A ZOZUWE SEBRE

1 A Zeova tʋm-tʋmd a Moyiiz kũumã poore, a Zeova yeela a Nun biig a Zozuwe*+ sẽn da yaa a Moyiiz sõangdã+ yaa: 2 “Mam tʋm-tʋmd a Moyiiz kiime.+ Masã, bɩ f yik n dʋʋg Zʋrdẽ kʋɩlgã, foom ne nin-buiidã fãa, tɩ y kẽng n tɩ kẽ tẽng ning mam sẽn kõ bãmb sẽn yaa Israyɛll nebã.+ 3 Mam na n kõo yãmb zĩig ning fãa yãmb naoã sẽn na n tabe, wa m sẽn pʋlem a Moyiizã.+ 4 Yãmb soolmã na n sɩnga ne we-raoogã n tãag Libã, n paas Efrat kʋɩlgã sẽn yaa kʋɩl-kãsengã, rat n yeel tɩ Hɛt nebã soolmã fãa,+ n tãag Mog-kãsengã* sẽn be wĩndg sẽn lʋɩtẽ wã.+ 5 Fo yõor tɛka, ned baa a ye kõn tõog n yals fo taoor ye.+ Mam na n zĩnda ne foo wa m sẽn zĩnd ne a Moyiizã.+ Mam pa na n tol n bas n pa sõng foo, wall m daag-f n bas ye.+ 6 Keng f sũur la f tall raoodo,+ bala yaa foo n na n tall nin-buiidã tɩ b tɩ reeg soolem ning mam sẽn da pʋlem b yaab-rãmbã tɩ m na n kõ-b lame wã.+

7 “Fo we n keng f sũur la f tall raood sõma, n tũ Tõog ning mam tʋm-tʋmd a Moyiiz sẽn kõ foomã fãa neere. Ra bʋdg goabg wall rɩtgo,+ tɩ rẽ la f na n tõog n tʋm ne yam zĩig ning fãa fo sẽn na n kẽnge.+ 8 Ra bas n pa gom Tõogã seb-kãngã goamã yell ye.*+ Fo tog n sikda f koɛɛg n karemd-a* wĩntoog ne yʋngo, n tõog n tũ bũmb nins fãa sẽn gʋls a pʋgẽ wã neere.+ Yaa rẽ la fo sẽn maand fãa na n yãk nenga, tɩ f tõog n tʋm ne yam me.+ 9 Mam le yeta foo yaa: ‘Keng f sũur la f tall raoodo. Ra yɛɛs wall f rig rabeem ye. Bala fo Wẽnnaam a Zeova bee ne foo zĩig ning fãa fo sẽn na n kẽnge.’”+

10 Rẽ poore, a Zozuwe yeela nin-buiidã taoor dãmb yaa: 11 “Saag-y sikã zĩig fãa n yeel nin-buiidã yaa: ‘Bao-y rɩɩbo, bala ka ne rasem a tã, yãmb na n dʋʋga Zʋrdẽ kʋɩlgã, n tɩ reeg tẽng ning a Zeova sẽn kõ yãmbã n sooge.’”+

12 La a Zozuwe yeela Rubɛn ne Gaad buudã neba, la Manase buudã neb pʋɩ-sʋkã yaa: 13 “Tẽeg-y-yã a Zeova tʋm-tʋmd a Moyiiz sẽn da yeel yãmbã:+ ‘Yãmb Wẽnnaam a Zeova kõo yãmb tẽn-kãngã* tɩ y na n zĩnd a pʋgẽ ne bãane. 14 Yãmb pagbã ne y kambã la y rũmsã na n paa zĩig ning a Moyiiz sẽn kõ yãmb Zʋrdẽ kʋɩlgã rʋʋn-kãnga wã.*+ La yãmb fãa sẽn yaa gãndaadã+ na n lʋɩɩ y ba-biisã taoore, tɩ y kẽnd wa y rabda zabre.+ Yãmb segd n sõnga y ba-biisã, 15 hal t’a Zeova wa kõ-b vʋʋsg zĩig wa a sẽn kõ yãmbã, sẽn na yɩl tɩ bãmb me soog soolem ning yãmb Wẽnnaam a Zeova sẽn kõ-bã. Rẽ poor bɩ y leb soolem ning b sẽn kõ yãmbã pʋgẽ n tɩ zĩnd be, soolem ning a Zeova tʋm-tʋmd a Moyiiz sẽn da kõ yãmb Zʋrdẽ wã rʋʋnd ning sẽn be yaang sẽnesã.’”+

16 Bãmb leoka a Zozuwe yaa: “Tõnd na n maana bũmb ning fãa fo sẽn yeel tõnd tɩ d maanã, la d na n kẽnga zĩig ning fãa fo sẽn na n yeel tõnd tɩ d kẽngã.+ 17 Tõnd na n saka foo wa d sẽn da sak a Moyiiz bũmb fãa pʋgẽ wã. Bɩ fo Wẽnnaam a Zeova zĩnd ne foo wa a sẽn da zĩnd ne a Moyiizã.+ 18 Ned ning sẽn na n kɩɩs fo noorã, n pa maan bũmb ning fãa fo sẽn yeel-a t’a maanã, b na n kʋ-a lame.+ Fo we n keng f sũur la f tall raoodo.”+

2 A Nun biig a Zozuwe soos n tʋma neb a yiib tɩ b yi Sitim+ n na n tɩ soos n ges tẽngã. A yeel-b lame: “Kẽng-y n tɩ ges-y tẽngã sẽn yaa to-to wã neere, sẽn yɩɩd fãa Zeriko.” Dẽ, b kẽngame, n tɩ sig pʋg-yoodr yʋʋr sẽn boond t’a Rahaab+ zakẽ n pa be. 2 La neb n tɩ yeel Zeriko naabã yaa: “Gese! Israyɛll rap n wa ka yʋngẽ n na n soos n ges tẽngã.” 3 Dẽ, Zeriko naabã tʋma neb tɩ b tɩ yeel a Rahaab yaa: “Yiis rapã sẽn wa n be fo roogẽ wã, bala b waame n na n soos n ges tẽngã fãa.”

4 A Rahaab talla rap a yiibã n tɩ solge. La a leok neb nins naabã sẽn tʋmã yaa: “Sɩda, rapã waa mam nengẽ, la mam da pa mi b sẽn yitẽ ye. 5 La zĩigã sẽn wa n sobgdẽ tɩ b rat n pag tẽngã rignoyã, rapã loogame. Mam pa mi b sẽn teesẽ ye. La yãmb sã n pʋgl-b tao-tao, y na n paam-b lame.” 6 (A yaool n da tall-b lame n dʋ a roogã zugu, n solg-b lẽ* raad b sẽn da rʋʋg sʋka.) 7 Dẽ, rap nins naabã sẽn tʋmã pʋgl-b lame n tees Zʋrdẽ kʋɩlgã zĩis nins b sẽn tõe n kẽn n dʋʋgã.+ La bãmb sẽn yi wã, b paga tẽngã rignoorã.

8 Nand tɩ rapã gãande, a Rahaab bʋʋg-b-la roogã zugu. 9 A yeel-b lame yaa: “Mam kɩsa sɩd t’a Zeova na n kõo yãmb tẽngã.+ Sẽn paase, yãmb kẽesa tõnd dabeem.+ Yãmb yĩnga, tẽngã neb fãa komsa raoodo,+ 10 bala tõnd wʋma a Zeova sẽn kʋɩɩs Mog-miuugã koom to-to yãmb taoor yãmb sẽn yi Ezɩptã,+ la d wʋm yãmb sẽn maan Amoor nebã rĩm-dãmb a yiibã, a Siyon+ ne a Oog+ bũmb ningã, yãmb sẽn kʋ-b Zʋrdẽ kʋɩlgã rʋʋnd a to wã.* 11 Tõnd sẽn wʋm dẽ wã, tõnd gĩinã fãa maagame, la yãmb yĩnga, tõnd ned baa a ye pa le tar daood ye. Bala yãmb Wẽnnaam a Zeova yaa Wẽnnaam saasẽ sẽn be yĩngrã, la tẽng zug ka.+ 12 Masã, m kotame tɩ y wẽen a Zeova taoor tɩ mam sẽn maan yãmb neerã,* yãmb me na n maana mam ba wã zak rãmb neere, la y segd n kõo maam bãnd sẽn wilgd* tɩ y na n pidsa y sẽn yeelã. 13 Yãmb segd n basa mam ba wã ne m ma wã, m ba-biisã la b nebã fãa, la y fãag tõnd* tɩ b ra kʋ-d ye.”+

14 Rapã leok-a lame yaa: “Tõnd sã n pa maan wa d sẽn yeelã bɩ Wẽnnaam kʋ-do! Fo sã n pa togs tõnd sẽn wa n maan bũmb ningã, a Zeova sã n kõ tõnd tẽngã, tõnd na n maana foo neere, n maan wa d sẽn yeelã.” 15 Rẽ poore, a rɩka wĩir n loe a roogã fenetr tɩ b tũ n sigi, bala a roogã ra bee tẽngã lalg kɩrenga. Sɩd me, a roogã ra bee lalgã zugu.+ 16 A yeel-b lame yaa: “Kẽng-y tãensẽ wã n tɩ solg rasem a tã, tɩ sẽn baood-b yãmbã ra yã-y ye. Dẽ, b sã n lebg n wa, y na yaool n dɩk y sore.

17 Rapã yeel-a lame yaa: “Tõnd na n pidsa d wẽenegã,+ 18 fo sã n maan bũmb ning tõnd sẽn na n yeel foo wã: Tõnd sã n wa kẽ tẽngã, bɩ f loe wĩ-moom-kãngã f fenetrẽ wã, zĩig ning fo sẽn tũnug n sik tõndã. La f peeg f ba wã, f ma wã, f ba-biisã la f ba wã zak rãmb fãa n tigm-b fo roogã pʋgẽ.+ 19 Woto, ned sã n yi fo roogã pʋgẽ, a kũumã taal* bee ne yẽ, pa be ne tõnd ye. La bũmb sã n maan* ned sẽn pa ne foo roogã pʋgẽ, a kũumã taal bee ne tõndo. 20 La fo sã n togs bũmb ning tõnd sẽn wa n maanã,+ wẽeneg ning fo sẽn kɩt tɩ tõnd wẽenã taal pa le be tõnd zug ye.” 21 T’a leoke: “Bɩ yɩ wa yãmb sẽn yeelã.”

A basa rapã tɩ b looge. Dẽ, a rɩka wĩ-moomdã n loe fenetrẽ wã. 22 Bãmb loogame n kẽng tãensẽ wã, n tɩ pa be rasem a tã hal tɩ neb nins sẽn da baood bãmbã lebg n kuili. Sẽn pʋgl-b bãmbã ra bao-b-la soayã fãa zutu, la b pa yã-b ye. 23 Rap a yiibã yii tãensẽ wã n sig n dʋʋg kʋɩlgã n leb a Nun biig a Zozuwe nengẽ. B togs-a-la bũmb nins fãa sẽn maanã. 24 B yeela a Zozuwe yaa: “A Zeova rɩka soolmã fãa n ning tõnd nugẽ.+ Sɩd me, tẽngã nebã fãa komsa raood tõnd yĩnga.”+

3 A Zozuwe yika yibeoog pĩnda, tɩ yẽ ne Israyɛll nebã* fãa yi Sitim+ n kẽn n ta Zʋrdẽ kʋɩlgã. Bãmb gãanda be yʋn-kãnga, n yaool n na n dʋʋg kʋɩlgã.

2 Rasem a tãab poore, nin-buiidã taoor dãmb+ saaga sikã zĩigẽ, 3 n yeel nin-buiidã yaa: “Yãmb sã n wa yã maan-kʋʋdbã sẽn yaa Levi buudã nebã+ sẽn tʋk yãmb Wẽnnaam a Zeova kaoolã koglgã, bɩ y yik y zĩisẽ wã n pʋg-a. 4 La y segd n zãaga ne-a na maan kãntɩɩg tus a yiibu,* n da pẽneg-a ye. Rẽ la y na n bãng sor ning y sẽn tog n tũ wã. Bala yãmb zɩ n dɩk so-kãng ye.”

5 A Zozuwe yeela nin-buiidã yaa: “Yɩlg-y y mense,+ bala beoogo, a Zeova na n maana bõn-kãsems yãmb sʋka.”+

6 Rẽ poore, a yeela maan-kʋʋdbã: “Rɩk-y kaoolã koglgã+ n lʋɩ nin-buiidã taoore.” La bãmb dɩka kaoolã koglgã, n lʋɩ nin-buiidã taoore.

7 Rẽ la a Zeova yeel a Zozuwe yaa: “Rũndã, mam na n sɩnga fo zugã zẽkr Israyɛll nebã fãa nifẽ,+ tɩ b bãng tɩ mam bee ne foo+ wa m sẽn da be ne a Moyiizã.+ 8 Ad fo sẽn segd n yeel maan-kʋʋdbã sẽn tʋkd kaoolã koglgã: ‘Yãmb sã n ta Zʋrdẽ kʋɩlgã noor bɩ y kẽ koomã pʋgẽ n yalse.’”+

9 La a Zozuwe yeela Israyɛll nebã yaa: “Wa-y n kelg-y yãmb Wẽnnaam a Zeova goamã.” 10 Rẽ poore, a yeelame: “Ad bũmb ning sẽn na n kɩt tɩ yãmb bãng tɩ Wẽnnaam sẽn vɩ n be yãmb sʋka,+ la t’a na n sɩd riga Kanaã nebã, Hɛt nebã, Perɛɛz nebã, Girgas nebã ne Amoor la Zebuus nebã+ yãmb taoore. 11 Ges-y-yã! Dũniyã gill fãa Zu-soabã kaoolã koglg na n lʋɩɩ yãmb taoore, n kẽng Zʋrdẽ kʋɩlgẽ wã. 12 Masã, bɩ y yãk rap piig la a yiib Israyɛll buudã sʋka, buud fãa pʋgẽ ned a yembre.+ 13 Neb nins sẽn tʋk a Zeova sẽn yaa dũniyã gill fãa Zu-soabã Koglgã nao-sɩlpamã sã n tab Zʋrdẽ kʋɩlgã koom bala, koomã sẽn yit zugẽ n watẽ wã na n yalsame, n zẽk yĩngr wa lalga.”+

14 Dẽ, nin-buiidã sẽn viig b fu-rotã n na n kẽng Zʋrdẽ kʋɩlgẽ wã, maan-kʋʋdb nins sẽn tʋk kaoolã koglgã+ lʋɩɩ bãmb taoore. 15 Neb nins sẽn tʋk koglgã sẽn ta Zʋrdẽ kʋɩlgẽ wã, tɩ maan-kʋʋdbã nao tab koomã bala, (Zʋrdẽ kʋɩlgã koom pit n puugda+ kẽebgã wakat fãa), 16 koomã sẽn da yit zugẽ n watẽ wã yalsame. A zẽka yĩngr wa lalga, n zãag n ta Ãdem sẽn yaa tẽng sẽn pẽ Zartanna wã, tɩ koomã sẽn zoet n teesd Araba wã mogrã sẽnesã, rat n yeel tɩ Yamsem mogrã* sẽnesã kʋɩ. Kʋɩlgã koom yalsame tɩ nin-buiidã rʋʋg n kẽng Zeriko sẽnese. 17 Maan-kʋʋdbã sẽn tʋk a Zeova kaoolã koglgã kell n yalsa Zʋrdẽ kʋɩlgã sẽn kʋɩ wã tẽn-sʋka,+ tɩ Israyɛll nebã fãa tab tẽn-koɛɛngã n looge,+ hal tɩ nin-buiidã fãa rʋʋg n sa.

4 Nin-buiidã fãa sẽn dʋʋg Zʋrdẽ kʋɩlgã n sa wã bala, a Zeova yeela a Zozuwe yaa: 2 “Yãk rap piig la a yiib Israyɛll buudã sʋka, buud fãa pʋgẽ ned a yembre,+ 3 n yeel-b yaa: ‘Wʋk-y kug piig la a yiib Zʋrdẽ kʋɩlgã tẽn-sʋka, zĩig ning maan-kʋʋdbã sẽn yalsã,+ n zã n tɩ rʋʋg zĩig ning y sẽn na n gãand yʋngã.’”+

4 Dẽ, a Zozuwe boola rap piig la a yiibã a sẽn da yãk Israyɛll nebã sʋkã, buud fãa pʋgẽ ned a yembrã, 5 n yeel-b yaa: “Lʋɩ-y yãmb Wẽnnaam a Zeova Koglgã taoor n kẽng Zʋrdẽ kʋɩlgã tẽn-sʋka, tɩ y ned kam fãa rɩk kugr n zɩlg a bãokẽ, wa sẽn zems Israyɛll buud toor-toorã sõore. 6 Kug-kãensã na n yɩɩ bãnd yãmb sʋka. Yãmb kambã* sã n wa sok yãmb tɩ ‘bõe yĩng tɩ kug-kãensã rʋr ka?’+ 7 Y segd n leok-b lame yaa: ‘Bala Zʋrdẽ kʋɩlgã koom yalsa a Zeova kaoolã koglg taoore.+ B sẽn wa n tar-a n dʋʋgd Zʋrdẽ kʋɩlgã, kʋɩlgã koom yalsame. Kug-kãensã na n tẽegda Israyɛll nebã bõn-kãngã wakat fãa.’”+

8 Dẽ, Israyɛll nebã maana wa a Zozuwe sẽn yeel bãmbã. Bãmb wʋka kug piig la a yiib Zʋrdẽ kʋɩlgã tẽn-sʋk wa a Zeova sẽn da yeel a Zozuwe wã, tɩ zems Israyɛll buud toor-toorã sõore. B talla kugã n kẽng zĩig ning b sẽn na n gãand ne yʋngã, n dʋʋg-b be.

9 Sẽn paase, a Zozuwe vigla kug piig la a yiib Zʋrdẽ kʋɩlgã tẽn-sʋka, zĩig ning maan-kʋʋdbã sẽn tʋk kaoolã koglg n yalsã.+ La kugã keta be hal ne rũndã.

10 Maan-kʋʋdbã sẽn tʋk kaoolã koglgã kell n yalsa Zʋrdẽ kʋɩlgã tẽn-sʋka, hal tɩ b maan bũmb nins fãa a Zeova sẽn da yeel a Zozuwe t’a yeel nin-buiidã tɩ b maanã n sa, tɩ zems ne bũmb nins a Moyiiz sẽn da yeel a Zozuwe wã. Rẽ tɩ nebã rʋʋgda kʋɩlgã tao-tao. 11 Nin-buiidã fãa sẽn dʋʋg kʋɩlgã n sa wã bala, maan-kʋʋdbã sẽn da tʋk a Zeova Koglgã me rʋʋga kʋɩlgã nebã nifẽ.+ 12 La Rubɛn buudã ne Gaad buudã nebã, n paas Manase buudã neb pʋɩ-sʋkã lʋɩɩ Israyɛll neb a taabã taoor n dʋʋg kʋɩlgã, n kẽnd wa b rabda zabre,+ wa a Moyiiz sẽn da yeel bãmbã bala.+ 13 Yɩɩ na maan sodaas tus-pis-naas sẽn bob zab-teed n dʋʋg kʋɩlgã a Zeova taoore, n tees Zeriko we-rasempʋɩɩgã sẽn yaa tẽn-nabrã sẽnese.

