A SÃMWƐLL SEBR A YIIB-N-SOABA

1 Ad bũmb ning sẽn maan a Sayull kũumã poore. A Davɩɩd ra tɩ tõoga* Amalɛk nebã n lebg n wa. Yaa rasem a yiib la woto a sẽn lebg n wa Ziklaagã.+ 2 Rasem a tãab-n-soabã daare, ned n yi a Sayull sikã zĩigẽ n zoe n wa a Davɩɩd nengẽ. A futã ra pãrsame t’a zugã yaa tom. A kolga a Davɩɩd n wõgemd a taoor n fõgen a neng tẽnga.

3 A Davɩɩd sok-a lame yaa: “Fo yii yɛ?” T’a leoke: “Mam yii Israyɛll sikã zĩigẽ n zoe n põse.” 4 T’a Davɩɩd le yeel-a yaa: “Maana wãna? M kotame tɩ f togs-ma.” T’a leoke: “Nin-buiidã zoee zabrẽ wã, la neb wʋsg kiime. A Sayull ne a biig a Zonatã meng kiime.”+ 5 Rẽ la a Davɩɩd sok bi-bɩɩgã sẽn wa n taas-a koɛɛgã yaa: “Fo maana wãn n bãng t’a Sayull ne a biig a Zonatã kiime?” 6 Tɩ bi-bɩɩgã leoke: “Mam da wa n bee Gilbowa tãngã zugu,+ n yã a Sayull sẽn tik a kãndã, tɩ saar-dãmbã* ne wed-rʋʋdbã zoet n pẽnegd-a.+ 7 Yẽ sẽn wẽnemd n yã maamã, a boola maam tɩ mam leoke: ‘N-na, ad maam!’ 8 A Sayull soka maam tɩ mam yaa ãnda? Tɩ mam leok tɩ m yaa Amalɛk neda.+ 9 Dẽ, a yeelame: ‘M kotame tɩ f kolg n baas-ma, bala mam namsda wʋsgo, la m ket n nan pa ki ye.’ 10 Woto, mam kolgame n kʋ-a,+ bala mam da miime t’a sẽn pogl n gãe tẽngã, a pa na n põs ye. Rẽ poore, mam rɩka maanfã sẽn da be a zugẽ wã, la zũurã sẽn be a nugẽ wã n tall n wa n na n kõ m zu-soabã.”

11 A Davɩɩd sẽn wʋm dẽ, a gãda a futã n pãrse, la rap nins fãa sẽn da be ne yẽ wã me maana woto. 12 Bãmb yãbame n wiis la b loe noor+ n tãag zaabre, a Sayull ne a biig a Zonatã yĩnga, la a Zeova nin-buiidã ne Israyɛll buudã yĩnga.+ Bala b ra kʋʋ bãmb ne sʋʋga.

13 A Davɩɩd soka bi-bɩɩgã sẽn wa n taas-a koɛɛgã yaa: “Fo yita yɛ?” T’a leok t’a yaa sãana, n yaa Amalɛk ned biiga. 14 T’a Davɩɩd yeel-a yaa: “Bõe yĩng tɩ fo pa zoe rabeem, n sak n kʋ ned ning a Zeova sẽn yãkã?”*+ 15 Zĩig pʋgẽ, a Davɩɩd boola bi-bɩɩg a yembr n yeele: “Kolg n kʋ-a.” La bi-bɩɩgã kʋ-a lame.+ 16 A Davɩɩd yeel-a lame yaa: “Fo zɩɩmã raagr taal bee fo zugu. Bala fo mengã n yaag f noor n yeel tɩ foo n kʋ ned ning a Zeova sẽn yãkã.”+

17 Rẽ poore, a Davɩɩd yɩɩla sũ-sãang yɩɩll* a Sayull ne a biig a Zonatã yĩnga,+ 18 n yeel tɩ b segd n zãmsa Zida buudã nebã yɩɩn-kãnga. A gom-zugã yaa: “Tãpã.” B gʋls-a-la Zasaar sebrã pʋgẽ:+

19 “Israyɛll neba, sẽn da yaa-b yãmb ziirã kii yãmb zĩ-zãntsẽ wã.+

Ges-y yãmb gãndaadã sẽn ki to-to zabrẽ wã!

25 Ges-y yãmb gãndaadã sẽn ki to-to zabrẽ wã!

B kʋʋ a Zonatã yãmb zĩ-zãntsẽ wã!+

Fo sẽn da nong maam to-to wã yɩɩda pagbã nonglem.+

2 Rẽ poore, a Davɩɩd soka a Zeova+ yaa: “M segd n tɩ zĩnda Zida soolmã tẽng a yembrẽ bɩ?” T’a Zeova leok-a tɩ n-ye. A Davɩɩd leb n sokame: “Yɛ la m segd n kẽnge?” T’a yeel t’a kẽng Ebrõ.+ 2 Dẽ, a Davɩɩd kẽnga Ebrõ ne a pagb a yiibã: Yaa Zizreyɛll pag a Ayinowam,+ ne a Abigayɩll+ sẽn yaa Karmell rao a Naball pʋg-kõorã. 3 A Davɩɩd peega rap nins sẽn da be ne-a wã me+ ne b zagsã rãmba, tɩ b tɩ zĩnd tẽns nins sẽn gũbg Ebrõ wã pʋsẽ. 4 Zida buudã nebã waa beenẽ n yãk a Davɩɩd t’a lebg b rĩma.+

A Davɩɩd wʋmame tɩ yaa Zabɛs-galaad nebã n mum a Sayulli. 5 Dẽ, a tʋma neb tɩ b tɩ yeel Zabɛs-galaad nebã yaa: “Bɩ a Zeova ning yãmb barka, bala yãmb maana y zu-soab a Sayull neer n mum-a.+ 6 Bɩ a Zeova maan yãmb neer la a maan sɩd ne yãmba. Ma-me na n maana yãmb neere, yãmb sẽn maan bõn-kãnga wã yĩnga.+ 7 Masã, keng-y y mens la y tall raoodo, bala yãmb zu-soab a Sayull kiime, tɩ Zida buudã neb yãk maam tɩ m lebg b rĩma.”

8 La a Neer biig a Abneer+ sẽn yaa a Sayull tãb-biisã naabã ra rɩka a Sayull biig a Is-bosɛt+ n dʋʋg kʋɩlgã n kẽng Mahanayim,+ 9 n tɩ kɩt t’a lebg rĩm n na n soog Galaade,+ Asʋʋr nebã, Zizreyɛlle,+ Efrayim,+ Bẽnzame la Israyɛll tõrã. 10 A Sayull biig a Is-bosɛt sẽn wa n lebg Israyɛll rĩmã t’a tara yʋʋm pis-naase, la a rɩɩ naam yʋʋm a yiibu. La Zida buudã nebã yẽ ra bee ne a Davɩɩde.+ 11 A Davɩɩd zĩnda Ebrõ n yɩ Zida buudã rĩm n maan yʋʋm a yopoe la kiis a yoobe.+

12 A Neer biig a Abneer ne a Is-bosɛt rapã wa n yii Mahanayim+ n kẽng Gabawõ.+ 13 A Seruya+ biig a Zowaab+ ne a Davɩɩd rapã me yiime, la b tɩ sega taab Gabawõ bãkẽ wã. Bãmb da bee bãkã kɩreng a ye, t’a Abneer ne a rapã be bãkã kɩreng a to wã. 14 A Abneer wa n yeela a Zowaab yaa: “D kɩt tɩ kom-bɩɩsã yik n zab taab* tõnd taoore.” T’a Zowaab yeele: “B yiki!” 15 Dẽ, kom-bɩɩsã yikame n kolg tɩ b yãk neb piig la a yiib Bẽnzame buudã ne a Sayull biig a Is-bosɛt nebã sʋka, la b yãk neb piig la a yiib me a Davɩɩd rapã sʋka, tɩ b na n zabe. 16 B gãda taab zutu, tɩ ned kam fãa kõs a to lʋgr ne a sʋʋg tɩ b naag taab n lʋɩ n ki. Dẽ, b boola zĩ-kãng sẽn be Gabawõ wã tɩ Hɛlkat-azurim.*

17 Zabrã sẽn pʋglã yɩɩ toog wʋsg baraare, la a Davɩɩd rapã wa n baas n tõoga a Abneer ne Israyɛll nebã. 18 A Seruya kom-dibli a tãabã+ ra bee be. Yaa a Zowaabe,+ a Abisayi+ la a Asayɛlle.+ A Asayɛll ra zoeta ne tʋʋlem wa yãk sẽn tʋʋl to-to weoogẽ wã. 19 A Asayɛll ra rigda a Abneere, n pa bʋdgd goabg wall rɩtg ye. 20 A Abneer sẽn wẽnemd n yã a Asayɛllã, a sokame yaa: “Yaa foom bɩ, Asayɛlle?” T’a leoke: “N-ye. Yaa maam.” 21 Dẽ, a Abneer yeel-a lame yaa: “Bʋdg goabg bɩ rɩtg n yõk bi-bɩɩg a ye, n deeg fo sẽn dat fãa.” La a Asayɛll ra pa rat n bas a Abneer digb ye. 22 A Abneer leb n yeela a Asayɛll yaa: “Bas m digb tɩ m da wa kʋ-f ye! Mam sã n kʋ foo, m na n maana wãn n tõog n zẽk m neng n ges f ba-biig a Zowaabe?” 23 La a Asayɛll tõdgame t’a kõn lebg ye. Dẽ, a Abneer kõsa a pʋgã ne kãndã sɛɛga,+ tɩ sãag n yi a poorẽ wã t’a lʋɩ be n ki. Ned sã n da ta a Asayɛll sẽn lʋɩ zĩig ning n ki wã, a ra yalsdame.

24 Woto, a Zowaab ne a Abisayi zoe n pʋgla a Abneere. Wĩntoogã sẽn wa n lʋɩtẽ wã tɩ b taa Amma tãngã sẽn tees Giya, sor ning sẽn dabd Gabawõ we-raoogẽ wã zugu. 25 Bẽnzame buudã neb tigma taab a Abneer poorẽ. Bãmb sũu taab n tɩ yals tãng zugu. 26 Dẽ, a Abneer boola a Zowaab n yeel yaa: “Sʋʋgã na n kʋʋdame n pa yalsdẽ la? Fo pa mi tɩ baasgã na n yɩɩ toog bala? Na n yaa n kaoosa wakat a wãn tɩ fo yaool n yeel nin-buiidã tɩ b bas b ba-biisã rigbu?” 27 Rẽ la a Zowaab yeel-yã: “Mam wẽenda ne Wẽnnaam sɩd-sɩdã sẽn vɩ wã tɩ fo sã n da pa gome, nin-buiidã ra na n kell n diga b ba-biisã hal tɩ beoogã vẽege.” 28 A Zowaab peeba baorgã, la a nebã basa Israyɛll nebã rigbu, tɩ zabrã sa.

29 A Abneer ne a nebã pasga Araba wã+ yʋn-kãng tõre, n dʋʋg Zʋrdẽ kʋɩlgã n kẽng rʋʋnd a to wã. Bãmb rʋʋga bokã* n kẽn n ta Mahanayim.+ 30 A Zowaab sẽn bas a Abneer rigb n lebgã poore, a tigma nin-buiidã fãa. A Davɩɩd rapã sʋka, neb piig la a wɛ n da paooge, n paas a Asayɛlle. 31 La a Davɩɩd tʋm-tʋmdbã tõoga Bẽnzame buudã nebã ne a Abneer nebã, n kʋ bãmb kobs-tã la pis-yoobe. 32 Bãmb dɩka a Asayɛll+ n tɩ mum Betlehɛm+ a ba wã yaoogẽ. Rẽ poore, a Zowaab ne a nebã kẽna yʋngã tõr n ta Ebrõ+ ne tõd-beoogo.

3 Zabr ning sẽn da be a Sayull roogã ne a Davɩɩd roogã neb sʋkã ra tõta saabo. A Davɩɩd pãngã ra paasdame+ t’a Sayull roogã neb pãng ra boogdẽ.+

2 A Davɩɩd sẽn wa n be Ebrõ wã, a roga kom-dibli.+ A bi-kãsengã yʋʋr la a Amnon,+ t’a ma wã yaa Zizreyɛll pag a Ayinowam.+ 3 A bi-ribl a yiib-n-soabã yʋʋr la a Kileyaabe, n yaa Karmell dao a Naball pʋg-kõor a Abigayɩll+ biiga. Tãab-n-soabã yaa a Absalom.+ A ma la a Maaka, n da yaa Gesʋʋr dĩm a Talmayi+ bi-pugla. 4 Bi-ribl a naas-n-soabã yʋʋr la a Adoniza,+ t’a ma yʋʋr la a Agiti. A bi-ribl a nu soabã yaa a Sefatiya, t’a ma la a Abitalle. 5 Yoob-n-soabã yʋʋr la a Itreyam, n yaa a Davɩɩd pag a Egla biiga. Bãmbã yaa a Davɩɩd kom-dibli a sẽn dog Ebrõ.

6 Zabr ning sẽn da be a Sayull doogã neb ne a Davɩɩd roogã neb sʋkã sẽn wa n wogendẽ wã, a Abneer+ da maneg n paamda pãng a Sayull doogã rãmb sʋka. 7 A Sayull da tara pʋg-rɩkdg t’a yʋʋr la a Rispa,+ n yaa a Aya bi-pugla. A Is-bosɛt+ wa n soka a Abneer yaa: “Maana wãn tɩ fo kẽ ne mam ba wã pʋg-rɩkdga?”*+ 8 A Abneer sũurã puuga a Is-bosɛt sẽn sok-a woto wã, t’a yeele: “Mam yaa Zida buudã baag la? Hal n tãag rũndã, mam maana sɩd ne fo ba a Sayull doogã rãmba, a ba-biisã ne a zo-rãmbã, la mam pa zãmb foo n ning a Davɩɩd nugẽ, tɩ fo wa ningd maam taal rũndã pag poorẽ? 9 Mam sã n pa maan bũmb ning a Zeova sẽn pʋlem a Davɩɩdã,+ bɩ Wẽnnaam sɩbg maam ne sɩbg-kãsenga. 10 A ra pʋlmame t’a na n deega naamã a Sayull roogã neb nugẽ, la a kɩt t’a Davɩɩd lebg rĩm n dɩ naam Israyɛll ne Zida, sẽn sɩng ne Dan n tãag Bɛɛr-seba.”+ 11 A Is-bosɛt pa tõog n leok a Abneer tɩ bũmbu, a sẽn da zoet-a wã yĩnga.+

12 A Abneer tʋma neb tɩ b tɩ sok a Davɩɩd yaa: “Tẽngã yaa ãnd n so?” La a paase: “Maan-y kaool ne maam tɩ m na n maana m sẽn tõe fãa tɩ Israyɛll nebã fãa wẽnemd n kẽ yãmba.”+ 13 T’a Davɩɩd leok-a yaa: “Be neere! Mam na n maana kaoolã ne foo. Bũmb sẽn be bala, fo sã n wat mam nengẽ bɩ f tall a Sayull bi-pugl a Mikall+ n wa. Sã n pa rẽ bɩ f ra saag n wa mam nengẽ ye.” 14 A Davɩɩd tʋma neb a Sayull biig a Is-bosɛt nengẽ+ tɩ b tɩ yeel-a yaa: “Kõ-m m pag a Mikall mam sẽn wõrs Filisti neb yo-gãnd koabg n yao n deegã.”+ 15 Dẽ, a Is-bosɛt tʋmame tɩ b tɩ reeg a Mikall a sɩd a Paltɩyɛll+ sẽn yaa a Layis biigã nengẽ. 16 La a sɩdã ra pʋgdame n yãbda, hal n tãag Bawurim.+ Dẽ, a Abneer yeel-a lame yaa: “Lebg n kuili!” La yẽ lebgame.

17 Wakat kãnga, a Abneer tʋma neb tɩ b tɩ yeel Israyɛll kãsem-dãmbã yaa: “Yãmb da sɩng n datame t’a Davɩɩd lebg y rĩma. 18 Masã, maan-y y sẽn da ratã. Bala a Zeova ra yeela a Davɩɩd yaa: ‘Mam na n fãaga Israyɛll nebã sẽn yaa mam nin-buiidã Filisti nebã nugẽ, la b bɛɛbã fãa nugẽ, ne m tʋm-tʋmd a Davɩɩd nug pãnga.’”+ 19 Dẽ, a Abneer tɩ goma ne Bẽnzame buudã nebã.+ Rẽ poore, a kẽnga Ebrõ me n tɩ yã a Davɩɩde. A togs-a-la bũmb ning Israyɛll nebã ne Bẽnzame buudã nebã sẽn zems taab n na n maanã.

20 A Abneer ne neb pisi wã sẽn ta a Davɩɩd nengẽ Ebrõ wã, a Davɩɩd maana tigr b yĩnga. 21 A Abneer yeela a Davɩɩd yaa: “M zu-soaba, kõ-y-m sor tɩ m kẽng n tɩ tigim Israyɛll nebã fãa n kõ yãmba, tɩ b maan kaool ne yãmba. Woto, yãmb na n lebga rĩma, n soog y sẽn dat fãa.”* Dẽ, a Davɩɩd kõo a Abneer sore, t’a loog ne laafɩ.

22 Wakat kãng bala, a Davɩɩd tãb-biisã ne a Zowaab yii zabr weoog n wa ne teed wʋsg b sẽn zɛ. A Abneer da pa le be Ebrõ a Davɩɩd nengẽ ye. Bala a ra kõ-a-la sor t’a loog ne laafɩ. 23 A Zowaab+ ne tãb-biisã fãa sẽn da be ne-a wã sẽn ta wã, b yeel-a lame t’a Neer+ biig a Abneer+ waa rĩmã nengẽ, tɩ rĩmã bas-a t’a loog ne laafɩ. 24 Woto, a Zowaab kẽe rĩmã nengẽ n sok-a yaa: “Yaa bõe la yãmb sẽn maanã? A Abneer waa yãmb nengẽ tɩ yãmb bas-a t’a loog faag-faag woto? 25 Yãmb yaool n mii a Neer biig a Abneer sõma! A waame n na n belg yãmb n paam n bãng yãmb sẽn maandã fãa.”

26 A Zowaab yii a Davɩɩd nengẽ n tʋm neb tɩ b babs a Abneere. Bãmb tɩ paam-a-la Sira bulgẽ wã n tall-a n wa. La a Davɩɩd ra pa mi baa fʋɩ yel-kãngã wɛɛngẽ ye. 27 A Abneer sẽn lebg n wa Ebrõ wã,+ a Zowaab maana wa a rat n togs-a-la koɛɛga, n peeg-a n yi kɛɛng tẽngã rignoorẽ. La a Zowaab kõsa a Abneer pʋgã ne sʋʋg t’a ki.+ A maana woto, a Abneer sẽn da kʋ b ba-biig a Asayɛllã yĩnga.*+ 28 A Davɩɩd sẽn wa n wʋm bũmb ning sẽn maanã, a yeelame: “Maam ne m rĩungã kõn tol n tall taal a Zeova taoore,+ a Neer biig a Abneer zɩɩmã raagr yĩng ye. 29 Bɩ taalã zĩnd a Zowaab ne a ba wã zak rãmb fãa zugu.+ Bɩ ned sẽn bẽed taoor bãaga,+ wall wãoore,+ bɩ nin-saan-paga,* pa rẽ bɩ ned b sẽn kʋ ne sʋʋga, wall ned sẽn kae rɩɩb n dɩtẽ+ da tol n kong a Zowaab zakã rãmb sʋk ye.” 30 Woto, a Zowaab ne a ba-biig a Abisayi+ kʋʋ a Abneere,+ a sẽn kʋ b ba-biig a Asayɛll Gabawõ zabrẽ wã yĩnga.+

31 A Davɩɩd yeela a Zowaab ne neb nins fãa sẽn be ne-a wã tɩ b pãrs b futã la b yeelg bot n yãb a Abneer yĩnga. Rĩm a Davɩɩd meng ra pʋgda pãndarã. 32 Bãmb muma a Abneer Ebrõ. Rĩmã zẽka a koɛɛg n yãb a Abneer yaoogẽ wã, la nin-buiidã fãa me yãbame. 33 Rĩmã pʋda yɩɩll a Abneer yĩnga, n yeele:

“A Abneer da tog n kii wa yalem sɩda?

Fo kii wa nin-wẽns sẽn kʋʋd ned to-to wã.”+

Nin-buiidã sẽn wʋm yɩɩllã, b le sɩng-a-la yãbre.

