Kibayã pipi sebre
12 Ad rap nins sẽn wa a Davɩɩd nengẽ Ziklaag+ a sẽn da wa n pa tõe n gõ a yam, a Kis biig a Sayull+ yĩngã. Bãmb naaga tãb-biis nins sẽn yaa gãndaado, n da sõngd-a n zabdẽ wã.+ 2 Bãmb da raoola b mens ne tãbdo, n da tõe n lobg loaabg+ ne goabg wall rɩtgo,+ pa rẽ bɩ n tall tãp n tão pɛɛm ne goabg wall rɩtgo. Bãmb da yaa Bẽnzame+ buudã neba, n yaa a Sayull ba-biisi. 3 B taoor soabã ra yaa a Ahiyezɛɛr, t’a Zowaas pʋgda. B yiibã fãa ra yaa Gibeya rao+ a Sema kom-dibli, n paas a Azmavɛt+ kom-dibli a Yeziyɛll ne a Pelɛt, a Beraka, Anatot rao a Zehu, 4 Gabawõ rao+ a Ismaya sẽn da yaa gãndaad pis-tã+ wã nin-yend la b taoor soabã, n paas a Zeremi, a Yahaziyɛll, a Zohanan, Gedeera rao a Zozabaad, 5 a Eluzayi, a Yerimot, a Beyaliya, a Semariya, Harif rao a Sefatiya, 6 a Ɛlkana, a Isiya, a Azareyɛll, ne a Yowezɛɛr la a Yasobeyam sẽn yaa a Koore yagensã,+ 7 n paas a Yoweela ne a Zebadiya sẽn yaa Gedoor dao a Zerowam kom-dibli wã.
8 Gaad buudã neb kẽer kẽnga a Davɩɩd nengẽ zĩ-soalgdgẽ wã sẽn be we-raoogẽ wã.+ Bãmb da yaa gãndaado, sodaas sẽn mi zabre, n da mi b sẽn tõe n tall gãong sẽn yaa yaleng la kãnd n zab to-to. Yaa b rãmb nins nens sẽn da yaa wa gɩgma nense, la b ra tʋʋl wa yãgsã sẽn be tãensã zutã. 9 A Ezɛɛr n da yaa taoor soaba, t’a Abdiyaas yaa yiib-n-soaba, t’a Eliyaab yaa tãab-n-soaba, 10 a Mismana yaa naas-n-soaba, a Zeremi yaa nu soaba, 11 a Atayi yaa yoob-n-soaba, a Eliyɛll yaa yopoe-n-soaba, 12 a Zohanan yaa nii-n-soaba, a Ɛlzabaad yaa wɛ soaba, 13 a Zeremi yaa piig soaba, t’a Makbanayi yaa piig la a ye soaba. 14 Bãmbã n da yaa Gaad buudã+ neba, n yaa tãb-biis taoor dãmba. Bãmb sʋkã ned ning pãng sẽn paood n yɩɩdã tõe n tõoga neb koabga, tɩ b ned ning pãng sẽn yɩɩd a taabã tõe n tõog neb tusri.+ 15 Yaa bãmb n da rʋʋg Zʋrdẽ kʋɩlgã a sẽn wa n pid n puug pipi kiuugã wakate. Bãmb diga neb nins sẽn da be tẽn-nabdrẽ wã yaang la nin-taoore.
16 Bẽnzame la Zida buudã neb kẽer waa a Davɩɩd nengẽ a zĩ-soalgdgẽ wã.+ 17 Dẽ, a Davɩɩd yiime n seg-b n yeel-b yaa: “Yãmb sã n waa mam nengẽ ne laafɩ n na n sõng maam, mam bee ne yãmba. La sã n yaa sẽn na n zãmb maam n kõ m bɛɛbã tɩ mam yaool n pa beege, bɩ tõnd yaab-rãmbã Wẽnnaamã gese, la a bʋ yellã.”+ 18 La Wẽnnaam vʋʋsmã siga a Amasayi+ sẽn yaa gãndaad pis-tã wã taoor soabã, t’a yeele:
“Davɩɩde, tõnd yaa yãmb neba! Zese* biiga, tõnd bee ne yãmba!+
Bɩ laafɩ zĩnd ne yãmba, la ne ned ning fãa sẽn sõngd yãmba.
Bala yãmb Wẽnnaamã sõngd-y lame.”+
Dẽ, a Davɩɩd reeg-b lame n kɩt tɩ b lebg tãb-biisã taoor dãmba.