14 Baraare, a Zeova zẽka a Zozuwe zug Israyɛll nebã fãa nifẽ,+ la b waoog-a-la neer* a yõor tɛka, wa b sẽn da waoogd a Moyiiz neerã.+

15 A Zeova yeela a Zozuwe yaa: 16 “Yeel maan-kʋʋdbã sẽn tʋk Kaset koglgã+ tɩ b yi Zʋrdẽ kʋɩlgẽ wã.” 17 Rẽ la a Zozuwe yeel maan-kʋʋdbã yaa: “Wa n yi-y Zʋrdẽ kʋɩlgẽ wã.” 18 Maan-kʋʋdbã sẽn tʋk a Zeova kaoolã koglgã+ sẽn yi Zʋrdẽ kʋɩlgã tẽn-sʋk tɩ b nao-sɩlpamã tab tẽn-koɛɛngã bala, Zʋrdẽ kʋɩlgã koom lebg n sɩnga zoeese, n pid n puugd wa pĩndã.+

19 Nin-buiidã rʋʋga Zʋrdẽ kʋɩlgã pipi kiuugã rasem piigã daare, n tɩ tilg b sikã Gilgalle,+ Zeriko toadg ning sẽn be yaang sẽnesã.

20 Sã n yaa ne kug piig la a yiibã b sẽn da wʋk Zʋrdẽ kʋɩlgã pʋgẽ wã, a Zozuwe vigl-b-la Gilgalle.+ 21 Rẽ poore, a yeela Israyɛll nebã yaa: “Yãmb kambã sã n wa sok yãmb nindaar tɩ ‘bõe yĩng tɩ kug-kãensã be ka?’+ 22 y segd n leok-b lame yaa: ‘Israyɛll nebã rʋʋga Zʋrdẽ kʋɩlgã koɛɛnga,+ 23 bala yãmb Wẽnnaam a Zeova kɩtame tɩ Zʋrdẽ kʋɩlgã koom kʋɩ bãmb taoor tɩ b tõog n dʋʋg-a, wa yãmb Wẽnnaam a Zeova sẽn da kɩt tɩ Mog-miuugã koom kʋɩ tõnd taoor tɩ d tõog n dʋʋg-a wã.+ 24 A Zeova maana rẽ sẽn na yɩl tɩ dũniyã nebã fãa bãng yẽ nugã pãng sẽn yaa kãseng to-to,+ la tɩ yãmb me zoe yãmb Wẽnnaam a Zeova daar fãa.’”

5 Amoor nebã+ rĩm-dãmbã fãa sẽn be Zʋrdẽ kʋɩlgã nin-taoorã,* la Kanaã nebã+ fãa sẽn be mogrã sẽnesã sẽn wʋm t’a Zeova kɩtame tɩ Zʋrdẽ kʋɩlgã koom kʋɩ Israyɛll nebã taoor tɩ b tõog n dʋʋg-a wã, b gĩinã maagame,*+ tɩ b koms raood zãng* Israyɛll nebã yĩnga.+

2 Wakat kãnga, a Zeova yeela a Zozuwe yaa: “Pees kug n maan sʋʋse, n le kẽes Israyɛll rapã bãongo,+ naoor a yiib-n-soaba.” 3 Dẽ, a Zozuwe peesa kug n maan sʋʋse, n kẽes Israyɛll rapã bãong Gibeyat-haaralote.*+ 4 Ad bũmb ning sẽn kɩt t’a Zozuwe kẽes-b bãongã: Rap nins fãa sẽn yi Ezɩptã, rat n yeel tɩ b rãmb nins yʋʋm sẽn ta zabr kẽndã ra kii we-raoogẽ wã, so-toakã sasa, b Ezɩpt yiibã poore.+ 5 Neb nins fãa sẽn yi Ezɩptã ra kẽe bãongo, la neb nins fãa sẽn dog we-raoogẽ wã, so-toakã sasa b Ezɩpt yiibã poorã ra pa kẽ bãong ye. 6 Israyɛll nebã yeeba we-raoogẽ wã yʋʋm pis-naase,+ hal tɩ buudã rapã fãa wa ki, rat n yeel tɩ rap nins yʋʋm sẽn da ta zabr kẽndã sẽn yi Ezɩptã, la sẽn pa kelg a Zeova koɛɛgã.+ A Zeova ra wẽename t’a pa na n bas tɩ nin-kãens yã tẽng+ ning a Zeova sẽn da wẽen n yeel d yaab-rãmbã t’a na n kõo tõndã ye.+ Yaa tẽng sẽn pid ne bĩisim la sɩɩdo.+ 7 Dẽ, yẽ kɩtame tɩ b kom-dibli wã reeg b zĩiga.+ Kom-dibli-kãens la a Zozuwe sẽn kẽes bãongã. B ra pa kẽ bãongo, bala b pa kẽes-b bãong so-toakã sasa ye.

8 B sẽn kẽes buudã rap fãa bãong n sa wã, b kell n paa zĩig ning b sẽn da be sikã zĩigẽ wã hal tɩ wa sãooge.

9 A Zeova yeela a Zozuwe yaa: “Rũndã mam kɩtame tɩ yãnd ning Ezɩpt nebã sẽn da ning yãmbã sa.” Rẽ n so tɩ b boond zĩigã tɩ Gilgalle,+ hal n tãag rũndã.

10 Israyɛll nebã kell n zĩnda Gilgalle, n maan Pak tigrã kiuugã rasem piig la a naas-n-soabã daar+ zaabre, Zeriko we-rasempʋɩɩgã sẽn yaa tẽn-nabrẽ wã. 11 Bãmb sɩnga tẽngã kood biis rɩɩb Pakã vẽkembeoogo, rat n yeel tɩ bur sẽn pa ning rabɩlle,+ la kood biis b sẽn sẽ, daar-n-kãng bala. 12 Dẽ, bãmb sẽn dɩ tẽngã kood biisã vẽkembeoogo, mannã pa le puk ye. Mann ra pa le be Israyɛll nebã yĩng ye.+ La b sɩnga Kanaã tẽngã kood biis rɩɩb yʋʋm-kãnga.+

13 A Zozuwe sẽn wa n be Zeriko sɛɛgẽ, a zẽka a neng n yã rao+ sẽn yas a taoor n wõog sʋʋg n zãad a nugẽ.+ A Zozuwe kẽngame n kolg-a n sok-a yaa: “Fo bee ne tõnd bɩ, bɩ f bee ne tõnd bɛɛbã?” 14 T’a leoke: “Mam* waame, bala mam yaa a Zeova tãb-biisã naaba.”+ Dẽ, a Zozuwe fõgna a neng tẽnga, n wõgemd a taoor n yeele: “Koe-bʋg la m zu-soabã tar n na n taas b tʋm-tʋmdã?” 15 A Zeova tãb-biisã naab yeela a Zozuwe yaa: “Piid f neooda wã, bala fo sẽn yas zĩig ningã yaa sõngo.” Tao-tao bala, a Zozuwe maana wa a sẽn yeelã.+

6 Zeriko kʋɩlensã ra paga sõma Israyɛll nebã yĩnga. Ned ra pa yita, ned ra pa kẽede.+

2 A Zeova yeela a Zozuwe yaa: “Gese! Mam ninga Zeriko ne a rĩmã la a tãb-biisã sẽn yaa gãndaadã fo nugẽ.+ 3 Yãmb tãb-biisã fãa segd n kẽn n gilga tẽngã, n gilg-a vugri. Woto la y segd n maan hal tɩ ta rasem a yoobe. 4 Kɩt tɩ maan-kʋʋdb a yopoe zã bard a yopoe sẽn maan ne pe-raad yɩɩla, n lʋɩ Koglgã taoore. La rasem a yopoe-n-soabã daare, yãmb segd n kẽn n gilga tẽngã naoor a yopoe, tɩ maan-kʋʋdbã peeb bardã.+ 5 B sã n peeb bardã sẽn maan ne pe-raad yɩɩlã tɩ yãmb wʋm peebgã rãamde,* bɩ nebã fãa kaas zabr kɛleng sẽn yaa kãsenga. Dẽ, tẽngã lalg na n sirgame.+ Nebã fãa segd n kẽe tẽngã, la ned fãa segd n kẽnga tɩrg n kẽ.”

6 A Nun biig a Zozuwe boola maan-kʋʋdbã fãa n yeel-ba: “Tʋk-y kaoolã koglgã, tɩ maan-kʋʋdb a yopoe zã bard a yopoe sẽn maan ne pe-raad yɩɩl n lʋɩ a Zeova Koglgã taoore.”+ 7 Rẽ poore, a Zozuwe yeela nin-buiidã yaa: “Kẽng-y n gilg-y tẽngã, la tãb-biisã sẽn bob zab-teedã+ segd n lʋɩɩ a Zeova Koglgã taoore.” 8 Nin-buiidã maana wa a Zozuwe sẽn yeel bãmbã. Maan-kʋʋdb a yopoe wã sẽn zãad bard a yopoe sẽn maan ne pe-raad yɩɩl n be a Zeova taoorã kẽndame la b peebd bardã, tɩ sẽn tʋk-b a Zeova kaoolã koglgã pʋgd-ba. 9 Tãb-biisã sẽn bob zab-teedã lʋɩɩ maan-kʋʋdbã sẽn peebd bardã taoore, la tãb-biis a taabã ra pʋgda Koglgã tɩ bardã tar peebgo.

10 A Zozuwe yeela nin-buiidã yaa: “Ra n kaas-y wall y zẽk y koɛɛg tɩ ned wʋm ye. Gomd pa segd n yi yãmb noorẽ, hal n tãag m sẽn na n wa yeel yãmb tɩ y ‘kaase!’ tɩ y yaool n kaase.” 11 A kɩtame tɩ b tall a Zeova Koglgã n gilg tẽngã vugri, n lebg n leb sikã zĩigẽ n tɩ gãand ne yʋngã.

12 Vẽkembeoogã yibeoogo, a Zozuwe sãdame tɩ maan-kʋʋdbã tʋk a Zeova Koglgã,+ 13 tɩ maan-kʋʋdb a yopoe wã sẽn zãad bard sẽn maan ne pe-raad yɩɩlã lʋɩ a Zeova Koglgã taoore, n peebd bardã. Tãb-biisã sẽn bob zab-teedã lʋɩɩ bãmb taoore, la tãb-biis a taabã ra pʋgda a Zeova Koglgã, tɩ bardã tar peebgo. 14 B kẽname n gilg tẽngã vugr rasem a yiib-n-soabã daare, n lebg n leb sikã zĩigẽ. B maana woto rasem a yoobe.+

15 La rasem a yopoe-n-soabã daare, b yika pĩnd tɩ zĩigã nan pa yẽege, n kẽn n gilg tẽngã wa raasenkamã, naoor a yopoe. Yaa raar-n-kãng bal la b kẽn n gilg tẽngã naoor a yopoe.+ 16 La naoor a yopoe-n-soabã, maan-kʋʋdbã peeba bardã t’a Zozuwe yeel nin-buiidã yaa: “Kaas-y-yã,+ bala a Zeova kõo yãmb tẽngã! 17 Sãam-y tẽngã ne teed nins fãa sẽn be a pʋgẽ wã zãnga.+ B fãa yaa a Zeova n so. Yaa pʋg-yoodr a Rahaab+ bal n segd n vɩɩmde, yẽ ne neb nins fãa sẽn be a roogẽ wã. Bala a solga rapã tõnd sẽn tʋm tɩ b tɩ soos n ges tẽngã.+ 18 La zãag-y y mens ne bũmb ning fãa sẽn segd ne sãoongã,+ tɩ y yam da wa kẽ bũmb sẽn segd ne sãoong tɩ y rɩk-a,+ n kɩt tɩ Israyɛll sikã zĩig lebg bũmb sẽn segd ne sãoongo, n wa ne yel-beed* a zug ye.+ 19 La wanzuri wã ne sãnemã la teed nins sẽn maan ne zũud la kutã yaa sõng ne a Zeova.+ B segd n ning-b-la a Zeova laogã bĩngr zĩigẽ.”+

20 La bardã sẽn peebã, nebã kaasame.+ Nin-buiidã sẽn wʋm baorgã peebg rãamd n kaas zabr kɛleng sẽn yaa kãsengã bala, tẽngã lalgã sirgame.+ Rẽ poore, nin-buiidã kẽe tẽngã. Ned kam fãa kẽnga tɩrg n kẽ, tɩ b reeg tẽngã. 21 Bãmb sãama bũmb nins fãa sẽn da be tẽngã pʋgẽ wã ne sʋʋga, rat n yeel tɩ rapã la pagbã, kambã la sẽn kʋʋl-bã, niisã, piisã la bõensã.+

22 A Zozuwe yeela rap a yiibã sẽn da kẽng n tɩ soos n ges tẽngã yaa: “Kẽng-y pʋg-yoodrã roogẽ, n tɩ yiis yẽ ne neb nins fãa a sẽn so wã, wa yãmb sẽn da wẽenã.”+ 23 Dẽ, rapã sẽn da tɩ soos n ges tẽngã kẽngame n tɩ yiis a Rahaab ne a ba wã, a ma wã, a ba-biisã la neb nins fãa a sẽn so wã. N-ye, b yiisa a zakã neb fãa+ n tall-b n kẽng Israyɛll sikã kɩrenga, tɩ bũmb pa maan-b ye.

24 Dẽ, bãmb yõoga tẽngã la bũmb nins fãa sẽn be a pʋgẽ wã ne bugum. La wanzuri wã, sãnemã la teed nins sẽn maan ne zũud la kutã, b rɩka b fãa n ning a Zeova roogã laogã bĩngr zĩigẽ.+ 25 Yaa pʋg-yoodr a Rahaab ne a ba wã zak rãmba, n paas neb nins a sẽn so wã bal la a Zozuwe bas n pa kʋ.+ A bee Israyɛll n tãag rũndã,+ a sẽn solg rap nins a Zozuwe sẽn da tʋm tɩ b tɩ soos n ges Zeriko wã yĩnga.+

26 Wakat kãnga, a Zozuwe kãabame* n yeele: “Bɩ a Zeova kɩt tɩ kãab-wẽng zĩnd ned ning sẽn na n bao n lebs n me Zeriko wã zugu. A sã n yẽbg tẽngã, a bi-kãsengã n na n ki. La a sã n vigl a kʋɩlensã, a nugẽ biigã n na n ki.”+

27 A Zeova ra bee ne a Zozuwe,+ la a yʋʋrã yiime n saag dũniyã gilli.+

7 La Israyɛll nebã pa maan sɩd bũmb nins sẽn da segd ne sãoongã wɛɛngẽ ye. Bala a Akã+ sẽn yaa Zida buudã nedã rɩka bũmb kẽer sẽn da segd ne sãoongo.+ Yẽ yaa a Karmi biiga, t’a Karmi yaa a Zabdi biiga, t’a Zabdi yaa a Zeera biiga. Rẽ kɩtame t’a Zeova sũur puug ne Israyɛll nebã.+

2 A Zozuwe tʋma neb tɩ b yi Zeriko n kẽng Ayi+ sẽn pẽ Bɛt-avɛn n be Betɛll+ yaangã, n yeel-b yaa: “Kẽng-y n tɩ soos-y n ges-y tẽngã.” La rapã kẽngame n tɩ soos n ges Ayi. 3 Bãmb sẽn lebg n wa a Zozuwe nengẽ wã, b yeel-a lame: “Pa tɩlɛ tɩ nebã fãa kẽng ye. Neb tus a yi bɩ tus a tãab bal tõe n tõoga Ayi. Ra nams nin-buiidã fãa n kɩt tɩ b kẽng ye. Bala Ayi nebã sõor yaa bilf bala.”

4 Woto, yɩɩ na maan neb tus a tãab n kẽnge, la b wa n kong n zoee Ayi nebã taoore.+ 5 Ayi nebã kʋʋ neb pis-tã la a yoobe. La b sɩng-b-la rigb tẽngã rignoorẽ n tãag Sebarim. B kell n talla bãmb kʋʋb tãngã sigdgẽ. Rẽ kɩtame tɩ nin-buiidã koms raoodo.*

6 Dẽ, a Zozuwe kẽesa a futã, n lʋɩ tẽng n fõgen a neng a Zeova Koglgã taoor hal n tãag zaabre, yẽ ne Israyɛll kãsem-dãmbã. La b ra yugunda b zutã tom n pa basdẽ ye. 7 A Zozuwe yeelame: “Kayto! Zu-soab sẽn ka to a Zeova, bõe tɩ yãmb tall nin-kãensã n dʋʋg Zʋrdẽ kʋɩlgã, n na n bas-b Amoor nebã nugẽ tɩ b kʋ-ba? Tõnd sã n da paẽ Zʋrdẽ kʋɩlgã rʋʋnd a to wã* n são! 8 Y gaafare, Zeova! Israyɛll nebã sẽn zoe b bɛɛbã taoorã, bõe la mam na n yeel masã? 9 Kanaã nebã ne tẽngã nebã fãa sã n wʋm bũmb ning sẽn maanã, b na n gũbga tõnd n menes d yʋʋr dũniyã zugu. La bõe la yãmb na n maan y yʋ-kãsengã yĩnga?”+

10 A Zeova leoka a Zozuwe yaa: “Yiki! Yaa bõe tɩ fo fõgen f neng tẽnga? 11 Israyɛll nebã maana yel-wẽnde. B kɩɩsa mam kaoolã+ mam sẽn da yeel bãmb tɩ b tũ wã. B rɩka bũmb kẽer sẽn da segd ne sãoongo.+ B zuume+ n soos n ning b teedã sʋka.+ 12 Woto wã, Israyɛll nebã pa na n tõog n yals b bɛɛbã taoor ye. B na n zoee b bɛɛbã taoore, bala b lebga bũmb sẽn segd ne sãoongo. Mam pa na n le zĩnd ne yãmba, sã n pa yãmb menesa bũmb ning sẽn segd ne sãoongã yãmb sʋka.+ 13 Yik n yɩlg nin-buiidã!+ Yeel-b yaa: ‘Yɩlg-y y mens beoog yĩnga, bala ad bũmb ning Israyɛll Wẽnnaam a Zeova sẽn yeele: “Israyɛll neba! Bũmb sẽn segd ne sãoong n be yãmb sʋka. Yãmb pa na n tõog n yals y bɛɛbã taoore, sã n pa y yiisa bũmb ning sẽn segd ne sãoongã y sʋk ye. 14 Beoog yibeoogo, yãmb segd n waa Wẽnnaam taoor buud-buudu. A Zeova sẽn na n yãk buud ningã+ neb segd n kolga roog-roogo, t’a Zeova sẽn na n yãk roog ningã neb kolg zak-zaka. La a Zeova sẽn na n yãk zak ningã rap segd n kolga yembr-yembre. 15 La b sã n bãng ned ning sẽn dɩk bũmb ning sẽn segd ne sãoongã, b na n yõog-a-la ne bugum,+ yẽ ne a sẽn so wã fãa. Bala a kɩɩsa a Zeova kaoolã,+ n maan bũmb sẽn yaa wẽng wʋsg Israyɛlle.”’”

16 Dẽ, a Zozuwe sãda yibeoog pĩnda, n kɩt tɩ Israyɛll nebã kolg buud-buudu, tɩ b yãk Zida buudã. 17 A kɩtame tɩ Zida buudã neb kolge, tɩ b yãk a Zeera roogã rãmba.+ Rẽ poore, a kɩtame t’a Zeera roogã rap kolg yembr-yembr tɩ b yãk a Zabdi. 18 Sẽn na n baase, a kɩtame t’a Zabdi zakã rap kolg yembr-yembre, la b yãka a Akã. A Akã yaa Zida buudã neda, n yaa a Karmi biiga, t’a Karmi yaa a Zabdi biiga, t’a Zabdi yaa a Zeera biiga.+ 19 Rẽ la a Zozuwe yeel a Akã yaa: “M biiga, m bõos tɩ f waoog Israyɛll Wẽnnaam a Zeova, n togs-a fo sẽn maanã. M bõos tɩ f togs-m bũmb ning fo sẽn maanã. Ra solg maam bõn-kãng ye.”