35 Nand tɩ wĩndgã lʋɩ, nin-buiidã waa a Davɩɩd nengẽ n na n kõ-a rɩɩb n bels-a.* La a Davɩɩd yeelame: “Mam sã n lemb dɩɩb wall bũmb a to tɩ wĩndgã nan pa kẽ, bɩ Wẽnnaam sɩbg maam ne sɩbg-kãsenga!”+ 36 Nin-buiidã fãa yãa bũmb ning rĩmã sẽn maanã, la yɩ-b-la noogo. B sũur yɩɩ noog ne bõn-kãnga, wa b sũur sẽn da noom ne bũmb ning fãa rĩmã sẽn da maandã. 37 Woto, a Davɩɩd nebã ne Israyɛll nebã fãa bãnga baraar tɩ rĩmã pa tar taal a Neer biig a Abneer kʋʋbã pʋgẽ ye.+ 38 Rĩmã yeela a tʋm-tʋmdbã yaa: “Yãmb pa mi tɩ yaa naab la nin-kãseng la sẽn ki Israyɛll rũndã wã la?+ 39 Rũndã, baa b sẽn yãk maam tɩ m lebg rĩmã,+ mam pa tar pãng ye. A Seruya kom-dibli wã+ yaa nin-toos wʋsgo.+ Bɩ a Zeova rol nin-wẽng wa sẽn zems a wẽnemã.”+

4 A Sayull biig a Is-bosɛt+ sẽn wʋm t’a Abneer kii Ebrõ wã,+ a komsa raood zãnga, tɩ Israyɛll nebã fãa me yɛɛse. 2 A Sayull biigã tãb-biisã sʋka, fãadb sul n da be, tɩ b neb a yiib yaa b taoor dãmba: Yaa a Baana ne a Rekaabe. Bãmb da yaa Beerot rao a Rimon sẽn yaa Bẽnzame buudã nedã kom-dibli. (Bala b ra geelgda Beerot+ me n naagd Bẽnzame soolmã. 3 Beerot nebã zoeeme n kẽng Gitayim,+ n tɩ lebg sãamb beenẽ hal n tãag rũndã.)

4 A Sayull biig a Zonatã+ ra tara bi-ribl t’a naoã komse.+ Wakat ning nebã sẽn yi Zizreyɛll+ n wa togs a Sayull ne a Zonatã kũumã t’a ra tara yʋʋm a nu. Pag ning sẽn da yaoond-a wã rɩk-a lame n na n zoe, la a sẽn wa n zoetẽ wã, rabeemã yĩnga, biigã lʋɩɩme n lebg koamsa. A yʋʋr la a Mefibosɛte.+

5 Beerot rao a Rimon kom-dibli a Rekaab ne a Baana kẽnga a Is-bosɛt nengẽ, zĩigã sẽn wa n zabd wʋsg sasa. A Is-bosɛt ra gãee ne wĩndgã n vʋʋsdẽ. 6 Bãmb kẽe roogẽ wã, n maan wa b wa n na n dɩka bɩle, la b kõsa a pʋgã. Rẽ poore, a Rekaab ne a ba-biig a Baana+ soosame n zoe. 7 Bãmb sẽn kẽ roogẽ wã t’a ra gãee a gãagẽ ro-pʋgẽ wã. Bãmb kõs-a lame n kʋ, la b fiuug a zugã. Rẽ poore, b rɩka a zugã n tũ Araba wã sor n kẽn yʋngã tõre. 8 Bãmb talla a Is-bosɛt zugã+ n kẽng rĩm a Davɩɩd nengẽ Ebrõ, n tɩ yeel-a yaa: “Ad yãmb bɛ a Sayull+ sẽn da rat n yãk yãmb yõorã+ biig a Is-bosɛt zugã. Rũndã, a Zeova kɩtame tɩ d zu-soabã la d rĩmã rok a sũur ne a Sayulli, la ne a yagensã.”

9 La a Davɩɩd yeela a Rekaab ne a ba-biig a Baana sẽn yaa Beerot rao a Rimon kambã yaa: “Mam wẽenda ne a Zeova sẽn vɩ wã, soab ning sẽn fãag maam* m toogã fãa pʋgẽ wã+ 10 tɩ ned a ye sẽn da wa n togs maam t’a Sayull kiime,+ n tagsdẽ t’a waa ne koe-noogã, mam yõk-a lame n kʋ+ Ziklaage. Rẽ n yɩ keoor a sẽn paam mam nugẽ! 11 Woto wã, nin-wẽns sẽn kẽ nin-tɩrg roogẽ n kʋ-a a gãagẽ n tog ne sɩbgr n yɩɩda. Mam na n sɩbga yãmb y sẽn daag a zɩɩmã yĩnga,+ la m menes-y dũniyã zugu.” 12 Dẽ, a Davɩɩd kɩtame t’a rapã kʋ-ba.+ Rẽ poore, b fiuusa b nusã ne b naoã, n yagl-b+ Ebrõ bãkã noore. La bãmb dɩka a Is-bosɛt zugã n mum Ebrõ, a Abneer yaoogẽ wã.

5 Israyɛll buud toɛy-toɛyã fãa wa n kẽnga a Davɩɩd nengẽ Ebrõ+ n tɩ yeel-a yaa: “Yãmb ne tõnd yaa rogem.”*+ 2 A Sayull sẽn da wa n yaa tõnd rĩmã, yaa yãmb n da lʋɩt Israyɛll tãb-biisã taoor tɩ y kẽnd zabre.*+ La a Zeova yeela yãmb yaa: ‘Foom n na n yɩ Israyɛll sẽn yaa mam nin-buiidã pe-kɩɩma, la f na n lebga Israyɛll nebã taoor soaba.’”+ 3 Woto, Israyɛll kãsem-dãmbã fãa waa Rĩm a Davɩɩd nengẽ Ebrõ, la yẽ maana kaool ne bãmb be,+ a Zeova taoore. Dẽ, bãmb yãka* a Davɩɩd t’a lebg Israyɛll rĩma.+

4 A Davɩɩd sẽn wa n na n deeg naamã t’a tara yʋʋm pis-tã, la a rɩɩ naam yʋʋm pis-naase.+ 5 Yẽ rɩɩ naam yʋʋm a yopoe la kiis a yoob Ebrõ, la yʋʋm pis-tã la a tãab Israyɛll ne Zida nebã fãa zugu, Zerizalɛm.+ 6 Rĩmã ne a nebã rɩka Zerizalɛm sor n na n tɩ zab ne Zebuus nebã+ sẽn da be soolmã pʋgẽ wã. La Zebuus nebã yaala a Davɩɩd n yeel-a yaa: “Fo kõn tol n kẽ ka ye. Baa tõnd zoensã la d koms-rãmbã na n tõog n diga foo.” B tagsa b sũurẽ t’a Davɩɩd pa na n tol n tõog n deeg bãmb tẽngã ye.+ 7 La a Davɩɩd tõog n deega Siyõ tẽngã sẽn tar pãngã, la be n lebg a Davɩɩd tẽnga.+ 8 Baraare, a Davɩɩd yeelame yaa: “Neb nins sẽn na n zab ne Zebuus nebã segd n tũu ko-sorã* n kʋ koms-rãmbã la zoensã a Davɩɩd sẽn kisã!” Yaa rẽ n so tɩ nebã yetẽ tɩ koams la zoang pa na n tol n kẽ na-yirã ye. 9 Woto, a Davɩɩd tɩ zĩnda tẽn-kãng sẽn tar pãngã pʋgẽ, la b wa n boonda* tẽngã t’a Davɩɩd tẽnga. A Davɩɩd mee lals la rot n gũbg tẽngã, sẽn sɩng ne Milo wã*+ n tar n watẽ.+ 10 A Davɩɩd pãngã ra tara paasgo,+ la Wẽnnaam a Zeova sẽn yaa tãb-biis naabã ra bee ne-a.+

11 Tɩɩr dĩm a Hiram+ tʋma neb a Davɩɩd nengẽ. Sẽn paase, a tool-a-la sɛɛdr tɩɩs raado,+ la a tʋm ra-wãadba, la kug-pɛɛsdb sẽn na n sõng n me lalse, la bãmb sɩngame n na n me roog* n kõ a Davɩɩde.+ 12 A Davɩɩd bãngame t’a Zeova kɩtame t’a naamã vigl sõma Israyɛlle,+ la t’a zẽka a rĩungã+ Israyɛll sẽn yaa Wẽnnaam nin-buiidã yĩnga.+

13 A Davɩɩd sẽn yik Ebrõ n kẽng Zerizalɛmmã, a paama pagb a taab ne pʋg-rɩkdse,*+ la a rog kom-dibli la kom-pugli a taaba.+ 14 Ad kamb nins a Davɩɩd sẽn dog Zerizalɛmmã: Yaa a Samuwa, a Sobaabe, a Natã,+ a Salomo,+ 15 a Yibaare, a Elisuwa, a Nefɛɛge, a Zafiya, 16 a Elisama, a Eliyada la a Elifelɛte.

17 Filisti nebã sẽn wʋm tɩ b yãka a Davɩɩd t’a lebg Israyɛll rĩmã,+ b fãa yiime n baood a Davɩɩde.+ A Davɩɩd sẽn wʋm dẽ wã, a tɩ kẽe a zĩ-soalgdgẽ wã.+ 18 Filisti nebã waame, n sãeeg n pid Refayim longã.+ 19 Dẽ, a Davɩɩd soka a Zeova+ yaa: “Mam segd n tɩ zaba ne Filisti nebã bɩ? Yãmb na n ninga bãmb mam nugẽ bɩ?” T’a Zeova leok-a yaa: “Yik n tɩ zab ne-b tɩ mam na n ning-b-la fo nugẽ.”+ 20 Woto, a Davɩɩd kẽnga Baal-perazim, la yẽ kʋʋ Filisti nebã beenẽ. Dẽ, yẽ yeelame yaa: “A Zeova tuka sor mam bɛɛbã sʋk+ wa koom sẽn lub lalga.” Rẽ n so t’a pʋd zĩigã yʋʋr tɩ Baal-perazim.*+ 21 Filisti nebã zoeeme n bas b bõn-naandsã be, t’a Davɩɩd ne a nebã wʋk n looge.

22 Rẽ zugẽ, Filisti nebã le waame n sãeeg n pid Refayim longã.+ 23 A Davɩɩd soka a Zeova a sẽn segd n maanega, la a leok-a lame yaa: “Ra kẽng tɩrg n seg-b ye. Gilg b poorẽ wã n tɩ zab ne-b baka tuudã taoore. 24 La fo sã n wa wʋm bʋrg sẽn wõnd tãb-biis nao rãamd baka tuudã zugẽ, bɩ f yik tao-tao n zab ne-ba. Bala a Zeova na n lʋɩɩ fo taoor n kʋ Filisti tãb-biisã.” 25 A Davɩɩd maana wa a Zeova sẽn yeel-a wã. Yẽ kʋʋ Filisti nebã,+ sẽn sɩng ne Geba+ n tãag Gezɛɛre.+

6 A Davɩɩd le tigma Israyɛll tãb-biis nins fãa sẽn yaa gãndaad n yɩɩdã bãmb tus-pis-tã. 2 A Davɩɩd ne rap nins fãa sẽn da be ne-a wã seglame n na n kẽng Baal-zida n tɩ tall Wẽnnaam Koglgã n wa.+ Yaa koglg ning taoor nebã sẽn pẽgd* a Zeova sẽn yaa tãb-biis naabã yʋʋrã,+ soab ning sẽn zao a geerã sẽn be seribẽ-rãmbã zugã.*+ 3 La bãmb rɩka Wẽnnaam Koglgã n sagl niis sarɛt-paall pʋgẽ,+ n yi a Abinadaab yirã+ sẽn be tãngã zugã. A Abinadaab kom-dibli a Uuza ne a Ayio n da get sarɛtã yell t’a kẽnda.

4 Woto, b talla Wẽnnaam Koglgã n yi a Abinadaab yirã sẽn be tãngã zugã, t’a Ayio ra be Koglgã taoor n kẽnda. 5 A Davɩɩd ne Israyɛll nebã fãa ra kɩdemda sũ-noog a Zeova taoor ne yʋʋm-teed toor-toor sẽn maan ne raado, pendse, yʋʋm-teed a taab sẽn tar rissi,+ bembendo,*+ waase,+ la yʋʋm-teed a taaba. 6 La b sẽn wa n ta a Nakon zɛɛgẽ wã, a Uuza tẽega a nug n gãd Wẽnnaam Koglgã,+ bala niisã maaname t’a ra rat n lʋɩ. 7 Rẽ kɩtame tɩ Wẽnnaam a Zeova sũurã puug ne a Uuza t’a kʋ-a+ be, a sẽn paoog yẽ wã yĩnga.+ Yẽ kii beenẽ, Wẽnnaam Koglgã sɛɛga. 8 La a Davɩɩd sũur yikame, a Zeova sũur sẽn puug t’a sɩbg a Uuza zĩig pʋgẽ wã yĩnga. La b boola zĩ-kãng tɩ Perɛɛz-uuza* hal n tãag rũndã. 9 Baraare, a Zeova rabeem kẽe a Davɩɩd+ t’a yeele: “Mam na n maana a wãn t’a Zeova Koglgã wa mam nengẽ?”+ 10 A Davɩɩd ra pa le rat n tall a Zeova Koglgã n wa a tẽngẽ wã ye.+ La yẽ kɩtame tɩ b tall-a n kẽng Gat* rao a Obɛɛd-edom zakẽ wã.+

11 A Zeova Koglgã paa Gat rao a Obɛɛd-edom zakẽ wã kiis a tãabo, la a Zeova ra ningda a Obɛɛd-edom ne a zakã rãmb fãa barka.+ 12 Neb n tɩ togs rĩm a Davɩɩd yaa: “Ad a Zeova ninga a Obɛɛd-edom zakã rãmb ne a sẽn so wã fãa barka, Wẽnnaam Koglgã yĩnga.” Dẽ, a Davɩɩd kẽngame n na n tɩ tall Wẽnnaam Koglgã a Obɛɛd-edom yirã n wa a Davɩɩd tẽngẽ wã ne kɩdengo.+ 13 Neb nins sẽn da tʋk+ a Zeova Koglgã sẽn kẽng nao-yakem a yoobe, a Davɩɩd kɩtame tɩ b kʋ loalg ne rũm-noabdga, n maan maando.

14 A Davɩɩd ra saood n gilgda a Zeova taoor ne a pãng fãa. A ra yera* efood* sẽn wʋg ne lẽ gĩsi.+ 15 A Davɩɩd ne Israyɛll nebã fãa ra tara a Zeova Koglgã+ n watẽ, n kaasd ne sũ-noog+ la b peebd bardo.+ 16 La a Zeova Koglgã sẽn ta a Davɩɩd tẽngẽ wã, a Sayull bi-pugl a Mikall+ lɩka roog fenetrẽ n yã rĩm a Davɩɩd sẽn yɩgd la a saood n gilgd a Zeova taoore. La yẽ sãbga a Davɩɩd a sũurẽ wã.+ 17 Woto, bãmb talla a Zeova Koglgã n kẽes fu-roog ning a Davɩɩd sẽn tilg a yĩngã pʋgẽ.+ Dẽ, a Davɩɩd maana maand sẽn yõogd bugum+ ne zems-n-taar maand+ a Zeova taoore.+ 18 A Davɩɩd sẽn maan maand sẽn yõogd bugum ne zems-n-taar maand n sa wã, a ninga nin-buiidã bark ne a Zeova sẽn yaa tãb-biis naabã yʋʋre. 19 Sẽn paase, a kõo nin-buiidã fãa, rat n yeel tɩ zãma wã fãa sẽn yaa Israyɛll nebã, rapã la pagbã fãa bur sẽn wõnd maanfo, Mak kɛgl-gila, la viyn biis b sẽn kʋɩɩs n gili. La ned fãa kuila a yiri.

20 A Davɩɩd sẽn lebg n na n tɩ ning a yirã rãmb barkã, a Sayull bi-pugl a Mikall+ yi n seg-a lame n yeel-a yaa: “Ad Israyɛll rĩmã paam ziir dũndã! Bala a yeesa a futã n bas a meng zaal la bal a tʋm-tʋmdbã yem-pogs taoore, wa ned zug sẽn kae!”+ 21 Rẽ la a Davɩɩd yeel-yã: “Yaa a Zeova taoor la m da kɩdemda. Yẽ n yãk maam n bas fo ba wã ne a zakã rãmba, n kɩt tɩ mam lebg Israyɛll sẽn yaa a Zeova nin-buiidã naabã.+ Rẽ wã, mam na n kɩdma a Zeova taoore. 22 Mam na n sika m meng n yɩɩg woto, la m paoog m meng n paase. La sã n yaa ne yem-pogs nins yell fo sẽn gomã, bãmb n na n waoog maam.” 23 Woto, a Sayull bi-pugl a Mikall+ pa tol n paam biig n tãag a kũum ye.

7 Rĩm a Davɩɩd sẽn kẽ a na-yirã,+ t’a Zeova kɩt t’a paam a meng ne a bɛɛbã fãa sẽn da gũbg-a wã, 2 a yeela no-rɛɛs a Natã+ yaa: “Mam gãee roog sẽn me ne sɛɛdr tɩɩs raad pʋgẽ,+ tɩ Wẽnnaam Koglgã yaool n be fu-roog pʋgẽ.”+ 3 A Natã leoka rĩmã yaa: “Maan-y bũmb ning fãa y sẽn date, bala a Zeova bee ne yãmba.”+

4 La baraar yʋng bala, a Zeova goma ne a Natã n yeele: 5 “Kẽng n tɩ yeel m tʋm-tʋmd a Davɩɩd yaa: ‘Ad a Zeova sẽn yeele: “Rẽ yĩnga, fo n tog n me roog n kõ maam tɩ m zĩnd a pʋgẽ sɩda?+ 6 Bala mam sẽn yiis Israyɛll nebã Ezɩptã tɛk n tãag rũndã, mam pa zĩnd roog pʋgẽ ye.+ La mam da toeemda zĩisi, n da be fu-roog wall sɛk-roog pʋgẽ.+ 7 Rẽ yĩnga, wakat ning fãa mam sẽn zĩnd ne Israyɛll nebã,* m tol n goma ne Israyɛll buud baa a ye taoor soab m sẽn yãk t’a ges m nin-buiidã yelle, n sok-a tɩ bõe yĩng tɩ y pa me sɛɛdr tɩɩs raad roog n kõ-ma?’” 8 Rẽ wã, tɩ yeel mam tʋm-tʋmd a Davɩɩd t’a Zeova sẽn yaa tãb-biis naabã yeelame yaa: “Fo ra bee weoogẽ n gũud rũmsi,+ tɩ mam wa yiis foo be n kɩt tɩ f lebg Israyɛll nebã sẽn yaa mam nin-buiidã taoor soaba.+ 9 Mam na n zĩnda ne foo zĩig ning fãa fo sẽn na n kẽnge,+ la m na n menesa fo bɛɛbã fãa f taoore,+ la m kɩt tɩ f yʋʋrã lebg kãsenga,+ wa dũniyã nin-kãsemsã yʋya. 10 Mam na n yãka zĩig n kõ Israyɛll nebã sẽn yaa mam nin-buiidã tɩ b tilg be. Bãmb na n zĩnda be, la ned baa a ye kõn tiis-b ye. Nin-wẽns pa na n le nams-b wa b sẽn da nams-b to-to pĩndã,+ 11 wakat ning mam sẽn da yãkd bʋ-kaoodb+ tɩ b get Israyɛll nebã sẽn yaa mam nin-buiidã yellã ye. Mam na n kɩtame tɩ f paam f meng ne f bɛɛbã fãa n zĩnd ne bãane.+

“‘“Sẽn paase, a Zeova yeela foo t’a Zeova na n kɩtame tɩ fo buudã lebg na-roogo.*+ 12 Fo sã n wa maan kaalem+ wa f yaab-rãmbã, mam na n kɩtame tɩ ned sẽn na n yi fo pendẽ wã, rat n yeel tɩ fo mengã bi-roak lebg rĩma, la mam na n vigla a rĩungã kãn-kãe.+ 13 Yaa yẽ n na n me roog mam yʋʋrã yĩnga,+ la m na n vigla a naamã geer wakat fãa yĩnga.+ 14 Mam na n yɩɩ yẽ ba, la yẽ na n lebga mam biiga.+ A sã n wa beege, mam na n kibl-a-la ne ãdem-biis rasaare, la m sɩbg-a ne sãbsg wa ninsaalbã sẽn maand to-to wã.+ 15 Mam na n nong-a-la ne nonglem sẽn pa na n tol n sa ye. Mam pa na n bas-a wa m sẽn bas a Sayull+ n deeg a naamã n kõ foo wã ye. 16 Fo roogã ne f rĩungã na n paa wakat fãa, la fo naamã geer na n vigla kãn-kãe wakat sẽn kõn sa.”’”+