19 Manase buudã neb kẽer me n da zoe n kẽng a Davɩɩd nengẽ wakat ning a sẽn tũ Filisti nebã n wa n na n zab ne a Sayullã. La a pa sõng Filisti nebã ye. Bala Filisti+ nanambsã sẽn yã taab poore, bãmb kɩtame t’a lebge, n yeel tɩ sã n pa rẽ, a na n wa basa bãmb n kẽng a zu-soab a Sayull nengẽ, la tɩ tõe n tũu ne bãmb yõore.+ 20 Ad Manase buudã neb nins sẽn zoe n kẽng a Davɩɩd nengẽ a sẽn wa n kẽng Ziklaagã:+ Yaa a Adna, a Zozabaad, a Yediyayɛll, a Mikayɛll, a Zozabaad, a Elihu ne a Siltayi. Bãmb yaa Manase buudã neb tusr-tusr taoor dãmba.+ 21 B sõnga a Davɩɩd t’a zab ne fãadbã. Bala bãmb da yaa rap sẽn tar pãnga, la gãndaado.+ La bãmb lebga tãb-biis nanambse. 22 Daar fãa, nebã ra wata a Davɩɩd+ nengẽ n na n sõng-a, hal tɩ b sikã zĩig wa pid wʋsg wa Wẽnnaam sika.+
23 Neb nins sẽn bobd zab-teedã taoor dãmbã waa a Davɩɩd nengẽ Ebrõ,+ n na n dɩk a Sayull naamã n kõ-a wa a Zeova sẽn da yeelã. Ad b sõore:+ 24 Zida buudã neb nins sẽn zãad gãong sẽn yaa yaleng la kãndã yɩɩ neb tus a yoob la kobs-nii. B ra bobda zab-teedo. 25 Sɩmeyõ buudã neb sʋka, yɩɩ tãb-biis sẽn yaa gãndaad la sẽn tar pãng tus a yopoe la koabga.
26 Levi buudã neb sʋka, yɩɩ bãmb tus a naas la kobs-yoobe. 27 A Zehoyada+ n da yaa a Aarõ kom-dibli+ wã taoor soaba. Neb tus a tãab la kobs-yopoe n da be ne-a, 28 n paas a Zadok+ sẽn yaa bi-bɩɩg sẽn tar pãng la gãndaoogo, ne a buudã rot taoor dãmb pisi la a yiibu.
29 Bẽnzame buudã neb sẽn yaa a Sayull+ ba-biisã sʋka, yɩɩ neb tus a tãabo. Bãmb sʋkã, wʋsg n da get a Sayull ne a zakã rãmb yelle. 30 Efrayim buudã neb sʋka, yɩɩ tãb-biis tus-pisi la kobs-nii, n da yaa gãndaad la neb yʋy sẽn yi b buudã rot taoor dãmb sʋka.
31 Manase buudã pʋɩ-sʋkã neb sʋka, yɩɩ tãb-biis tus-piig la a nii b sẽn da yãk tɩ b na n kẽng n tɩ kõ a Davɩɩd naamã. 32 Isakaar buudã neb sʋka, yɩɩ nanambs kobs-yi. Bãmb da yaa neb sẽn wʋmd wakatã võore, la b mi Israyɛll nebã sẽn tog n maane. B ba-biisã fãa ra sakda bãmba. 33 Zabulõ buudã neb sʋka, yɩɩ tãb-biis tus-pis-nu sẽn da tõe n kẽng zabre. Bãmb da paama zãmsgo, n tõe n tong taab ned fãa ne a zĩig zabr sasa, n tall zab-teoog buud fãa n zabe. Bãmb fãa tɩ saka a Davɩɩd ne b sũur fãa.* 34 Naftali buudã neb sʋka, yɩɩ nanambs tusri, ne neb tus-pis-tã la a yopoe sẽn zãad gãong sẽn yaa yaleng la kãnde. 35 Dan buudã neb sʋka, yɩɩ neb tus-pisi la a nii la kobs-yoob sẽn paam zãmsgo, n tõe n tong taab ned fãa ne a zĩig zabr sasa. 36 Asɛɛr buudã neb sʋka, yɩɩ tãb-biis tus-pis-naas sẽn da tõe n kẽng zabre. Bãmb paama zãmsg n tõe n tong taab ned fãa ne a zĩig zabr sasa.
37 Zʋrdẽ kʋɩlgã+ rʋʋndẽ, Rubɛn ne Gaad la Manase buudã neb pʋɩ-sʋkã sʋka, yɩɩ sodaas tus-koabg la pisi sẽn tõe n bob zab-teoog buud fãa. 38 Nin-kãensã fãa ra yaa sodaas sẽn segl n sa n tõe n kẽng zabre. Bãmb waa a Davɩɩd nengẽ Ebrõ ne yam a yembr n na n yãk-a t’a lebg Israyɛll nebã fãa rĩma. La Israyɛll neb nins fãa sẽn da ketã me ra naaga taab yam a yembr* n dat n yãk a Davɩɩd t’a lebg rĩma.+ 39 Bãmb kell n paa be ne a Davɩɩd rasem a tãabo, n da rɩtẽ la b yũud bũmb nins fãa bãmb ba-biisã sẽn da segl bãmb yĩngã. 40 Sẽn paase, neb nins fãa sẽn da pẽ bãmbã, la baa neb nins sẽn da be hal Isakaar ne Zabulõ la Naftali wã ra wata ne rɩɩb b sẽn zɩlg bõense, yʋgma, bõn-weese,* la niisi. Bãmb da wata ne zom me, kankam-gil ne viyn biis b sẽn kʋɩɩs n gili, divẽ, kaam, la niis ne piis wʋsgo. Bala Israyɛll fãa ra kɩdemda sũ-noogo.