20 A Akã leoka a Zozuwe yaa: “Sɩda, yaa maam n beeg Israyɛll Wẽnnaam a Zeova, la ad bũmb ning mam sẽn maane: 21 Mam yãa fu-neer sẽn yaa Sineyaar fuug+ te-zɛɛdmã sʋka, n paas wanzuri sɩkl* kobs-yi la sãnem giulg zɩslem sẽn ta sɩkl pis-nu, tɩ m yam kẽ-b tɩ m dɩk-ba. Mam tuu bok m fu-roogã pʋgẽ n solg-ba, tɩ ligdã be tẽngre.”

22 Zĩig pʋgẽ, a Zozuwe tʋma neb tɩ b zoe n kẽng a Akã fu-roogẽ wã, la b tɩ yãa fuugã sẽn solg fu-roogã pʋgẽ, tɩ ligdã be tẽngre. 23 B yiisa teedã fu-roogẽ wã, n tall n wa a Zozuwe ne Israyɛll nebã fãa nengẽ, n dɩgl-b a Zeova taoore. 24 A Zozuwe ne Israyɛll nebã fãa talla a Akã+ sẽn yaa a Zeera biigã, n paas wanzuri wã ne fu-neerã, la sãnem giulgã+ ne a kom-dibli wã, a kom-pugli wã, a niisã, a bõensã, a rũms a taabã, a fu-roogã, la bũmb nins fãa a sẽn so wã, n kẽng Akoor longẽ wã.+ 25 A Zozuwe yeelame: “Bõe yĩng tɩ fo kɩt tɩ yel-beed* paam tõndo?+ Rũndã, a Zeova na n kɩtame tɩ yel-beed paam foom.” Rẽ poore, Israyɛll nebã fãa loba a Akã kug n kʋ,+ la b yõog bãmb bugum.+ Woto, bãmb loba b fãa kug n kʋ. 26 La b zama kug wʋsg bãmb zugu, tɩ kug-kãens ket hal n tãag rũndã. Woto, a Zeova sũurã sẽn da puugã sigame.+ Rẽ n so tɩ b boond zĩ-kãng tɩ Akoor* long n tãag rũndã.

8 A Zeova yeela a Zozuwe yaa: “Ra zoe rabeem wall f yɛɛs ye.+ Tall tãb-biisã fãa n kẽng n tɩ zab ne Ayi. Gese! Mam ninga Ayi rĩmã, a nin-buiidã, a na-tẽngã la a soolmã fo nugẽ.+ 2 Maan Ayi ne a rĩmã wa f sẽn maan Zeriko ne a rĩmã bũmb ningã.+ La so-kãngã, yãmb tõe n wʋka a te-zɛɛdmã la a rũmsã n sooge. Yãk neb tɩ b tɩ solg tẽngã poore.”

3 Woto, a Zozuwe ne a tãb-biisã kẽngame n na n tɩ zab ne Ayi. A Zozuwe yãka tãb-biis tus-pis-tã sẽn yaa gãndaado, n tʋm-b ne yʋngo. 4 A kõo bãmb noor n yeele: “Kelg-y-yã, yãmb segd n tɩ solga tẽngã poore. Da zãag-y ne tẽngã ye. Bɩ y fãa segl y mense. 5 Maam ne neb nins fãa sẽn be ne maamã na n kolga tẽngã, la b sã n yi n na n zab ne tõnd wa pĩndã,+ tõnd na n lebg n zoeeme. 6 B sã n yi n na n dig tõndo, tõnd na n tall-b lame n zãag ne tẽngã, bala b na n yeelame: ‘B lebg n zoeta wa pĩndã.’+ La tõnd na n lebg n zoeta bãmb taoore. 7 Wakat kãnga, yãmb segd n yii zĩig ning y sẽn da solgã n deeg tẽngã. Yãmb Wẽnnaam a Zeova na n ning-a-la yãmb nugẽ. 8 Y sã n deeg tẽngã bal bɩ y ning-a bugum.+ Yãmb segd n maana wa a Zeova sẽn yeelã. Noy nins mam sẽn da tar n na n taas yãmbã la woto.”

9 Dẽ, a Zozuwe tʋm-b lame, la bãmb kẽname n ta b soondgã zĩigẽ. Yaa Betɛll ne Ayi sʋka, la yaa Ayi nin-taoore. La a Zozuwe paa ne nin-buiidã yʋn-kãnga.

10 A Zozuwe yika yibeoog pĩnd n tigim tãb-biisã. Rẽ poore, yẽ ne Israyɛll kãsem-dãmbã tall-b lame n kẽng Ayi. 11 Tãb-biis nins fãa+ sẽn da be ne yẽ wã kẽname n kolg tẽngã noore. B tilga b sikã Ayi rɩtgo, tɩ longã be bãmb ne Ayi sʋka. 12 Wakat kãng t’a ra yãka neb tus a nu, n kɩt tɩ b tɩ solg+ Betɛll+ ne Ayi sʋkã, tẽngã nin-taoore. 13 Woto, nin-buiidã tilga b sikã tẽngã rɩtgo,+ tɩ tãb-biis nins sẽn solgã be tẽngã nin-taoore.+ La a Zozuwe kẽnga longã sʋk yʋn-kãnga.

14 Ayi rĩmã sẽn yã rẽ wã bala, yẽnda ne tẽngã nebã yika tao-tao yibeoog pĩnda, n na n seg Israyɛll nebã n zab ne bãmba, zĩig sẽn tees we-rasempʋɩɩgã sẽn yaa tẽn-nabrã. La a ra pa mi tɩ neb n solg tẽngã poor n na n zab ne-a ye. 15 La Ayi rapã sẽn sɩng zabrã, a Zozuwe ne Israyɛll nebã fãa zoeeme n dɩk sor ning sẽn teesd we-raoogã sẽnesã.+ 16 Dẽ, bãmb boola neb nins fãa sẽn be tẽngã pʋgẽ wã tɩ b yi n dig-ba, la b sẽn wa n digd a Zozuwe wã, b zãaga ne tẽngã. 17 Rao pa kell Ayi ne Betɛll n pa yi n na n dig Israyɛll nebã ye. B basa tẽngã noy vɩʋʋgo, n yi n dig Israyɛll nebã.

18 Wakat kãnga, a Zeova yeela a Zozuwe yaa: “Rɩk kãndã sẽn be fo nugẽ wã n tees Ayi,+ bala mam na n kɩtame tɩ fo tõog-a.”+ Dẽ, a Zozuwe rɩka kãndã sẽn da be a nugẽ wã n tees tẽngã. 19 A sẽn tẽeg a nugã bala, sẽn da solg-bã yii b zĩigẽ wã tao-tao, n zoe n kẽ tẽngã n deeg-a, n ning-a bugum zĩig pʋgẽ.+

20 Ayi nebã sẽn wẽnemd n yã tẽngã bug-zõos sẽn dukdã, b gĩinã maagame, tɩ b pa mi b sẽn na n zoe n teesẽ ye. Dẽ, neb nins sẽn da zoet n teesd we-raoogẽ wã wẽnemdame n na n zab ne sẽn da rigd-b bãmbã. 21 A Zozuwe ne Israyɛll nebã fãa sẽn yã tɩ sẽn da solg-bã reega tẽngã, la tɩ tẽngã bug-zõosã rukdame wã, b wẽnemdame n na n zab ne Ayi nebã. 22 Sẽn da be-b tẽngã pʋgẽ wã yiime n segd-ba, tɩ Ayi nebã be tẽn-sʋk n pa tar b sẽn teesdẽ ye. Israyɛll neb kẽer da bee bãmb poorẽ, tɩ b taabã be b taoore. B talla bãmb kʋʋb hal tɩ b ned baa a ye pa põs wall a tõog n zoe ye.+ 23 La b yõka Ayi rĩmã+ vɩɩga, n tall-a n kẽng a Zozuwe nengẽ.

24 Israyɛll nebã sẽn kʋ Ayi tẽngã neb nins sẽn da be zĩ-vɩʋʋgẽ wã, rat n yeel tɩ we-raoogã zĩig ning b sẽn da rig bãmb n teesã, n kʋ b fãa ne sʋʋg n sa wã, b leba Ayi tẽngã pʋgẽ n tɩ kʋ sẽn ket-bã ne sʋʋga. 25 Neb nins fãa sẽn ki baraarã, rapã ne pagbã, yɩɩ neb tus-piig la a yiibu. Yɩɩ Ayi nebã fãa. 26 A Zozuwe pa sik a nugã sẽn gãd kãndã n tees tẽngã,+ hal t’a kʋ Ayi nebã fãa ye.+ 27 La Israyɛll nebã wʋka tẽngã te-zɛɛdmã la a rũmsã n sooge, wa a Zeova sẽn da yeel a Zozuwe wã.+

28 A Zozuwe yõoga Ayi tẽngã bugum, n kɩt t’a lebg raboog+ n tãag rũndã. 29 A yagla Ayi rĩmã* raoog* zug n tãag zaabre. La wĩndgã sẽn wa n dat n lʋɩ wã, a Zozuwe kɩtame tɩ b sik a kũumã raoogã zugu.+ Rẽ poore, b lob-a-la tẽngã rignoore, n wʋk kug n zam-a. Kugã keta be n tãag rũndã.

30 Dẽ, a Zozuwe mee tẽn-kugr Eball tãngã+ zug Israyɛll Wẽnnaam a Zeova yĩnga, 31 wa a Zeova tʋm-tʋmd a Moyiiz sẽn da yeel Israyɛll nebã tɩ b maanã, la wa sẽn gʋls a Moyiiz Tõogã sebr+ pʋgẽ wã: “Tẽn-kugr sẽn maan ne kug-mum b sẽn pa pees ne kutu.”+ B maana maand sẽn yõogd bugum la zems-n-taar maand beenẽ n kõ a Zeova.+

32 Rẽ poore, a gʋlsa Tõog+ ning a Moyiiz sẽn da gʋls Israyɛll nebã taoorã+ kug-kãens zutu. 33 Israyɛll nebã fãa, b kãsem-dãmbã, b taoor dãmbã la b bʋ-kaoodbã ra yasa Koglgã kɩrems a yiibẽ, maan-kʋʋdbã sẽn yaa Levi buudã sẽn tʋkd a Zeova kaoolã koglgã taoore. Sãambã ra bee be, n paas Israyɛll buudã neba.+ Bãmb pʋɩ-sʋk ra yasa Gerizim tãngã taoore, tɩ pʋɩ-sʋk a to wã ra yas Eball tãngã+ taoore, (wa a Zeova tʋm-tʋmd a Moyiiz sẽn da yeel bãmb tɩ b maanã)+ n na n ning Israyɛll nebã barka. 34 Rẽ poore, a Zozuwe zẽka a koɛɛg n karem Tõogã goamã fãa,+ a kãab-noodã+ ne kãab-beedã,+ wa sẽn zems bũmb nins fãa sẽn gʋls Tõogã sebr pʋgẽ wã. 35 Gomd pa be goam nins fãa a Moyiiz sẽn da togsã sʋka, t’a Zozuwe pa zẽk a koɛɛg n karem Israyɛll nin-buiidã fãa taoor ye.+ Pagbã ne b kambã la sãambã+ sẽn be* Israyɛll nebã sʋkã me ra bee be.+

9 Rĩm-dãmb nins fãa sẽn da be Zʋrdẽ kʋɩlgã+ nin-taoorã wʋma bũmb ning sẽn maanã. Yaa rĩm-dãmb nins sẽn da be soolmã zĩig ning sẽn yaa tãensã, Sefela wã pʋgẽ, n paas b rãmb nins fãa sẽn da be Mog-kãsengã*+ noorã, la Libã taoorã, rat n yeel tɩ Hɛt nebã, Amoor nebã, Kanaã nebã, Perɛɛz nebã, Hevi nebã la Zebuus nebã.+ 2 B zemsa taab n na n zab ne a Zozuwe la Israyɛll nebã.+

3 Gabawõ nebã+ me wʋma a Zozuwe sẽn maan Zeriko+ ne Ayi+ bũmb ningã. 4 Dẽ, b maana sɩlem n bao rɩɩb n ning yol-kʋd pʋsẽ n zɩlg b bõense, la b zã waoos sẽn pãrs tɩ b sẽ. 5 B leb n wida neooda sẽn zags tɩ b sẽ, la b yeelg fut sẽn ki. B burã fãa ra kʋɩɩme n sʋʋgdẽ. 6 B kẽnga a Zozuwe nengẽ sikã zĩigẽ Gilgalle,+ n tɩ yeel yẽ ne Israyɛll nebã yaa: “Tõnd yii hal tẽn-zãrgẽ n wa. Masã, bɩ y maan kaool ne tõndo.” 7 La Israyɛll nebã yeela Hevi nebã yaa:+ “Tõe tɩ yãmb pa zãr ne tõnd ye. Rẽ wã, tõnd yɩta wãn n maan kaool ne yãmba?”+ 8 La b leoka a Zozuwe yaa: “Tõnd yaa yãmb tʋm-tʋmdba.”*

Rẽ la a Zozuwe yeel-b yaa: “Yãmb yaa ãnd dãmba, la yɛ la yãmb yita?” 9 Tɩ b leoke: “Yãmb tʋm-tʋmdbã yii hal tẽn-zãrgẽ n wa,+ d sẽn nand yãmb Wẽnnaam a Zeova yʋʋrã yĩnga. Bala tõnd wʋmame tɩ b gomd a ziirã yelle, la bũmb nins fãa a sẽn maan Ezɩptã,+ 10 la a sẽn maan Amoor nebã rĩm-dãmb a yiibã sẽn da be Zʋrdẽ kʋɩlgã rʋʋnd a to wã.* Yaa Hɛsbon rĩm a Siyon,+ la Basan rĩm a Oog+ sẽn da be Astarotã. 11 Dẽ, tõnd kãsem-dãmbã ne tẽngã nebã fãa yeela tõnd yaa: ‘Bao-y rɩɩb so-toakã yĩnga, la y kẽng n tɩ seg-ba. Yeel-y-b yaa: “Tõnd na n yɩɩ yãmb tʋm-tʋmdba.+ Masã, bɩ y maan kaool ne tõndo.”’+ 12 Bur-kãngã tõnd sẽn zã wã ra yaa tʋʋlg d sẽn wa n yit d zagsẽ n na n wa yãmb nengẽ wã. La y pa ne tɩ kʋɩɩme masã n sʋʋgdẽ sɩda?+ 13 D waoosã ra yaa paal d sẽn wa n pidsd-bã, la masã b poome.+ D futã la d neooda wã kiime, so-toakã sẽn yɩ wokã yĩnga.”

14 Dẽ, Israyɛll nebã reega b rɩɩbã bilf n gese, la b pa sok a Zeova b sẽn segd n maan ye.+ 15 Dẽ, a Zozuwe maana laafɩ kaool ne bãmb+ n na n bas-b tɩ b vɩɩmde. Yaa woto la nin-buiidã* taoor dãmbã wẽen n na n maane.+

16 La Israyɛll nebã sẽn maan kaool ne-bã rasem a tãab poore, b wʋmame tɩ b pa yit zĩ-zãrgẽ ye. B wẽneg n pẽe ne bãmba. 17 Rẽ la Israyɛll nebã rɩk sor n ta b tẽnsẽ wã rasem a tãab-n-soabã daare. B tẽnsã ra yaa Gabawõ,+ Kefira, Beerot la Kiryat-yeyarim.+ 18 La Israyɛll nebã pa zab ne-b ye. Bala nin-buiidã taoor dãmbã ra wẽena ne Israyɛll Wẽnnaam a Zeova yʋʋre.+ Rẽ kɩtame tɩ nin-buiidã fãa sɩng yẽgeng ne taoor dãmbã. 19 La taoor dãmbã fãa yeela nin-buiidã yaa: “Tõnd sẽn wẽen ne Israyɛll Wẽnnaam a Zeova wã yĩngã, tõnd pa le tar sor n na n maan-b wẽng ye. 20 Ad bũmb ning tõnd sẽn na n maane: Tõnd na n bas-b lame tɩ b vɩɩmde, tɩ Wẽnnaam sũur da wa puug ne tõndo, d sẽn wẽenã yĩnga.”+ 21 Taoor dãmbã paasame: “Bas-y-b tɩ b vɩɩmde, la b na n lebga neb sẽn wɩɩsd raado, la sẽn yõngd koom nin-buiidã fãa yĩnga.” Woto la taoor dãmbã pʋlem bãmba.

22 A Zozuwe boola Gabawõ nebã n sok-b yaa: “Bõe yĩng tɩ yãmb belg tõnd n yeel tɩ y ‘yita tẽng sẽn zãr wʋsg ne tõndo,’ n yaool n wẽneg n pẽ ne tõndo?+ 23 Masã tɛka, kãab-wẽng bee yãmb zugu.+ Yãmb na n yɩɩ yembs wakat fãa, n wɩɩsd raad la y yõngd koom mam Wẽnnaamã roog yĩnga.” 24 La b leoka a Zozuwe: “Yaa b sẽn togs yãmb tʋm-tʋmdbã vẽeneg tɩ yãmb Wẽnnaam a Zeova ra yeela a tʋm-tʋmd a Moyiiz t’a kõ yãmb tẽngã, la a sãam tẽngã nebã fãa yãmb taoorã yĩnga.+ Yãmb dabeem yõka tõndo, la d yɛɛsa d vɩɩmã* yĩnga.+ Yaa rẽ yĩng la d sẽn maan woto wã.+ 25 La masã, tõnd bee yãmb nugẽ. Maan-y tõnd y sẽn tagsd tɩ yaa sõma la tɩrga.” 26 La yaa woto la a Zozuwe maan bãmba. A fãaga bãmb Israyɛll nebã nugẽ tɩ b pa kʋ-b ye. 27 La baraar tɛka, a Zozuwe kɩtame tɩ b wɩɩsd raad la b yõngd koom nin-buiidã yĩnga,+ la a Zeova tẽn-kugrã yĩnga, zĩig ning a sẽn na n yãke.+ La b ket n maanda rẽ n tãag rũndã.+

10 Zerizalɛm rĩm a Adoni-zedɛk sẽn wʋm t’a Zozuwe reega Ayi n sãam-a, n maan Ayi ne a rĩmã+ wa a sẽn maan Zeriko tẽngã ne a rĩmã,+ la a wʋm tɩ Gabawõ nebã maana kaool ne Israyɛll nebã+ n be b sʋkã, 2 a yɛɛsa wʋsgo.+ Bala Gabawõ ra yaa tẽn-kãsenga, wa rĩm-dãmb a taabã tẽnsã. A ra yaa kãseng n yɩɩd Ayi,+ la a rapã fãa ra yaa gãndaado. 3 Rẽ n so tɩ Zerizalɛm rĩm a Adoni-zedɛk tʋm neb tɩ b tɩ yeel a Hoham sẽn yaa Ebrõ rĩmã,+ ne a Piram sẽn yaa Yarmut rĩmã, la a Yafiya sẽn yaa Lakiis rĩmã, n paas a Debiir sẽn yaa Eglon rĩmã+ yaa: 4 “Wa-y n sõng-y maam tɩ d naag taab n zab ne Gabawõ, bala b maana kaool ne a Zozuwe la Israyɛll nebã.”+ 5 Dẽ, Amoor nebã rĩm-dãmb a nu wã,+ rat n yeel tɩ Zerizalɛm rĩmã, Ebrõ rĩmã, Yarmut rĩmã, Lakiis rĩmã ne Eglon rĩmã fãa tigma taab ne b tãb-biisi, n tɩ gũbg Gabawõ n na n zab ne-a.

6 Rẽ la Gabawõ nebã tʋm tɩ b tɩ yeel a Zozuwe sikã zĩigẽ Gilgall+ yaa: “Da bas-y* y yembsã ye.+ Wa-y tao-tao n fãag-do, n sõng-do! Amoor nebã rĩm-dãmb nins fãa sẽn be soolmã zĩig ning sẽn yaa tãensã tigma taab n dat n zab ne tõndo.” 7 La a Zozuwe yika Gilgall ne a tãb-biisã la a gãndaadã+ fãa n kẽnge.

