A NAHUM SEBRE
1 Ad bʋ-kaoor koɛɛg b sẽn togs Niniiv+ tẽngã wɛɛngẽ. Yaa sebr sẽn gomd vẽnegr ning Ɛlkoos rao a Nahum* sẽn yã wã yelle:
2 A Zeova yaa Wẽnnaam sẽn dat tɩ b waoog yẽ a ye tãa,+ la sẽn dokd a sũuri.
A Zeova rokda a sũuri. A na n wilga a sũ-puugrã.+
A Zeova rokda a sũur ne a bɛɛbã.
A bĩngda a sũ-puugrã a bɛɛbã yĩnga.
3 A Zeova sũur pa yikd tao-tao ye.+ A pãngã yaa kãsenga.+
Baasgo, a Zeova pa na n tol n bas n pa sɩbg neb nins sẽn segd ne sɩbgrã ye.+
A sorã bee sãoong sobg pʋgẽ.
Sawatã yaa a naoã wubsgu.+
Basan ne Karmell kʋɩtame.+
Libã tɩ-puudã zelgdame.
5 Yẽ yĩnga, tãensã rigimdedame,
tɩ kunkubã yẽnegdẽ.+
A nengã yĩnga, tẽngã na n zũndgame.
Na n yɩɩ woto ne tẽngã, n paas neb nins fãa sẽn be a zugã.+
6 Ãnda n tõe n yals a sũ-puugrã taoore?+
Ãnda n tõe n yals a sũ-yikrã tʋʋlem taoore?+
A na n kiiga a sũ-puugrã wa bugum.
A na n wãa kug-bɛdã.
7 A Zeova yaa sõma.+ A yaa zĩ-lilldg toog wakate.+
A geta* neb nins sẽn baood koglg yẽ nengẽ wã yelle.+
8 A na n kɩtame tɩ sa-kãseng wa sãam Niniiv* zãnga.
La lik na n diga a bɛɛbã.
9 Bõe la yãmb na n sed taab n maan a Zeova?
A na n kɩtame tɩ sãoong zãng-zãng wa.
Toogã pa na n wa naoor a yiib-n-soab ye.+
10 Bãmb kala taab wa gõose.
B yaa wa neb sẽn yũ rãam* tɩ b nensã yilimdẽ,
la b na n dɩɩ bugum wa mo-koeemse.
11 Ned sẽn magd n na n maan a Zeova wẽng n na n yi fo pʋgẽ.
Yaa ned sẽn kõt sagl-yoodo.
12 Ad a Zeova sẽn yeele:
“Baa b sẽn tar pãng wʋsg tɩ b sõorã me waoogẽ wã,
b na n lʋɩɩme, n meneme.
Mam da namsda foo,* la m pa na n le nams-f ye.
13 Masã, mam na n kaooga yubl-balgdgã b sẽn balg-fã,+
la m kao bãensã sẽn sẽb-fã.
14 A Zeova yiisa noor fo* yĩnga:
‘Ned pa na n kɩt tɩ fo yʋʋrã ra menem ye.
Mam na n menesa bõn-naands nins b sẽn peesã, la bõn-naands nins b sẽn dõog tɩ be fo wẽnnaam-dãmbã roogẽ wã.
Mam na n tuu yaoog fo yĩnga, bala fo ka bark ye.’
15 Gese! Ned sẽn wat ne koe-noogo,+
la sẽn sẽn moond laafɩ koɛɛg n be tãensã zut n watẽ.
Yãmb a Zida neba, maan-y y tigã.+ Pids-y y pʋlemsã.
Bala nin-yaalgã pa na n tol n le pasg yãmb soolmã ye.
B na n sãam-a-la zãnga.”
2 Ned sẽn sãeegd n wa n na n zab ne foo.*+
Gũ-y lalsã.
Kell-y n ges-y sorã.
Keng-y y mense, la y maan y sẽn tõe fãa n tall pãng zabr yĩnga.
2 Bala a Zeova na n kɩtame t’a Zakoob yagensã le zẽk b zugu.
A na n kɩtame tɩ Israyɛll nebã le zẽk b zugu.
