Yɩɩn-sõamyã sebre
Yɩɩlã taoor soab yĩnga. Segd n yɩɩla ne Nehilote.* A Davɩɩd yɩɩlle.
5 Zeova, kelg-y m goamã.+
Kelg-y m sirã.
2 M Dĩm la m Wẽnnaam, kelg-y mam sẽn yãbd n kot sõngrã,
bala yaa yãmb la mam pʋʋsda.
3 Zeova, yãmb na n wʋma mam koɛɛgã yibeoogo.+
Yibeoogo, mam na n togsa yãmb m zu-loɛɛgã,+ la m gũ yãmb sõngrã ne m sũur fãa.
4 Bala yãmb pa Wẽnnaam sẽn maand sũ-noog ne wẽng ye.+
Nin-wẽng baa a ye pa tõe n kell n pa ne yãmb ye.+
5 Wuk-m-meng soab baa a ye pa tõe n yaas yãmb taoor ye.
A Zeova kisa nen-kɛglem dãmba, la neb sẽn zãmbd b taaba.*+
7 La mam na n waa yãmb roogẽ wã,+ yãmb maan-neerã sẽn yaa kãsengã yĩnga.+
Mam na n wõgemdame n tees yãmb ro-sõngã, n wilg tɩ m waoogd-y-la wʋsgo.+
8 Zeova, wilg-y-m sor y tɩrlmã pʋgẽ, mam bɛɛbã yĩnga.
Maneg-y y sorã n kõ-ma.+
9 Bala ned pa tõe n teeg b gomd baa a yembr ye.
Bũmb pa be b sũyẽ wã n zʋʋg wẽnem ye.
B kokorã yaa wa yaoog sẽn pake.
10 La Wẽnnaam na n yeelame tɩ b tara taale.
Bãmb mens sɩlmã n na n wa ne b lʋɩɩse.+
Bɩ y rig-ba, b kongrã sẽn yaa wʋsgã yĩnga,
bala b tõdga yãmba.
11 La neb nins fãa sẽn soonded yãmb nengẽ wã na n kɩdma sũ-noogo.+
Bãmb na n kaasda sũ-noog wakat fãa.
Yãmb na n gɩdga sẽn dat-b n maan bãmb wẽngã tɩ b ra paam-b ye.
Neb nins sẽn nong yãmb yʋʋrã na n maana sũ-noogo.*
12 Bala yãmb a Zeova na n ninga neb nins fãa sẽn yaa tɩrsã barka.
Yãmb na n maan-b-la neere. Yãmb na n kogl-b-la wa gãong sẽn yaa yalenga.+