Ezekɩyɛll sebre

22 A Zeova le goma ne maam n yeele: 2 “Sã n yaa ne foom a ninsaal biiga, fo segl n saame n na n kao* tẽn-kãngã sẽn tar zɩɩm taalã bʋʋdo,+ la f kɩt t’a bãng a tʋʋm-wẽnsã fãa bɩ?+ 3 Fo segd n yeelame yaa: ‘Ad a Zeova sẽn yaa Zu-soab sẽn ka to wã sẽn yeele: “Foom a tẽng sẽn daagd zɩɩm+ f pʋgẽ, foom a tẽng ning wakat sẽn wate,+ la sẽn maand bõn-naands sẽn yaa bõn-yood* n dẽgemd f menga,+ 4 fo sẽn daagd zɩɩmã kɩtame tɩ f tar taale,+ tɩ f bõn-naandsã sẽn yaa bõn-yoodã kɩt tɩ f lebg rẽgdo.+ Fo kɩtame tɩ f saab wakat na n ta tao-tao. Fo yʋʋmã saab taame. Yaa rẽ yĩng la mam sẽn na n kɩt tɩ fo lebg bũmb buud toɛy-toɛyã sẽn na n paoogdẽ, la bũmb soolem toɛy-toɛyã fãa sẽn na n yaandẽ wã.+ 5 Foom a tẽng ning yʋʋr sẽn dẽgme, n yaa tẽng sẽn pid ne zũnd-zãndã, soolem nins sẽn pẽ la sẽn zãr-b ne foomã na n yaala foo.+ 6 Kelge! Israyɛll nanambs nins sẽn be fo pʋgẽ wã ned kam fãa tũnugda ne a naamã n daagd zɩɩm.+ 7 B bee fo pʋgẽ n paoogd b ba-rãmb la b ma-rãmba.+ B wẽgda sãamba, la b namsd kɩɩbs* la pʋg-kõapa.”’”+

8 “‘Fo paoogda mam zĩ-sõamyã wã, la f kɩɩsd m vʋʋsg rayã noya.+ 9 Munaafɩgs n be fo pʋgẽ n magd n na n daag zɩɩm.+ Neb n dɩt maand rɩɩb tãensã zut fo pʋgẽ. B tʋmda tʋʋm-dẽgd fo pʋgẽ.+ 10 B gãee b ba-rãmb pagb fo pʋgẽ,+ la b yõgd pagb sẽn yaa rẽgd b sẽn yã b pekr yĩnga.+ 11 Fo pʋgẽ, neb n tʋmd tʋʋm-yood ne b taab pagba,+ tɩ sãnda tʋmd tʋʋm-dẽgd ne b bi-pagb n dẽgemd-ba,+ tɩ b taab gãe b tãopa, b ba-rãmbã kom-pugli.+ 12 Fo pʋgẽ, neb n deegd noor-madgr n daagd zɩɩm.+ Fo nebã pengd n dogenda yõodo,+ la b maand b taabã pãng n deesd b ligdi.+ Hakɩɩka, fo yĩma maam zãng fasɩ.’ Yaa a Zeova sẽn yaa Zu-soab sẽn ka to wã n yeele.

13 “‘Kelge! Mam wẽeda nug-pogs mam yam sẽn yi zãmb paoongã fo sẽn paamã, la zɩɩmã b sẽn daag fo pʋgẽ wã yĩnga. 14 Wakat ning mam sẽn na n sɩbg foomã, fo na n kell n talla raoodo,* tɩ f nusã kell n tall pãng sɩda?+ Yaa maam a Zeova meng n gome. Mam na n sɩbg-f lame. 15 Mam na n sãeega fo nebã buud toɛy-toɛyã sʋka, la m sãeeg-b soolem toor-toorã sʋka.+ Mam na n kɩtame tɩ fo rẽgdã sa.+ 16 Fo na n paama paoogr buud toɛy-toɛyã nifẽ. Woto, fo na n bãngame tɩ mam yaa a Zeova.’”+