8 A Zeova yeela a Zozuwe yaa: “Da zoe-b ye.+ Bala mam ninga bãmb fo nugẽ.+ B baa a yembr pa na n tõog n yals fo taoor ye.”+ 9 A Zozuwe yii Gilgall n kẽn yʋngã tõre, n tɩ ling-b n na n zab ne-ba. 10 A Zeova kɩtame tɩ b yirb Israyɛll nebã taoore.+ Bãmb kʋ-b-la wʋsg Gabawõ, n dig-b n dʋ Bɛt-horon, n kell n kʋ-b n tãag Azɛka la Makeda. 11 B sẽn wa n zoet Israyɛll nebã taoor n sigd Bɛt-horonnã, a Zeova kɩtame tɩ sapɩlem-bɛd yi yĩngr n lʋɩ b zut n tãag Azɛka, la b kiime. Sɩd-sɩdã, neb nins sapɩlmã sẽn kʋ wã sõor yɩɩga Israyɛll nebã sẽn kʋ-b rãmb ne sʋʋgã.

12 Yɩɩ baraar a Zeova sẽn kɩt tɩ Amoor nebã zoe Israyɛll nebã taoorã la a Zozuwe yeel a Zeova Israyɛll nebã nifẽ yaa:

13 Woto, wĩndgã kell n yalsame, la kiuugã me pa yẽrge, hal tɩ Israyɛll nebã rok b sũur ne b bɛɛbã. B pa gʋls kiba-kãng tɩ be Zasaar sebrã pʋgẽ sɩda?+ Wĩndgã kell n yalsa saagã tẽn-sʋk daarã tõre, n pa kẽ tao-tao ye. 14 Sẽn deng baraare, la rẽ poor me, daar zɩ n zĩnd a Zeova sẽn kelg ninsaal koɛɛg woto ye.+ Bala a Zeova ra zabda Israyɛll nebã yĩnga.+

15 Rẽ poore, a Zozuwe ne Israyɛll nebã fãa leba sikã zĩigẽ Gilgalle.+

16 Wakat kãng tɩ rĩm-dãmb a nu wã zoe n tɩ solga tãng bokẽ, Makeda.+ 17 La neb n wa n togs a Zozuwe yaa: “B yãa rĩm-dãmb a nu wã sẽn solg tãng bokẽ, Makeda.”+ 18 La a Zozuwe yeelame yaa: “Bilim-y kug-bɛd n pag bokã noore, la y yãk neb tɩ b gũ-ba. 19 La sẽn ket-bã pa segd n yals ye. Rig-y y bɛɛbã n pʋgl b poorẽ n kʋ-ba.+ Da bas-y tɩ b kẽ b tẽnsẽ wã ye. Bala yãmb Wẽnnaam a Zeova ninga bãmb yãmb nusẽ.”

20 A Zozuwe ne Israyɛll nebã kʋ-b-la wʋsg zembal n baase, n da na n tolg n menes-b zãnga, sã n pa neb a wãn bal sẽn põs n zoe n tɩ kẽ tẽns sẽn gũbg ne lals pʋsẽ wã. 21 Rẽ poore, nebã fãa leba a Zozuwe nengẽ sikã zĩigẽ Makeda ne laafɩ. Ned baa a ye pa le saag n gom Israyɛll nebã wẽng ye.* 22 A Zozuwe yeelame: “Pak-y bokã noore, n tall rĩm-dãmb a nu wã n wa ne.” 23 Dẽ, b tɩ yiisa rĩm-dãmb a nu wã bokã pʋgẽ n wa kõ-a. Yaa Zerizalɛm rĩmã, Ebrõ rĩmã, Yarmut rĩmã, Lakiis rĩmã, la Eglon rĩmã.+ 24 B sẽn tall rĩm-kãens n wa a Zozuwe nengẽ wã, a boola Israyɛll rapã fãa n yeel a tãb-biisã taoor dãmb sẽn da tũud yẽ wã yaa: “Kolg-y ka. Rɩk-y y naoã n teeg b kãyã.” B sɩd kolgame n dɩk b naoã n teeg rĩm-dãmbã kãyã.+ 25 Dẽ, a Zozuwe yeel-b lame: “Ra n zoe-y rabeem wall y yɛɛs ye.+ Keng-y y sũurã la y tall raoodo. Bala yaa woto la a Zeova na n maan yãmb bɛɛbã fãa sẽn zabd ne yãmbã.”+

26 Dẽ, a Zozuwe kʋ-b lame n yagl-b ra-lugs* a nu zutu, tɩ b kell n pa be n tãag zaabre. 27 Wĩndgã sẽn wa n kẽedẽ, a Zozuwe kɩtame tɩ b sik-b ra-lugsã zut+ n lob-b tãngã bokẽ zĩig ning b sẽn da zoe n tɩ solgã. Dẽ, b wʋka kug-bɛd n pag bokã noore, la b keta be n tãag rũndã.

28 A Zozuwe reega Makeda+ baraare, n kʋ a nebã ne sʋʋga. A kʋʋ a rĩmã ne neb nins fãa* sẽn da be a pʋgẽ wã, n pa bas tɩ ned baa a ye põs ye.+ A maana Makeda rĩmã+ wa a sẽn maan Zeriko rĩmã.

29 Rẽ poore, a Zozuwe ne Israyɛll nebã fãa yii Makeda n kẽng Libna+ n na n tɩ zab ne-a. 30 A Zeova ninga tẽngã ne a rĩmã+ fãa Israyɛll nebã nugẽ, la b sãam-a lame n kʋ neb nins fãa* sẽn da be a pʋgẽ wã ne sʋʋga, n pa bas tɩ ned baa a ye põs ye. Woto, b maana a rĩmã wa b sẽn da maan Zeriko rĩmã.+

31 A Zozuwe ne Israyɛll nebã fãa yii Libna n kẽng Lakiisi,+ n tilg b sikã be n zab ne tẽngã. 32 A Zeova ninga Lakiis Israyɛll nebã nugẽ, la b reeg-a-la rasem a yiib-n-soabã daare. B sãama tẽngã, la b kʋ neb nins fãa* sẽn da be a pʋgẽ wã ne sʋʋga,+ wa b sẽn maan Libna wã.

33 Rẽ la Gezɛɛr+ rĩm a Horam yik n na n tɩ sõng Lakiisi, la a Zozuwe kʋʋ yẽ ne a nebã fãa, hal tɩ ned baa a ye pa põs ye.

34 Rẽ poore, a Zozuwe ne Israyɛll nebã fãa yii Lakiis n kẽng Eglon,+ n tilg b sikã be n zab ne tẽngã. 35 B reega tẽngã baraare, n kʋ a nebã ne sʋʋga. B kʋʋ neb nins fãa* sẽn da be a pʋgẽ wã baraare, wa b sẽn da maan Lakiisã.+

36 Rẽ poore, a Zozuwe ne Israyɛll nebã fãa yii Eglon n kẽng Ebrõ,+ n tilg b sikã be n zab ne tẽngã. 37 B reeg-a lame n sãam-a, la b kʋ a rĩmã, n sãam a tẽn-kɩremsã. B kʋʋ neb nins fãa* sẽn da be a pʋgẽ wã ne sʋʋga, n pa bas tɩ ned baa a ye põs ye. Bãmb sãama Ebrõ ne neb nins fãa* sẽn da be a pʋgẽ wã, wa b sẽn da maan Eglonnã.

38 Sẽn na n baase, a Zozuwe ne Israyɛll nebã fãa wẽnemdame n tees Debiir+ n zab ne-a. 39 B reeg-a lame n kʋ a rĩmã, la b sãam a tẽn-kɩremsã. B kʋʋ bãmb ne sʋʋga, n sãam neb nins fãa* sẽn da be a pʋgẽ wã,+ n pa bas tɩ ned baa a ye põs ye.+ Bãmb maana Debiir ne a rĩmã wa b sẽn da maan Ebrõ la Libna ne a rĩmã.

40 A Zozuwe tõoga soolmã zĩig nins sẽn yaa tãensã fãa, Negɛɛbã, Sefela wã,+ sẽn be b sigdgẽ wã ne b rĩm-dãmbã fãa, n pa bas tɩ ned baa a ye põs ye. Bãmb kʋʋ nin-buiidã fãa,+ wa Israyɛll Wẽnnaam a Zeova sẽn da yeelã.+ 41 A Zozuwe tõog-b lame, sẽn sɩng Kadɛɛs-barneya+ n ta Gaaza+ ne Gosɛn+ tẽngã tõre, hal n tãag Gabawõ.+ 42 A Zozuwe tõoga rĩm-kãensã fãa ne b tẽnsã vugr bala, bala yaa Israyɛll Wẽnnaam a Zeova n da zabd Israyɛll nebã yĩnga.+ 43 Rẽ poore, a Zozuwe ne Israyɛll nebã fãa leba sikã zĩigẽ Gilgalle.+

11 Hazoor rĩm a Yabin sẽn wʋm rẽ wã bala, a tʋmame tɩ b tɩ taas Madõ rĩm+ a Zobaab koɛɛga, ne Simron rĩmã, Aksaf rĩmã,+ 2 rĩm-dãmb nins sẽn be soolmã zĩig ning sẽn yaa tãensã nug-rɩtgã, b rãmb nins sẽn be Kinerɛt tẽn-nabrã* nug-goabgã, sẽn be-b Sefela wã, n paas Door sigdgẽ+ wã sẽn be nin-taoorã, 3 Kanaã nebã+ sẽn be yaang la nin-taoorã, Amoor nebã,+ Hɛt nebã, Perɛɛz nebã, Zebuus nebã sẽn be soolmã zĩig ning sẽn yaa tãensã, la Hevi nebã+ sẽn be Hɛrmo+ tãngã pendẽ Mizpa soolmẽ wã. 4 Dẽ, b waa ne b tãb-biisã fãa, tɩ b sõorã yaa wʋsg wa bĩisrã sẽn be mogrã noorã, n paas wed-moos wʋsg la zabr saar-dãmba.* 5 Rĩm-dãmb-kãensã fãa yãka yam n na n seg taaba. B fãa wa n tilga b sikã Merom koomã noore, n na n zab ne Israyɛlle.

6 Rẽ la a Zeova yeel a Zozuwe yaa: “Ra zoe rabeem nin-kãensã yĩng ye.+ Bala beoog wakat kãngã, mam na n ninga b fãa Israyɛll nugẽ kɩɩmse. Yãmb segd n kɛɛ b wed-moosã nao-gĩinã n pase,+ la y yõog b saar-dãmbã bugum.” 7 A Zozuwe ne tãb-biisã fãa wa n ling-b-la Merom koomã noore, n zab ne-ba. 8 A Zeova ning-b-la Israyɛll nebã nugẽ,+ la b tõog-b lame n dig-b n tãag Sɩdõ-kãsengã+ ne Misrefot-mayim,+ la Mizpe longã sẽn be yaangã. Bãmb kʋ-b lame hal tɩ ned baa a ye pa põs ye.+ 9 A Zozuwe maana bãmb wa a Zeova sẽn da yeel-a wã. A kɛɛ b wed-moosã nao-gĩinã n pase, la a yõog b saar-dãmbã bugum.+

10 Sẽn paase, a Zozuwe leba Hazoor n tɩ reeg-a, n kʋ a rĩmã ne sʋʋga.+ Bala Hazoor n da yaa kãseng n yɩɩd soolem-kãensã fãa. 11 B kʋʋ neb nins fãa* sẽn da be a pʋgẽ wã ne sʋʋga, n sãam-b zãnga.+ Ned baa a ye pa põs ye.+ Rẽ poore, a yõoga Hazoor bugum. 12 A Zozuwe reega rĩm-dãmb-kãens tẽnsã fãa, n kʋ b rĩm-dãmbã fãa ne sʋʋga.+ A sãam-b-la+ wa a Zeova tʋm-tʋmd a Moyiiz sẽn da yeelã. 13 La Israyɛll nebã pa yõog tẽns nins sẽn be kunkub zutã baa a yembre, sã n pa Hazoor bala. Yaa yẽ bal la a Zozuwe yõog bugum. 14 Israyɛll nebã wʋka tẽn-kãens te-zɛɛdmã fãa ne b rũmsã n sooge.+ La b kʋʋ ninsaalbã fãa ne sʋʋga, hal n menes-b zãnga.+ B pa bas ned baa a ye t’a põs ye.+ 15 A Zeova sẽn yeel a tʋm-tʋmd a Moyiizã bal la a Moyiiz yeel a Zozuwe,+ t’a Zozuwe maan wa a Moyiiz sẽn yeelã. A maana bũmb nins fãa a Zeova sẽn da yeel a tʋm-tʋmd a Moyiizã, n pa bas baa a ye.+

16 A Zozuwe tõoga soolem-kãngã fãa, soolmã zĩig ning sẽn yaa tãensã, Negɛɛbã+ gilli, ne Gosɛn tẽngã fãa, Sefela wã,+ Araba wã,+ la Israyɛll soolmã zĩig ning sẽn yaa tãensã soolmã ne a Sefela* wã. 17 Yaa sẽn sɩng ne Halak tãngã sẽn teesd Seyɩɩrã la hal n tãag Baal-gaad+ sẽn be Libã longẽ wã, Hɛrmo tãngã+ pendẽ. A yõga b rĩm-dãmbã fãa n kʋ-ba. 18 A Zozuwe zaba ne rĩm-dãmb-kãens fãa n kaoose. 19 Tẽng baa a ye pa bao laafɩ ne Israyɛlle, sã n pa Hevi nebã sẽn be Gabawõ wã bala.+ Yɩɩ ne zabr la Israyɛll nebã rees tẽns a taabã fãa.+ 20 Yaa a Zeova n bas tɩ b riglim b sũyã+ n zab ne Israyɛlle, sẽn na yɩl t’a sãam-b zãng n pa zoe b nimbãaneg ye.+ B ra tog n menes-b lame, wa a Zeova sẽn da yeel a Moyiizã.+

21 Wakat kãnga, a Zozuwe menesa Anak nebã+ sẽn da be soolmã zĩig ning sẽn yaa tãensã, sẽn sɩng ne Ebrõ, Debiir, Anaab n tãag Zida soolmã zĩig ning sẽn yaa tãensã fãa, la Israyɛll soolmã zĩig ning sẽn yaa tãensã fãa. A Zozuwe kʋʋ bãmb fãa, la a sãam b tẽnsã.+ 22 Anak ned baa a ye pa kell Israyɛll soolmẽ wã ye. Sã n pa+ Gaaza,+ Gat+ la Asdood+ bala. 23 A Zozuwe sooga soolmã fãa, wa a Zeova sẽn da pʋlem a Moyiizã.+ Rẽ poore, a Zozuwe kõo soolmã Israyɛll nebã tɩ na n yɩ b fãa pʋɩɩr b sẽn segd n pʋɩ b buud toɛy-toɛyã sʋka.+ La zabr pa le zĩnd tẽngã pʋgẽ ye.+

12 Ad soolmã rĩm-dãmb nins Israyɛll nebã sẽn tõoge, b rãmb nins tẽns b sẽn deeg Zʋrdẽ kʋɩlgã yaangã. Yaa sẽn sɩng ne Arno longã*+ n tãag Hɛrmo tãnga,+ la Araba wã tõr sẽn teesd yaang sẽnesã.+ 2 Yaa Amoor nebã rĩm a Siyon+ sẽn da be Hɛsbon n dɩt naam Arowɛɛr+ sẽn be Arno longã*+ noorã, sẽn sɩng ne longã tẽn-sʋka, ne Galaad pʋɩ-sʋk n tãag Zabok longã* sẽn be Amon nebã toadgẽ wã. 3 A leb n dɩɩ naam Araba wã yaang n tãag Kinerɛt* mogrã,+ la a yaangã n tall n ta Araba wã mogrã, rat n yeel tɩ Yamsem mogrã* sẽn be Bɛt-zesimot sẽnesã, n paas Pisga tãngã+ sigdgẽ nug-goabgã.

4 B leb n deega Basan rĩm a Oog+ soolmã. Ra yaa Refayim neb nins sẽn da ketã nin-yende.+ A zĩnda Astarot ne Edreyi 5 n dɩ naam Hɛrmo tãngẽ wã, Salka la Basan+ n tãag Gesʋʋr nebã la Maakat nebã+ toadgẽ wã, la Galaad pʋɩ-sʋk n tãag Hɛsbon rĩm a Siyon soolmã.+

6 A Zeova tʋm-tʋmd a Moyiiz ne Israyɛll nebã tõog-b lame,+ tɩ rẽ poore, a Zeova tʋm-tʋmd a Moyiiz rɩk b tẽnsã n kõ Rubɛn buudã neba, Gaad buudã neba, la Manase buudã neb pʋɩ-sʋk tɩ b sooge.+

7 Ad soolmã rĩm-dãmb nins a Zozuwe ne Israyɛll nebã sẽn tõog Zʋrdẽ kʋɩlgã nin-taoorã. Yaa sẽn sɩng ne Baal-gaad+ sẽn be Libã longẽ wã,+ n tãag Halak tãngã+ sẽn teesd Seyɩɩrã.+ Rẽ poore, a Zozuwe rɩka b soolmã n pʋɩ n kõ Israyɛll buud toɛy-toɛyã, buud fãa ne a pʋɩɩr tɩ b sooge.+ 8 Tẽn-kãens bee soolmã zĩig ning sẽn yaa tãensẽ wã, Sefela wã, Araba wã, tãensã sigdgẽ, we-raoogẽ wã, la Negɛɛbã,+ rat n yeel tɩ Hɛt nebã soolmã, Amoor nebã+ soolmã, Kanaã nebã soolmã, Perɛɛz nebã soolmã, Hevi nebã soolmã la Zebuus nebã+ soolmã. Ad rĩm-dãmb nins b sẽn tõogã:

13 A Zozuwe ra kʋʋlame n kolg kũum.+ Rẽ n so t’a Zeova yeel-a yaa: “Fo kʋʋlame, pa na n kaoos la f ki ye. La tẽns nins yãmb sẽn segd n deegã sẽn ketã yaa wʋsgo.” 2 Ad tẽns nins sẽn ketã:+ Yaa Filisti nebã soolmã fãa, ne Gesʋʋr nebã+ soolmã fãa, 3 (sẽn sɩng ne Nill kʋɩlgã wɛlgã* sẽn be Ezɩpt yaangã* n tãag Ekron sẽn be nug-rɩtgã. Ra yaa Kanaã nebã soolem)+ ne Filisti nanambs a nu wã+ soolem, (yaa Gaaza, Asdood,+ Askelon,+ Gat+ la Ekron)+ ne Avim-dãmbã+ soolmã 4 sẽn be nug-goabgã. Sẽn paase, Kanaã nebã soolmã fãa, Meyara sẽn yaa Sɩdõ nebã+ tẽngã, n tãag Afɛk Amoor nebã toadgẽ wã, 5 la Geball nebã+ soolmã ne Libã tõrã sẽn be yaang sẽnesã, sẽn sɩng ne Baal-gaad sẽn be Hɛrmo tãngã pendẽ wã n tãag Lebo-hamate,*+ 6 soolmã zĩig ning sẽn yaa tãensã nebã fãa, sẽn sɩng ne Libã+ n tãag Misrefot-mayimmi,+ la Sɩdõ nebã fãa.+ Mam na n diga bãmb n yiis Israyɛll nebã taoore.+ Fo segd n dɩka soolem-kãens n kõ Israyɛll tɩ yɩ b pʋɩɩre, wa mam sẽn yeel foomã.+ 7 Masã, bɩ f pʋɩ soolem-kãng n kõ Israyɛll buud a wɛ wã ne Manase buudã neb pʋɩ-sʋk tɩ yɩ b pʋɩɩre.+

8 Manase buudã neb pʋɩ-sʋkã sẽn ketã, ne Rubɛn buudã neb n paas Gaad buudã neb reega b pʋɩɩrã a Moyiiz sẽn da kõ-b Zʋrdẽ kʋɩlgã rʋʋnd ning sẽn be yaangã, wa a Zeova tʋm-tʋmd a Moyiiz sẽn da kõ-bã:+ 9 Yaa sẽn sɩng ne Arowɛɛr+ sẽn be Arno longã*+ noorã, ne tẽng ning sẽn be longã tẽn-sʋkã la Medeba tẽn-laagã fãa n tãag Dibon, 10 n paas Amoor nebã rĩm a Siyon sẽn dɩ naam Hɛsbon n tãag Amon nebã toadgã+ tẽns fãa, 11 n paas Galaad ne Gesʋʋr nebã la Maakat nebã+ soolmã, ne Hɛrmo tãngã fãa, la Basan tõre,+ n tãag Salka,+ 12 n paas rĩm a Oog soolmã tõr sẽn be Basannã. A rɩɩ naam Astarot ne Edreyi. (Ra yaa Refayim neb nins sẽn da ketã nin-yende.)+ A Moyiiz tõog-b-la zãnga, n dig-b n yiisi.+ 13 La Israyɛll nebã pa rig Gesʋʋr nebã ne Maakat nebã ye.+ Bala Gesʋʋr nebã ne Maakat nebã ket n bee Israyɛll sʋk n tãag rũndã.

