɩnga a Sãmsõ tõogre, bala a pãngã ra loogdame. 20 Pagã zẽka a koɛɛg n yeele: “Sãmsõ, Filisti nebã waame!” A Sãmsõ nekame n yeele: “Mam na n yii wa raasenkamã+ n fãag m menga.” La a ra pa mi t’a Zeova ra bas-a lame ye. 21 Dẽ, Filisti nebã yõk-a lame n leo a ninã. B sẽb-a-la ne zũud bãens a yiib n tall-a n kẽng Gaaza t’a tɩ be bãens roogẽ n werd zom. 22 La b sẽn wõrs a Sãmsõ zugã, a zoobdã wa n le sɩnga yiibu.+

23 Filisti nanambsã wa n tigma taab n na n kʋ maand wʋsg n kõ b wẽnnaam a Dagõ+ la b maan tigri. Bala b ra yetame: “Tõnd wẽnnaamã ninga d bɛ a Sãmsõ d nugẽ!” 24 Nin-buiidã sẽn yã b bõn-naandgã, b pẽg-a lame, n yeele: “Tõnd wẽnnaamã ninga d bɛ wã d nugẽ, soab ning sẽn sãam tõnd tẽngã+ la a kʋ tõnd neb wʋsgã.”+

25 Bãmb sũyã sẽn da noomã yĩnga, b yeelame: “Tall-y-yã a Sãmsõ n wa tɩ d yaal-a.” Woto, bãmb tɩ yiisa a Sãmsõ bãensã roogẽ n tall-a n wa n na n yaal-a. B kɩtame t’a yals ra-lugsã sʋka. 26 La a Sãmsõ yeela bi-ribl ning sẽn da gãd a nugã n tatẽ wã yaa: “Bas-m tɩ m tik ra-lugsã sẽn teend roogã n paam n delle.” 27 (Roogã ra pida ne pagb la rapa. Filisti nanambsã fãa ra bee be, tɩ rap la pagb tus a tãab be roogã zug n get a Sãmsõ n laadẽ.)

28 La a Sãmsõ+ zẽka a koɛɛg n yeel a Zeova yaa: “Zu-soab sẽn ka to a Zeova, m kot-y lame tɩ y tẽeg m yelle. M bõos tɩ y kõ-m pãng+ so-kãngã bala. Mam Wẽnnaam, bas-y tɩ m dok m sũur ne Filisti nebã baa yaa m nif a ye yĩng bala.”+

29 La a Sãmsõ tika ra-lugs a yiibã sẽn be roogã tẽn-sʋk n teend roogã. A tika a ye ne a rɩtgo, a to wã ne a goabgã. 30 A Sãmsõ zẽka a koɛɛg n yeele: “Bas-y tɩ m* naag Filisti nebã n ki!” Dẽ, a tusa ra-lugsã ne a pãngã fãa tɩ roogã sirg n zãb nanambsã la nin-buiidã fãa sẽn da be be wã.+ Woto, a sẽn kʋ neb nins a kũumã daarã sõor yɩɩga a sẽn kʋ b rãmb a vɩɩmã wakatã.+

31 A Sãmsõ ba-biisã ne a ba wã zak rãmb fãa wa n dɩka a kũumã n kuili. Bãmb tall-a lame n tɩ mum a ba a Manowa+ yaoogẽ wã, Zora+ ne Ɛstawoll sʋka. A Sãmsõ yɩɩ Israyɛll bʋ-kaood yʋʋm pisi.+