17 A Natã togsa a Davɩɩd gom-kãensã fãa, n paas Wẽnnaam sẽn vẽneg-a wã fãa.+

18 Rĩm a Davɩɩd sẽn wʋm dẽ wã, a tɩ zĩnda a Zeova taoor n yeele: “Zu-soab sẽn ka to a Zeova, mam yaa ãnda, la m doogã rãmb yaa ãnd rãmb tɩ yãmb maan woto fãa n kõ maam?+ 19 Zu-soab sẽn ka to a Zeova, woto fãa ket n pa sek yãmba, tɩ y yeel tɩ y tʋm-tʋmdã roog rãmb na n kaoosa hal wʋsgo. Zu-soab sẽn ka to a Zeova, rẽ yaa noor ãdem-biisã fãa yĩnga. 20 Zu-soab sẽn ka to a Zeova, bõe la maam a Davɩɩd sẽn yaa yãmb tʋm-tʋmdã tõe n le yeel n paase? Bala yãmb mii maam sõma.+ 21 Yãmb maana bõn-kãensã fãa sẽn yaa kãsemsã, la y vẽneg bãmb y tʋm-tʋmdã+ wa sẽn zems y raabã la y sẽn da yeelã. 22 Zu-soab sẽn ka to a Zeova, rẽ n so tɩ yãmb sɩd yaa kãsenga.+ Yãmb to kae,+ la Wẽnnaam a to kae n zʋʋg yãmb ye.+ Bũmb nins fãa tõnd sẽn wʋmã wilgda rẽ. 23 Rẽ yĩnga, buud a to bee tẽngã zug n yaa wa Israyɛll nebã sẽn yaa yãmb nin-buiidã sɩda?+ Yãmb kẽngame n tɩ fãag bãmba, n kɩt tɩ b lebg y nin-buiidu,+ n tʋm tʋʋm-kãsemse, la y maan bõn-yɛɛsds bãmb yĩng+ sẽn na yɩl tɩ nebã bãng y yʋʋrã.+ Yãmb meng n fãag y nin-buiidã Ezɩpti, n dig bu-zẽmsã ne b wẽnnaam-dãmbã y nebã yĩnga. 24 Yãmb kɩtame tɩ Israyɛll nebã lebg yãmb nin-buiid wakat fãa yĩnga,+ la yãmb a Zeova lebga bãmb Wẽnnaam.+

25 Masã, Wẽnnaam a Zeova, bɩ y kɩt tɩ bũmb ning y sẽn pʋlem y tʋm-tʋmdã ne a roogã rãmbã pids wakat fãa yĩnga, la y maan wa y sẽn pʋlmã.+ 26 Bɩ y yʋʋrã paam waoogr wakat fãa yĩnga,+ sẽn na yɩl tɩ nebã yeel tɩ tãb-biis naab a Zeova yaa Israyɛll Wẽnnaam. La bɩ yãmb tʋm-tʋmd a Davɩɩd na-roogã vigl kãn-kãe yãmb taoore.+ 27 Bala tãb-biis naab a Zeova sẽn yaa Israyɛll Wẽnnaam, yãmb n vẽneg y tʋm-tʋmdã n yeel-a tɩ y na n yẽbga na-roog n kõ-a.+ Rẽ n so tɩ yãmb tʋm-tʋmdã paam daood n pʋʋsd yãmb n gomd woto. 28 Zu-soab sẽn ka to a Zeova, yãmb la Wẽnnaam sɩd-sɩdã, y goamã yaa sɩda,+ la yãmb pʋlma y tʋm-tʋmdã bõn-kãensã sẽn yaa sõma wã. 29 Rẽ wã, m kotame tɩ y ning y tʋm-tʋmdã na-roogã barka, la bɩ a kaoos wakat sẽn kõn sa yãmb taoore.+ Bala Zu-soab sẽn ka to a Zeova, yãmb pʋlmame, la bɩ y tʋm-tʋmdã roog rãmb paam bark wakat fãa,+ yãmb barkã maasem yĩnga.”

8 Rẽ poor bilfu, a Davɩɩd zaba ne Filisti nebã+ n tõog-b zãnga.+ La yẽ reega Metɛɛg-amma Filisti nebã nugẽ.

2 A Davɩɩd tõoga Mowaab nebã,+ n kɩt tɩ b gãand tẽng n yɛgl taaba, t’a mak-b ne wĩiri. Yẽ maka wĩir woglem a yiibu, n kʋ nin-kãense, la a mak wĩir woglem a ye n bas bãmb rãmbã tɩ b vɩɩmde.+ Mowaab nebã lebga a Davɩɩd tʋm-tʋmdba, n da yaood-a fadgo.*+

3 A Davɩɩd tõoga Zoba rĩm+ a Rewoob biig a Hadadezɛɛre, a sẽn wa n dabd Efrat kʋɩlgẽ wã+ n na n le tɩ soog-a wã. 4 A Davɩɩd yõga a Hadadezɛɛr wed-rʋʋdb tusr la kobs-yopoe, la a sodaas tus-pisi sẽn kẽnd nao. A kɛɛ saar-dãmbã* wed-moos fãa la bal nao-gĩin n pase, la a bas bãmb koabga.+

5 La Siiri nebã sẽn be Damaasã+ sẽn wa n na n sõng Zoba Rĩm a Hadadezɛɛrã, a Davɩɩd kʋʋ Siiri neb tus-pisi la a yiibu.+ 6 Rẽ poore, a Davɩɩd zĩniga tãb-biis sul Siiri nebã sẽn be Damaasã sʋka, la Siiri nebã lebga a Davɩɩd tʋm-tʋmdba, n da yaood-a fadgo.* A Davɩɩd sẽn kẽngẽ fãa, a Zeova ra kɩtdame t’a paamd tõogre.*+ 7 Sẽn paase, a Davɩɩd reega a Hadadezɛɛr tãb-biisã sãnem gãndã sẽn yaa gilsã n tall n kẽng Zerizalɛm.+ 8 Rĩm a Davɩɩd wʋka zũud wʋsg Beta ne Berotayi sẽn yaa a Hadadezɛɛr tẽnsã pʋsẽ.

9 Hamat+ Rĩm a Toyi wʋmame t’a Davɩɩd tõoga a Hadadezɛɛr tãb-biisã fãa.+ 10 Dẽ, a tʋma a bi-ribl a Zoram rĩm a Davɩɩd nengẽ n na n bãng a keelem la a pẽg-a, a sẽn zab ne a Hadadezɛɛr n tõog-a wã yĩnga. (Bala a Hadadezɛɛr zaba naoor wʋsg ne a Toyi.) Yẽ zãa teed toor-toor sẽn maan ne wanzuri, sãnem la zũud n kẽnge. 11 Rĩm a Davɩɩd rɩka rẽ fãa n kõ a Zeova,* n paas wanzuri wã ne sãnemã a sẽn da wʋk bu-zẽms nins fãa a sẽn tõogã nengẽ wã:+ 12 Yaa teed nins a sẽn da reeg Siiri ne Mowaab soolmẽ wã,+ Amon nebã, Filisti nebã,+ Amalɛk nebã,+ la teed nins a sẽn da wʋk Zoba rĩm a Hadadezɛɛr+ sẽn yaa a Rewoob biigã nengẽ wã. 13 A Davɩɩd le kẽngame n tɩ kʋ Edom neb tus-piig la a nii Yamsem longã pʋgẽ.+ Rẽ me kɩtame t’a yʋʋrã yi. 14 A Davɩɩd zĩniga tãb-biis sul Edomme. Edom soolmã fãa pʋgẽ, a zĩniga tãb-biis sula, tɩ Edom nebã fãa lebg a Davɩɩd tʋm-tʋmdba.+ A sẽn kẽngẽ fãa, a Zeova ra kɩtdame t’a paamd tõogre.*+

15 A Davɩɩd kell n yɩɩ Israyɛll soolmã fãa rĩma.+ A ra kaooda bʋʋd tɩrga, la a ra maand sẽn yaa tɩrg+ ne a nebã fãa.+ 16 A Seruya biig a Zowaab+ n da yaa tãb-biisã naaba, t’a Ahiluud biig a Zozafat+ yaa seb-bĩngda. 17 A Ayituub biig a Zadok+ ne a Abiyataar biig a Ahimelɛk n da yaa maan-kʋʋdba, t’a Seraya yaa seb-gʋlsda. 18 A Zehoyada biig a Benaya+ n da yaa Kerɛt nebã ne Pelɛt nebã+ taoor soaba, t’a Davɩɩd kom-dibli wã lebg tʋm-tʋmd-kãsemsã taoor dãmba.*

9 A Davɩɩd sokame yaa: “A Sayull zakã ned pa ket tɩ m maan a soab neer a Zonatã+ yĩnga?” 2 A Sayull zakã tʋm-tʋmd a ye n da be t’a yʋʋr la a Ziba.+ Dẽ, b tall-a lame n wa rĩm a Davɩɩd nengẽ t’a sok-a yaa: “Foo la a Ziba?” T’a leoke: “N-na, yaa maam.” 3 Rĩmã paasame yaa: “A Sayull zakã ned pa ket tɩ m maan-a neer wa Wẽnnaam sẽn datã?” T’a Ziba leoke: “A Zonatã bi-ribl a ye n kete. A nao a yiibã fãa komsame.”*+ 4 Rĩmã sok-a lame yaa: “A bee yɛ?” T’a Ziba leok rĩmã: “A bee Lodebaare, a Amiyɛll biig a Makɩɩr+ zakẽ wã.”

5 Zĩig pʋgẽ, rĩm a Davɩɩd tʋmame tɩ b kẽng Lodebaare, a Amiyɛll biig a Makɩɩr zakẽ wã n tɩ tall-a n wa. 6 A Zonatã biig a Mefibosɛt sẽn ta a Davɩɩd nengẽ wã, a lʋɩɩme n fõgen a neng tẽnga. Dẽ, a Davɩɩd yeelame yaa: “Mefibosɛte!” T’a leoke: “N-na! Ad y tʋm-tʋmdã!” 7 A Davɩɩd yeel-a lame yaa: “Da zoe rabeem ye. Bala mam na n maana foo neere,+ f ba a Zonatã yĩnga. M na n lebsa foom f yaab a Sayull pʋtã fãa, la fo na n dɩta* ne maam daar fãa.”+

8 A Mefibosɛt sẽn wʋm dẽ, a wõgemdame n yeele: “Mam yaa ãnd tɩ y get m yelle? Mam yaa wa ba-kɩɩng+ bala.” 9 Rĩmã tʋmame tɩ b tɩ bool a Sayull tʋm-tʋmd a Ziba, t’a yeel-a yaa: “Mam kõta fo zu-soabã yagengã bũmb nins fãa a yaab a Sayull ne a zakã rãmb sẽn so wã.+ 10 Foo ne f kambã, la f tʋm-tʋmdbã na n kooda pʋtã la y tigsd koodã tɩ f zu-soabã yagengã zak rãmb paamd rɩɩbo. La fo zu-soabã yageng a Mefibosɛt na n dɩta ne maam daar fãa.”+

A Ziba ra tara kom-dibli piig la a nu ne tʋm-tʋmdb pisi.+ 11 Dẽ, a Ziba yeela rĩmã yaa: “M zu-soab la m dĩma, yãmb tʋm-tʋmdã na n maana bũmb ning fãa y sẽn yeelã.” A Mefibosɛt ra rɩta ne rĩm a Davɩɩd* wa a biiga. 12 A Mefibosɛt me ra tara bi-ribl sẽn paood t’a yʋʋr la a Mise.+ A Ziba zakã neb fãa lebga a Mefibosɛt tʋm-tʋmdba. 13 A Mefibosɛt ra bee Zerizalɛmme, bala a ra rɩta ne rĩmã daar fãa.+ La a nao a yiibã fãa ra komsame.+

10 Kaoosg zugẽ, Amon nebã rĩmã+ kiime t’a biig a Hanun ledg-a n lebg rĩma.+ 2 A Davɩɩd sẽn wʋm dẽ wã, a yeelame: “Mam na n maana a Nahaas biig a Hanun neere,* a ba wã sẽn da maan maam neerã yĩnga.” Woto, a Davɩɩd tʋma neb tɩ b kẽng n na n tɩ pʋʋs a Hanunni, a ba wã sẽn maan kaalmã yĩnga. La a Davɩɩd nebã sẽn ta Amon nebã soolmẽ wã, 3 Amon nebã nanambsã yeela b zu-soab a Hanun yaa: “Yãmb tẽedame t’a Davɩɩd sẽn tʋm nebã tɩ b wa pʋʋs kʋʋrã yaa sẽn na n waoog y ba wã la? Rẽ yĩnga, pa sẽn na n soos n gilg n ges tẽngã n wa tõog n sãam-a yĩng la a sẽn tʋm-bã sɩda?” 4 Dẽ, a Hanun kɩtame tɩ b yõg a Davɩɩd nebã n põng b toeemsã n bas bɛgse,+ la b wõrs b futã n ta b seesã, n bas-b tɩ b looge. 5 B sẽn tɩ togs a Davɩɩdã, zĩig pʋgẽ, a tʋma neb tɩ b tɩ seg-ba, bala b paoog-b-la wʋsgo. Rĩmã yeel-b lame yaa: “Pa-y Zeriko+ hal tɩ y toeemsã lebg n yi tɩ y yaool n wa.”

6 Amon nebã wa n mikame tɩ b lebga wa bõn-põosg a Davɩɩd nifẽ. Woto, bãmb tʋma neb tɩ b tɩ yao sodaas tus-pisi sẽn kẽnd nao la sẽn yaa Siiri neb n yit Bɛt-rewoob+ soolmẽ wã la Zoba+ soolmẽ wã tɩ b na n wa sõng-ba. Bãmb yaoo ligd me tɩ Maaka rĩmã+ ne neb tusri, n paas Istoob* neb tus-piig la a yi+ na n wa sõng-ba. 7 A Davɩɩd sẽn wʋm dẽ, a tʋma a Zowaab ne tãb-biisã fãa, hal baa a gãnda-sãeemsã.+ 8 Amon nebã yiime n tong taab ned fãa ne a zĩig tẽngã rignoor n na n zabe, tɩ Siiri nebã sẽn yit Zoba ne Rewoobã, n paas sẽn yit-b Istoob* ne Maaka wã tɩ yals weoogẽ wã.

9 A Zowaab sẽn yã tɩ b watame n na n zab ne yẽ poorẽ la taoorã, a yãka Israyɛll tãb-biis nins sẽn mi zabr sõma n yɩɩdã kẽere, tɩ b tong taab ned fãa ne a zĩig n na n seg Siiri nebã.+ 10 A kɩtame t’a ba-biig a Abisayi+ lʋɩ sẽn ket-bã taoore, n tong-b ned fãa ne a zĩig tɩ b seg Amon nebã.+ 11 Rẽ poore, a yeela a Abisayi yaa: “Siiri nebã sã n wa rat n tõog maam, fo tog n wa sõnga maam. La Amon nebã sã n dat n tõog foo, mam na n wa sõnga foo. 12 D segd n kenga d sũur la d tall raood+ tõnd nin-buiidã la d Wẽnnaamã tẽns yĩnga, t’a Zeova na n maana sẽn yaa neer a nifẽ.”+

13 La a Zowaab ne a nebã kolgame n na n zab ne Siiri nebã, la bãmb zoee a Zowaab taoore.+ 14 Amon nebã sẽn yã tɩ Siiri nebã zoeeme wã, bãmb me zoee a Abisayi taoor n kẽ tẽngã pʋgẽ. Rẽ poore, a Zowaab basa Amon nebã n lebg n leb Zerizalɛm.

15 Siiri nebã sẽn yã tɩ Israyɛll nebã tõog-b lame wã, bãmb le tigma taaba.+ 16 A Hadadezɛɛr+ tʋma neb tɩ b kẽng n tɩ tall Siiri neb nins sẽn be Kʋɩlgã* soolmẽ wã+ n wa. Bãmb waa Helamme, t’a Sobak sẽn yaa a Hadadezɛɛr tãb-biisã naabã lʋɩ bãmb taoore.

17 B sẽn tɩ togs a Davɩɩdã, zĩig pʋgẽ, a tigma Israyɛll tãb-biisã fãa tɩ b rʋʋg Zʋrdẽ kʋɩlgã n kẽng Helamme. Dẽ, Siiri nebã tonga taab ned fãa ne a zĩig n na n seg a Davɩɩd n zab ne-a.+ 18 La Siiri nebã zoee Israyɛll nebã taoore. A Davɩɩd kʋʋ Siiri neb kobs-yopoe sẽn da zao saar-dãmba,* la b wed-rʋʋdb tus-pis-naase. Yẽ kʋʋ bãmb tãb-biisã naab a Sobak beenẽ.+ 19 A Hadadezɛɛr sẽn so rĩm-dãmb ninsã fãa sẽn yã tɩ Israyɛll nebã tõog-b lame wã, bãmb yɩɩ tao-tao n bao laafɩ ne Israyɛll nebã, tɩ Israyɛll nebã na n soog-ba.+ La Siiri nebã pa le saag n na n sõng Amon nebã ye.

11 Yʋʋmdã sɩngrẽ, wakat ning rĩm-dãmbã sẽn mi n yi n kẽng zabrã, a Davɩɩd tʋma a Zowaab ne a tʋm-tʋmdbã, la Israyɛll tãb-biisã fãa tɩ b kẽng n tɩ zab ne Amon nebã n sãam-b zãnga. Bãmb tɩ gũbga Raba.+ La a Davɩɩd paa Zerizalɛm.+

2 Daar a ye zaabre, rĩm a Davɩɩd yika a gãagẽ n da be a bɛoongã zug n gilgdẽ. Yẽ paa be n yã pag a ye sẽn sood koom. Pagã ra yaa neer wʋsgo. 3 A Davɩɩd tʋma ned t’a tɩ bao n bãng pagã sẽn yaa ned ninga, la a lebgame n wa yeel a Davɩɩd yaa: “Yaa a Eliyam bi-pugl+ a Batseba+ sẽn yaa Hɛt rao+ a Uuri+ pagã.” 4 Rẽ poore, a tʋmame tɩ b tɩ tall-a n wa.+ Pagã waa a Davɩɩd nengẽ, la yẽ kẽe ne-a.+ (Rẽ tɩ pagã ra yɩlgda a menga.*)+ Rẽ poore, pagã lebg n kuila a yiri.

5 Pagã rɩka pʋga, n tʋm tɩ b tɩ yeel a Davɩɩd t’a tʋtame. 6 A Davɩɩd sẽn wʋm dẽ, a tʋmame tɩ b tɩ yeel a Zowaab t’a kɩt tɩ Hɛt rao a Uuri wa a nengẽ. Woto, a Zowaab tʋma a Uuri a Davɩɩd nengẽ. 7 A Uuri sẽn ta a Davɩɩd nengẽ wã, a sok-a-la a Zowaab ne tãb-biisã keelem, la zabrã sẽn yaa to-to. 8 A Davɩɩd yeela a Uuri t’a kuil n tɩ vʋʋse.* A Uuri sẽn loogã, rĩmã tʋmame tɩ b tɩ kõ-a kũuni.* 9 La a Uuri gãanda rĩmã zakã noore, yẽ ne rĩmã tãb-biis a taabã. A pa kuil a yirã n tɩ gãand ye. 10 Dẽ, b tɩ togsa a Davɩɩd t’a Uuri pa kuil ye. Rẽ la a Davɩɩd yeel a Uuri yaa: “Fo yii so-toak n wa. Bõe yĩng tɩ fo pa kuil yiri?” 11 T’a Uuri leok a Davɩɩd yaa: “Koglgã+ ne Israyɛll la Zida nebã bee fu-rot pʋsẽ, tɩ mam zu-soab a Zowaab ne a tãb-biisã tilg b sikã weoogẽ. Woto wã, mam yɩta wãn n kuil m yir n tɩ rɩ, n yũ la m kẽ ne m pagã?+ Mam wẽenda ne yãmb sẽn vɩ wã tɩ mam kõn maan bõn-kãngã ye!”