17 A Zeova le goma ne maam n yeele: 18 “Ninsaal biiga, Israyɛll buudã neb lebga wa sagd* sẽn pa tar yõod ne maam. B fãa yaa wa zũudu, waasdo, kut la namd sẽn be wʋng pʋgẽ. B lebga wa wanzuri sagdo.+

19 “Woto wã, ad a Zeova sẽn yaa Zu-soab sẽn ka to wã sẽn yeele: ‘Yãmb fãa sẽn lebg wa sagd sẽn pa tar yõodã yĩnga,+ mam na n tigma yãmb Zerizalɛm pʋgẽ. 20 B ningda wanzuri, zũudu, kutu, namd la waasd wʋng pʋgẽ sẽn na yɩl n fʋʋs bugum b zut tɩ b yẽnege. Woto me, mam na n tigma yãmb m sũ-yikrã la m sũ-puugrã pʋgẽ, n fʋʋs y zut tɩ y yẽnege.+ 21 Mam na n tigma yãmb n fʋʋs m sũ-puugrã bugum y zutu,+ tɩ y yẽneg y galʋ-tẽngã pʋgẽ.+ 22 B na n yẽnega yãmb y galʋ-tẽngã pʋgẽ wa b sẽn yẽnegd wanzuri wʋng pʋgẽ. Woto, yãmb na n bãngame tɩ yaa maam a Zeova meng n kiig m sũ-puugrã y zutu.’”

23 A Zeova le goma ne maam n yeele: 24 “Ninsaal biiga, yeel soolmã yaa: ‘Fo yaa soolem sẽn pa na n paam yɩlgr wall saag mam sũ-puugrã daar ye. 25 Soolmã no-rɛɛsdbã magda mag-wẽns a pʋgẽ.+ B yaa wa gɩgemd sẽn kelemd la a wãbd rũng a sẽn yõke.+ B wãbda neba.* B reesda arzɛgs la bõn-sõma ne pãnga. B kɩtame tɩ pagb wʋsg lebg pʋg-kõap a pʋgẽ. 26 A maan-kʋʋdbã kɩɩsa mam tõogã,+ la b rẽgemd mam zĩ-sõamyã wã wakat fãa.+ B pa maand welgr bũmb sẽn yaa sõng la bũmb sẽn pa sõng sʋk ye.+ B pa wilgd nebã bũmb sẽn pa yɩlemd ne sẽn yaa yɩlemd n bak ye.+ B zãgsame tɩ b kõn tũ mam vʋʋsg rayã noy ye. Mam paama paoogr b sʋka. 27 A nanambsã sẽn be a pʋgẽ wã yaa wa we-baas sẽn wãbd rũng b sẽn yõke. B raagda zɩɩm, la b kʋʋd neb* sẽn na yɩl n paam zãmb paoongo.+ 28 La a no-rɛɛsdbã bolga b tʋʋm-tʋmdɩ wã ne goor sẽn yaa pɛɛlga. B paamda zirẽ-be-vẽnegr toor-toore, la b bʋgd zirẽ-be-bagre,+ n yetẽ: “Ad a Zeova sẽn yaa Zu-soab sẽn ka to wã sẽn yeele,” t’a Zeova meng yaool n pa gom ye. 29 Soolmã neb zãmbame la b fã.+ B namsa nimbãan-neb la naong rãmba. B zãmba sãamba, n pa kao b bʋʋd tɩrg ye.’

30 “‘Mam baoo ned b sʋkã sẽn na n maneg kugã lalga, wall sẽn na n yaas mam taoore, lalgã sẽn poogẽ wã n kogl soolmã sẽn na yɩl tɩ b ra sãam-a,+ la m pa yã ye. 31 Rẽ n so tɩ m na n kiig m sũ-puugrã b zutu, la m kɩt tɩ m sũ-puugrã bugum menes-b zãnga. Mam na n kɩtame tɩ b manesmã biis wẽneg n wa b zutu.’ Yaa a Zeova sẽn yaa Zu-soab sẽn ka to wã n yeele.”