14 Yaa Levi buudã neb bal la a Moyiiz pa kõ pʋɩɩre.+ Yaa maandã b sẽn yõogd bugum n kõt Israyɛll Wẽnnaam a Zeova wã n da yaa b pʋɩɩre,+ wa a sẽn da pʋlem bãmbã.+

15 Rẽ poore, a Moyiiz kõo Rubɛn buudã neb b pʋɩɩre, roog fãa ne a rẽnda. 16 B soolmã ra sɩngda Arowɛɛr sẽn be Arno longã* noorã, ne tẽng ning sẽn be longã tẽn-sʋkã, la Medeba tẽn-laagã tõre, 17 Hɛsbon ne a tẽn-kɩremsã+ sẽn be tẽn-laagẽ wã, Dibonne, Bamot-baalle, Bɛt-baal-meyone,+ 18 Zahaaze,+ Kedemote,+ Mefaate,+ 19 Kiryatayim, Sibma+ la Zerɛt-sahaar sẽn be tãng longẽ wã, 20 Bɛt-pewoore, Pisgã tãngã sigdsẽ,+ Bɛt-zesimote,+ 21 tẽns nins fãa sẽn be tẽn-laagẽ wã, ne Amoor nebã rĩm a Siyon sẽn dɩ naam Hɛsbonnã soolem.+ A Moyiiz tõoga yẽ+ ne Madiyã nanambs a Evi, a Rekɛm ne a Zʋʋr la a Huur n paas a Reba.+ A Siyon n da so nanambs-kãensã sẽn da be soolmã pʋgẽ wã. 22 A Beoor biig a Balaam+ sẽn yaa bagã+ ra naaga neb nins Israyɛll nebã sẽn kʋ ne sʋʋgã. 23 Rubɛn buudã neb soolmã toadg ra yaa Zʋrdẽ kʋɩlgã. Soolem-kãng n da yaa Rubɛn buudã pʋɩɩre, roog fãa ne a rẽnda, n paas tẽn-bɛdã ne b tẽn-bõonesã.

24 A Moyiiz kõo Gaad buudã neb me b pʋɩɩre, roog fãa ne a rẽnda. 25 B soolmã ra yaa Yazɛɛr tẽngã+ ne Galaad tẽnsã fãa, la Amon nebã soolmã pʋɩ-sʋkã,+ n tãag Arowɛɛr sẽn tees Raba wã,+ 26 la sẽn sɩng ne Hɛsbon+ n tãag Ramat-mizpe ne Betonimmi, la sẽn sɩng ne Mahanayim+ n tãag Debiir toadgẽ wã, 27 n paas longẽ wã, Bɛt-aram ne Bɛt-nimra,+ Sukot+ la Zafonne, n paas Hɛsbon+ rĩm a Siyon soolmã tẽns nins sẽn ketã. B toadgã ra yaa Zʋrdẽ kʋɩlgã yaang n tãag Kinerɛt mogrã*+ nug-goabgã. 28 Rẽ n da yaa Gaad buudã nebã pʋɩɩre, roog fãa ne a rẽnda, n paas tẽn-bɛdã ne b tẽn-bõonesã.

29 Sẽn paase, a Moyiiz kõo Manase buudã neb pʋɩ-sʋkã b pʋɩɩre, roog fãa ne a rẽnda.+ 30 La b soolmã sɩnga Mahanayimmi,+ n yaa Basan tõrã, rat n yeel tɩ Basan rĩm a Oog soolmã fãa, ne Zayɩɩr+ tẽn-bõonesã sẽn da yaa fu-rot tẽnsã. Soolmã fãa ra yaa tẽns pis-yoobe. 31 Galaad soolmã pʋɩ-sʋka, la Astarot ne Edreyi+ sẽn yaa Basan rĩm a Oog tẽnsã yɩɩ a Manase biig a Makɩɩr kom-dibli wã+ pʋɩɩre, t’a Makɩɩr buudã neb pʋɩ-sʋk roog fãa paam a rẽnda.

32 Rẽ n yɩ soolem nins a Moyiiz sẽn kõ bãmb Mowaab we-rasempʋɩɩgã sẽn yaa tẽn-nabrã sẽn be Zʋrdẽ kʋɩlgã rʋʋnd a to wã, Zeriko yaangã.+

33 La sã n yaa ne Levi buudã nebã, a Moyiiz pa kõ bãmb pʋɩɩr ye.+ Israyɛll Wẽnnaam a Zeova n yaa bãmb pʋɩɩre, wa a sẽn da pʋlem bãmbã.+

14 Ad tẽns nins Israyɛll nebã sẽn soog Kanaã soolmẽ wã tɩ yɩ b pʋɩɩrã. Yɩɩ maan-kʋʋd a Eleazaar ne a Nun biig a Zozuwe la Israyɛll buud toɛy-toɛyã rotã taoor dãmb n kõ-ba.+ 2 B maana bãnd n pʋɩ tẽnsã,+ wa a Zeova sẽn da yeel a Moyiiz bũmb ning buud a wɛ la pʋɩ-sʋkã wɛɛngẽ wã.+ 3 A Moyiiz kõo buud a yiib la pʋɩ-sʋkã sẽn kellã b pʋɩɩr Zʋrdẽ kʋɩlgã+ rʋʋnd a to wã,* la a pa kõ Levi buudã nebã pʋɩɩr bãmb sʋk ye.+ 4 B geelga a Zozɛf yagensã wa buud a yiibu:+ A Manase ne a Efrayim.+ La b pa kõ Levi buudã nebã tẽng tɩ b sooge, sã n pa tẽns+ b sẽn na n zĩndi, la zĩis b rũmsã ne b paoongã yĩng bala.+ 5 Woto, Israyɛll nebã pʋɩɩ tẽngã wa a Zeova sẽn da yeel a Moyiizã.

6 Rẽ poore, Zida rap kẽer waa a Zozuwe nengẽ Gilgalle,+ t’a Yefune biig a Kalɛɛb+ sẽn yaa Keniiz nedã yeel-a yaa: “Fo mengã mii a Zeova sẽn yeel+ a Moyiiz sẽn yaa Wẽnnaam raoã+ bũmb ning maam ne foo poorẽ Kadɛɛs-barneya wã.+ 7 Mam da tara yʋʋm pis-naase, a Zeova tʋm-tʋmd a Moyiiz sẽn wa n tʋm maam tɩ m yi Kadɛɛs-barneya n tɩ soos n ges tẽngã,+ la mam lebg n wa togsa bũmba fãa ne pʋ-peelem.*+ 8 Baa ne m ba-biis nins sẽn tũ maam n kẽngã sẽn kɩt tɩ nebã gĩin maagã, mam tũu m Wẽnnaam a Zeova ne m sũur fãa.*+ 9 Baraare, a Moyiiz wẽename n yeele: ‘Tẽng ning fo naoã sẽn tabã na n yɩɩ foo ne f kambã pʋɩɩr wakat fãa yĩnga. Bala fo tũu mam Wẽnnaam a Zeova ne f sũur fãa.’+ 10 A Zeova sẽn pʋlem a Moyiiz pʋlen-kãngã+ Israyɛll nebã sẽn wa n ket n be we-raoogẽ wã tɛka,+ a Zeova kogla maam+ yʋʋm pis-naas la a nu wã tɩ m ket n vɩ wa a sẽn pʋlmã. M ket n bee ka n tar yʋʋm pis-nii la a nu masã. 11 La rũndã, m ket n tara pãng wa a Moyiiz sẽn tʋm maamã wakate. M ket n tara keelem wa wakat kãnga, n tõe n kẽng zabre, la m maan bũmb a taaba. 12 Woto yĩnga, bɩ f kõ maam soolmã zĩ-kãngã sẽn yaa tãensã a Zeova sẽn pʋlem daar-n-kãngã. Yaa sɩd tɩ yãmb wʋma baraar tɩ Anak nebã+ bee be n tar tẽn-bɛd sẽn gũbg ne lalse,+ la sãmbg kae* t’a Zeova na n zĩnda ne maam,+ la tɩ m na n dig-b lame n yiis wa a Zeova sẽn yeelã ye.”+

13 Dẽ, a Zozuwe ninga a Yefune biig a Kalɛɛb barka, n kõ-a Ebrõ tɩ yɩ a pʋɩɩre.+ 14 Rẽ n so tɩ hal n tãag rũndã, Ebrõ yaa a Yefune biig a Kalɛɛb sẽn yaa Keniiz nedã pʋɩɩre. Bala a tũu Israyɛll Wẽnnaam a Zeova ne a sũur fãa.+ 15 B ra boonda Ebrõ tẽngã tɩ Kiryat-arba+ (a Arba ra yaa nin-kãseng Anak nebã sʋka.) La zabr pa le zĩnd tẽngã pʋgẽ ye.+

15 Soolem ning b sẽn kõ*+ Zida buudã rot toor-toor nebã taa Edom toadgã,+ Zĩn we-raoogã n tãag Negɛɛb nug-goabg satmẽ wã. 2 B nug-goabg toadgã sɩngda Yamsem mogrã*+ kɩreng ning sẽn teesd nug-goabgã. 3 Toadgã yii nug-goabgã n dʋʋg Akrabimmi,+ n kẽng Zĩn. Rẽ poore, a yii nug-goabgã n teesd Kadɛɛs-barneya,+ n pɩʋʋg Ɛsron n sãag n ta Adaare, n gõdg n tees Karka. 4 Rẽ poore, a yii be n ta Azmon+ n sãag n ta Ezɩpt kosoogã,*+ n tɩ tek Mogrẽ wã.* B nug-goabg toadgã la rẽ.

5 B yaang toadgã ra yaa Yamsem mogrã* n tall n ta Zʋrdẽ kʋɩlgã satmẽ, tɩ nug-rɩtg toadgã gõdr ra be mogrã noore, Zʋrdẽ kʋɩlgã satmẽ.+ 6 Toadgã tall n kẽnga Bɛt-ogla,+ n pãrg Bɛt-araba+ nug-rɩtgã n tees a Rubɛn biig a Bohan kugrẽ wã.+ 7 Toadgã teesa Debiire, Akoor longã+ zĩigẽ, n gõdg nug-rɩtg n kẽng Gilgall+ sẽn tees Adumim rʋʋdgã, la sẽn be kosoogã nug-rɩtgã, n yi be n kẽng Ɛn-semees+ ko-bundgã zĩigẽ n tek Ɛn-rogɛlle.+ 8 Toadgã sãagame n ta a Hinom bi-riblã longẽ+ wã n tees Zebuus nebã tẽngã sigdgẽ+ nug-goabg sẽnesã, rat n yeel tɩ Zerizalɛmme,+ n lebg n dʋʋg tãng ning sẽn tees a Hinom longã nin-taoorã, la sẽn be Refayim longã noore, nug-rɩtg sẽnesã. 9 La b sɩnga tãngã n karg toadgã n tãag Neftowa ko-bundgã,+ n tees Efron tãngã tẽnsã. B leb n karga toadgã n ta Baalla, rat n yeel tɩ Kiryat-yeyarim.+ 10 Toadgã yii Baalla n wẽnemd nin-taoor n tees Seyɩɩr tãngã, n pɩʋʋg n ta Zeyarim tãngã sigdg ning sẽn be nug-rɩtgã, rat n yeel tɩ Kesalonne. A sigame n ta hal Bɛt-semese,+ n kẽng Timna.+ 11 Toadgã sãagame n ta Ekron+ tãngã nug-goabg sigdgẽ wã. B karga toadgã n ta Sɩkeronne, n dʋʋg Baalla tãngã n tees Zabneyɛlle, n tek mogrẽ wã.

12 Nin-taoor toadgã ra yaa Mog-kãsengã*+ ne a wogellã. Woto fãa n da yaa tods nins sẽn gũbg a Zida yagensã soolmã, wa sẽn zems b rotã.

13 La a Zozuwe kõo a Yefune biig a Kalɛɛb+ pʋɩɩr a Zida yagensã sʋka, wa a Zeova sẽn da yeel a Zozuwe wã. Yɩɩ Kiryat-arba, rat n yeel tɩ Ebrõ.+ (A Arba ra yaa a Anak ba.) 14 A Kalɛɛb riga a Anak kom-dibli a tãabã+ n yiis be: Yaa a Sesayi, a Ahiman la a Talmayi+ sẽn yaa a Anak yagensã. 15 Rẽ poore, a yii be n tɩ zab ne Debiir tẽngã neba.+ (B ra boonda Debiir tɩ Kiryat-sefɛɛre.) 16 Rẽ la a Kalɛɛb yeel-yã: “Ned ning sẽn na n zab ne Kiryat-sefɛɛr n tõog-a, mam na n kõ-a-la m bi-pugl a Aksa t’a maan a paga.” 17 La a Otniyɛll+ sẽn yaa a Kalɛɛb ba-biig a Kenaaz+ bi-riblã reega tẽngã. Woto, a Kalɛɛb kõ-a-la a bi-pugl a Aksa+ t’a maan a paga. 18 A sẽn wa n kuiisẽ wã, a pẽdga a sɩdã t’a kos a ba wã pʋʋgo. Dẽ, a Aksa siga a bõangã zugu,* t’a Kalɛɛb sok-a: “Yaa bõe la fo rata?”+ 19 T’a leoke: “M bõos tɩ y kõ-m kũuni, tɩ yɩ kaset tɩ m paama yãmb barka. Bala yãmb kõo maam tẽng nug-goabg sẽnesã. Bɩ y kõ maam Gulot-mayim* me.” Dẽ, a kõo yẽ zugẽ Gulottã ne tẽngr Gulottã.

20 Woto fãa n da yaa Zida buudã neb pʋɩɩre, roog fãa ne a rẽnda.

21 Tẽns nins sẽn be Zida buudã soolmã satmẽ wã, nug-goabgã, Edom toadgã+ sẽnesã ra yaa: Kabzeyɛlle, Edɛɛre, Zagʋʋre, 22 Kina, Dimona, Adaada, 23 Kedɛɛse, Hazoore, Itnane, 24 Zɩfe, Telɛmme, Beyalote, 25 Hazoor-hadata, Keriyot-hɛtsronne, rat n yeel tɩ Hazoore, 26 Amamme, Sema, Molaada,+ 27 Hazaar-gada, Hɛsmonne, Bɛt-pelɛte,+ 28 Hazaar-suwalle, Bɛɛr-seba,+ Biziyotiya, 29 Baalla, Imme, Ezemme, 30 Ɛltolaade, Kesille, Horma,+ 31 Ziklaage,+ Madmana, Sansana, 32 Lebawote, Silimmi, Ayin la Rimonne.+ B fãa yaa tẽn-bɛd pisi la a wɛ ne b tẽn-bõonesã.

33 Sefela wã+ pʋgẽ, ra yaa Ɛstawolle, Zora,+ Asna, 34 Zanowa, Ɛn-ganimmi, Tapuwa, Enamme, 35 Yarmuti, Adulamme,+ Soko, Azɛka,+ 36 Saarayimmi,+ Aditayim la Gedeera ne Gederotayimmi.* Fãa yaa tẽn-bɛd piig la a naas ne b tẽn-bõonesã.

37 Zenanne, Adasa, Migdall-Gaade, 38 Dileyanne, Mizpe, Yokteyɛlle, 39 Lakiisi,+ Boozkate, Eglonne, 40 Kabonne, Lamaame, Kitliisi, 41 Gederote, Bɛt-dagõ, Naama la Makeda.+ Fãa yaa tẽn-bɛd piig la a yoobe, ne b tẽn-bõonesã.

42 Libna,+ Etɛɛre, Asanne,+ 43 Ifta, Asna, Neziibi, 44 Keyila, Akziib la Maresa. Fãa yaa tẽn-bɛd a wɛ ne b tẽn-bõonesã.

45 Ekron ne tẽns nins a sẽn so wã* la a tẽn-bõonesã, 46 sẽn sɩng ne Ekron nin-taoor sẽnesã, rat n yeel tɩ tẽns nins fãa sẽn pẽ Asdood ne b tẽn-bõonesã.

47 Asdood+ ne tẽns nins a sẽn so wã* la a tẽn-bõonesã. Gaaza+ ne tẽns nins a sẽn so wã la a tẽn-bõonesã, n sig n tãag Ezɩpt kosoogã, la Mog-kãsengã* ne beenẽ babgã fãa.+

48 La soolmã zĩig ning sẽn yaa tãensã, ra yaa Samiiri, Yatɩɩre,+ Soko, 49 Dana, Kiryat-sana, rat n yeel tɩ Debiire, 50 Anaabe, Ɛstemo,+ Animmi, 51 Gosɛnne,+ Holon la Gilo.+ Fãa yaa tẽn-bɛd piig la a ye, ne b tẽn-bõonesã.

52 Arab, Duma, Esanne, 53 Zanimmi, Bɛt-tapuwa, Afɛka, 54 Humta, Kiryat-arba, rat n yeel tɩ Ebrõ+ la Ziyoore. B fãa yaa tẽn-bɛd a wɛ ne b tẽn-bõonesã.

55 Mawonne,+ Karmelle, Zɩfe,+ Zuta, 56 Zizreyɛlle, Yokdeyam, Zanowa, 57 Kayinne, Gibeya la Timna.+ Fãa yaa tẽn-bɛd piiga, ne b tẽn-bõonesã.

58 Halulle, Bɛt-sʋʋre, Gedoore, 59 Maarate, Bɛt-anot la Ɛltekonne. B fãa yaa tẽn-bɛd a yoobe, ne b tẽn-bõonesã.

60 Kiryat-baalle, rat n yeel tɩ Kiryat-yeyarim+ ne Raba. B fãa yaa tẽn-bɛd a yiibu, ne b tẽn-bõonesã.

61 We-raoogẽ wã, ra yaa Bɛt-araba,+ Midinni, Sekaka, 62 Nibsanne, Yamsem tẽngã la Ɛn-gedi.+ B fãa yaa tẽn-bɛd a yoobe, ne b tẽn-bõonesã.

63 La sã n yaa ne Zebuus nebã+ sẽn da be Zerizalɛmmã,+ Zida nebã pa tõog n dig-b ye.+ Rẽ n so tɩ Zebuus nebã ket n be Zida nebã sʋk Zerizalɛm n tãag rũndã.