Bala sãamdbã sãama bãmba.+
B sãama bãmb wilã.
3 A gãndaadã gãnã yaa miidu.
A tãb-biisã yera fu-miidu.
Daar ning a sẽn segend zabrã,
a zabr saar-dãmbã* kutã pɩnda wa bugum,
tɩ b zẽgsd kãn sẽn maan ne zenevirie raado.
4 Zabr saar-dãmbã zoeta yaar soayã zutu.
B zoet n pɩʋʋmda zãma wã zĩisẽ ne tʋʋlem.
B pɩnda wa bug-vɩlense, la b yãgd wa saaga.
5 A na n tigma a soda-nanambsã.
B na n zoetame la b lagsd n lʋɩtẽ.
B zoeta ne tʋʋlem n dabd a lalgẽ wã.
B paasda lalgã pãnga.
7 B yiisa noore: B yeega a futã n bas-a beelle.
B tall-a lame n looge, t’a yem-pogsã wõosdẽ.
B rãamdã yaa wa marwal sẽn yãbda, la b pãbd b yãadã.*
8 Niniiv yẽbgrã tɛka,+ a ra yaa wa bãka,
la masã a nebã zoetame.
“Yals-y-yã! Yals-y-yã!”
La ned baa a ye pa wẽnemded ye.+
9 Zɛ-y wanzuri, zɛ-y sãnem!
Laogã pa tõe n sa ye.
B naag-a-la ne bõn-sõma buud fãa n bĩngi.
10 Tẽngã yaa vɩʋʋgo, ned ka a pʋgẽ ye. B sãam-a lame!+
Rabeemã kɩtame tɩ b sũyã bondge, tɩ b rũmã pãbd taaba, tɩ b seesã rigda.
B fãa nensã bendgame.
11 Gɩgma wã gãag zĩig bee yɛ?+ Yaa zĩig ning gɩgem-poalã sẽn dɩte,
tɩ gɩgemdã yit ne a biigã
tɩ ned kae n kẽesd-b rabeemã.
12 Gɩgemdã ra yõgda rũms wʋsg n tõsd n kõt a kambã.
A sãrame n kõ a gɩgem-yãansã.
A ra kɩtdame t’a gãagã zĩig pit ne rũms a sẽn yõge,
la ne rũms a sẽn tõse.
13 A Zeova sẽn yaa tãb-biis naabã yeelame: “Gese! Mam zabda ne foom.+
Mam na n yõoga fo zabr saar-dãmbã bugum tɩ b rɩ tẽma.+
Sʋʋgã na n kʋʋ fo gɩgem-poalã.
Mam na n kɩtame tɩ fo fãabã sa tẽngã zugu.
B pa na n le wʋm fo koe-taasdbã rãamd yɛs ye.”+
3 Tẽng ning sẽn daagd zɩɩmã na n paama toogo!
Tẽngã tõr pida ne zãmb la fãabo.
A zɩ n bas fãab ye!
2 B wʋmda kalwaas rãamd a pʋgẽ, saar* nao rãamde,
n paas wed-moaag sẽn zoet la saar sẽn yɩgd dãamde.
3 Wed-rʋʋdã sẽn zao wed-moaagã, sʋʋgã sẽn yãgdã, kãndã sẽn pɩndã,
neb wʋsgã b sẽn kʋ wã, la kũ-rãmbã rʋyã:
Kũ-rãmbã sõor pa tõe n sõd n sa ye.
Nebã lagsda kũ-rãmbã n lʋɩtẽ.
4 Yaa pʋg-yoodrã yoobã sẽn yaa wʋsgã yĩnga.
Yẽ yaa pʋg-neer sẽn belgd nebã ne a neermã, la sẽn tar tɩt n maand nebã wẽnga.
A bẽda buud kẽer ne a yoobã n yõke, la a bẽd buud sãnda ne a tɩtã.
5 A Zeova sẽn yaa tãb-biis naabã yeelame: “Gese! Mam zabda ne foom.*+
Mam na n zẽka fo futã n lud f nengã.