12 La a Davɩɩd yeela a Uuri yaa: “Pa ka rũndã me, tɩ beoog bɩ m kõ-f sor tɩ f looge.” Woto, a Uuri paa Zerizalɛm baraar ne a vẽkembeoogo. 13 A Davɩɩd tʋmame tɩ b bool a Uuri t’a wa naag yẽ n dɩ la a yũ. Yẽ yũnug-a-la rãam t’a tɩge. La zĩigã sẽn sobge, a Uuri yiime n tɩ naag a zu-soabã tʋm-tʋmdbã n gãand a gãagẽ, n pa kuil yir ye. 14 Beoogã sẽn vẽege, a Davɩɩd gʋlsa sebr n kɩs a Uuri t’a tɩ kõ a Zowaabe. 15 Ad a sẽn gʋls sebrã pʋgẽ: “Ning a Uuri zĩig ning zabrã sẽn yaa toog wʋsgã, la f targ n bas-a tɩ b kʋ-a.”+

16 A Zowaab ra gesa tẽngã sõma, la yẽ ninga a Uuri zĩig ning a sẽn mi tɩ gãndaad bee be wã. 17 Tẽngã nebã sẽn yi n zab ne a Zowaabã, a Davɩɩd tãb-biisã kẽer n ki, tɩ Hɛt rao a Uuri ra be sẽn ki-bã sʋka.+ 18 A Zowaab tʋmame tɩ b tɩ togs a Davɩɩd zabrã sẽn yɩ to-to wã fãa. 19 A yeela a sẽn tʋm ned ningã yaa: “Fo sã n togs rĩmã zabrã sẽn yɩ to-to wã fãa n sa, 20 tõe t’a sũur na n yikame t’a sok foo yaa: ‘Bõe yĩng tɩ yãmb kolg tẽngã wʋsg n na n zabe? Yãmb pa mi tɩ b na n paa lalgã zug n tão yãmb la? 21 Yaa ãnd n kʋ a Zerubesɛt biig a Abimelɛk+ Tebɛɛz soolmẽ wã?+ Pa pag n dɩk neer kugr n yals lalg zug n lobg-a t’a ki la? Bõe yĩng tɩ yãmb kolg tẽngã wʋsg n na n zabe?’ A sã n yeel woto, bɩ f yeel-a yaa: ‘Yãmb tʋm-tʋmd a Uuri sẽn yaa Hɛt raoã me kiime.’”

22 Woto, koe-taasdã kẽngame n tɩ togs a Davɩɩd a Zowaab goamã fãa. 23 A yeela a Davɩɩd yaa: “Bãmb nebã pãng yɩɩga tõndo. B yi n waa weoogẽ wã n na n zab ne tõndo. La tõnd dig-b lame n tãag tẽngã rignoore. 24 Tãb-tãoodbã ra bee lalg zug n tãood tõndo, la yãmb tãb-biisã kẽer kiime. Y tʋm-tʋmd a Uuri sẽn yaa Hɛt raoã me kiime.”+ 25 Rẽ la a Davɩɩd yeel koe-taasdã yaa: “Yeel a Zowaab t’a ra sãam a sũur yel-kãng yĩng ye. Bala sʋʋg kʋʋda ned buud fãa zabr sasa. A we n nang pãng n zab ne tẽngã n tõog-a.+ La f keng a Zowaab raoodo.”

26 A Uuri pagã sẽn wʋm t’a sɩdã kiime wã, a yãba a sɩdã kũum. 27 Wakat ning a sẽn tog n yãb a sɩdã kũumã sẽn sa wã, a Davɩɩd tʋmame tɩ b tɩ tall-a n wa a zakẽ wã, la yẽ lebga a paga.+ A roga bi-ribl n kõ a Davɩɩde. La bũmb ning a Davɩɩd sẽn maanã sãama a Zeova sũur hal wʋsgo.*+

12 A Zeova tʋma a Natã+ a Davɩɩd nengẽ t’a kẽng+ n tɩ yeel-a yaa: “Rap a yiib n da be tẽng a ye pʋgẽ, t’a ye yaa rakãagre, t’a to wã yaa naong soaba. 2 Rakãagrã ra tara piis la niis wʋsgo.+ 3 La naong soabã ra pa tar baa fʋɩ. Yaa pe-bi-sadg a ye a sẽn da ra bala.+ Raoã ra geta a yelle, t’a naag a kom-dibli wã n bɩtẽ. A ra pa tar dɩɩb wʋsg ye. La a ra kõta pesgã rɩɩb ning fãa yẽ sẽn dɩte, la bõn-yũudl ning fãa a sẽn yũudi, la a gãnegd-a a nusẽ wã. Pesgã ra lebga wa a bi-pugla. 4 La kaoosg zugẽ, sãan n wa n sig rakãagrã, t’a pa yãk a pesg bɩ a naaf n segl dɩɩb n kõ sãanã sẽn sig-a wã ye. Yaa naong soabã pe-bilã la a yõk n segl n kõ-a.”+

5 A Davɩɩd sẽn wʋm dẽ wã, a sũur puugame t’a yeel a Natã yaa: “M wẽenda ne a Zeova sẽn vɩ wã+ tɩ rao ning sẽn maan woto wã segda ne kũum! 6 A sẽn maan bõn-wẽn-kãngã n pa yɩ nimbãan-zoetã, a segd n baoo pe-bi a naas n lebse.”+

7 Rẽ la a Natã yeel a Davɩɩd yaa: “Yaa yãmb la nin-kãnga! Ad Israyɛll Wẽnnaam a Zeova sẽn yeele: ‘Yaa maam n yãk* foo tɩ f lebg Israyɛll rĩma,+ la m fãag foo a Sayull nugẽ.+ 8 Mam dɩka fo zu-soabã sẽn so wã fãa n kõ-fo,+ la m ning a pagbã+ fo nugẽ, n dɩk Israyɛll ne Zida fãa n kõ foo.+ La rẽ sã n da pa seke, m da na n maana sẽn yɩɩd rẽ n kõ-fo.+ 9 Bõe yĩng tɩ fo paoog a Zeova* n maan bũmb a sẽn gɩdge? Fo kʋʋ Hɛt rao a Uuri ne sʋʋga!+ Fo sẽn kɩt tɩ Amon nebã kʋ-a wã poore,+ fo peega a pagã n kẽese.+ 10 Woto wã, sʋʋg pa na n tol n gil fo zakã ye.+ Bala fo sẽn dɩk Hɛt rao a Uuri pagã n kẽesã, fo paooga maam. 11 Ad a Zeova sẽn yeele: ‘Mam na n kɩtame tɩ yel-beed kẽ fo zakã pʋgẽ.+ Mam na n dɩka fo pagbã f nifẽ, n kõ rao a to+ t’a kẽ ne-b wĩntoogo.+ 12 Fo soos n maaname,+ la mam na n maana rẽ ne wĩntoogo, Israyɛll nebã fãa nifẽ.’”

13 Dẽ, a Davɩɩd yeela a Natã yaa: “Mam beega a Zeova.”+ T’a Natã leok-a: “A Zeova me kõt-f-la sugr f yel-wẽndã yĩnga.+ Fo pa na n ki ye.+ 14 La fo sẽn maan yel-kãngã n paoog a Zeova wʋsgã, fo bi-ribl ning sẽn nan dogã na n kiime.”

15 Rẽ poore, a Natã kuila a yiri.

La a Zeova kɩtame tɩ biig ning a Uuri pagã sẽn dog n kõ a Davɩɩdã lʋɩ bãaga. 16 A Davɩɩd yõka Wẽnnaam sɛɛg a biigã yĩnga, n da loet noor n pa basdẽ ye. A sã n da kẽ yʋngo, a gãee tẽnga.+ 17 Dẽ, na-yirã kãsem-dãmb kẽnga a nengẽ n na n kos-a t’a yiki, la a pa sak ye. A pa tʋlg n dɩ ne-b me ye. 18 Rasem a yopoe-n-soabã daare, biigã kiime. La a Davɩɩd tʋm-tʋmdbã ra yɛɛsdame n pa rat n togs-a ye. Bãmb yeelame yaa: “Biigã sẽn wa n ket n vɩ wã, tõnd ra gomda ne-a t’a pa kelgd tõnd ye. Rẽ wã, tõnd na n maana wãn n togs-a tɩ biigã kiime? A tõe n tʋmame tɩ nare.”

19 A Davɩɩd sẽn yã a tʋm-tʋmdbã sẽn walemd taabã, a bãngame tɩ biigã kiime. Rẽ la a sok-b yaa: “Biigã kiime la?” Tɩ b leoke: “N-na! A kiime.” 20 Dẽ, a Davɩɩd yikame n so koom n zae kaam+ la a toeem futu. Yẽ kẽnga a Zeova roogẽ wã+ n tɩ waoog-a. Rẽ poore, a lebg n kuilame n tɩ yeel tɩ b wa ne rɩɩbo, la yẽ reegame n dɩ. 21 A tʋm-tʋmdbã sok-a lame yaa: “Yaa bõe tɩ yãmb maand woto? Biigã sẽn wa n ket n vɩ wã, yãmb da loeta noor la y yãbda. La a sẽn ki wã bala, yãmb yikame n dɩ.” 22 T’a Davɩɩd leoke: “Biigã sẽn wa n ket n vɩ wã, mam da loeta noor+ la m yãbda, n saagdẽ t’a Zeova na n zoee m nimbãaneg n bas biigã t’a vɩɩmde.+ 23 La a sẽn ki wã, bõe yĩng tɩ m na n leb n loe noore? M tõe n vʋʋg-a lame bɩ?+ Maam n na n ki n babs-a yaoogẽ wã,+ la yẽ pa na n wa mam nengẽ ye.”+

24 Dẽ, a Davɩɩd belsa a pag a Batseba.+ Yẽ kẽng n tɩ kẽe ne-a. A Batseba wa n doga bi-ribla, tɩ b pʋd a yʋʋr t’a Salomo.*+ La a Zeova ra nonga biigã,+ 25 n tʋm no-rɛɛs a Natã+ t’a tɩ yeel tɩ b pʋd biigã yʋʋr t’a Zedidiya,* a Zeova yĩnga.

26 A Zowaab kell n zaba ne Raba+ sẽn yaa Amon nebã tẽngã,+ n tõog n deeg b na-tẽngã.+ 27 Dẽ, a Zowaab tʋmame tɩ b tɩ yeel a Davɩɩd yaa: “Mam zaba ne Raba+ n tõog n deeg koom tẽngã.* 28 Masã, bɩ y tigim tãb-biisã sẽn ketã n tɩ tilg y tãb-sik n zab ne tẽngã n deeg-a, tɩ mam da wa reeg-a tɩ waoogrã yɩ mam dẽnd ye.”

29 Woto, a Davɩɩd tigma tãb-biisã fãa n kẽng n tɩ zab ne Raba n deeg-a. 30 A Davɩɩd fõka maanf ning sẽn da fõg a Malkam zugã. A zɩslmã ra taa sãnem talã* a ye, tɩ b ra nags-a ne kug-neeba. B rɩk-a lame n fõgen a Davɩɩde. A Davɩɩd wʋka teed zem bal+ tẽngã pʋgẽ me.+ 31 A yiisa neb nins sẽn da be be wã, n tɩ kɩt tɩ b peesd kuga, tɩ b tʋmd ne kud-sɩlemse, ne kut laya, la b wẽed tãn-koɛɛma. Yaa woto la yẽ maan tẽns nins fãa Amon nebã sẽn so wã. A Davɩɩd ne a tãb-biisã fãa wa n leba Zerizalɛm.

13 A Davɩɩd bi-ribl a Absalom da tara tão sẽn yaa neere, t’a yʋʋr la a Tamaare.+ La a Davɩɩd bi-ribl a Amnon+ yam da kẽ-a lame. 2 A Amnon ra namsda wʋsgo, hal n bẽed a tão a Tamaar poorẽ. Bala a Tamaar da nan pa mi raoa, t’a Amnon pa mi a sẽn na n maaneg n paam-a ye. 3 A Amnon ra tara tũud-n-taag t’a yʋʋr la a Zonadaabe,+ n yaa a Davɩɩd kẽem a Simeya bi-ribla.+ A Zonadaab ra tara sɩlem wʋsgo. 4 Yẽ yeela a Amnon yaa: “Yaa bõe tɩ fo yaa rĩmã biiga, n yaool n yaa wa nimbãan-ned daar fãa? Togs maam bũmb ning sẽn namsd foomã.” T’a Amnon leok-a yaa: “Mam yamã kẽe a Absalom tão+ a Tamaare.” 5 A Zonadaab yeel-a lame yaa: “Gãand f gãagẽ wã n maan wa f bẽedame. F baaba sã n wa n na n ges foo, bɩ f yeel-a yaa: ‘M bõos tɩ y kɩt tɩ m tão a Tamaar wa segl dɩɩb n kõ-ma. Mam datame t’a wa segl bãad-rãmbã rɩɩb* mam taoor n kõ-m tɩ m dɩ.’”

6 Woto, a Amnon sɩd gãanda a gãagẽ n maan wa a bẽedame, tɩ rĩmã wa n na n ges-a. A Amnon yeela rĩmã yaa: “M bõos tɩ y kɩt tɩ m tão a Tamaar wa segl dɩɩb* m nifẽ, n kõ-m tɩ m dɩ.” 7 Dẽ, a Davɩɩd tʋma ned zakẽ wã t’a tɩ yeel a Tamaar yaa: “M kotame tɩ f kẽng f kẽem a Amnon nengẽ n tɩ segl dɩɩb* n kõ-a.” 8 Woto, a Tamaar kẽnga a kẽem a Amnon zakẽ wã, a sẽn da gãẽ wã. Yẽ rɩka zom n nag n maan bur-maas n kõ-a. 9 A Tamaar yãka rɩɩbã n kõ a Amnonne, la a zãgsame t’a kõn dɩ ye. Yẽ yeelame tɩ nebã fãa yi, la b yiime.

10 Rẽ poore, a Amnon yeela a Tamaar t’a rɩk rɩɩbã* n wa kõ-a a ro-gãagẽ wã t’a rɩ. Woto, a Tamaar dɩka rɩɩbã a sẽn seglã n kẽ a kẽem a Amnon ro-gãagẽ wã n na n kõ-a. 11 La a Tamaar sẽn kolg n na n kõ-a rɩɩbã t’a rɩ wã, a gãd-a lame n yeel-a yaa: “M tãoã, wa gãand ne maam.” 12 T’a Tamaar leok yaa: “Ayo, m kẽema! Ra modg maam ye. Bõn-kãngã pa maand Israyɛll ye.+ Ra maan tɩ yaa wɩɩbdo.+ 13 Mam na n deega yãnd a woto n kẽ yɛɛnẽ? La fo mengã na n lebga nin-yaalg Israyɛlle. M bõos tɩ f gom ne rĩmã t’a na n sak n dɩka maam n kõ foo.” 14 La a Amnon pa sak n kelg-a ye. A modg-a lame n yõg-a. 15 A sẽn yõg-a n sa wã poore, a sɩng-a-la kisgri, hal n kisg-a n yɩɩg a sẽn da nong-a to-to wã. Yẽ yeel-a lame yaa: “Yik n yi!” 16 La a Tamaar yeel-a lame yaa: “Ayo, m kẽema! Fo sẽn digd maamã wẽnem yɩɩda bũmb ning fo sẽn maan maamã.” La a Amnon pa sak n kelg-a ye.

17 Yẽ boola a tʋm-tʋmd a yembr n yeel-a yaa: “Rig nin-kãngã n yiis la f sog m doogã.” 18 (A Tamaar da yera fu-wok sẽn yaa neere,* bala yaa fu-kãens la rĩmã kom-pugli nins sẽn nan pa mi rapã ra yeelgda.) Tʋm-tʋmdã yiis-a-la yɩnga, la a lebs roogã n soge. 19 A Tamaar yuga a zugã tompɛglem+ la a pãrs fu-wokã a sẽn da yerã. Yẽ kʋka a zug n kẽnd la a wiisdẽ.

20 Rẽ la a Tamaar kẽem a Absalom+ sok-a yaa: “Yaa fo kẽem a Amnon n maan foo bõn-kãngã bɩ? Ra gom yel-kãngã yell ne ned ye. A yaa fo ba-biiga.+ Da rɩk yellã n ning f sũurẽ ye.” Woto, a Tamaar tɩ zĩnda kɛɛnga, a kẽem a Absalom zakẽ wã. 21 Rĩm a Davɩɩd sẽn wʋm bũmb ning sẽn maanã, a sũur puuga wʋsgo.+ La a sẽn da nong a biig a Amnonnã yĩnga, a pa tʋlg n na n maan bũmb tɩ sãam a sũur ye. Bala ra yaa a bi-kãsenga. 22 La a Absalom ra pa le gomd ne a Amnon ye. A pa gom ne-a wẽng wall noog ye. Bala a ra kisa+ a Amnonne, a sẽn yõg a tão a Tamaarã yĩnga.+

23 Yʋʋm a yiib poore, a Absalom wa n wõrsda a piis Baal-hazoor sẽn be Efrayim noorã,+ n bool rĩmã kom-dibli wã fãa tɩ b wa.+ 24 A Absalom kẽnga rĩmã nengẽ n tɩ yeel-a yaa: “N-na! Mam wõrsda m piisã, n dat n bõos tɩ yãmb ne y nanambsã wa.” 25 La rĩmã leoka a Absalom yaa: “Ayo, m biiga. Tõnd fãa sã n wa, na n yɩɩ zɩɩb ne-fo.” A Absalom kell n pẽdga rĩmã, la a pa sak n na n kẽng ye. La rĩmã ning-a-la barka. 26 A Absalom yeela rĩmã yaa: “Yãmb sã n pa na n wa, bɩ m bõos tɩ y bas tɩ m kẽem a Amnon tũ tõndo.”+ Tɩ rĩmã leok-a: “Bõe yĩng tɩ fo rat t’a tũ foo?” 27 La a Absalom kell n pẽdga rĩmã, hal t’a wa sak t’a Amnon ne rĩmã kom-dibli a taabã fãa tũ-a.

28 La a Absalom kõo a tʋm-tʋmdbã noor n yeel-b yaa: “Gũus-y-yã a Amnon neere. A sã n wa yũ rãamã n tɩg t’a sũurã noomẽ, mam na n yeela yãmb tɩ y kʋ-a. Kʋ-y-yã-a la y ra zoe rabeem ye. Yaa maam n kõ yãmb noore. Keng-y y sũur la y tall raoodo.” 29 A Absalom tʋm-tʋmdbã maana wa a sẽn yeelã bal kɛpɩ. La rĩmã kom-dibli a taabã fãa yik n zomba b bõn-wees* n zoe. 30 Bãmb sẽn wa n nan ket sorẽ, ned n tɩ togs a Davɩɩd t’a Absalom kʋʋ rĩmã kom-dibli wã fãa tɩ b baa a ye pa põs ye. 31 Rĩmã sẽn wʋm dẽ wã, a yikame n pãrs a futã n gãand tẽnga, t’a tʋm-tʋmdbã fãa me pãrs b futã n yas a sɛɛgẽ.

32 La a Davɩɩd kẽem a Simeya+ bi-ribl a Zonadaab+ yeelame: “N-na! Ra n tags-y tɩ b kʋʋ yãmb kom-dibli wã fãa ye. Yaa a Amnon bal n ki.+ A Absalom n kõ noor tɩ b kʋ-a.+ Yaa hal daar ning a Amnon sẽn yõg a tão+ a Tamaarã+ la a sɩf n na n maan woto. 33 Rẽ wã, bɩ m dĩmã ra tẽ b sẽn yeel tɩ b kʋʋ rĩmã kom-dibli wã fãa wã ye. Yaa a Amnon bal n ki.”

34 La a Absalom zoeeme.+ Gũudã wa n zẽka a neng n yã neb wʋsg sẽn be sor ning sẽn yit tãngã sɛɛgẽ wã n watẽ. 35 Rẽ la a Zonadaab+ yeel rĩmã yaa: “N-na! Yãmb kom-dibli wã la sẽn watã. Yaa wa mam sẽn da yeel yãmbã.” 36 A sẽn gom n sa bala, rĩmã kom-dibli wã taame, n zẽk b koees n yãbda. La rĩmã ne a tʋm-tʋmdbã me yãba wʋsgo. 37 A Absalom zoeeme n kẽng a Amiwuud biig a Talmayi+ sẽn yaa Gesʋʋr dĩmã nengẽ. La a Davɩɩd yãba a biigã kũum dasem wʋsgo. 38 A Absalom sẽn zoe n kẽng Gesʋʋrã,+ a zĩnda be yʋʋm a tãabo.