16 B sẽn maan bãnd+ n yãk soolem ning n kõ a Zozɛf+ yagensã ra sɩngda ne Zʋrdẽ kʋɩlgã sẽn be Zeriko wã n tãag koomã sẽn be Zeriko yaangã. A ra pɩʋʋgda we-raoogã sẽn sɩng ne Zeriko n ta soolmã zĩig ning sẽn yaa tãensã sẽn be Betɛllã.+ 2 A yii Betɛll sẽn be Luuz soolmẽ wã, n sãag n ta Ark nebã toadg sẽn be Atarotã, 3 n sig nin-taoor sẽnesã n ta Zaflɛt-rãmbã toadgã, hal n tãag tẽngr Bɛt-horonnã+ la Gezɛɛr+ toadgã n tek mogrẽ wã.

4 Woto, Manase ne Efrayim buudã nebã sẽn yaa a Zozɛf yagensã+ reega b soolmã.+ 5 Ad a Efrayim yagensã rot fãa soolmã toadg sẽn da yaa to-to: B yaang toadgã yii Atarot-adaar+ hal n ta zugẽ Bɛt-horonnã,+ 6 n sãag n ta mogrã. Mikmetat+ ra bee a nug-rɩtgo, la toadgã wẽnemda yaang sẽnesã n tees Taanat-silo, n pɩʋʋg yaangã n ta Zanowa. 7 A yii Zanowa n sig n ta Atarot la Naara, n ta hal Zeriko+ n sãag n ta Zʋrdẽ kʋɩlgã. 8 Toadgã yii Tapuwa+ n sãag nin-taoorã n ta Kana kosoogã, n tek mogrẽ wã.+ Rẽnda n yaa Efrayim buudã neb pʋɩɩre, roog fãa ne a rẽnda. 9 A Efrayim yagensã ra tara tẽns Manase buudã neb+ soolmã sʋk me, tẽn-bɛd ne b tẽn-bõonese.

10 La b pa rig Kanaã nebã sẽn da be Gezɛɛrã+ ye. Kanaã nebã ket n bee Efrayim nebã sʋk n tãag rũndã,+ tɩ Efrayim nebã modg-b tɩ b tʋmd bãmb tʋʋmã.+

17 Rẽ poore, b maana bãnd+ n yãk pʋɩɩr n kõ Manase buudã nebã,+ bala a Manase yaa a Zozɛf bi-kãsenga.+ La a Makɩɩr+ sẽn da yaa zabr gãndaoogã, b kõ-a-la Galaad ne Basanne.+ A ra yaa a Manase bi-kãsenga, n yaa a Galaad ba. 2 B maana bãnd n yãk soolem n kõ a Manase yagens nins sẽn ketã, roog fãa ne a rẽnda. Yaa a Abiyezɛɛr kom-dibli,+ a Helɛk kom-dibli, a Asriyɛll kom-dibli, a Sikɛm kom-dibli, a Hefɛɛr kom-dibli, la a Semida kom-dibli. Bãmb n da yaa a Zozɛf biig a Manase yagense, rao fãa ne a roogo.+ 3 La a Manase biig a Makɩɩr biig a Galaad biig a Hefɛɛr biig a Zelofehaad+ pa paam kom-dibli ye. Yaa kom-pugli bala. Ad bãmb yʋya: A Maala, a Nowa, a Ogla, a Milka ne a Tɩrza. 4 Bãmb kolga maan-kʋʋd a Eleazaar+ ne a Nun biig a Zozuwe la nin-buiidã taoor dãmbã n yeel yaa: “A Zeova ra yeela a Moyiiz t’a kõ tõnd pʋɩɩr d ba-biisã sʋka.”+ Dẽ, a Zozuwe kõ-b-la pʋɩɩr b ba wã ba-biisã sʋka, wa a Zeova sẽn da yeelã.+

5 B kõo a Manase zĩis piiga, Galaad la Basan sẽn da be Zʋrdẽ kʋɩlgã rʋʋnd a to wã*+ sẽn yãk b toogo. 6 Bala a Manase kom-pugli wã me paama pʋɩɩr wa a kom-dibli wã. Galaad yɩɩ a Manase yagens a taabã soolem.

7 Manase soolmã toadg sɩnga Asɛɛr soolmẽ wã n tãag Mikmetat+ sẽn tees Sikɛmmã.+ Toadgã kell n teesa nug-goabg sẽnes n sãag n ta Ɛn-tapuwa nebã soolmẽ. 8 Tapuwa soolmã+ lebga a Manase yagensã rẽnda, la Tapuwa ning sẽn be a Manase yagensã soolem toadgẽ wã yaa a Efrayim yagensã rẽnda. 9 La toadgã sigame n ta Kana kosoogã nug-goabg sẽnese. A Efrayim yagensã tẽns n da be a Manase yagensã soolmẽ,+ t’a Manase yagensã soolmã toadg ra be bãoogã nug-rɩtgo, la a teka mogrẽ wã.+ 10 Soolmã nug-goabg ra yaa a Efrayim yagensã rẽnda, t’a Manase yagensã so a nug-rɩtgã, la mogrã n da yaa a toadga.+ Bãmb* nug-rɩtg toadgã ra yaa Asɛɛr soolmã, tɩ b yaang toadgã yaa Isakaar soolmã.

11 Isakaar ne Asɛɛr buudã soolmẽ wã, b kõo Manase buudã Bɛt-seyan ne tẽns nins a sẽn so wã,* Ibleyam+ ne tẽns nins a sẽn so wã, Door+ nebã ne tẽns nins b sẽn so wã, Ɛn-door+ nebã ne tẽns nins b sẽn so wã, Taanak+ nebã ne tẽns nins b sẽn so wã, Megido nebã ne tẽns nins b sẽn so wã, tãensã sʋka, bãmb b tãabo.

12 La a Manase yagensã pa tõog n deeg tẽn-kãensã ye. Kanaã nebã zãgsa fasɩ tɩ b kõn yi be ye.+ 13 Israyɛll nebã sẽn wa n paam pãngã, b modga Kanaã nebã tɩ b tʋmd bãmb tʋʋmã,+ la b pa rig b fãa n yiis ye.+

14 A Zozɛf yagensã soka a Zozuwe yaa: “Bõe yĩng tɩ fo kõ tõnd* zĩ-yɛng bala?+ Tõnd sõorã yaa wʋsgo, bala a Zeova ninga tõnd bark n tãag masã.”+ 15 T’a Zozuwe leok-ba: “Yãmb sõorã sã n sɩd yaa wʋsgo, bɩ y kẽng weoogẽ wã n tɩ kɛ tɩɩsã n paam zĩig Perɛɛz+ ne Refayim nebã+ soolmẽ, Efrayim soolmã zĩig ning sẽn yaa tãensã+ sẽn yaa sẽk ne yãmbã yĩnga.” 16 Rẽ la a Zozɛf yagensã yeel-yã: “Soolmã zĩig ning sẽn yaa tãensã pa sekd tõnd ye. Sẽn paase, Kanaã nebã fãa sẽn be longã soolmẽ wã tara zabr saar-dãmb*+ sẽn tar sʋ-wogd+ b naoẽ wã, sẽn be-b Bɛt-seyan ne tẽns nins a sẽn so wã,* la sẽn be-b Zizreyɛll tẽn-nabrẽ wã+ me tarame.” 17 Dẽ, a Zozuwe yeela a Zozɛf roogã nebã, rat n yeel tɩ Efrayim ne Manase buudã nebã yaa: “Yãmb sõorã yaa waoogame, la y tara pãng wʋsgo. Rẽ wã, d pa na n kõ yãmb zĩig a ye bal ye.+ 18 Soolmã zĩig ning sẽn yaa tãensã soolmã me na n yɩɩ yãmb dẽnda.+ Baa a sẽn yaa kãgrã, yãmb na n kɛ-a lame t’a yɩ yãmb soolmã satem. Bala yãmb na n diga Kanaã nebã, baa b sẽn tar pãng la b tar zabr saar-dãmb sẽn tar sʋ-wogd b naoẽ wã.”+

18 Israyɛll nin-buiidã fãa tigma taab Sɩlo+ n tilg sɛk-roog be,+ bala b reega soolmã zãng masã.+ 2 La Israyɛll buud a yopoe n da ket n nan pa paam b pʋɩɩre. 3 Dẽ, a Zozuwe yeela Israyɛll nebã yaa: “Yãmb na n basame tɩ ta dabʋr tɩ y yaool n tɩ reeg tẽng ning yãmb yaab-rãmbã Wẽnnaam a Zeova sẽn kõ yãmbã?+ 4 Yãk-y rap a tãab buud fãa sʋk n kõ maam tɩ m tʋm-ba. Bãmb segd n kẽngame n tɩ gilg n ges tẽngã, la b mag-a n gʋls wa sẽn zems buud fãa ne a pʋɩɩre. Rẽ poore, b segd n lebg n waa mam nengẽ. 5 Bãmb segd n pʋɩɩ taab tẽngã zĩis a yopoe.+ A Zida roogã neb na n kell n paa b soolmẽ wã sẽn yaa nug-goabgã,+ t’a Zozɛf roogã neb pa b soolmẽ wã sẽn yaa nug-rɩtgã.+ 6 La yãmba, mag-y tẽngã n pʋɩ-a zĩis a yopoe n gʋls n wa kõ maam ka, tɩ m maan bãnd+ n pʋɩ-a n kõ-yã, tõnd Wẽnnaam a Zeova taoore. 7 La b pa kõ Levi buudã neb pʋɩɩr yãmb sʋk ye.+ Bala a Zeova maan-kʋʋrã tʋʋmd n yaa bãmb pʋɩɩre.+ Gaad buudã ne Rubɛn buudã la Manase buudã pʋɩ-sʋk+ ra zoe n paama b pʋɩɩr Zʋrdẽ kʋɩlgã yaangã, pʋɩɩr ning a Zeova tʋm-tʋmd a Moyiiz sẽn kõ bãmbã.”

8 Rapã seglame n na n looge, t’a Zozuwe yeel neb nins sẽn segd n mag tẽngã yaa: “Kẽng-y n tɩ gilg-y tẽngã n mag-a n gʋls n wa kõ maam, tɩ mam na n maana bãnd n pʋɩ-a n kõ yãmb Sɩlo ka, a Zeova taoore.”+ 9 Dẽ, rapã kẽngame n tɩ gilg soolmã n mag-a n pʋɩ a tẽnsã zĩis a yopoe, n gʋls sebr zugu. Rẽ poore, b lebg n waa a Zozuwe nengẽ sikã zĩigẽ Sɩlo. 10 Woto, a Zozuwe maana bãnd n pʋɩ-b tẽngã Sɩlo, a Zeova taoore.+ Yaa be la a Zozuwe pʋɩ tẽngã n kõ Israyɛll nebã tɩ b sooge.+

11 B maana bãnd n yãk Bẽnzame buudã pʋɩɩre, roog fãa ne a rẽnda. Bãmb soolmã ra bee Zida+ ne Zozɛf buudã+ soolmã sʋka. 12 Bãmb soolmã nug-rɩtg toadgã ra sɩngda Zʋrdẽ kʋɩlgã, n ta Zeriko tãngã sigdg+ nug-rɩtgã, n dʋ tãngã n tees nin-taoore, n sãag n ta Bɛt-avɛn we-raoogã.+ 13 Toadgã yii be n sãag n ta Luuz tãngã sigdg nug-goabgã, rat n yeel tɩ Betɛlle.+ A sigame n tees Atarot-adaare,+ tãng ning sẽn be tẽngr Bɛt-horonnã+ nug-goabgã. 14 La b sɩnga toadgã kargr nin-taoor sẽnesã, n wẽnemd n tees nug-goabgã, sẽn sɩng ne tãng ning sẽn tees Bɛt-horon nug-goabgã, n tek Kiryat-baalle, rat n yeel tɩ Kiryat-yeyarim+ sẽn yaa Zida tẽng a yembrã. Rẽ n da yaa soolmã nin-taoor toadgã.

15 Soolmã nug-goabg toadgã sɩnga Kiryat-yeyarim satmẽ wã, n sãag nin-taoorã n ta Neftowa ko-bundgẽ wã.+ 16 Toadgã sigame n ta tãngã sẽn be a Hinom bi-riblã longã+ satmẽ wã, rat n yeel tɩ Refayim longã+ nug-rɩtgã. Rẽ poore, a sigame n ta a Hinom longã, n sãag n ta Zebuus tãngã sigdg+ nug-goabga, hal n tãag Ɛn-rogɛlle.+ 17 B karga toadgã nug-rɩtgã n kẽng n ta Ɛn-semeese, n sãag Gelilot sẽn tees Adumim tãngã rʋʋdgẽ+ wã. Rẽ poore, a sigame n ta a Rubɛn bi-ribl a Bohan+ kugrẽ wã.+ 18 A sãaga nug-rɩtg tãngã sigdg ning sẽn tees Araba wã, n sig n ta Araba wã. 19 Toadgã sãagame n ta Bɛt-ogla tãngã sigdg+ nug-rɩtgo, n tek Yamsem mogrã*+ nug-rɩtg noorã sẽn be Zʋrdẽ kʋɩlgã satmẽ, nug-goabgã. Rẽ n da yaa soolmã nug-goabg toadgã. 20 La Zʋrdẽ kʋɩlgã n da yaa soolmã yaang toadgã. Woto n da yaa Bẽnzame buudã pʋɩɩre, roog fãa ne a rẽnda, wa sẽn zems a todsã fãa.

21 Ad tẽns nins b sẽn kõ Bẽnzame buudã, roog fãa ne a rẽndã: Zeriko, Bɛt-ogla, Emɛk-kezisi, 22 Bɛt-araba,+ Zemarayimmi, Betɛlle,+ 23 Avimmi, Paara, Ofra, 24 Kefaar-amoni, Ofni la Geba.+ B fãa ra yaa tẽn-bɛd piig la a yiibu, ne b tẽn-bõonese.

25 Gabawõ,+ Rama, Beerote, 26 Mizpe, Kefira, Mooza, 27 Rekɛmme, Irpeyɛlle, Tarala, 28 Zela,+ Ha-elɛfe, Zebuusi, rat n yeel tɩ Zerizalɛmme,+ Gibeya+ la Kiryate. B fãa ra yaa tẽn-bɛd piig la a naase, ne b tẽn-bõonese.

Woto n da yaa a Bẽnzame yagensã pʋɩɩre, roog fãa ne a rẽnda.

19 Rẽ poore, b maana bãnd naoor a yiib-n-soaba,+ n yãk Sɩmeyõ+ buudã pʋɩɩre, roog fãa ne a rẽnda. Bãmb pʋɩɩrã ra bee Zida buudã nebã pʋɩɩr pʋgẽ.+ 2 Bãmb pʋɩɩrã yɩɩ Bɛɛr-seba+ ne Saba, Molaada,+ 3 Hazaar-suwalle,+ Bala, Ezemme,+ 4 Ɛltolaade,+ Betulli, Horma, 5 Ziklaage,+ Bɛt-markabote, Hazaar-susa, 6 Bɛt-lebawote,+ la Saruhɛnne: Tẽn-bɛd piig la a tãab ne b tẽn-bõonese. 7 Ayinne, Rimonne, Etɛɛr la Asanne:+ Tẽn-bɛd a naas ne b tẽn-bõonese, 8 n paas tẽn-bõones nins fãa sẽn gũbg tẽn-kãensã, n tãag Baalat-bɛɛre, rat n yeel tɩ nug-goabg Rama wã. Woto n da yaa Sɩmeyõ buudã pʋɩɩre, roog fãa ne a rẽnda. 9 B yãka a Sɩmeyõ yagensã pʋɩɩr Zida buudã soolmã pʋgẽ, bala Zida buudã soolem ra yaa yaleng wʋsg ne bãmba. Dẽ, a Sɩmeyõ yagensã reega b pʋɩɩr Zida buudã soolem pʋgẽ.+

10 Sẽn pʋgde, b maana bãnd n yãk pʋɩɩr a tãab-n-soabã+ n kõ a Zabulõ yagensã,+ roog fãa ne a rẽnda. Bãmb soolmã toadg ra taa hal Sariidi. 11 B toadgã teesa nin-taoor sẽnes n dabd Mareyalle, n tãag Dabesɛte, n yi be n ta longã* sẽn tees Yokneyammã. 12 Toadgã yii Sariid n tees yaang sẽnesã, wĩndg sẽn pukdẽ, n kẽng Kislot-taboor toadgẽ wã, n yi Daberat+ n sãag Yafiya. 13 A teesa yaang sẽnesã, wĩndg sẽn pukdẽ, n ta Gat-hefɛɛr+ ne Ɛt-kazinni, n yi be n ta Rimonne, n sãag n ta Neya. 14 Toadgã wẽnemdame n tees nug-rɩtgã n ta Hanatonne, n tɩ tek Yifta-ɛll longã. 15 La Katate, Nahalalle, Simronne,+ Idala, la Betlehɛm+ me naagame: Tẽn-bɛd piig la a yiib ne b tẽn-bõonese. 16 Woto n yɩ a Zabulõ yagensã pʋɩɩre, roog fãa ne a rẽnda.+ Rẽ n yɩ bãmb tẽn-bɛdã ne b tẽn-bõonesã.

17 B maana bãnd n yãk pʋɩɩr a naas-n-soabã+ n kõ a Isakaar+ yagensã, roog fãa ne a rẽnda. 18 Bãmb toadgã ra taa Zizreyɛlle,+ Kesulote, Sunemme,+ 19 Hafarayimmi, Sɩyonne, Anaharate, 20 Rabite, Kisyonne, Ebɛɛze, 21 Remete, Ɛn-ganimmi,+ Ɛn-hada, la Bɛt-pazɛɛse. 22 Toadgã ra taa Taboor+ ne Sahazuma la Bɛt-semese, la b toadgã tɩ teka Zʋrdẽ kʋɩlgã: Tẽn-bɛd piig la a yoob ne b tẽn-bõonese. 23 Woto n yɩ Isakaar buudã pʋɩɩre, roog fãa ne a rẽnda,+ a tẽn-bɛd la a tẽn-bõonese.

24 Rẽ poore, b maana bãnd n yãk pʋɩɩr a nu soabã+ n kõ Asɛɛr+ buudã, roog fãa ne a rẽnda. 25 B toadgã ra yaa Hɛlkate,+ Hali, Betɛnne, Aksafe, 26 Alamelɛke, Amaad la Misalle. Nin-taoor sẽnesã, a ra taa Karmell+ la Sihoor-libnate, 27 n wẽnemd n tees yaang n ta Bɛt-dagõ, n sãag Zabulõ la Yifta-ɛll longã sẽn be nug-rɩtgã, n tãag Bɛt-emɛk la Neyiyɛlle, n yi be n sãag Kabull sẽn be nug-goabgã, 28 n ta Ebronne, Rewoobe, Hamon la Kana hal n tãag Sɩdõ-kãsengã.+ 29 Toadgã wẽnemd n teesa Rama, n sãag n ta Tɩɩr tẽngã sẽn gũbg ne lalsã.+ A wẽnemd n teesa Hooza, n tɩ tek mogrã sẽn be Akziib soolmẽ wã, 30 Umma, Afɛk+ la Rewoobe:+ Tẽn-bɛd pisi la a yi ne b tẽn-bõonese. 31 Woto n yɩ Asɛɛr buudã pʋɩɩre, roog fãa ne a rẽnda.+ Rẽ n yɩ bãmb tẽn-bɛdã ne b tẽn-bõonesã.

