SƖNGR GOAMA

Goam nins sẽn be Biiblã pʋgẽ wã yaa Wẽnnaam n vẽneg tɩ b gʋls tõnd fãa yĩnga. Tõnd segd n zãmsa Biiblã sẽn na yɩl n bãng soab ning sẽn so-a wã. (Zã 17:3; 2 Tɩmote 3:16) Biiblã pʋgẽ, Wẽnnaam a Zeova wilga a raabã sẽn yaa a soab ne ninsaalbã la ne tẽngã.—Sɩngre 3:15; Vẽnegre 21:3, 4.

Sebr a to pa tõe n toeem ned vɩɩm n ta Biiblã ye. Biiblã sõngda tõnd tɩ d rɩkd a Zeova togs-n-taar nonglmã la nimbãan-zoeerã wɛɛngẽ. A sõngda ned t’a tẽed tɩ manegr n wate, tɩ rẽ kõt-a raood t’a tõe n mao baa ne zu-loe-kɛgemse. Sẽn paase, Biiblã sõngdame tɩ d bãngd bũmb nins sẽn be dũniyã pʋgẽ n pa zems ne Wẽnnaam daabã sẽn zems zãngã vẽenega.—Yɩɩn-sõamyã 119:105; Ebre-rãmbã 4:12; 1 Zã 2:15-17.

Sɩngrẽ wã, b gʋlsa Biiblã ne Ebre, Arameyẽ la Gɛrke. La rũndã-rũndã, b lebga a tõrã wall a pʋɩ-sʋk buud-goam tus a tã la zak pʋgẽ. B sẽn lebga buud-goam ninsã la b sẽn yiis Biibl-dãmbã sõor yɩɩda sɛb a taabã hal zĩig sẽn zãre. Rẽ pa lingd tõnd ye. Biiblã bãngr-gomd n yete: “Rĩungã koe-no-kãngã na n moona dũniyã tɛk fãa tɩ yɩ kaset buud toɛy-toɛyã fãa yĩnga. Yaa rẽ poor la saabã na n ta.”—Matiye 24:14.

D sẽn mi tɩ koɛɛg ning sẽn be Biiblã pʋgẽ wã tara yõod wʋsgã yĩnga, d sẽn da rat yaa maan d sẽn tõe fãa n lebg Biiblã tɩ zems takɩ, la d modg tɩ võorã wʋm yɩ nana tɩ karengã me noome. Vẽnegr nins sẽn yaa: “Noy Biiblã lebgr yĩnga,” “Bũmb kẽer Biibl-kãngã wɛɛngẽ,” la “B sẽn maan to-to tɩ Biiblã pa menemã” pʋsẽ, b wilgda bũmb kẽer d sẽn maneg Biibl-kãngã pʋgẽ.

Neb nins sẽn nong Wẽnnaam a Zeova la b waoogd-a wã rata Biibl b sẽn lebg tɩ yaa takɩ, t’a võorã wʋmb me yaa nana. (1 Tɩmote 2:4) Rẽ n so tɩ d lebg Biibl-kãngã ne Moore, tɩ zems ne d raabã sẽn yaa modg tɩ Dũni-paalgã lebgr zĩnd buud-goam wʋsg pʋgẽ wã. D saagdame tɩ Gʋls-sõamyã lebg-kãngã na n sõnga yãmb a karemdbã sẽn modgd n ‘baood Wẽnnaamã’ tɩ y “sɩd yã-a,” la d pʋʋsd rẽ yĩnga.—Tʋʋma 17:27.