39 La Rĩm a Davɩɩd wa n data ne a sũur fãa n yã a biig a Absalomme, bala a sũur da siga* a biig a Amnon kũumã yĩnga.

14 A Seruya+ biig a Zowaab bãngame tɩ rĩmã rata ne a sũur fãa n yã a Absalom.+ 2 Dẽ, a Zowaab tʋmame tɩ b tɩ bool Tekowa+ pag a ye sẽn tar yam wʋsgo, n yeel-a yaa: “M bõos tɩ f maan wa f bee sũ-sãang pʋgẽ, n yeelg sũ-sãang futu, la f ra zae kaam ye.+ Maan wa pag ned sẽn maan kaalem t’a be sũ-sãang pʋgẽ hal sẽn kaoose. 3 Rẽ poor bɩ f kẽng rĩmã nengẽ n tɩ togs-a m sẽn na n yeel foomã.” Woto, a Zowaab wilga pagã a sẽn tog n gom to-to.*

4 Tekowa pagã kẽnga rĩmã nengẽ n tɩ lʋɩ n fõgen a neng tẽnga, n yeel-a yaa: “N-na! Sõng-y-ma!” 5 Tɩ rĩmã sok-a yaa: “Yaa bõe yell n tar-fo?” Tɩ pagã leoke: “Kayto! M sɩdã kiime n bas-m tɩ m yaa pʋg-kõore. 6 La mam da tara kom-dibli a yiibu. B wa n zaba taab weoogẽ. La ned sẽn da pa be n na n paas-bã, a ye wã kʋʋ a to wã. 7 La baa buudã neb fãa sẽn mi tɩ biig ning sẽn ketã n segd n soog rogem-pʋɩɩrã, b yikame n zabd ne maam n yetẽ: ‘Wa ne biig ning sẽn kʋ a to wã tɩ d kʋ-a, a sẽn kʋ a ba-biigã yĩnga!+ B rat n kʋʋ m bi-yendã sẽn ketã, wa ned sẽn kiisd yaoolem saall sẽn ket bugmẽ. Woto, bãmb na n kɩtame tɩ m sɩdã yʋʋr menem dũniyã zugu, t’a pa le tar ned ye.”

8 Dẽ, rĩmã yeela pagã yaa: “Kuil tɩ m na n welga f yellã.” 9 Tɩ Tekowa pagã leok rĩmã yaa: “M zu-soab la dĩma, bɩ taalã zĩnd maam ne m ba wã zakã rãmb zugu. La bɩ rĩmã ne a rĩungã ra tall taal yel-kãngã pʋgẽ ye.” 10 Rẽ la rĩmã yeel-yã: “Ned sã n le gom foo, bɩ f tall-a n wa mam nengẽ t’a kõn le nams-f a bada.” 11 La pagã yeelame: “M dĩma, mam kotame tɩ y tẽeg y Wẽnnaam a Zeova yelle, tɩ sũ-roakdã+ ra wa kʋ m bi-riblã n menes-a ye.” Tɩ rĩmã leoke: “Mam wẽenda ne a Zeova sẽn vɩ wã+ tɩ f bi-riblã zoobg baa a ye kõn lʋɩ tẽng ye.”* 12 Rẽ la pagã yeel-yã: “M zu-soab la m dĩma, m bõos n le gom ne y bilfu.” Tɩ rĩmã yeel-a t’a gome.

13 Pagã yeelame: “Bõe yĩng tɩ yãmb maan Wẽnnaam nin-buiidã bũmb sẽn wõnd woto?+ Yãmb sẽn gom to-to wã, y ninga y meng taale. Bala yãmb diga y biigã n pa bas t’a lebg n wa yir ye.+ 14 Hakɩɩka, tõnd na n kiime n lebg wa koom sẽn daag tẽng tɩ b pa le tõe n wʋk ye. La Wẽnnaam pa na n yãk ned vɩɩm* ye. A getame tɩ bʋʋm sã n beẽ, bɩ a kɩt tɩ nebã sẽn dig a soabã ra yɩ ned b sẽn dig wakat fãa a taoor ye. 15 M zu-soab la m dĩma, mam waame n na n togs yãmb gom-kãngã, bala nin-buiidã n kẽes maam rabeem. Rẽ n so tɩ mam yeel tɩ m na n goma ne m rĩmã, tɩ daar ninga, a na sak m kosgã. 16 Mam tagsame tɩ tõe tɩ rĩmã kelge, la a fãag maam ned ning sẽn dat n kʋ maam ne m bi-yendã nugẽ. Sã n pa rẽ, yẽ na n kɩtame tɩ d ra paam pʋɩɩr ning Wẽnnaam sẽn kõ-dã ye.+ 17 Mam da yeela m sũurẽ me yaa: ‘M zu-soabã la m dĩmã goamã na n belsa maam,’ bala yẽ yaa wa Wẽnnaam malɛka, n tõe n bãng sẽn yaa sõma ne sẽn yaa wẽng n welge. Bɩ yãmb Wẽnnaam a Zeova zĩnd ne yãmba.”

18 Rĩmã yeela pagã yaa: “M kotame tɩ f leok m sogsgã m sẽn na n sok-fã la f ra solg-m baa fʋɩ ye.” Tɩ pagã leoke: “M zu-soab la m dĩma, gom-y-yã.” 19 Rĩmã sokame: “Yaa a Zowaab n yeel foo tɩ f wa togs bõn-kãensã fãa bɩ?”+ Tɩ pagã leoke: “M zu-soab la m dĩma, mam wẽenda ne yãmb sẽn vɩ wã tɩ yaa wa yãmb sẽn yeelã. Bala yaa yãmb tʋm-tʋmd a Zowaab n kõ maam noore, n wilg maam m sẽn tog n gom to-to. 20 Yãmb tʋm-tʋmd a Zowaab maana woto sẽn na yɩl tɩ yɛlã toeeme. La m zu-soaba, yãmb tara yam wa Wẽnnaam malɛka, n mi bũmb ning fãa sẽn maand tẽngã pʋgẽ.”

21 Rẽ poore, rĩmã yeela a Zowaab yaa: “Be neere, mam na n maana fo sẽn kosã.+ Kẽng n tɩ tall bi-bɩɩg a Absalom n wa.”+ 22 Dẽ, a Zowaab wõgemdame n fõgen a neng tẽnga, n pẽg rĩmã n yeele: “M zu-soab la m dĩma, rũndã, mam bãngame tɩ y sũur nooma ne maam. Bala yãmb maana mam sẽn kosã.” 23 Dẽ, a Zowaab yikame n kẽng Gesʋʋr+ n tɩ tall a Absalom n wa Zerizalɛmme. 24 La rĩmã yeelame yaa: “Bɩ a Absalom lebg n wa a yirã, la a ra wa mam nengẽ ye.” Woto, a Absalom kuila a yiri, n pa yã rĩmã ye.

25 Israyɛll soolmã fãa pʋgẽ, rao ra pa be tɩ nebã pẽgd a rasãndã wʋsg n ta a Absalom ye. Bala sẽn sɩng ne a nao-sɩlpamã n tãag a zugã, a ra pa tar zang ye. 26 Yẽ ra wõrsda a zugã yʋʋmd fãa, bala a zoobdã ra zɩsa wʋsgo. B sã n da mak a zoobdã zɩslmã ne na-yirã makdga,* yaa sɩkl kobs-yi.* 27 A Absalom roga kom-dibli a tãabo,+ ne bi-pugl a yembre. A bi-puglã yʋʋr la a Tamaare, n da yaa neer wʋsgo.

28 A Absalom kell n zĩnda Zerizalɛm yʋʋm a yiibu, n pa tol n yã rĩmã ye.+ 29 A Absalom tʋmame tɩ b tɩ bool a Zowaab sẽn na yɩl t’a tʋm-a rĩmã nengẽ, la a Zowaab pa wa ye. Yẽ tʋmame tɩ b tɩ bool-a naoor a yiib-n-soaba, la a kell n pa wa ye. 30 Yẽ wa n baas n yeela a tʋm-tʋmdbã yaa: “A Zowaab pʋʋg n be mam pʋʋgã sɛɛgẽ, tɩ orz* be beenẽ. Kẽng-y n tɩ ning-y-yã-a bugum.” Dẽ, a Absalom tʋm-tʋmdbã kẽngame n tɩ ning a Zowaab pʋʋgã bugum. 31 A Zowaab yikame n kẽng a Absalom nengẽ n tɩ sok-a yaa: “Bõe yĩng tɩ fo tʋm-tʋmdbã ning mam pʋʋgã bugum?” 32 T’a Absalom leok a Zowaab yaa: “Kelge! Mam tʋmame tɩ b bool foo tɩ f wa tɩ m tʋm-f rĩmã nengẽ. Mam da ratame tɩ f tɩ sok-a yaa: ‘Mam sẽn yi Gesʋʋr n wa wã võore?+ Mam sã n da paẽ be n são. Masã, mam dat n yãa rĩmã, t’a sã n mik tɩ m tara taal bɩ a kʋ-ma.’”

33 Woto, a Zowaab kẽnga rĩmã nengẽ n tɩ togs-a a Absalom sẽn yeelã. Dẽ, rĩmã kɩtame tɩ b bool a Absalom. Yẽ kẽe rĩmã nengẽ, n wõgemd a taoor n fõgen a neng tẽnga. La rĩmã moka a Absalom.+

15 Bõn-kãensã fãa zugẽ, a Absalom baoo saar* ne wiidi, la neb pis-nu tɩ b be a taoor n zoetẽ.+ 2 A Absalom ra yikda yibeoog pĩnda, n tɩ yals sor ning sẽn dabd tẽngã rignoorã sɛɛgẽ.+ Ned sã n da tar yell n dabd rĩmã nengẽ n dat tɩ b welge,+ a Absalom boond-a lame n yeel-a yaa: “Fo yita tẽn-bʋgo?” A soabã ra leokdame t’a yaa Israyɛll buud a ye neda. 3 A Absalom ra yetame yaa: “Gese! Fo bee bʋʋm, la rĩmã pa yãk ned sẽn na n welg f yellã ye.” 4 A Absalom leb n yetame yaa: “B sã n da yãkẽ maam tɩ m yaa bʋ-kaood tẽn-kãngã pʋgẽ! Ned ning fãa sẽn tar a yell n dat tɩ b bʋ na n waa mam nengẽ, tɩ m ges tɩ b bʋ a yellã tɩrg n kõ-a.”

5 La ned sã n da kolg a Absalom n na n wõgemd a taoore, a tẽegda a nug n gãd-a t’a ra wõgemde, la a mok-a.+ 6 A Absalom ra maanda woto ne Israyɛll neb nins fãa sẽn wat rĩmã nengẽ n dat t’a bʋ b yɛlã. Woto, a Absalom ra maanda sɩlem n wẽnemded Israyɛll nebã yam tɩ b kẽed-a.+

7 Yʋʋm a naas poore,* a Absalom kẽnga rĩmã nengẽ n tɩ yeel-a yaa: “M kotame tɩ y kõ-m sor tɩ m kẽng Ebrõ+ n tɩ pids pʋleng m sẽn pʋlem a Zeova. 8 Bala mam sẽn wa n be Gesʋʋr+ Siiri soolmẽ wã, m pʋlma+ a Zeova n yeel t’a sã n sõng maam tɩ m lebg n wa Zerizalɛmme, m na n maana maoong n kõ* a Zeova.” 9 Dẽ, rĩmã kõo a Absalom sore, la a yikame n kẽng Ebrõ.

10 A Absalom soos n tʋma neb Israyɛll buud toɛy-toɛyã pʋsẽ n yeel-b yaa: “Yãmb sã n wa wʋm baorgã peebg rãamd bala, bɩ y yeel t’a Absalom lebga rĩm Ebrõ!”+ 11 Neb kobs-yi la a Absalom bool-yã, tɩ b yi Zerizalɛm n tũ-a n kẽng Ebrõ. Nin-kãens ra pʋgd-a lame n pa mi yellã tiiri, la b pa mi a sẽn dat n maan ye. 12 Sẽn paase, a sẽn maan maandã n sɛ wã, a tʋma neb Gilo+ tɩ b tɩ bool a Ahitofɛll+ sẽn da yaa a Davɩɩd sagendã.+ A Absalom kɩɩsgã ra paamda pãnga, tɩ neb nins sẽn teend-a wã sõor tar paasgo.+

13 La ned n wa n kẽng a Davɩɩd nengẽ n tɩ togs-a tɩ Israyɛll rapã basd-a lame n kẽed a Absalomme. 14 Zĩig pʋgẽ, a Davɩɩd yeela a tʋm-tʋmdbã fãa sẽn da be ne-a Zerizalɛmmã yaa: “Yik-y tɩ d zoe,+ sã n pa rẽ, tõnd ned baa a ye pa na n põsg a Absalom ye. D zoe tao-tao, t’a ra wa paam tõnd n sãame, la a kʋ tẽngã nebã ne sʋʋg ye.”+ 15 Rĩmã tʋm-tʋmdbã leok-a lame yaa: “N-na! Yãmb sẽn yeel a soab fãa tõnd na n maaname.”+ 16 Dẽ, rĩmã yii ne a zakã rãmb fãa n looge, la a basa pʋg-rɩkds*+ piig tɩ b yõd n ges zakã yelle. 17 Rĩmã ne neb nins fãa sẽn da tũud-a wã kell n dɩka b sor n loogdẽ, la b yalsa Bɛt-merake.

18 A tʋm-tʋmdbã fãa sẽn da tũud-a wã, n paas Kerɛt nebã, Pelɛt nebã,+ la Gat neb+ kobs-yoobã sẽn da yi Gat+ n tũ a Itayi wã ra pɩʋʋgda rĩmã taoor t’a getẽ. 19 Dẽ, rĩmã yeela Gat rao a Itayi yaa:+ “Bõe yĩng tɩ fo-me rat n tũ tõndo? Lebg n tɩ pa ne rĩm-paalgã, bala fo yaa sãana, la ned sẽn zoe n bas a tẽnga. 20 Fo sẽn wa tõnd nengẽ wã nan pa kaoos ye. Rẽ wã, mam na n yɩɩ wãn n zoe n sak tɩ fo tũud tõnd n yeebdẽ, n kẽnd zĩig ning fãa m sẽn na n kẽnge, la wakat ning fãa m sẽn na n looge? Leb ne f ba-biisã, la bɩ a Zeova maan foo neere, la a maan sɩd ne foom.”+ 21 La a Itayi leoka rĩmã yaa: “Mam wẽenda ne a Zeova sẽn vɩ wã, la m wẽenda ne yãmb sẽn vɩ wã, tɩ zĩig ning fãa yãmb sẽn na n kẽnge, baa na n tũ ne m yõore, mam na n kẽngame.”+ 22 Rẽ la a Davɩɩd yeel a Itayi yaa:+ “Wa loog n pasge.” Woto, Gat rao a Itayi ne a rapã fãa la b zagsã rãmb pasgame n looge.

23 Tẽngã nebã fãa ra zẽka b koees n yãbda, tɩ neb nins sẽn tũud rĩmã ra pasgd longã. Rĩmã ra yasa Sedrõ longã+ sɛɛga. B fãa ra pasgdame n teesd sor ning sẽn dabd we-raoogẽ wã. 24 A Zadok+ me ra bee be, ne Levi buudã neb+ nins fãa sẽn da tʋkd Wẽnnaam kaoolã+ koglgã.+ B sika Wẽnnaam Koglgã. La a Abiyataar+ waame. Rẽ tɩ nebã fãa sẽn yi tẽngã pasgame n sa la bala. 25 La rĩmã yeela a Zadok yaa: “Tall Wẽnnaam koglgã n lebg n leb tẽngã pʋgẽ.+ A Zeova sũur sã n noom ne maam, a na n kɩtame tɩ ma-me lebg n wa, la m yã koglgã ne a zĩigã.+ 26 La yẽ sã n yeel tɩ mam pa ta a yam, bɩ a maan maam bũmb ning fãa sẽn yaa sõma a nifẽ.” 27 Rĩmã yeela maan-kʋʋd a Zadok yaa: “Fo yaa gɛta.+ Bɩ foo ne a Abiyataar leb tẽngã pʋgẽ ne laafɩ, yãmb ne y kom-dibli a yiibã: Fo biig a Ahimaaze, ne a Abiyataar biig a Zonatã.+ 28 Ade! Mam na n paa kʋɩlgã sẽn be we-raoogẽ wã, zĩis nins b sẽn tõe n kẽn n dʋʋgã sɛɛgẽ n kaoose, hal tɩ koɛɛg yi yãmb nengẽ n wa.”+ 29 Woto, a Zadok ne a Abiyataar talla Wẽnnaam koglgã n leb Zerizalɛmme, la b kell n paa be.

30 A Davɩɩd da rʋʋda Oliiv tɩɩs tãngã+ la a yãbda. A ra pila a zugã la a kẽnd na-zaala. Neb nins fãa sẽn da be ne-a wã me pila b zutã n yãbd la b rʋʋd tãngã. 31 B wa n yeela a Davɩɩd yaa: “A Ahitofɛll naaga neb nins sẽn sed+ ne a Absalom+ n zãmbd yãmbã.” A Davɩɩd sẽn wʋm dẽ wã, a yeelame: “Zeova!+ M bõos tɩ y kɩt t’a Ahitofɛll saglgã lebg yalemdo.”+

32 A Davɩɩd sẽn ta tãngã zugu, zĩig ning nebã sẽn nong n wõgemded n pʋʋsd Wẽnnaamã, a yãa Ark rao+ a Husayi+ sẽn be be n gũud-a. A futã ra pãrsame t’a zugã yaa tom. 33 La a Davɩɩd yeel-a lame yaa: “Fo sã n tũ maam n kẽnge, f na n yɩɩ zɩɩbo. 34 Leb tẽngã pʋgẽ n tɩ yeel a Absalom yaa: ‘N-na! Mam yaa yãmb tʋm-tʋmda. Mam yɩɩ yãmb ba wã tʋm-tʋmda, la masã, mam yaa yãmb tʋm-tʋmda.’+ Fo sã n maan woto, f na n sõnga maam, n kɩt t’a Ahitofɛll saglgã ra yãk neng ye.+ 35 Maan-kʋʋdb a Zadok ne a Abiyataar bee be ne foom. Fo sẽn na n wʋm bũmb ning fãa na-yirã bɩ f togs-ba.+ 36 Bãmb kom-dibli a yiibã me bee be ne-ba. Yaa a Ahimaaz+ sẽn yaa a Zadok biigã, ne a Abiyataar biig a Zonatã.+ Fo sẽn wʋm bũmb ning fãa bɩ f tʋm-b tɩ b wa taas-ma.” 37 Woto, a Davɩɩd zoa* a Husayi+ taa Zerizalɛm n mik a Absalom me sẽn nan tate.

16 A Davɩɩd sẽn sig tãngã n sãag bilfu,+ a yãa a Mefibosɛt+ tʋm-tʋmd a Ziba+ sẽn yi n na n seg-a ne bõens a yiib sẽn zɩlg bur kobs-yi, viyn biis b sẽn kʋɩɩs n gil bãmb koabga, la kankam ne Mak kɛgl-gil-koeems koabga, n paas divẽ ne yʋ-bedre.+ 2 Rĩmã soka a Ziba yaa: “Bõe yĩng tɩ fo wa ne woto fãa?” T’a Ziba leoke: “N-na! Bõensã yaa sẽn na n kõ yãmb zakã rãmb tɩ b zombe. Burã, kankamã ne Mak kɛgl-gil-koeemsã yaa sẽn na n kõ kom-bɩɩsã tɩ b wãbe. La divẽ wã yaa sẽn na yɩl tɩ yaams sã n wa yõk kẽer we-raoogẽ wã bɩ b yũ.”+ 3 Rẽ la rĩmã sok-a yaa: “Fo zu-soabã biigã* bɛɛ?”+ T’a Ziba leok rĩmã yaa: “A paa Zerizalɛmme. Bala a yeelame: ‘Rũndã, Israyɛll nebã na n lebsa maam m ba wã naamã.’”+ 4 Dẽ, rĩmã yeela a Ziba yaa: “Gese! Bũmb ning fãa a Mefibosɛt sẽn so wã lebga fo rẽnda.”+ T’a Ziba leok yaa: “Mam wõgemdeda yãmb taoore. La bɩ m zu-soabã la m dĩmã ket n maand-m neere.”+

5 Rĩm a Davɩɩd sẽn ta Bawurimmã, a Sayull buudã rao a ye yʋʋr sẽn boond t’a Simeyi+ n yaa a Geera biig n yi, n zẽkd a koɛɛg n kãabd-a beed la a watẽ.+ 6 A ra lobda Rĩm a Davɩɩd ne a tʋm-tʋmdbã kuga, n paas a tãb-biisã fãa la gãndaadã sẽn da be a goabg la a rɩtgã. 7 A Simeyi ra kãabda a Davɩɩd n yetẽ: “Kẽng n meneme! Kẽng n meneme! Nin-kʋʋda! Ka-bark soaba! 8 A Zeova kɩtame t’a Sayull zakã neb zɩɩm fo sẽn daagã leb-fo. Fo reega a naamã, la a Zeova reega naamã fo nugẽ n kõt f biig a Absalom. Yaa f sẽn yaa nin-kʋʋdã yĩng la yel-beedã sẽn paam-fã!”+

9 La a Seruya+ biig a Abisayi yeela rĩmã yaa: “Yaa bõe tɩ ba-kɩɩn-kãngã+ kãabd m zu-soab la m dĩmã?+ M kot-y lame tɩ y bas tɩ m kẽng n tɩ fiuug a zugã.”+ 10 Tɩ rĩmã leok yaa: “Bʋg n pak yãmba, Seruya kom-dibli?+ Bas-y-yã-a t’a kãab-ma.+ Bala yaa a Zeova n yeel+ t’a kãab-ma. Rẽ wã, ãnda n na n gɩdg-a?” 11 A Davɩɩd yeela a Abisayi yaa: “Mam mengã biig sẽn yi m pendẽ wã sã n dat n yãk m yõore,*+ Bẽnzame buudã ned+ n dat n yɩɩda! Bas-y-yã-a sɩɩ t’a kãab-m tɩ yaa a Zeova n kõ-a sore! 12 Tõe t’a Zeova na n yãa m nimbãanegã.+ Tõe t’a Zeova tek kãab-wẽng ning nebã sẽn kãabd maam rũndã wã tɩ lebg yel-sõmde.”+ 13 A Davɩɩd ne a nebã kell n dɩka b sor n loogdẽ t’a Simeyi kẽnd tãngã sɛɛgẽ n yɛgd-a, n kãabd-a,+ n lobd-a kug la a wʋkd tom wʋsg n fãeed-a.