32 B maana bãnd n yãk pʋɩɩr a yoob-n-soabã+ n kõ a Naftali yagensã, roog fãa ne a rẽnda. 33 Bãmb toadgã sɩnga Helɛf ne tɩ-kãsengã sẽn be Zaananimmã,+ n tees Adami-nekɛɛb ne Zabneyɛll hal n ta Lakummi, n tɩ tek Zʋrdẽ kʋɩlgã. 34 Toadgã wẽnemd n teesa nin-taoor sẽnese, n ta Aznot-taboore, n yi be n ta Ukok n sãag n ta Zabulõ sẽn be nug-goabgã, ne Asɛɛr sẽn be nin-taoorã, la Zida sẽn be Zʋrdẽ kʋɩlgã yaang sẽnesã. 35 Tẽns nins sẽn da gũbg ne lalsã ra yaa Zidimmi, Zɛɛre, Hamate,+ Rakate, Kinerɛte, 36 Adama, Rama, Hazoore,+ 37 Kedɛɛse,+ Edreyi, Ɛn-hazoore, 38 Yironne, Migdall-ɛlle, Horemme, Bɛt-anat la Bɛt-semese:+ Tẽn-bɛd piig la a wɛ ne b tẽn-bõonese. 39 Woto n yɩ Naftali buudã pʋɩɩre, roog fãa ne a rẽnda,+ b tẽn-bɛdã la b tẽn-bõonesã.

40 B maana bãnd n yãk pʋɩɩr a yopoe-n-soabã+ n kõ Dan buudã,+ roog fãa ne a rẽnda. 41 Bãmb soolmã toadg ra yaa Zora,+ Ɛstawolle, Ir-semeese, 42 Saalabinni,+ Ayalonne,+ Yitla, 43 Elonne, Timna,+ Ekronne,+ 44 Ɛlteke, Gibetonne,+ Baalate, 45 Yehuudi, Bene-berake, Gat-rimonne,+ 46 Me-zarkon la Rakonne, tɩ toadgã get Zope.+ 47 La Dan buudã soolmã ra yaa sẽk ne bãmba.+ Woto, bãmb kẽnga Lesɛm n tɩ zab ne-a n deeg-a,+ n kʋ a nebã ne sʋʋga. Rẽ poore, b reeg-a lame n kẽ be, n toeem a yʋʋrã sẽn da yaa Lesɛmmã tɩ lebg Danne, wa b yaab a Dan yʋʋrã.+ 48 Woto n yɩ Dan buudã pʋɩɩre, roog fãa ne a rẽnda. Rẽ n yɩ bãmb tẽn-bɛdã ne b tẽn-bõonesã.

49 B weela tẽngã n pʋɩ-a tɩ buud fãa paam a pʋɩɩre. Rẽ poore, Israyɛll nebã kõo a Nun biig a Zozuwe pʋɩɩr bãmb sʋka. 50 A Zeova yeelame tɩ b kõ-a tẽng ning a sẽn kosã, rat n yeel tɩ Timnat-seera+ sẽn be Efrayim soolmã zĩig ning sẽn yaa tãensã, la a mee tẽngã n zĩnd be.

51 Rẽ n yɩ soolem nins maan-kʋʋd a Eleazaar ne a Nun biig a Zozuwe, la Israyɛll buud toɛy-toɛyã rotã taoor dãmb sẽn maan bãnd n pʋɩ+ n kõ Israyɛll nebã Sɩlo,+ a Zeova taoore, sɛk-roogã rignoorẽ.+ Woto, b pʋɩɩ soolmã fãa n sa.

20 Rẽ poore, a Zeova yeela a Zozuwe: 2 “Yeel Israyɛll nebã yaa: ‘Yãk-y soondg tẽns+ yãmb mensã yĩnga, wa m sẽn da kɩt t’a Moyiiz yeel yãmbã, 3 tɩ ned sã n kʋ a to* ne yĩdg* wall pa ne pʋ-toogo, bɩ a tõe n zoe n kẽng be. B na n yɩɩ soondg zĩis yãmb yĩnga, tɩ y tõe n zoe n põs sũ-roakdã.*+ 4 Sẽn kʋ-a nedã segd n zoe n kẽnga tẽn-kãens a ye pʋgẽ,+ n tɩ yals tẽngã rignoorẽ+ n togs yellã tɩ tẽngã kãsem-dãmb kelge. Rẽ poore, b segd n deeg-a-la tẽngã pʋgẽ, n kõ-a zĩig t’a zĩnd ne bãmba. 5 Sũ-roakdã* sã n pʋgl-a n wa, b pa segd n yiis sẽn kʋ-a nedã n kõ-a ye. Bala a kʋʋ a to wã ne yĩdgu,* a ra pa kis-a ye.+ 6 A segd n zĩnda be hal tɩ bʋ-kaoodbã* wa kao a bʋʋdo,+ t’a kell n pa be n tãag wakat kãng maan-kʋʋdb kãsmã kũum.+ Dẽ, sẽn kʋ-a nedã tõe n lebg n kẽnga tẽng ning a sẽn zoe n basã, n tɩ kẽ a tẽngẽ la a zakẽ.’”+

7 Woto, b yãka Kedɛɛs+ sẽn be Galile, Naftali soolmã zĩig ning sẽn yaa tãensã, Sikɛm+ sẽn be Efrayim soolmã zĩig ning sẽn yaa tãensã, la Kiryat-arba,+ rat n yeel tɩ Ebrõ sẽn be Zida soolmã zĩig ning sẽn yaa tãensã, n welg-b toore.* 8 Zʋrdẽ kʋɩlgã soolmẽ, rat n yeel tɩ Zeriko yaangã, b yãka Bezɛɛr+ sẽn be we-raoogã tẽn-laagẽ wã, Rubɛn buudã soolmẽ. B yãka Ramot+ sẽn be Galaadã, Gaad buudã soolmẽ, la b yãk Golan+ sẽn be Basannã Manase buudã+ soolmẽ.

9 Tẽn-kãensã n yɩ tẽns nins b sẽn yãk Israyɛll nebã la sãambã sẽn be bãmb sʋkã yĩnga, tɩ ned sã n kʋ a to* ne yĩdgu, bɩ a tõe n zoe n kẽng be+ tɩ sũ-roakdã* ra wa kʋ-a tɩ bʋ-kaoodbã* nan pa kao a bʋʋd ye.+

21 Levi buudã rotã taoor dãmb kolga maan-kʋʋd a Eleazaar+ ne a Nun biig a Zozuwe, la Israyɛll buudã rotã taoor dãmba, 2 n gom ne-b Sɩlo+ sẽn be Kanaã soolmẽ wã n yeele: “A Zeova ra yeela a Moyiiz t’a kɩt tɩ b kõ tõnd tẽns tɩ d zĩnd b pʋsẽ, n paas rũms wãbneg zĩis d rũmsã yĩnga.”+ 3 Dẽ, Israyɛll nebã kõo Levi buudã tẽns+ ne b rũms wãbneg zĩis b soolmã pʋsẽ,+ wa a Zeova sẽn yeelã.

4 Bãmb yãka Kehat buudã+ rot toor-toorã pʋɩɩre, la Levi buudã neb nins sẽn yaa maan-kʋʋd a Aarõ yagensã paama pʋɩɩr b sẽn maan bãnd n yãk n kõ-ba: Yaa tẽns piig la a tãab Zida buudã soolmẽ,+ Sɩmeyõ+ la Bẽnzame buudã soolmẽ.+

5 Bãmb yãka tẽns piig Efrayim buudã soolmẽ,+ Dan la Manase buudã pʋɩ-sʋk soolmẽ+ n kõ Kehat buudã neb nins sẽn kellã.

6 La b kõo Gɛrson buudã+ tẽns piig la a tãab Isakaar buudã soolmẽ, Asɛɛr buudã soolmẽ, Naftali buudã soolmẽ, la Manase buudã pʋɩ-sʋk soolem sẽn be Basannã.+

7 B kõo a Merari roogã nebã+ tẽns piig la a yiib Rubɛn buudã soolmẽ, Gaad la Zabulõ buudã+ soolmẽ.

8 Woto, Israyɛll nebã kõo Levi buudã neb tẽn-kãens ne b rũms wãbneg zĩisi, wa a Zeova sẽn da yeel a Moyiizã.+

9 Ad tẽns nins b sẽn yãk Zida ne Sɩmeyõ buudã soolem pʋgẽ,+ 10 n kõ a Aarõ kamb nins sẽn yaa Kehat buudã nebã, n le yaa Levi buudã nebã, bala bãmb n paam pipi pʋɩɩrã. 11 Bãmb kõ-b-la Kiryat-arba+ (a Arba ra yaa a Anak ba,) rat n yeel tɩ Ebrõ,+ Zida soolmã zĩig ning sẽn yaa tãensã, n paas a rũms wãbneg zĩisã sẽn gũbg-a wã. 12 La bãmb rɩka pʋtã sẽn be tẽngã ne a tẽn-kɩremsã pʋgẽ wã, n kõ a Yefune biig a Kalɛɛb tɩ yɩ a pʋɩɩre.+

13 La bãmb kõo maan-kʋʋd a Aarõ kambã soondg tẽng ned sẽn kʋ a to yĩnga,+ rat n yeel tɩ Ebrõ+ ne a rũms wãbneg zĩisã, n paas Libna+ ne a rũms wãbneg zĩisã, 14 Yatɩɩr+ ne a rũms wãbneg zĩisã, Ɛstemowa+ ne a rũms wãbneg zĩisã, 15 Holon+ ne a rũms wãbneg zĩisã, Debiir+ ne a rũms wãbneg zĩisã, 16 Ayin+ ne a rũms wãbneg zĩisã, Zuta+ ne a rũms wãbneg zĩisã, la Bɛt-semes ne a rũms wãbneg zĩisã: Tẽns a wɛ, buud a yiibã soolmẽ.

17 Bẽnzame buudã pʋgẽ, b yãka Gabawõ+ ne a rũms wãbneg zĩisã, Geba ne a rũms wãbneg zĩisã,+ 18 Anatot+ ne a rũms wãbneg zĩisã, la Almon ne a rũms wãbneg zĩisã: Tẽns a naase.

19 Tẽns nins fãa bãmb sẽn kõ maan-kʋʋd a Aarõ yagensã, yɩɩ tẽns piig la a tãab ne b rũms wãbneg zĩisi.+

20 La bãmb maana bãnd n yãk tẽns Efrayim buudã soolmẽ, n kõ a Levi biig a Kehat rotã neb nins sẽn kellã. 21 Bãmb kõ-b-la Sikɛm+ sẽn yaa soondg tẽng ned sẽn kʋ a to yĩngã,+ ne a rũms wãbneg zĩisã sẽn be Efrayim soolmã zĩig ning sẽn yaa tãensã, n paas Gezɛɛr+ ne a rũms wãbneg zĩisã, 22 Kibzayim ne a rũms wãbneg zĩisã, la Bɛt-horon+ ne a rũms wãbneg zĩisã: Tẽns a naase.

23 La Dan buudã soolmẽ, b yãka Ɛlteke ne a rũms wãbneg zĩisã, Gibeton ne a rũms wãbneg zĩisã, 24 Ayalon+ ne a rũms wãbneg zĩisã, la Gat-rimon ne a rũms wãbneg zĩisã: Tẽns a naase.

25 Manase buudã pʋɩ-sʋk soolmẽ, b yãka Taanak+ ne a rũms wãbneg zĩisã, la Gat-rimon ne a rũms wãbneg zĩisã: Tẽns a yiibu.

26 Tẽns nins fãa a Kehat rotã neb nins sẽn kellã sẽn paamã yɩɩ bãmb piiga, ne b rũms wãbneg zĩisi.

27 La Manase buudã pʋɩ-sʋk kõo a Levi biig a Gɛrson rotã nebã+ Golan+ sẽn be Basan n yaa soondg tẽng ned sẽn kʋ a to yĩngã, ne a rũms wãbneg zĩisã, n paas Bɛstera ne a rũms wãbneg zĩisã: Tẽns a yiibu.

28 La Isakaar buudã soolmẽ,+ b yãka Kisyon ne a rũms wãbneg zĩisã, Daberat+ ne a rũms wãbneg zĩisã, 29 Yarmut ne a rũms wãbneg zĩisã, la Ɛn-ganim ne a rũms wãbneg zĩisã: Tẽns a naase.

30 Asɛɛr buudã soolmẽ,+ b yãka Misall ne a rũms wãbneg zĩisã, Abdon ne a rũms wãbneg zĩisã, 31 Hɛlkat+ ne a rũms wãbneg zĩisã, la Rewoob+ ne a rũms wãbneg zĩisã: Tẽns a naase.

32 La Naftali buudã soolmẽ, b yãka Kedɛɛs+ sẽn be Galile n yaa soondg tẽng+ ned sẽn kʋ a to yĩngã, ne a rũms wãbneg zĩisã, n paas Hamot-door ne a rũms wãbneg zĩisã, la Kartan ne a rũms wãbneg zĩisã: Tẽns a tãabo.

33 Tẽns nins fãa a Gɛrson rotã nebã sẽn paamã yɩɩ tẽns piig la a tãabo, ne b rũms wãbneg zĩisi.

34 La a Merari rotã nebã+ sẽn yaa Levi buudã neb nins sẽn kellã paama tẽns Zabulõ buudã soolmẽ.+ Yaa Yokneyam+ ne a rũms wãbneg zĩisã, Karta ne a rũms wãbneg zĩisã, 35 Dimna ne a rũms wãbneg zĩisã, la Nahalall+ ne a rũms wãbneg zĩisã: Tẽns a naase.

36 Rubɛn buudã soolmẽ, b yãka Bezɛɛr+ ne a rũms wãbneg zĩisã, Zahaaz ne a rũms wãbneg zĩisã,+ 37 Kedemot ne a rũms wãbneg zĩisã, la Mefaat ne a rũms wãbneg zĩisã: Tẽns a naase.

38 La Gaad buudã soolmẽ,+ b yãka Ramot sẽn be Galaad+ n yaa soondg tẽng ned sẽn kʋ a to yĩngã, ne a rũms wãbneg zĩisã, n paas Mahanayim+ ne a rũms wãbneg zĩisã, 39 Hɛsbon+ ne a rũms wãbneg zĩisã, la Yazɛɛr+ ne a rũms wãbneg zĩisã: B fãa yaa tẽns a naase.

40 Tẽns nins fãa b sẽn kõ a Merari buudã nebã rot toor-toorã, rat n yeel t’a Levi roogã neb nins sẽn kellã, yɩɩ tẽns piig la a yiibu.

41 Levi buudã nebã sẽn paam tẽns nins Israyɛll soolmẽ wã yɩɩ bãmb pis-naas la a nii, ne b rũms wãbneg zĩisi.+ 42 Tẽn-kãensã fãa ra tara b rũms wãbneg zĩis sẽn gũbg-ba. Ra yaa woto ne tẽng fãa.

43 Woto, a Zeova kõo Israyɛll nebã soolem ning fãa a sẽn da wẽen t’a na n kõo b yaab-rãmbã.+ La Israyɛll nebã reega soolmã, n zĩnd a pʋgẽ.+ 44 Sẽn paase, a Zeova kɩtame tɩ Israyɛll nebã zĩnd soolmã pʋgẽ ne bãane, wa a sẽn da wẽen n yeel b yaab-rãmbã,+ la b bɛɛbã baa a ye pa tõog n yals b taoor ye.+ A Zeova ninga Israyɛll nebã bɛɛbã fãa b nugẽ.+ 45 Kãab-nood* nins fãa a Zeova sẽn da pʋlem Israyɛll nebã baa a ye pa vaal ye. B fãa pidsa kɛpɩ.+

22 Dẽ, a Zozuwe boola Rubɛn buudã ne Gaad la Manase buudã pʋɩ-sʋk 2 n yeel-b yaa: “Yãmb maana bũmb ning fãa a Zeova tʋm-tʋmd a Moyiiz sẽn yeel yãmbã,+ la yãmb saka mam koɛɛgã n maan mam sẽn yeel yãmbã fãa.+ 3 Hal n tãag rũndã,+ yãmb pa bas y ba-biisã ye. Yãmb tũu noor ning yãmb Wẽnnaam a Zeova sẽn kõ yãmbã me.+ 4 Masã, yãmb Wẽnnaam a Zeova kɩtame tɩ yãmb ba-biisã zĩ bãane, wa a sẽn da pʋlem-bã.+ Yãmb tõe n leba y fu-rotẽ wã, soolem ningẽ a Zeova tʋm-tʋmd a Moyiiz sẽn kõ yãmb tɩ y soog Zʋrdẽ kʋɩlgã rʋʋnd a to wã.*+ 5 La bũmb sẽn be bala, gũus-y neer n tũ noy nins la Tõog ning a Zeova tʋm-tʋmd a Moyiiz sẽn kõ yãmbã sõma,+ n nong y Wẽnnaam a Zeova,+ n kẽnd a soayã fãa zutu,+ n sakd a noyã,+ n gãd-a kãn-kãe,+ n tũud-a+ ne y sũur fãa la ne y sɩɩgã* fãa.”+

6 Rẽ poore, a Zozuwe ninga bãmb barka, n kõ-b sor tɩ b looge. La bãmb leba b fu-rotẽ wã. 7 A Moyiiz ra kõo Manase buudã pʋɩ-sʋkã neb pʋɩɩr Basan soolmã pʋgẽ,+ t’a Zozuwe kõ pʋɩ-sʋk a to wã soolem Zʋrdẽ kʋɩlgã nin-taoore,+ b ba-biisã sʋka. Sẽn paase, a Zozuwe sẽn wa n na n kõ-b sorã, a ning-b-la bark 8 n yeel-b yaa: “Leb-y y fu-rotẽ wã ne arzɛgs wʋsgo, ne rũms wʋsgo, ne wanzuri la sãnem, zũud la kutu, la ne fut wʋsgo.+ Rɩk-y y bɛɛbã te-zɛɛdmã+ tɩ yãmb ne y ba-biisã pʋɩ taaba.”

9 Rẽ poore, Rubɛn buudã ne Gaad buudã la Manase buudã pʋɩ-sʋk yii Israyɛll neb a taabã nengẽ Sɩlo sẽn be Kanaã soolmẽ wã, n leb Galaade,+ soolem ning b sẽn da kõ bãmb tɩ b zĩndi, wa a Zeova sẽn da yeel a Moyiizã.+ 10 Rubɛn ne Gaad la Manase buudã pʋɩ-sʋkã sẽn wa n ta Zʋrdẽ kʋɩlgã soolem sẽn be Kanaã wã, bãmb mee tẽn-kug-kẽeng beenẽ. 11 Israyɛll neb a taabã wa n wʋma rẽ,+ n yeele: “Ges-y-yã! Rubɛn buudã ne Gaad buudã la Manase buudã pʋɩ-sʋkã mee tẽn-kugr Kanaã toadgẽ wã, Zʋrdẽ kʋɩlgã soolmẽ, Israyɛll nebã soolmã kɩrenga.” 12 Israyɛll nebã sẽn wʋm woto wã, nin-buiidã fãa tigma taab Sɩlo,+ n na n tɩ zab ne bãmba.