Mam na n kɩtame tɩ buud toɛy-toɛy yã foo f zaala,
la m kɩt tɩ soolem toɛy-toɛy yã f yãndã.
7 Ned ning fãa sẽn na n yã foo na n zoe n zãaga ne foo,+ la a yeele:
‘B sãama Niniivi!
Ãnda n na n kʋm-a?’
Yɛ la m na n yã neb sẽn na n bels foo?
8 Fo sãoo No-amon+ sẽn da be Nill kʋɩlgã ko-soayã noorã la?+
Koom n da gũbg-a.
Mogrã n da yaa a arzɛka. Mogrã n da yaa a lalga.
9 A pãn-kãsengã ra yita Etiyopi ne Ezɩpti.
Put+ ne Libi nebã n da yaa a* sõngdba.+
10 La baasgo, b yõk-a lame n looge.
B tall-a lame n loog yembdo.+
B kɛɛ a kambã me n pas sotiis fãa zugu.
B yõga a nin-bɛdã n maan bãnd n pʋɩ,
la b sẽb a nin-kãsemsã fãa ne bãense.
11 Fo-me nengã na n yilma wa ned sẽn tɩg rãam.+
Fo na n tɩ solgame.
Fo na n baoo zĩig n solg sẽn na yɩl tɩ bɛ wã ra yã-f ye.
12 Fo lalsã fãa yaa wa kankams sẽn tar bi-rẽems sẽn mooge.
B sã n miim-ba, b na n sʋʋga sẽn dɩt-bã noorẽ.
13 Gese! Fo tãb-biisã yaa wa pagba, n be fo pʋgẽ.
Fo soolmã kʋɩlens na n paka yaleng fo bɛɛbã taoore.
Bugum n na n dɩ fo rignoyã sogdse.
14 Wi koom n bĩngi, b sẽn na n wa gũbg tẽngã yĩnga.+
Paas f lalsã pãnga.
Sig n kẽ bɛgdẽ wã n tab tãndã.
Rɩk tãn-koeem-wamdã.
15 Baa beenẽ, bugum n na n dɩ foo.
Sʋʋg n na n kʋ foom.+
A na n dɩɩ foo wa kalwaare.+
Paas f tãb-biisã sõor tɩ b yɩ wʋsg wa kalwaare!
Paas b sõorã tɩ b yɩ wʋsg wa sʋya!
16 Fo kɩtame tɩ f toandbã sõor yɩɩg ãdsã sẽn be saasẽ wã.
Kalwaarã wõoga a wʋʋgẽ, n yɩk n looge.
17 Fo gũudbã yaa wa sʋya,
tɩ f soda-nanambsã yaa wa kalwaare.
Waood wakate, b kẽeda yãgr sẽn maan ne kug pʋgẽ.
La wĩntoogã sã n puki, b yɩkdame n looge,
tɩ ned baa a ye pa mi b sẽn beẽ ye.
18 Asiiri rĩma, fo pe-kɩɩmbã* suusdame.
Fo nin-kãsemsã paa b zagsẽ.
Fo nin-buiidã sãeegame n be tãensã zutu,
tɩ ned baa a ye pa tigimd-b ye.+
19 Fo kõn paam yolsg f yel-beedã pʋgẽ ye.
Fo sãmpogrã pa tõe n tɩp ye.
Neb nins fãa sẽn na n wʋm fo kibarã na n wẽe nug-pogse.+
Bala ãnda n pa nams wakat fãa fo wẽnemã yĩnga?”+
Rat n yeel tɩ “Bɛlsda.”
Ebre, “mii.”
Ebre, “a zĩigã.”
Bɩ, “bɩle rãam.”
Rat n yeel tɩ Zida.
Rat n yeel tɩ Asiiri.
Rat n yeel tɩ Niniivi.
Yaa bũmb sẽn wõnd sarɛt tɩ wed-moos tatẽ.
Bɩ, “na n boogame.”
Ebre, “sũyã.”
Yaa bũmb sẽn wõnd sarɛt tɩ wed-moos tatẽ.
Rat n yeel tɩ Niniivi.
Ebre, “fo.”
Bɩ, “nanambsã.”