14 Rĩmã ne a nebã sẽn wa n ta b sẽn dabdẽ wã tɩ b yaame. La bãmb vʋʋsame.

15 Wakat kãnga, a Absalom ne Israyɛll rapã fãa taa Zerizalɛmme, t’a Ahitofɛll+ ra be ne-a. 16 Ark rao+ a Husayi+ sẽn yaa a Davɩɩd zoa wã* taa a Absalom nengẽ n yeel-a yaa: “N-na! Wẽnd na kaoos-yã!+ Wẽnd na kaoos-yã!” 17 La a Absalom yeela a Husayi yaa: “Fo sẽn maand sɩd ne f zoa wã la woto? Bõe yĩng tɩ fo pa tũ f zoa wã n looge?” 18 T’a Husayi leok a Absalom yaa: “Mam bee ne ned ning a Zeova sẽn yãkã, soab ning nin-kãensã la Israyɛll nebã fãa sẽn yãkã. Yaa ne yẽ la mam na n pa. 19 Mam yeta yãmb yɛs yaa: Ãnda la mam segd n tũ? Pa a biigã sɩda? Mam sẽn tũ y ba wã to-to wã, mam na n tũu yãmb me woto.”+

20 Rẽ la a Absalom yeel a Ahitofɛll yaa: “Bɩ f kõ-m saglga.+ Bõe la d segd n maane?” 21 T’a Ahitofɛll yeel a Absalom yaa: “Kẽ-y ne y ba wã pʋg-rɩkdsã*+ a sẽn bas tɩ b yõdg n ges zakã yellã.+ Woto, Israyɛll nebã fãa sã n bãng tɩ yãmb lebga wa bõn-põosg y ba wã nifẽ, sẽn teend-b yãmbã na n paama raoodo.” 22 Dẽ, b tilga fu-roog bɛoongã zug+ t’a Absalom kẽ ne a ba wã pʋg-rɩkdsã*+ Israyɛll nebã fãa nifẽ.+

23 Wakat kãnga, b ra geta a Ahitofɛll+ saglg fãa wa* Wẽnnaam gomde. Yaa woto la a Davɩɩd ne a Absalom fãa ra get a Ahitofɛll saglsã.

17 Dẽ, a Ahitofɛll yeela a Absalom yaa: “M bõos tɩ y kõ-m sor tɩ m yãk rap tus-piig la a yiibu, n yik yʋngã n pʋgl a Davɩɩde. 2 Mam na n tɩ linga rĩmã, rẽ t’a yaame n pa le tar pãng ye.+ La mam na n kẽesa yẽ rabeem, n kɩt tɩ nin-buiidã fãa sẽn be ne-a wã zoe n bas-a, tɩ m kʋ yẽ bala.+ 3 Rẽ poore, mam na n talla nin-buiidã fãa n lebg n wa yãmb nengẽ. Nin-buiidã fãa na lebg n wa yãmb nengẽ bɩ b kõn lebg n wa wã bee ne bũmb ning sẽn na n paam yãmb sẽn baood a soabã. Woto, nin-buiidã fãa na n zĩnda bãane.” 4 A Ahitofɛll saglgã yɩɩ a Absalom ne Israyɛll kãsem-dãmbã fãa noogo.

5 La a Absalom yeelame: “M bõos tɩ y bool Ark rao a Husayi,+ tɩ yẽ me wa togs a sẽn tagsd tɩ d kelge.” 6 Dẽ, a Husayi kẽnga a Absalom nengẽ, t’a Absalom togs-a a Ahitofɛll sẽn yeelã, n sok-a yaa: “D segd n maana wa a sẽn yeelã bɩ? Sã n yaa ayo bɩ f togs tõnd d sẽn segd n maane.” 7 Rẽ la a Husayi yeel a Absalom yaa: “So-kãnga wã, a Ahitofɛll saglgã pa sõma ye!”+

8 A Husayi paasame: “Yãmb mii y ba wã sõma, la y mi t’a tãb-biisã yaa gãndaado,+ la sũ-toog n tar-b wa urs* sẽn menes a kamb weoogẽ.+ Sẽn paase, yãmb ba wã yaa zabr gãndaoogo,+ n pa na n gãand nin-buiidã sʋk yʋngã ye. 9 Woto t’a solga tãens bogdẽ wall zĩig ninga.+ A sã n yɩ pipi n yik zabr ne tõndo, neb nins sẽn na n wʋmã na n yeelame yaa: ‘B tõoga a Absalom poorẽ dãmbã!’ 10 A sã n yɩ woto, baa ned ning sẽn tar daood t’a sũurã yaa wa gɩgemd sũurã+ na n komsa raood rabeem yĩnga. Bala Israyɛll nebã fãa miime tɩ yãmb ba wã yaa gãndaoogo,+ la tɩ neb nins sẽn be ne-a wã tara raoodo. 11 Ad mam saglgã: Tigm-y Israyɛll nebã fãa yãmb sɛɛgẽ, sẽn sɩng Dan n tãag Bɛɛr-seba,+ tɩ b sõorã yɩ wʋsg wa bĩisrã sẽn be mogrã noorã,+ tɩ yãmb lʋɩ b taoor tɩ y kẽng n tɩ zabe. 12 Tõnd na n tɩ zaba ne-a zĩig ning fãa d sẽn na n yã-a. D na n tɩ pig-a-la wa meenem sẽn dʋʋgd tẽnga, la ned baa a ye pa na n põs bãmb sʋk ye. Yẽ bɩ neb nins sẽn be ne-a wã baa a ye kõn põs ye. 13 A sã n zoe n kẽng tẽng pʋgẽ, Israyɛll nebã fãa na n waa ne wĩy n vuug tẽn-kãng n ta longẽ wã, hal tɩ kugr baa a ye pa kell ye.”

14 Dẽ, a Absalom ne Israyɛll nebã fãa yeelame yaa: “Ark rao a Husayi saglgã yaa sõma+ n yɩɩd a Ahitofɛll dẽndã.” La yaa a Zeova n da rat tɩ b ra tũ a Ahitofɛll saglgã+ sẽn yaa sõma wã, sẽn na yɩl t’a Zeova wa ne yel-beed a Absalom zugu.+

15 A Husayi wilga maan-kʋʋdb a Zadok ne a Abiyataar+ a Ahitofɛll sẽn yeel a Absalom ne Israyɛll kãsem-dãmbã bũmb ningã, la yẽ me sẽn yeel bũmb ningã. 16 A Husayi paasame yaa: “Tʋm-y ned a Davɩɩd nengẽ tao-tao, n yeel-a: ‘Ra pa-y kʋɩlgã sẽn be we-raoogẽ* wã zĩig ning b sẽn tõe n kẽn n dʋʋgã yʋngã ye. Bɩ y fãa rʋʋg kʋɩlgã, sã n pa rẽ b na n kʋʋ rĩmã ne nin-buiidã fãa sẽn be ne-a wã.’”+

17 A Zonatã+ ne a Ahimaaz+ ra bee Ɛn-rogɛlle.+ Bala b pa saag n na n kẽ Zerizalɛm tɩ nebã yã-b ye. Dẽ, tʋm-tʋmd-poak a ye n kẽng n tɩ togs-ba, tɩ bãmb me kẽng n na n tɩ togs a Davɩɩde. 18 La bi-bɩɩg n yã bãmba, n kẽng n tɩ togs a Absalomme. Dẽ, bãmb zoee tao-tao n ta Bawurim+ rao a ye zakẽ. Bulg n da be a samandẽ wã, tɩ bãmb kẽ a pʋgẽ. 19 Raoã pag rɩka fuug n lud bulgã noore, n yɛdg kood b sẽn to, tɩ ned pa mi bũmb ning sẽn maan ye. 20 A Absalom tʋm-tʋmdbã taa pagã zakẽ n sok-a yaa: “A Ahimaaz ne a Zonatã bee yɛ?” Tɩ pagã leoke: “B tũu ka n tees kʋɩlgã sẽnese.”+ Dẽ, rapã baoo bãmb la b pa yã-b ye. Rẽ poore, bãmb leba Zerizalɛm.

21 Rapã loogr poore, a Zonatã ne a Ahimaaz yii bulgẽ wã n kẽng rĩm a Davɩɩd nengẽ n taas-a koɛɛgã. Bãmb togs-a-la a Ahitofɛll saglgã,+ n yeel-a yaa: “Yik-y n dʋʋg-y kʋɩlgã tao-tao.” 22 Zĩig pʋgẽ, a Davɩɩd ne neb nins fãa sẽn da be ne-a wã yikame n dʋʋg Zʋrdẽ kʋɩlgã. Beoogã ne a vẽeg tɩ nebã fãa rʋʋga Zʋrdẽ kʋɩlgã.

23 A Ahitofɛll sẽn yã tɩ b pa tũ a saglgã, a zomba a bõang n kuil a meng tẽngẽ.+ Yẽ kõo a zakã rãmb a yaoolem koeese,+ la a tɩ luul* a menga.+ Woto, yẽ kiime tɩ b mum-a zĩig ning b sẽn mum a yaab-rãmbã.

24 Wakat kãnga, a Davɩɩd taa Mahanayim,+ t’a Absalom ne Israyɛll nebã fãa rʋʋg Zʋrdẽ kʋɩlgã. 25 A Absalom kɩtame t’a Amaza+ ledg a Zowaab+ zĩigẽ n lʋɩ tãb-biisã taoore. A Amaza ra yaa ned b sẽn boond tɩ Israyɛll rao a Itra ne a Abigayɩll biiga. A Abigayɩll+ yaa a Nahaas bi-pugla, n yaa a Zowaab ma a Seruya yao. 26 Israyɛll nebã ne a Absalom tilga b sikã Galaad soolmẽ wã.+

27 A Davɩɩd sẽn ta Mahanayimmã bala, a Nahaas biig a Sobi sẽn yit Amon nebã tẽng a ye b sẽn boond tɩ Raba wã,+ n paas Lodebaar rao a Amiyɛll biig a Makɩɩr+ ne Galaad rao a Barzɩlayi+ sẽn yit Rogelimmã 28 waa ne gãase, la-pogdo, yagd laase, bɩle, orze,* zom, kood b sẽn sẽ, bɛnga, kood b sẽn kʋɩɩse, 29 sɩɩdo, bĩis-kaam, piis la bĩis-gõeem.* Bãmb zãa woto fãa n na n wa kõ a Davɩɩd ne nin-buiidã sẽn be ne-a wã tɩ b rɩ,+ bala bãmb yeelame: “Nin-buiidã yaame, tɩ kom la ko-yũud tar-b we-raoogẽ wã.”+

18 Dẽ, a Davɩɩd sõda tãb-biisã sẽn da be ne-a wã, n yãk kẽer tɩ b yɩ tãb-biis tusr-tusr nanambse, la sãnda tɩ b yɩ tãb-biis koabg-koabg nanambse.+ 2 Rĩm a Davɩɩd welga tãb-biisã sul a tãabo, n kɩt t’a Zowaab+ lʋɩ sull a yembr taoore, t’a Zowaab kẽem a Abisayi+ sẽn yaa a Seruya biigã+ lʋɩ sull a yiib-n-soabã taoore, tɩ Gat rao a Itayi+ lʋɩ sull a tãab-n-soabã taoore. Rẽ poore, rĩmã yeel-b lame yaa: “Ma-me na n tũu yãmba.” 3 La b yeela a Davɩɩd yaa: “Yãmb pa segd n tũ tõnd ye.+ Bala tõnd sã n zoe, b pa na n ges tɩ rẽ yaa bũmb ye. La baa tõnd pʋɩ-sʋk sã n ki b pa na n ges tɩ rẽ yaa bũmb ye. Bala yãmb taa tõnd neb tus-piiga.+ Rẽ wã, yaa sõma tɩ yãmb pa tẽngã pʋgẽ, tɩ d sã n wa rat sõngre, bɩ y tʋm neb tɩ b wa sõng-do.” 4 Rĩmã yeel-b lame yaa: “Mam na n maana bũmb ning fãa sẽn yaa sõma ne yãmba.” Dẽ, rĩmã yalsa tẽngã rignoorã sɛɛga, tɩ tãb-biisã fãa tong taab sul koabg-koabga, la tusr-tusr n looge. 5 Dẽ, rĩmã kõo a Zowaab ne a Abisayi la a Itayi noor n yeel yaa: “Ra kʋ-y-yã a Absalom t’a yaa m bi-nongre.”+ Nebã fãa wʋma rĩmã sẽn wa n gomd ne nanambsã a Absalom poorẽ wã.

6 Nebã kẽnga weoogẽ wã n na n tɩ seg Israyɛll nebã. La b zaba ne Israyɛll nebã Efrayim we-raoogẽ wã.+ 7 A Davɩɩd tãb-biisã tõoga+ Israyɛll nebã.+ Neb wʋsg n ki baraare, yɩɩ neb tus-pisi. 8 Zabrã taa soolmã fãa pʋgẽ. Sẽn paase, weoogã sẽn dɩ neb ninsã yɩɩga neb nins b sẽn kʋ ne sʋʋg baraarã.

9 A Absalom wa n sega a Davɩɩd tãb-biisã. A ra zomba bõn-wɛɛga,* tɩ bõn-wɛɛgã tũ tɩ-bedr wil-bɛd tẽngre, t’a zugã sẽgemd tɩɩgã wilẽ t’a yag be n luundẽ. La bõn-wɛɛgã a sẽn da zombã kell n zoeeme n looge. 10 Ned n yã a Absalom n tɩ togs a Zowaab+ yaa: “Mam yãa a Absalom t’a yag tɩ-bedr zugu.” 11 T’a Zowaab leok-a yaa: “Fo sã n yã-a lame, bõe yĩng tɩ fo pa kʋ-a be? Mam sũur da na n yɩɩ noog tɩ m kõ foom wanzuri ligd-koeems koabg la sẽbdga.” 12 La raoã yeela a Zowaab yaa: “Baa b sã n da ning wanzuri ligd-koeems tusr mam nugẽ, mam pa na n saag n maan rĩmã biig bũmb ye. Bala tõnd wʋma rĩmã sẽn yeel yãmb ne a Abisayi la a Itayi tɩ y ges tɩ ned ra kʋ a Absalommã.+ 13 Mam sã n da kɩɩsẽ noorã n yãk a yõorã,* rĩmã ra pa tõe n pa bãng ye. La yãmb ra pa na n sõng maam ye.” 14 La a Zowaab yeelame yaa: “Mam pa na n sãam m sẽk ne foom ye.” Dẽ, yẽ rɩka kãn* a tãab n tɩ kõs a Absalom sũurã t’a yaool n da ket n vɩ n yag tɩ-bedrã zugu. 15 Dẽ, tʋm-tʋmdb piig sẽn zãad a Zowaab zab-teedã wa n baasa a Absalom.+ 16 A Zowaab peeba baorg sẽn na yɩl tɩ tãb-biisã bas Israyɛll nebã rigbu. Woto, a Zowaab kɩtame tɩ bãmb yalse. 17 B rɩka a Absalom n lob bog-kẽeng pʋg weoogẽ wã, la b wʋk kug n zam-a hal tɩ lebg kug-rʋr-kẽenga.+ La Israyɛll nebã fãa zoe n kuila b zagsẽ.

18 A Absalom sẽn da wa n ket n vɩ wã, a ra vigla kugr a meng yĩng Rĩmã longẽ,+ bala yẽ yeelame yaa: “M pa tar bi-ribl sẽn na n kɩt tɩ m yʋʋrã ra menem ye.”+ Dẽ, yẽ rɩka a yʋʋrã n pʋd kugrã, tɩ b boond-a t’a Absalom kugri, hal n tãag rũndã.

19 A Zadok biig a Ahimaaz+ yeela a Zowaab yaa: “M bõos tɩ y bas tɩ m zoe n kẽng n tɩ taas rĩmã koɛɛgã, bala a Zeova fãaga yẽ a bɛɛbã nusẽ.”+ 20 La a Zowaab yeel-a lame yaa: “Fo pa na n yɩ koe-taasd rũndã ye. Fo na n taasa koɛɛg daar a to, la rũndã fo pa na n taas koɛɛg ye. Bala rĩmã bi-roak n ki.”+ 21 Dẽ, a Zowaab yeela Kuus ned yaa:+ “Kẽng n tɩ togs rĩmã fo sẽn yã bũmb ningã.” Tɩ Kuus nedã wõgemd a Zowaab taoore, la a zoe n looge. 22 A Zadok biig a Ahimaaz leb n yeela a Zowaab yaa: “Sẽn na n yɩ a soab bɩ yɩ, m bõos tɩ y bas tɩ m zoe n pʋgl Kuus nedã.” La a Zowaab yeel-a lame yaa: “M biiga, bõe yĩng tɩ fo na n zoe n kẽnge, tɩ koɛɛg yaool n pa be fo sẽn na n taase?” 23 La a Ahimaaz pẽdgame n yeel yaa: “Sẽn na n yɩ a soab bɩ yɩ, bas-y tɩ m zoe n kẽnge.” Dẽ, a Zowaab yeel-a lame t’a zoe n kẽnge. La a Ahimaaz tũu Zʋrdẽ kʋɩlgã soolem sorã n zoe, hal n wa yõsg Kuus nedã.

24 A Davɩɩd ra zĩi tẽngã rignoy a yiibã sʋka,+ la gũudã+ rʋʋ rignoor ning sẽn tong lalgã bɛoong zugu. A gesame n yã ned sẽn zoet n watẽ. 25 Dẽ, gũudã boola rĩmã n togs-a. Tɩ rĩmã leok yaa: “A sã n yaa a yembre, dẽnd a yaa koe-taasda.” Sẽn da zoet-a wã sẽn wa n kolgdã, 26 gũudã yãa ned a to sẽn zoet n watẽ, n bool rigno-gũudã n yeel-a yaa: “Gese! Ned a to n zoet a yembr n watẽ!” Tɩ rĩmã yeel yaa: “Nin-kãngã me yaa koe-taasda.” 27 Gũudã leb n yeelame yaa: “M neeme tɩ pipi raoã zoeta wa a Zadok biig a Ahimaaze.”+ Tɩ rĩmã yeel yaa: “Yaa nin-sõngo, a wata ne koe-noogo.” 28 A Ahimaaz taame n bool rĩmã n yeel yaa: “N-na! Yell kae ye.” Rẽ poore, a wõgemda rĩmã taoore, n fõgen a neng tẽng n yeele: “M zu-soab la m dĩma, bɩ yãmb Wẽnnaam a Zeova paam pẽgre, a sẽn ning neb nins sẽn kɩɩs yãmbã y nugẽ wã yĩnga!”+

29 La rĩmã sokame yaa: “M biig a Absalom bee laafɩ bɩ?” T’a Ahimaaz yeel yaa: “A Zowaab sẽn wa n tʋmd maam ne y tʋm-tʋmd a to wã, mam yãa rãmbg-kãsengã la m pa bãng a võor ye.”+ 30 Dẽ, rĩmã yeelame yaa: “Kẽng n yals kɩrenga.” La a leba kɩreng n yalse.