13 Dẽ, Israyɛll nebã tʋma maan-kʋʋd a Eleazaar biig a Fineyaas+ Rubɛn buudã nengẽ, Gaad buudã la Manase buudã pʋɩ-sʋkã nengẽ Galaade, 14 la Israyɛll rotã taoor dãmb piig n tũ-a. Buud fãa pʋgẽ, yaa taoor soab a ye n tũ. B ned kam fãa yaa a ba roog taoor soaba, n be Israyɛll buudã neb tusr-tusrã taoor dãmbã+ sʋka. 15 B sẽn ta Rubɛn buudã nengẽ, Gaad buudã la Manase buudã pʋɩ-sʋkã nengẽ Galaadã, b yeel-b lame:

16 “Ad a Zeova nin-buiidã fãa sẽn yete: ‘Bõe yĩng tɩ yãmb pa maan pʋ-peelem+ ne Israyɛll Wẽnnaamã? Yãmb sẽn me y tẽn-kugr n kɩɩs a Zeova wã, yãmb wẽnemdame n bas a Zeova tũub+ rũndã. 17 Pewoor kɩɩsgã pa sek tõnd sɩda? Hal n tãag rũndã, tõnd ket n namsda rẽ poorẽ, baa yel-beedã sẽn wa a Zeova nin-buiidã zugã.+ 18 La rũndã, yãmb dat n wẽnemdame n bas a Zeova! Yãmb sã n kɩɩs a Zeova rũndã, beoogo, a sũur na n puuga ne Israyɛll nin-buiidã fãa.+ 19 Masã, sã n mikame tɩ yaa soolem ning b sẽn kõ yãmbã n yaa rẽgdo, bɩ y wa a Zeova soolmẽ wã,+ zĩig ning a Zeova sɛk-roogã sẽn be wã,+ n zĩnd tõnd sʋka. La ra kɩɩs-y-yã a Zeova n kɩt tɩ tõnd me lebg tõatba, y sẽn me tẽn-kugr a to n paas tõnd Wẽnnaam a Zeova tẽn-kugrã yĩng ye.+ 20 A Zeera biig a Akã+ sẽn pa maan sɩd ne bũmb ning sẽn da segd ne sãoongã, sũ-puugr pa wa Israyɛll nebã fãa zug sɩda?+ Pa yẽ a ye n ki a beegrã yĩng ye.’”+

21 Rẽ la Rubɛn buudã ne Gaad buudã la Manase buudã pʋɩ-sʋkã leok Israyɛll buudã neb tusr-tusr* taoor dãmbã+ yaa: 22 “Wẽnnaam-dãmb Wẽnnaam a Zeova!* Wẽnnaam-dãmb Wẽnnaam a Zeova!+ Yẽnda miime, la Israyɛll me na n bãngame. Tõnd sã n kɩɩsa a Zeova n pa maan sɩd ne-a, bɩ y ra bas tõnd rũndã ye. 23 Tõnd sẽn me tẽn-kugrã sã n yaa sẽn na n wẽnemd n bas a Zeova, la d maan maand sẽn yõogd bugum, kood biis kũun la zems-n-taar maand a zugu, bɩ a Zeova sɩbg tõndo.+ 24 Yaa bũmb a to yĩng la tõnd sẽn maan bõn-kãnga wã. Bala tõnd yeelame yaa: ‘Yãmb kambã na n yeela tõnd kambã beoog yaa: “Bõe n kõt yãmb sor tɩ y naag tõnd n tũ Israyɛll Wẽnnaam a Zeova? 25 A Zeova kɩtame tɩ Zʋrdẽ kʋɩlgã yaa toadg sẽn be tõnd ne yãmb a Rubɛn la Gaad buudã nebã sʋka. Yãmb pa tar pʋɩɩr a Zeova pʋgẽ ye.” Woto, yãmb kambã na n gɩdga tõnd kambã tɩ b ra tũ* a Zeova ye.’

26 “Rẽ la tõnd yeel-yã: ‘Yaa tɩlɛ tɩ d maan bũmbu. D me tẽn-kugri, la pa sẽn na n yõogd maand a zug ye. 27 Yaa sẽn na yɩl t’a yɩ kaset tõnd ne yãmba,+ la tõnd yagensã* sẽn na n pʋgl tõndã sʋka, tɩ tõnd na n tʋma a Zeova tʋʋmdã a taoore, ne d maand sẽn yõogd bugmã, d zems-n-taar maandã,+ la d maand a taabã, tɩ yãmb kambã ra wa yeel tõnd kambã beoog yaa: “Yãmb pa tar pʋɩɩr a Zeova pʋgẽ ye.”’ 28 Dẽ, tõnd yeelame: ‘B sã n wa yeel tõnd ne d yagensã bõn-kãng beoogo, tõnd na n leokame: “Ad a Zeova tẽn-kugrã wõnego, d yaab-rãmbã sẽn maanã. Pa maand sẽn yõogd bɩ maand a taab yĩng ye. La yaa sẽn na yɩl t’a yɩ kaset yãmb ne tõnd sʋka.”’ 29 Tõnd pa na n saag n kɩɩs a Zeova, n wẽnemd n bas a Zeova rũndã+ n maan tẽn-kugr maand sẽn yõogd bugum yĩnga, kood biis kũun la maand a taab yĩnga, n zʋʋg tõnd Wẽnnaam a Zeova tẽn-kugrã sẽn be a sɛk-roogã taoorã ye!”+

30 Maan-kʋʋd a Fineyaas ne nin-buiidã nanambsã la Israyɛll neb tusr-tusr* taoor dãmbã sẽn tũ-a wã sẽn wʋm Rubɛn buudã, Gaad buudã la Manase buudã sẽn yeelã, b sũy maagame.+ 31 Dẽ, maan-kʋʋd a Eleazaar biig a Fineyaas yeela Rubɛn buudã, Gaad la Manase buudã yagensã yaa: “Rũndã, tõnd miime t’a Zeova bee tõnd sʋka. Bala yãmb pa maan bũmb n kɩɩs a Zeova ye. Yãmb fãaga Israyɛll nebã a Zeova nugẽ.”

32 Rẽ poore, maan-kʋʋd a Eleazaar biig a Fineyaas ne Israyɛll rotã taoor dãmbã yii Rubɛn buudã la Gaad buudã soolmẽ Galaade, n lebg n wa Kanaã n togs Israyɛll neb a taabã b kẽndã sẽn yɩ to-to. 33 Israyɛll nebã sũur yɩɩ noog ne b sẽn wʋmã. Bãmb pẽga Wẽnnaam, n pa le yeel tɩ b na n tɩ zaba ne Rubɛn buudã la Gaad buudã nebã, n sãam tẽng ning b sẽn be wã ye.

34 Rubɛn buudã nebã ne Gaad buudã nebã pʋda tẽn-kugrã yʋʋre.* Bala bãmb yeelame: “A yaa kaset tõnd sʋk t’a Zeova yaa Wẽnnaam sɩd-sɩda.”

23 A Zeova sẽn kɩt tɩ Israyɛll nebã paam b mens+ ne bɛɛbã fãa sẽn gũbg-bã kaoosg zugẽ, t’a Zozuwe kʋʋl n kolg kũumã,+ 2 a Zozuwe boola Israyɛll nebã fãa,+ b kãsem-dãmbã, b taoor dãmbã, b bʋ-kaoodbã la b nanambsã+ n yeel-ba: “Mam kʋʋlame n kolg kũum. 3 La yãmb mengã yãa bũmb nins fãa yãmb Wẽnnaam a Zeova sẽn maan bu-kãensã fãa yãmb neer yĩngã, bala yaa yãmb Wẽnnaam a Zeova n da zabd yãmb yĩnga.+ 4 Ade! Mam maana bãnd n pʋɩ yãmb*+ buud toɛy-toɛyã bu-zẽms nins sẽn ketã soolem.+ Mam kõo yãmb bu-zẽms nins mam sẽn sãamã soolem me,+ sẽn sɩng ne Zʋrdẽ kʋɩlgã n tãag Mog-kãsengã* sẽn be nin-taoorã.* 5 La yaa yãmb Wẽnnaam a Zeova n da rigd-b n yiisd yãmb taoore,+ la a rig-b lame n kõ yãmb tɩ yãmb reeg b soolmã, wa yãmb Wẽnnaam a Zeova sẽn da pʋlem yãmbã.+

6 “Masã, yãmb segd n kenga y mens sõma, n sak la y tũ bũmb nins fãa sẽn gʋls a Moyiiz Tõogã sebr pʋgẽ wã,+ n da bʋdg rɩtg wall goabga,+ 7 n da naag bu-zẽmsã+ sẽn ket yãmb sʋkã ye. Yãmb pa segd meng n pʋd b wẽnnaam-dãmbã yʋya,+ wall y wẽen ne bãmb ye. Y pa segd n tũ bãmb a bada, bɩ n wõgemd bãmb taoor ye.+ 8 Yãmb segd n gãda yãmb Wẽnnaam a Zeova kãn-kãe,+ wa yãmb sẽn maan n tãag rũndã wã. 9 A Zeova na n diga buud toɛy-toɛy sẽn yaa kãsems la sẽn tar pãng yãmb taoore,+ bala ned pa tõog n yals yãmb taoor n tãag rũndã ye.+ 10 Yãmb nin-yend bal na n diga bãmb neb tusri.+ Bala yãmb Wẽnnaam a Zeova zabd n sõngda yãmba,+ wa a sẽn da pʋlmã.+ 11 Woto wã, bɩ y gũus y mens wakat fãa*+ n nong yãmb Wẽnnaam a Zeova.+

12 “La yãmb sã n wẽnemd n bas Wẽnnaam, n tabend bu-zẽmsã neb nins sẽn ket yãmb sʋkã,+ n kẽ kãadem ne bãmba,+ la y naag bãmb tɩ bãmb me naag yãmba, 13 bɩ y bãng vẽeneg tɩ yãmb Wẽnnaam a Zeova pa na n kell n dig bu-kãensã* n kõ yãmb ye.+ B na n lebga wa gãmbre, bẽdg la kalwaas yãmb lʋgrẽ wã,+ la b lebg wa gõos yãmb ninẽ wã hal tɩ y menem zãng n bas tẽn-noogã yãmb Wẽnnaam a Zeova sẽn kõ yãmbã.

14 “La ade! Mam kolga kũum masã,* la yãmb mensã mii ne y sũur fãa la ne y sɩɩgã* fãa tɩ kãab-nood nins fãa yãmb Wẽnnaam a Zeova sẽn da pʋlem yãmbã baa a ye pa vaal ye. B fãa pidsa yãmb neer yĩnga. Gomd baa a ye pa vaal ye.+ 15 La wa kãab-nood nins fãa yãmb Wẽnnaam a Zeova sẽn pʋlem yãmbã sẽn pidsã,+ woto me, a Zeova na n kɩtame tɩ yel-beed ning a sẽn pʋlmã* wa yãmb zugu, la a na n menesa yãmb tẽn-noogã yãmb Wẽnnaam a Zeova sẽn kõ yãmbã pʋgẽ.+ 16 Yãmb sã n kɩɩs yãmb Wẽnnaam a Zeova kaoolã a sẽn yeel yãmb tɩ y tũ wã, la y sã n tɩ tũ wẽnnaam-dãmb a taab n wõgemd bãmb taoore, a Zeova sũurã na n puuga wʋsg ne yãmba,+ la yãmb na n kii tẽn-noog ning a sẽn kõ yãmbã pʋgẽ tao-tao.”+

24 Dẽ, a Zozuwe tigma Israyɛll buud toɛy-toɛyã neb fãa Sikɛmme, la a bool Israyɛll kãsem-dãmbã, b taoor dãmbã, b bʋ-kaoodbã la b nanambsã,+ tɩ b wa yals Wẽnnaam sɩd-sɩdã taoore. 2 A Zozuwe yeela nin-buiidã fãa yaa: “Ad Israyɛll Wẽnnaam a Zeova sẽn yeele: ‘Yaa Kʋɩlgã* rʋʋnd a to wã la yãmb yaab-rãmbã+ zĩnd-yã, n kaoos hal wʋsgo.+ Bãmb da tũuda wẽnnaam-dãmb a taaba.+ A Abrahaam ne a Nahoor ba a Teera me zĩnda b sʋka.

3 “‘Mam wa n kɩtame tɩ yãmb yaab a Abrahaam+ yik Kʋɩlgã* rʋʋnd a to wã, n kẽn n gilg Kanaã soolmã tõre, la mam kɩtame t’a yagensã lebg wʋsgo.+ Mam kõo yẽ a Izaake,+ 4 rẽ poore, mam kõo a Izaak a Zakoob ne a Ezayu.+ Kaoosg zugẽ, mam kõo a Ezayu Seyɩɩr tãngã tɩ yɩ a soolem,+ la a Zakoob ne a kambã kẽnga Ezɩpti.+ 5 Kaoosg zugẽ, mam tʋma a Moyiiz ne a Aarõ,+ la mam kɩtame tɩ yel-beed paam Ezɩpti.+ Rẽ poore, mam yiisa yãmb be. 6 Mam sẽn wa n yiis yãmb ba-rãmbã Ezɩpt+ tɩ b ta mogrẽ wã, Ezɩpt nebã da rigd-b-la ne zabr saar-dãmb* la wed-rʋʋdba, n tãag Mog-miuugẽ wã.+ 7 Bãmb sɩngame n zẽkd b koees n boond a Zeova,+ t’a kɩt tɩ lik zĩnd yãmb ne Ezɩpt nebã sʋka, la a kɩt tɩ mogrã koom lim-ba, n dɩ-ba.+ La yãmb meng nif yãa bũmb nins mam sẽn maan Ezɩpt nebã.+ Rẽ poore, yãmb zĩnda we-raoogẽ wã yʋʋm* wʋsgo.+

8 “‘La mam talla yãmb n tɩ kẽes Amoor nebã sẽn da be Zʋrdẽ kʋɩlgã rʋʋnd a to wã* soolmẽ. Bãmb zaba ne yãmba,+ la mam ninga bãmb yãmb nugẽ, tɩ yãmb deeg b soolmã. Mam menesa bãmb yãmb taoore.+ 9 Rẽ poore, a Sipoor biig a Balak sẽn yaa Mowaab rĩmã yikame n na n zab ne Israyɛlle. A boola a Beoor biig a Balaam t’a wa kãab yãmb wẽnga.+ 10 La mam pa sak n kelg a Balaam ye.+ Woto, a ninga yãmb bark naoor wʋsgo,+ la mam fãaga yãmb yẽ nugẽ.+

11 “‘Rẽ poore, yãmb rʋʋga Zʋrdẽ kʋɩlgã+ n wa Zeriko.+ La Zeriko nanambsã,* Amoor nebã, Perɛɛz nebã, Kanaã nebã, Hɛt nebã, Girgas nebã, Hevi nebã la Zebuus nebã zaba ne yãmba, la mam ninga bãmb yãmb nugẽ.+ 12 Mam kɩtame tɩ bãmb koms raoodo,* la bãmb zoee yãmb taoore.+ Yɩɩ Amoor nebã rĩm-dãmb a yiibu. La pa tũ ne yãmb sʋʋg wall y tãp ye.+ 13 Dẽ, mam kõo yãmb tẽng yãmb sẽn pa nams n paame, la galʋ-tẽns yãmb sẽn pa me,+ tɩ yãmb zĩnd b pʋsẽ. Yãmb dɩɩ viyn pʋt la oliiv tɩɩs biis yãmb sẽn pa sele.’+

14 “Woto yĩnga, bɩ y zoe a Zeova la y tũ-a ne sũur sẽn yaa yɩlemde,* la ne sɩda.*+ Yiis-y wẽnnaam-dãmb nins yãmb yaab-rãmbã sẽn tũ Kʋɩlgã* rʋʋndẽ wã la Ezɩpt soolmẽ wã,+ la y tũ a Zeova. 15 La sã n yaa wẽng ne yãmb tɩ y tũ a Zeova, bɩ y yãk y sẽn na n tũ a soab rũndã:+ Sã n yaa wẽnnaam-dãmb nins yãmb yaab-rãmbã sẽn tũ Kʋɩlgã* rʋʋndẽ wã+ la y rat n tũ, bɩ y tũ-ba. Wall sã n yaa Amoor nebã sẽn be yãmb sʋkã wẽnnaam-dãmbã+ la y rat n tũ, bɩ y tũ-ba. La maam ne m zakã rãmb yẽ, tõnd na n tũu a Zeova.”

16 Rẽ la nin-buiidã leok-yã: “Tõnd pa na n saag n bas a Zeova, n tũ wẽnnaam-dãmb a taab ye. 17 Yaa tõnd Wẽnnaam a Zeova n yiis tõnd ne d ba-rãmbã Ezɩpt+ sẽn yɩ tẽng ning pʋgẽ d sẽn da yaa yembsã,+ la a maan bõn-bãn-kãsems tõnd nifẽ.+ Yẽ n kell n kogl tõnd d so-toakã fãa sasa, la tẽns nins fãa tõnd sẽn pɩʋʋgã pʋsẽ.+ 18 A Zeova riga buud toɛy-toɛyã tõnd taoore, ne Amoor nebã sẽn deng tõnd soolmẽ wã. Woto yĩnga, tõnd me na n tũu a Zeova, bala yẽ n yaa tõnd Wẽnnaam.”

19 T’a Zozuwe yeel nin-buiidã yaa: “Yãmb pa tõe n tũ a Zeova ye. Bala a yaa Wẽnnaam sẽn yaa sõngo.+ A ratame tɩ b tũ yẽ a yembr tãa bala.+ A pa na n bas y kongrã* ne y yel-wẽnã taal ye.+ 20 Yãmb sã n bas a Zeova n tũ wẽn-sãamse, a na n wẽnemdame n zab ne yãmba, n menes yãmb zãnga, baa a sẽn da maan yãmb neerã.”+

21 La nin-buiidã yeela a Zozuwe yaa: “Ayo, tõnd na n tũu a Zeova!”+ 22 T’a Zozuwe yeel nin-buiidã: “Yãmb mengã yaa kaset tɩ yãmb yãka yam y toore, n na n tũ a Zeova.”+ Tɩ b leoke: “Tõnd yaa kaseto.”

23 “Sã n yaa rẽ bɩ y yiis wẽn-sãamsã sẽn be yãmb sʋkã, la y tũ Israyɛll Wẽnnaam a Zeova ne y sũur fãa.” 24 Nin-buiidã yeela a Zozuwe yaa: “Tõnd na n tũu tõnd Wẽnnaam a Zeova, la d na n saka yẽ!”

25 Dẽ, a Zozuwe maana kaool ne nin-buiidã baraare, la a lugla tõog bãmb yĩng Sikɛmme. 26 Rẽ poore, a Zozuwe gʋlsa gom-kãensã fãa Wẽnnaam Tõogã sebr pʋgẽ,+ la a rɩk kug-bedr+ n vigl tɩ-kãseng ning sẽn be a Zeova zĩ-sõngã zĩigẽ wã tẽngre.

27 A Zozuwe leb n yeela nin-buiidã yaa: “Ade! Kug-kãngã na n yɩɩ tõnd kaseto,+ bala a wʋma a Zeova sẽn yeel tõndã fãa, la a na n yɩɩ kaset yãmb yĩnga, sẽn na yɩl tɩ yãmb da wa kɩɩs y Wẽnnaamã ye.” 28 Dẽ, a Zozuwe kuilsa nin-buiidã, tɩ ned fãa leb a pʋɩɩrẽ.+

29 Rẽ poore, a Nun biig a Zozuwe sẽn yaa a Zeova tʋm-tʋmdã kiime. A yʋʋm da yaa koabg la piiga.+ 30 Bãmb mum-a-la a tẽngẽ wã Timnat-seera+ sẽn be Efrayim soolmã zĩig ning sẽn yaa tãensã, Gaas tãngã nug-rɩtgo. 31 Israyɛll nebã kell n tũu a Zeova a Zozuwe vɩɩmã tõre, la kãsem-dãmb nins a Zozuwe sẽn ki n basã vɩɩmã tõre. Kãsem-dãmbã ra mii bũmb nins fãa a Zeova sẽn maan Israyɛll nebã neer yĩngã.+

32 Israyɛll nebã muma a Zozɛf kõabã+ bãmb sẽn da zã Ezɩpt n wa wã Sikɛmme. Yɩɩ a Zakoob pʋʋgã pʋgẽ, pʋʋg ning a sẽn da a Sikɛm ba a Amoor kambã+ nengẽ ligd-koeems koabgã.+ Pʋʋgã lebga a Zozɛf kambã soolem.+

33 A Aarõ biig a Eleazaar me kiime.+ Bãmb mum-a-la a biig a Fineyaas kunkubrẽ wã,+ kunkubr ning b sẽn da kõ-a Efrayim soolmã zĩig ning sẽn yaa tãensã.