31 Dẽ, Kuus nedã taame,+ n yeel yaa: “M zu-soab la m dĩma, m tara koɛɛg n na n taas-yã. Rũndã, a Zeova fãaga yãmba, neb nins sẽn kɩɩs yãmbã fãa nusẽ.”+ 32 La rĩmã soka Kuus nedã yaa: “M biig a Absalom bee laafɩ bɩ?” Tɩ Kuus nedã yeel yaa: “Bɩ m zu-soab la m dĩmã bɛɛbã fãa, la neb nins fãa sẽn kɩɩs yãmb n dat n maan yãmb wẽngã lebg wa a Absalomme!”+

33 Koɛɛgã sãama rĩmã sũur wʋsgo, t’a rʋ yĩngr doogã sẽn be rignoorã zugã n yãbe. A ra kẽndame la a yetẽ yaa: “M biig a Absalom, m biiga! M biig a Absalom! M sã n da ki n bas foom n são! M biig a Absalom, m biiga!”+

19 Neb n tɩ togs a Zowaab yaa: “Rĩmã yãbdame n maand sũ-sãang a Absalom poorẽ.”+ 2 Baraare, tõogrã* lebga sũ-sãang ne tãb-biisã fãa, bala b fãa wʋmame tɩ rĩmã yãbda a biigã poorẽ. 3 Baraare, tãb-biisã lebg n leba tẽngã pʋgẽ sɩɩ-sɩɩ,+ wa yãnd sẽn yõk tãb-biis b sẽn zoe zabrẽ yĩnga. 4 Rĩmã luda a nengã, n da zẽkd a koɛɛg n yãbd n yetẽ: “M biig a Absalom! Absalom! M biiga! M biiga!”+

5 Dẽ, a Zowaab kẽe roogẽ wã n yeel rĩmã yaa: “Rũndã yãmb ninga y tãb-biisã fãa yãnde. Bãmb yaool n fãaga yãmb vɩɩmã,* la b fãag yãmb kom-dibli wã,+ y kom-pugli wã,+ y pagbã la y pʋg-rɩkdsã*+ vɩɩm.* 6 Yãmb nonga neb nins sẽn kis yãmbã, la y kis neb nins sẽn nong yãmbã. Bala yãmb wilga vẽeneg rũndã tɩ y tãb-biisã nanambse, la tãb-biisã pa baa fʋɩ yãmb nifẽ ye. Bala mam kɩsa sɩd tɩ tõnd fãa sã n da kiẽ t’a Absalom ket n vɩ, yãmb da na n nonga rẽ n yɩɩda. 7 Masã, bɩ y yik n yi yɩnga, n gom n gãneg y tãb-biisã yam. Bala mam wẽenda ne a Zeova tɩ yãmb sã n pa yi yɩnga, rao kõn pa ne yãmb yʋn-kãngã ye. La rẽ na n yɩɩ wẽng n yɩɩg yel-beed nins fãa y sẽn yã hal y yãadmẽ n tãag rũndã wã.” 8 Dẽ, rĩmã yikame n wa zĩnd tẽngã rignoorẽ. B togsa nin-buiidã tɩ rĩmã zĩi rignoorẽ wã masã. Woto, nebã fãa waa rĩmã taoore.

La Israyɛll nebã fãa ra zoe n kuila b zagsẽ.+ 9 Israyɛll buud toɛy-toɛyã nebã ra wẽeda no-koɛɛma, n yetẽ yaa: “Rĩmã fãaga tõnd d bɛɛbã nusẽ,+ la a fãag tõnd Filisti nebã nusẽ. La masã, rĩmã zoe n basa tẽngã a Absalom yĩnga.+ 10 Sẽn paase, a Absalom tõnd sẽn da yãk* a soab t’a na n lebg tõnd rĩmã+ kii zabrẽ wã.+ Bõe yĩng masã tɩ tõnd zĩ n pa na n kẽng n tɩ peeg rĩmã n wa?”

11 Rĩm a Davɩɩd tʋma koɛɛg maan-kʋʋdb a Zadok+ ne a Abiyataar+ nengẽ n yeele: “Gom-y ne Zida kãsem-dãmbã+ n yeel-b yaa: ‘Bõe yĩng tɩ yãmb na n bas tɩ b reng yãmb n tɩ peeg rĩmã n leb a zakẽ? Israyɛll nebã fãa koɛɛg yaool n taa maam, zĩig ning m sẽn be wã. 12 Yãmb yaa m ba-biisi. Tõnd yaa rogem.* Woto wã, bõe yĩng tɩ y na n bas tɩ b reng yãmb n peeg rĩmã n leb a zakẽ?’ 13 La y segd n yeela a Amaza+ yaa: ‘Tõnd pa rogem sɩda?’* Mam sã n pa kɩt tɩ fo reeg a Zowaab+ zĩigẽ n lebg m tãb-biisã naab masã tɛka, bɩ Wẽnnaam sɩbg maam ne sɩbg-kãsenga.’”

14 A Davɩɩd tõogame tɩ Zida nebã fãa yam kẽ-a, tɩ b tʋm koɛɛg yẽ nengẽ n yeele: “Bɩ yãmb ne y tʋm-tʋmdbã fãa lebg n wa.”

15 Rĩmã rɩka yir sor n wa ta Zʋrdẽ kʋɩlgẽ wã. La Zida nebã waa Gilgall+ n na n seg rĩmã, n yãag-a n dʋʋg Zʋrdẽ kʋɩlgã. 16 La Bẽnzame rao a Geera sẽn yit Bawurimmã biig a Simeyi+ yɩɩ tao-tao n naag Zida nebã n na n seg Rĩm a Davɩɩde. 17 La Bẽnzame buudã neb tusr n da be ne-a. Sẽn paase, a Ziba+ sẽn yaa a Sayull zakã tʋm-tʋmdã ne a kom-dibli piig la a nu wã, ne a tʋm-tʋmdb pisi wã renga rĩmã Zʋrdẽ kʋɩlgẽ wã. 18 Yẽ* rʋʋga kʋɩlgã n na n tɩ peeg rĩmã zakã rãmba, la a maan bũmb nins fãa rĩmã sẽn date. La rĩmã sẽn wa n dat n dʋʋg Zʋrdẽ kʋɩlgã, a Geera biig a Simeyi waame, n wõgemd a taoore. 19 A yeela rĩmã yaa: “M zu-soaba, ra ning-y m taale, la y ra tẽeg wẽng ning yãmb tʋm-tʋmdã sẽn maan yãmbã,+ daar ning m zu-soab la m dĩmã sẽn wa n zoet n yit Zerizalɛmmã ye. Bɩ m rĩmã ra bĩng rẽ a sũurẽ ye. 20 Bala yãmb tʋm-tʋmdã miime t’a beegame. Rẽ n so tɩ rũndã, a Zozɛf roogã nebã fãa sʋka, maam n yɩ pipi n wa n na n seg m zu-soab la m dĩmã.”

21 Zĩig pʋgẽ, a Seruya+ biig a Abisayi+ yeelame: “A Simeyi segda ne kũum, bala yẽ tʋʋsa ned ning a Zeova sẽn yãkã.”*+ 22 La a Davɩɩd yeelame: “Bʋg n pak yãmba, Seruya kom-dibli,+ tɩ y kɩɩsd maam rũndã? B pa segd n yãk ned yõor Israyɛll rũndã ye. Rẽ yĩnga, mam pa mi tɩ rũndã mam le lebga Israyɛll nebã rĩm sɩda?” 23 La rĩmã yeela a Simeyi yaa: “Fo pa na n ki ye.” Rĩmã sẽn yeel woto wã poore, a wẽename.+

24 A Sayull yageng a Mefibosɛt+ me waame n na n seg rĩmã. Rĩmã sẽn loogã tɛka, a Mefibosɛt zɩ n waas a naoã, wall a põng a no-kõbdo, pa rẽ bɩ a pɛgs a futã hal n tãag daar ning rĩmã sẽn lebg n wa ne laafɩ wã ye. 25 A sẽn wa* Zerizalɛm n na n seg rĩmã, rĩmã sok-a lame: “Mefibosɛte, bõe yĩng tɩ fo pa tũ maam n looge?” 26 Rẽ la a leok yaa: “M zu-soab la m dĩma, mam tʋm-tʋmdã+ zãmba maam. Bala m sẽn yaa koamsã yĩngã,+ mam yeelame t’a segl bõangã tɩ m zomb n tũ yãmba. 27 La a kãnega maam ne yãmba.+ M zu-soab la m dĩma, yãmb yaa wa Wẽnnaam malɛkã. Woto wã, bɩ y maan bũmb ning sẽn yaa sõma ne yãmba. 28 Yãmb da tõe n kɩtame tɩ b kʋ m ba wã zak rãmb fãa, la ne rẽ fãa yãmb kɩtame tɩ mam naag neb nins sẽn dɩt ne yãmbã.+ Woto wã, mam yɩta wãn n le kos rĩmã bũmbu?”

29 La rĩmã leoka yẽ yaa: “Bas goamã woto tɩ sekame. Mam datame tɩ foo ne a Ziba pʋɩ taab pʋtã.”+ 30 T’a Mefibosɛt yeel rĩmã yaa: “Bas-y t’a tall fãa. Mam sẽn paam tɩ m zu-soab la m dĩmã lebg n wa yir ne laafɩ wã seka maam.”

31 Galaad rao a Barzɩlayi+ yii Rogelim n wa n na n yãag rĩmã n ta Zʋrdẽ kʋɩlgã. 32 A Barzɩlayi ra kʋʋla wʋsgo, n tar yʋʋm pis-nii. Rĩmã sẽn da wa n be Mahanayimmã, a Barzɩlayi ra gesame t’a paam dɩɩbo.+ Bala a ra tara arzɛgs wʋsgo. 33 Rĩmã yeela a Barzɩlayi yaa: “Wa tũ maam n dʋʋg kʋɩlgã, tɩ m na n kɩtame tɩ f naag maam n dɩt Zerizalɛm.”+ 34 La a Barzɩlayi leoka rĩmã yaa: “Mam vɩɩmã rasem sõor sẽn ketã yaa bilfu. Woto wã, mam na n yɩɩ wãn n tũ rĩmã n kẽng Zerizalɛm? 35 Mam tara yʋʋm pis-nii rũndã.+ Mam tõe n le bãng sõma ne wẽng n welg sɩda? Mam tõe n bãng rɩɩb ne rãam noosem sɩda? Mam tõe n le wʋm pagb la rap sẽn yɩɩnd koɛɛg sɩda?+ Bõe yĩng tɩ m na n paas m zu-soab la m dĩmã zɩɩbo? 36 Mam sẽn paam n yãag rĩmã n ta Zʋrdẽ kʋɩlgã sekame. Bõe yĩng tɩ rĩmã na n dol maam woto? 37 Bas-y tɩ y tʋm-tʋmdã lebg n tɩ ki a tẽngẽ, zĩig ning b sẽn mum a ba ne a ma wã.+ Ad y tʋm-tʋmd a Kimham.+ Bas-y t’a naag yãmb n dʋʋg kʋɩlgã, tɩ y tɩ maan bũmb ning fãa sẽn yaa sõma ne yãmbã n kõ-a.”

38 Rĩmã leokame yaa: “A Kimham na n dʋʋga kʋɩlgã ne maam, la mam na n maana sẽn yaa sõma ne foomã n kõ-a. Fo sẽn na n kos maam bũmb ning fãa, mam na n maaname.” 39 Nebã fãa sɩnga Zʋrdẽ kʋɩlgã rʋʋgre. La rĩmã sẽn wa n na n dʋʋg kʋɩlgã, a moka a Barzɩlayi+ n ning-a barka, t’a Barzɩlayi lebg n kuili. 40 Rĩmã sẽn wa n dʋʋgd kʋɩlgã n na n kẽng Gilgallã,+ a Kimham tũume. Yaa Zida nebã fãa ne Israyɛll nebã pʋɩ-sʋk n yãag rĩmã n dʋʋg kʋɩlgã.+

41 Israyɛll rapã fãa kolga rĩmã n yeel-a yaa: “Bõe yĩng tɩ Zida nebã sẽn yaa d ba-biisã wa soos n tall yãmb ne y zakã rãmb n paas y rapã fãa n dʋʋg Zʋrdẽ kʋɩlgã?”+ 42 Zida rapã fãa leoka Israyɛll rapã yaa: “Yaa rĩmã sẽn kĩ ne tõndã yĩnga.+ Bõe yĩng tɩ yãmb sũur yiki? Tõnd dɩɩ rĩmã rɩɩb sɩda? Rĩmã kõo tõnd kũun sɩda?”

43 La Israyɛll rapã leoka Zida rapã yaa: “Tõnd yaa buud piiga. Woto wã, tõnd n so a Davɩɩd n yɩɩd yãmba. Bõe yĩng masã tɩ yãmb paoog tõndo? Pa tõnd n da segd n deng n tɩ peeg rĩmã sɩda?” La Zida rapã gomame n lub* Israyɛll rapã.

20 Rao a ye n da yaa tẽn-dãmbda, t’a yʋʋr boond t’a Saba.+ Ra yaa Bẽnzame rao a Bikri biiga. A peeba baorg+ n yeele: “Tõnd pa tar pʋɩɩr ne a Davɩɩd ye. Tõnd pa tar rogem-pʋɩɩr ne a Zese* biigã ye.+ Israyɛll neba! Ned fãa leb a wẽnnaam-dãmbẽ.”*+ 2 Israyɛll rapã fãa sẽn wʋm dẽ wã, b basa a Davɩɩd n pʋg a Bikri biig+ a Saba. La Zida nebã kell n tũu b rĩmã Zʋrdẽ kʋɩlgẽ wã n tãag Zerizalɛm.+

3 Rĩm a Davɩɩd sẽn ta na-yirã Zerizalɛmmã,+ a kɩtame tɩ b tall pʋg-rɩkds* piigã a sẽn da bas tɩ b yõdg n ges zakã yellã+ n tɩ ning roog pʋgẽ, tɩ neb gũud-ba. A ra kõt-b-la rɩɩbo, la a pa tol n le kẽ ne-b ye.+ B kell n paa be n tãag b kũum, n da yaa wa pʋg-kõapa, tɩ b sɩd yaool n da ket n vɩ.

4 Rĩmã yeela a Amaza+ yaa: “Bool Zida rapã n tigm-b ka la rasem a tãab n kõ-ma. La fo-me segd n zĩndame.” 5 Dẽ, a Amaza kẽngame n na n tɩ bool Zida rapã n tigim-ba. La a kaoosame, n pa wa wakat ning rĩmã sẽn da yãkã ye. 6 Rẽ la a Davɩɩd yeel a Abisayi+ yaa: “A Bikri biig a Saba+ tõe n maana tõnd wẽng n yɩɩg a Absalom sẽn maanã.+ Tall m tãb-biisã tɩ y pʋgl-a, t’a ra wa paam n kẽ tẽns sẽn gũbg ne lals n põsg tõnd ye.” 7 Woto, a Zowaab+ rapã, Kerɛt nebã, Pelɛt nebã,+ n paas gãndaadã fãa yiime n tũ-a.* B yii Zerizalɛm n na n pʋgl a Bikri biig a Saba. 8 B sẽn wa n kolg kug-bedrã sẽn be Gabawõ+ wã, a Amaza+ wa n seg-b lame. Rẽ t’a Zowaab ra ninga a zabr fuugu, n sẽbg a sɛɛg ne sʋʋg sẽn be a wʋʋgẽ. A sẽn kolg a Amaza wã, sʋʋgã lʋɩɩme.

9 A Zowaab yeela a Amaza yaa: “M saam-biiga, laafɩ beeme?” Dẽ, a Zowaab gãda a Amaza toɛɛngã ne a nug-rɩtgo, n maan wa a rat n mok-a lame. 10 A Amaza pa maan gũusg ne sʋʋgã sẽn da be a Zowaab nugẽ wã ye. A Zowaab kõsa a pʋgã+ ne sʋʋgã t’a yãadã yi n dʋʋg tẽnga. A pa kõs-a n paas ye. A sẽn kõs-a vugrã bal seka a na ki. Rẽ poore, a Zowaab ne a kẽem a Abisayi pʋgla a Bikri biig a Saba.

11 Bi-bɩɩg a ye sẽn da naag a Zowaab rapã yalsa a Amaza sɛɛgẽ, n da yetẽ yaa: “Ned ning fãa sẽn be a Zowaab poorẽ, la ned ning fãa sẽn yaa a Davɩɩd rẽnd bɩ a tũ a Zowaabe!” 12 Wakat kãng t’a Amaza ra gãee a zɩɩmã pʋg sorã sʋka. Bi-bɩɩgã sẽn yã tɩ nebã fãa yalsdame wã, a vuuga a Amaza sorã sʋk n kẽng pʋʋg pʋgẽ, n pil-a ne fuugu. Bala a yãame tɩ ned ning fãa sẽn ta a Amaza zĩigẽ wã yalsdame. 13 A sẽn vuug-a n yiis sorã sʋkã poore, nebã fãa tũu a Zowaab tɩ b na n pʋgl a Bikri biig a Saba.+

14 A Saba saaga Israyɛll buud toɛy-toɛyã soolmẽ wã n ta Abɛll Bɛt-maaka.+ La a Bikri buudã neb me tigma taab n babs-a.

15 A Zowaab ne a nebã wa n gũbga a Saba Abɛll Bɛt-maaka tẽngã pʋgẽ. Tẽngã sẽn da gũbg ne tãn-dʋrã yĩnga, b zama tãnd n na n paam n ta tẽngã lalga. Neb nins fãa sẽn da be ne a Zowaabã ra tuuda lalgã tẽngre, n na n lub-a. 16 Pag sẽn tar yam n pa tẽngã pʋgẽ n zẽk a koɛɛg n yeel yaa: “Kelg-y-yã, rapa, kelg-y-yã! M bõos tɩ y yeel a Zowaab t’a kolg tɩ m gom ne-a.” 17 A Zowaab kolga pagã, t’a sok-a yaa: “Foo la a Zowaab bɩ?” T’a leok yaa: “Yaa maam.” Tɩ pagã yeel-a yaa: “Kelg f tʋm-tʋmd-poakã goamã.” T’a Zowaab yeel yaa: “Gom tɩ m kelgdame.” 18 Pagã yeel-a lame: “Pĩndã nebã ra wae n yetame tɩ f sã n tar yell n dat n welge, bɩ f wa Abɛll tẽngẽ wã n kos saglse. 19 Mam gomda Israyɛll neb nins sẽn baood laafɩ la b yaa sɩd dãmbã yʋʋr yĩnga. Fo rat n sãama tẽng sẽn yaa wa ma Israyɛlle. Bõe yĩng tɩ f rat n sãam a Zeova pʋɩɩre?”+ 20 A Zowaab leokame yaa: “M pa na n saag n sãam-a ye. 21 D pa wa ka rẽ yĩng ye. Yaa rao n be yãmb tẽngã pʋgẽ t’a yʋʋr boond t’a Saba,+ n yit Efrayim soolmẽ wã.+ Yẽ yaa a Bikri biiga. A kɩɩsa* rĩm a Davɩɩde. Yãmb sã n yõk yẽ bal n kõ-do, mam na n loog n basa tẽngã.” La pagã yeela a Zowaab yaa: “Be neere. Tõnd na n lobga a zugã tɩ zʋʋg lalgã n wa yãmb nengẽ!”

22 Zĩig pʋgẽ, pag ning sẽn tar yamã lebame n tɩ yã tẽngã nin-buiidã fãa, la b fiuuga a Saba zugã n lob a Zowaabe. La a Zowaab peeba baorg tɩ nebã fãa sãeege. Ned fãa kuila a yiri,+ t’a Zowaab leb rĩmã nengẽ Zerizalɛm.

23 A Zowaab n da yaa Israyɛll tãb-biisã fãa taoor soaba,+ t’a Zehoyada+ biig a Benaya+ yaa Kerɛt ne Pelɛt nebã+ taoor soaba. 24 A Adoram+ n da get neb nins b sẽn kɩt tɩ b tʋmd tʋʋm-wɛglã yelle, t’a Ahiluud biig a Zozafat+ yaa seb-bĩngda. 25 A Seva n da yaa seb-gʋlsdã, t’a Zadok+ ne a Abiyataar+ yaa maan-kʋʋdba. 26 Zayɩɩr rao a Ira lebga a Davɩɩd tʋm-tʋmd-kãsemsã taoor dãmbã nin-yende.*

21 A Davɩɩd wakatẽ wã, kom+ n zĩnd yʋʋm a tãab n pʋgl taaba. Dẽ, a Davɩɩd soka a Zeova, t’a Zeova yeel yaa: “A Sayull ne a roogã rãmb tara zɩɩm samde. Bala a Sayull kʋʋ Gabawõ nebã.”+ 2 Woto, rĩmã boola Gabawõ nebã+ n gom ne-ba. (Gabawõ nebã ra pa Israyɛll neb ye. B ra yaa Amoor neb+ sẽn da kete. Israyɛll nebã ra wẽename tɩ b pa na n kʋ-b ye.+ La a Sayull sẽn da pa rat tɩ nin-kãensã naag Israyɛll nebã ne Zida nebã yĩngã, a baoome n na n kʋ-b zãnga.) 3 A Davɩɩd soka Gabawõ nebã yaa: “Bõe la m segd n maan n kõ yãmba, la bõe la m tõe n yao n dol d beegrã, sẽn na yɩl tɩ yãmb ning a Zeova nin-buiidã* barka?” 4 Gabawõ nebã leoka rĩmã yaa: “Yell ning sẽn be tõnd ne a Sayull la a roogã rãmb sʋkã pa wanzuri bɩ sãnem yell ye.+ Sẽn paase, tõnd pa tõe n kʋ ned baa a ye Israyɛll ye.” Tɩ rĩmã yeel yaa: “Yãmb sẽn yeel a soab fãa, mam na n maan n kõ-y lame.” 5 Rẽ la b yeel rĩmã yaa: “Sã n yaa ne rao ning sẽn da rat n kʋ tõnd buudã nebã zãnga, n menes tõnd Israyɛll soolmã fãa pʋgẽ wã,+ 6 kõ-y tõnd neb a yopoe a kom-dibli wã ne a yagensã sʋka. Tõnd na n kʋ-b lame n yagl b kũumã+ a Zeova taoor Gibeya+ sẽn yaa a Sayull tẽngã, soab ning a Zeova sẽn da yãkã.”+ Dẽ, rĩmã yeel-b lame yaa: “Mam na n kõ-b-la yãmba.”

7 La rĩm a Davɩɩd zoee a Mefibosɛt+ sẽn yaa a Sayull biig a Zonatã biigã nimbãanega, a Davɩɩd ne a Sayull biig a Zonatã+ sẽn da wẽen a Zeova taoorã yĩnga. 8 Rĩmã rɩka a Aya bi-pugl a Rispa+ kom-dibli a yiibã a sẽn dog n kõ a Sayullã, sẽn yaa a Armoni ne a Mefibosɛtã, n paas a Sayull bi-pugl a Mikall*+ kom-dibli a nu wã. Yaa kamb nins a Mikall sẽn dog n kõ Mehola rao a Barzɩlayi biig a Adriyɛllã.+ 9 Woto, a Davɩɩd ning-b-la Gabawõ nebã nugẽ, tɩ bãmb kʋ-ba, n dɩk b kũumã n yagl tãng zug a Zeova taoore.+ Bãmb b yopoe wã fãa naaga taab n ki. B kʋ-b-la kẽebgã sɩngrẽ, orzã* tigsg sasa. 10 Dẽ, a Aya bi-pugl a Rispa+ rɩka bot n tɩʋ pĩigã zugu, n zĩnd be kẽebgã sɩngrẽ hal tɩ saag wa ni n madg kũumã. Yẽ pa bas tɩ yĩngr bõn-yɩgdɩ sig b zug wĩntoogo, wall weoogẽ rũms kolg-b yʋng ye.

11 B tɩ togsa a Davɩɩd bũmb ning a Sayull pʋg-rɩkdg* a Rispa sẽn yaa a Aya bi-puglã sẽn maanã. 12 Woto, a Davɩɩd kẽnga Zabɛs-galaad taoor dãmbã* nengẽ, n tɩ reeg a Sayull ne a biig a Zonatã kõabã. Wakat ning Filisti nebã sẽn kʋ a Sayull Gilbowa+ wã, b yagla a Sayull ne a Zonatã kũumã Bɛt-san tẽngã zãma wã zĩigẽ. La Zabɛs-galaad+ taoor dãmbã kẽnga be n tɩ soos n dɩk b kũumã. 13 A Davɩɩd talla a Sayull ne a biig a Zonatã kõabã n wa. Sẽn paase, bãmb tigma neb nins Gabawõ nebã sẽn da yaglã kõaba.+ 14 Bãmb muma a Sayull ne a Zonatã kõabã Zela+ sẽn be Bẽnzame soolmẽ wã, a Sayull ba a Kis+ yaoogẽ wã. Nebã sẽn maan bũmb nins fãa rĩmã sẽn yeelã, Wẽnnaam reega b sẽn kos bũmb ning tẽngã wɛɛngẽ wã.+

15 Zabr n leb n zĩnd Filisti nebã ne Israyɛll nebã sʋka.+ Dẽ, a Davɩɩd ne a tãb-biisã kẽngame n tɩ zab ne Filisti nebã. La yaams n wa yõk a Davɩɩde. 16 Refayim nebã+ yageng a yembr yʋʋr sẽn boond t’a Isbi-benoobe, sẽn da tar zũud kãnd zɩslem sẽn ta sɩkl kobs-tã,*+ la sẽn da bob sʋ-paall n mak n na n kʋ a Davɩɩde. 17 Zĩig pʋgẽ, a Seruya biig a Abisayi+ wa n sõnga+ a Davɩɩde, n kʋ Filisti nedã. Rẽ poore, a Davɩɩd nebã wẽename n yeel-a yaa: “Yãmb pa na n le tũ tõnd n kẽng zabre,+ tɩ Israyɛll fɩtlã ra wa ki ye!”+

18 Rẽ zugẽ, Israyɛll nebã leb n zaba ne Filisti nebã+ Goobe. Wakat kãnga, Husa rao a Sibekayi+ kʋʋ a Saf sẽn da yaa Refayim nebã+ yagengã.

19 Zabr n leb n zĩnd Israyɛll nebã ne Filisti nebã sʋk+ Goobe, tɩ Betlehɛm dao a Yaare-oregim biig a Ɛlhanan kʋ Gat rao a Golyate. A Golyat kãndã raoog ra yaa wa koeer-bõanga.+

20 Zabr n leb n zĩnd Gate, tɩ nin-wobg ra be be. A nug fãa ra tara nug-biis a yoobe, t’a naoor fãa tar nao-bi a yoobe. A nug-biisã ne a nao-bi wã fãa sẽn naag taab yaa bãmb pisi la a naase. Yẽ me ra yaa Refayim nebã yagenga.+ 21 Yẽ ra baooda Israyɛll nebã noor n ka basdẽ ye.+ La a Zonatã sẽn yaa a Davɩɩd kẽem a Simeyi+ biigã kʋ-a lame.

22 Nin-kãensã a naasã ra yaa Refayim nebã yagens sẽn da be Gate. La a Davɩɩd ne a tãb-biisã kʋʋ bãmba.+

22 A Davɩɩd togsa a Zeova goam nins sẽn be yɩɩn-kãngã pʋgẽ wã,+ daar ning a Zeova sẽn fãag-a a bɛɛbã fãa nusẽ+ la a Sayull nugẽ wã.+ 2 A yeelame:

“A Zeova yaa mam pĩiga, la m pãng zĩiga,+ soab ning sẽn fãagd maamã.+

11 A zomba seribẽ+ n yɩk n watẽ.

Yẽ zomba malɛk* pɩgs n puk tɩ nebã neẽ.+

13 Bug-saal sẽn wit n yi vẽenemã sẽn be a taoorã pʋgẽ.

A yaa gãongo, neb nins fãa sẽn soonded a nengẽ wã yĩnga.+

32 Bala ãnd n yaa Wẽnnaam tɩ sã n pa a Zeova?+

Ãnd n yaa pĩig kugr tɩ sã n pa tõnd Wẽnnaamã?+

44 Yãmb na n fãaga maam ne m nin-buiidã wɩdgã.+

47 A Zeova vɩɩme! Bɩ m Pĩig kugrã paam pẽgre!+

Bɩ Wẽnnaam sẽn yaa m fãagr pĩig kugrã paam pẽgre.+

23 Gom-kãensã yaa a Davɩɩd yaoolem goama:+

 5 Mam doogã yaa woto Wẽnnaam taoore.

8 Ad a Davɩɩd gãndaadã yʋya:+ A Zosɛɛb-basebɛt sẽn yaa Takmoon raoã. Yẽ n da yaa gãndaad a tãabã taoor soaba.+ A talla a kãndã n kʋ neb kobs-nii daar-n-yɛnga. 9 Yiib-n-soabã yaa a Ahoyi biig a Dodo+ biig a Eleazaare.+ Yẽ naaga gãndaad a tãabã sẽn da be ne a Davɩɩd b sẽn da wa n bao Filisti nebã noorã. Bãmb da tigmame n na n zabe. La Israyɛll nebã sẽn zoe wã, 10 a Eleazaar yalsa a nao zug n zab ne Filisti nebã n kʋ-b hal t’a kangã wa yɛ, t’a nugã ki, a sẽn da zãad sʋʋgã yĩnga.+ Baraare, a Zeova kɩtame tɩ b paam tõogr* sẽn yɩ kãsenga,+ la nin-buiidã pʋgla a Eleazaar n tɩ zɛ sẽn ki-bã teedo.

11 Gãndaoog a tãab-n-soabã yaa a Sama sẽn yaa Haraar dao a Aage biigã. Filisti nebã tigma taab Leyi. Bɛng pʋʋg n da be beenẽ. Nin-buiidã zoee Filisti nebã yĩnga. 12 La a Sama kell n yalsa pʋʋgã tẽn-sʋk n zab n kogl-a. A kʋʋ Filisti nebã hal t’a Zeova kɩt tɩ b paam tõogr* sẽn yɩ kãsenga.+

13 Nanambs pis-tã wã neb a tãab n kẽng a Davɩɩd nengẽ Adulam+ tãngã bokẽ kẽebgã wakate. Rẽ tɩ Filisti nebã tãb-sik n da be Refayim longẽ wã.+ 14 A Davɩɩd ra bee zĩ-soalgdgẽ wã,+ tɩ Filisti nebã tãb-biis sull da be Betlehɛm. 15 A Davɩɩd wa n yeelame: “Mam sã n da tõe n paam bulg ning sẽn be Betlehɛm noorã koom n yũ, m sũur yɩtẽ-la noogo!” 16 Gãndaad a tãabã sẽn wʋm dẽ wã, b kẽe Filisti nebã tãb-sikẽ wã ne pãnga, n pɩʋʋg n ta bulgã sẽn be Betlehɛm noorã, n yõng koomã n wa kõ a Davɩɩde. La a Davɩɩd zãgsame t’a kõn yũ, n daag-a n kõ a Zeova.+ 17 A yeelame yaa: “Zeova, mam kõn saag n maan bõn-kãngã ye! Mam na yũ nin-kãensã sẽn gẽneg b yõyã* zɩɩm?”+ A zãgsame t’a kõn yũ koomã ye. Yaa bõn-kãensã la a Davɩɩd gãndaad a tãabã maan-yã.

18 A Seruya+ biig a Zowaab kẽem a Abisayi+ n da yaa gãndaad a tãab sull a to taoor soaba. Daar a ye, yẽ talla a kãndã n kʋ neb kobs-tã. A yʋʋrã ra yii wa pipi gãndaad a tãabã.+ 19 La baa a sẽn da yaa gãndaad a tãab kãensã taoor soaba, t’a yʋʋr yi n yɩɩdã, a pa ta pipi gãndaad a tãabã zĩigẽ ye.

20 A Zehoyada biig a Benaya+ yɩɩ raood soab sẽn tʋm gãnda-tʋʋm wʋsg Kabzeyɛlle.+ Yẽ n kʋ Mowaab rao a Ariyɛll kom-dibli a yiibã, la a kẽ bok pʋgẽ daar a ye n kʋ gɩgemd+ sa-lamd niib wakate. 21 Leb n yaa yẽ n kʋ Ezɩpt nedã sẽn da yaa nin-wobgã. Ezɩpt nedã ra zãada kãnd a nugẽ, la a Benaya talla raoog bal n zab ne-a, n fãag a kãndã n wẽneg n kʋ-a. 22 Yaa a Zehoyada biig a Benaya n maan bõn-kãensã. A yʋʋrã ra yii wa pipi gãndaad a tãabã. 23 La baa a yʋʋrã sẽn da yi n yɩɩd gãndaad pis-tã wã sʋkã, a pa ta pipi gãndaad a tãabã zĩigẽ ye. La a Davɩɩd yãk-a lame t’a lebg a gũudbã naaba.

24 A Zowaab yao a Asayɛll+ ra naaga gãndaad pis-tã wã: Yaa Betlehɛm dao a Dodo+ biig a Ɛlhanan, 25 Harood rao a Sama, Harood rao a Elika, 26 Pelɛt rao a Helɛɛze,+ Tekowa rao a Ikɛs biig a Ira,+ 27 Anatot rao+ a Abiyezɛɛre,+ Husa rao a Mebunayi, 28 Ahoyi buudã ned a Zalmon, Netofa rao a Maharayi,+ 29 Netofa rao a Baana biig a Helɛɛd, Gibeya sẽn be Bẽnzame soolmẽ wã rao a Ribayi biig a Itayi, 30 Piraton rao a Benaya,+ a Hidayi sẽn yit Gaas+ ko-soayẽ wã, 31 Bɛt-araba rao a Abi-albon, Bawurim rao a Azmavɛte, 32 Saalbim rao a Eliyaba, a Zasɛm kom-dibli wã, a Zonatã, 33 Haraar dao a Sama, Haraar dao a Saraar biig a Ahiyam, 34 a Elifelɛt sẽn yaa a Aasbayi sẽn yaa Maakat rao biigã, Gilo rao a Ahitofɛll+ biig a Eliyam, 35 Karmell rao a Heezro, Arab rao a Parayi, 36 Zoba rao a Natã biig a Yigalle, Gaad buudã rao a Bani, 37 Amon rao a Zelɛk, Beerot rao a Naharayi sẽn da zãad a Seruya biig a Zowaab zab-teedã, 38 Zetɛɛr dao a Ira, Zetɛɛr+ dao a Garɛɛbe, 39 la Hɛt rao a Uuri.+ B fãa ra yaa neb pis-tã la yopoe.

24 A Zeova sũur le puuga ne Israyɛlle,+ b sẽn wa n pirs a Davɩɩd t’a maan bũmb sẽn na n wã Israyɛll nebã, n yeel-a t’a kẽng n tɩ sõd+ Israyɛll ne Zida nebã.+ 2 Dẽ, rĩmã yeela a Zowaab+ sẽn yaa tãb-biisã naab n da be ne-a wã yaa: “Saag Israyɛll buud toɛy-toɛyã soolmã fãa pʋgẽ, sẽn sɩng ne Dan n tãag Bɛɛr-seba,+ n sõd nin-buiidã n wa togs-m b sõorã tɩ m bãnge.” 3 La a Zowaab leoka rĩmã yaa: “Bɩ y Wẽnnaam a Zeova paas nin-buiidã sõor naoor koabga, tɩ m zu-soab la m dĩmã nif yã. La bõe yĩng tɩ m zu-soab la m dĩmã rat n maan bũmb a woto?”

4 La rĩmã pa kelg a Zowaab ne tãb-biisã nanambs ye. Dẽ, a Zowaab ne tãb-biisã nanambs yii rĩmã nengẽ, n kẽng n na n tɩ sõd Israyɛll nebã.+ 5 Bãmb rʋʋga Zʋrdẽ kʋɩlgã n tɩ tilg b sikã Arowɛɛr noore,+ tẽng ning sẽn be longã* tẽn-sʋkã nug-rɩtgo, la b tees Gaad buudã neb soolmã, n sãag n ta Yazɛɛre.+ 6 Rẽ poore, b kẽnga Galaad+ ne Tatim-hodsi soolmẽ wã, n sãag n ta Dan-yaan, n wẽnemd n tees Sɩdõ.+ 7 Bãmb kẽnga Tɩɩr tẽngã+ sẽn gũbg ne lalsã, la b saag Hevi nebã+ ne Kanaã nebã tẽnsã fãa, n wa baas ne Bɛɛr-seba+ sẽn be Zida Negɛɛbã.+ 8 Woto, bãmb saaga soolmã fãa n lebg n wa Zerizalɛm kiis a wɛ la rasem pisi poore. 9 A Zowaab togsa rĩmã nin-buiidã bãmb sẽn sõdã sõor zãnga. Israyɛll nebã yɩɩ tãb-biis tus-kobs-nii sẽn bobd sʋʋse, tɩ Zida yɩ rap tus-kobs-nu.+

10 La a Davɩɩd sẽn kɩt tɩ b sõd nin-buiidã poore, a sũurã ning-a-la taale.+ Dẽ, yẽ yeela a Zeova yaa: “Mam sẽn maan bõn-kãnga wã, mam beega+ wʋsgo. La masã, Zeova, m bõos tɩ y kõ y tʋm-tʋmdã sugr a beegrã yĩnga.+ Bala mam maana yalemd meng-menga.”+ 11 A Davɩɩd sẽn yik vẽkembeoogã, a Zeova goma ne no-rɛɛs a Gaad+ sẽn yaa a Davɩɩd bãngdã,* n yeel-a yaa: 12 “Kẽng n tɩ yeel a Davɩɩd yaa: ‘Ad a Zeova sẽn yeele: “Mam na n wilga foo bũmb a tãabo. Yãk fo sẽn dat a soab tɩ m maan-fo.”’”+ 13 Dẽ, a Gaad kẽnga a Davɩɩd nengẽ n tɩ yeel-a yaa: “Yãmb datame tɩ yʋʋm a yopoe kom kẽ y soolmã pʋgẽ bɩ,+ bɩ y ratame tɩ y bɛɛbã rig-y tɩ y zoe kiis a tãabo?+ Wall y ratame tɩ bã-loangdg varg y soolmã neb rasem a tãabo?+ Tags-y neer n yãk m sẽn segd tɩ leok sẽn tʋm-a maamã bũmb ninga.” 14 A Davɩɩd leoka a Gaad yaa: “Yellã namsda maam wʋsgo. M kotame tɩ y bas tɩ d lʋɩ a Zeova nugẽ,+ t’a nimbãan-zoeerã yaa wʋsgo,+ la m da lʋɩ ninsaal nugẽ ye.”+

15 Dẽ, a Zeova kɩtame tɩ bã-loangdg+ kẽ Israyɛll soolmẽ wã, sẽn sɩng ne baraar yibeoog n tãag wakat ning b sẽn yãkã. La neb tus-pis-yopoe n ki,+ sẽn sɩng ne Dan n tãag Bɛɛr-seba.+ 16 Malɛkã sẽn tẽeg a nug n na n sãam Zerizalɛmmã, a Zeova sũur sãama* ne yel-beedã,+ t’a yeel malɛkã sẽn wat ne sãoong nin-buiidã sʋkã yaa: “Sekame! Sik f nug masã.” A Zeova malɛkã ra bee Zebuus rao+ a Arona+ zɛɛgã noore.

17 A Davɩɩd sẽn yã malɛkã sẽn kʋʋd nin-buiidã, a yeela a Zeova yaa: “Yaa maam n beege. Maam n maan yel-wẽndã. La nin-kãensã*+ maana bõe? Mam kotame tɩ y sɩbg maam ne m ba wã roog rãmba.”+

18 Woto, a Gaad waa a Davɩɩd nengẽ baraar n yeel-a yaa: “Yik-y n tɩ me tẽn-kugr Zebuus rao+ a Arona zɛɛgẽ wã a Zeova yĩnga.” 19 A Davɩɩd saka a Gaad goamã n yik n kẽng wa a Zeova sẽn da yeelã. 20 A Arona sẽn yã rĩmã sẽn wat a nengẽ wã, zĩig pʋgẽ, a yiime n tɩ wõgemd rĩmã taoor n fõgen a neng tẽnga. 21 A Arona soka rĩmã yaa: “Yaa noog tɩ m zu-soab la m dĩmã wat a tʋm-tʋmdã nengẽ?” T’a Davɩɩd leoke: “Yaa sẽn na n da f zɛɛgã n me tẽn-kugr a Zeova yĩnga, sẽn na yɩl tɩ bã-loangdgã sẽn kʋʋd nin-buiidã sa.”+ 22 La a Arona yeela a Davɩɩd yaa: “Mam zu-soab la m dĩma, reeg-y zɛɛgã n kõ Wẽnnaam maoong ning fãa sẽn yaa sõma ne yãmba. Ad niis sẽn na n maan maoong sẽn yõogd bugmã, n paas zɛɛgã ra-vuudsã, la niisã ra-balgdsã sẽn na n tall n yõgen bugmã. 23 M dĩma, maam a Arona kõta yãmb bõn-kãensã fãa.” Dẽ, a Arona leb n yeela rĩmã yaa: “Bɩ a Zeova sẽn yaa yãmb Wẽnnaamã ning-y barka.”

24 La rĩmã leoka a Arona yaa: “Ayo. Mam na n da-a-la fo nengẽ wa sẽn zems a ligdã. Mam pa na n dɩk zaalem bũmb n maan maoong sẽn yõogd bugum n kõ mam Wẽnnaam a Zeova ye.” Woto, a Davɩɩd raa zɛɛgã ne niisã wanzuri sɩkl* pis-nu.+ 25 A Davɩɩd mee tẽn-kugr+ be a Zeova yĩnga, n maan maand sẽn yõogd bugum ne zems-n-taar maando. Woto, a Zeova reega nin-buiidã kosgo,+ la bã-loangdgã sẽn da kʋʋd Israyɛll nebã saame.