A SOFONI SEBRE
1 A Zeova goma ne a Kuusi biig a Sofoni* a Amo+ biig a Zoziyas+ sẽn yaa Zida rĩmã wakatẽ. A Kuusi yaa a Gedaliya biiga, t’a Gedaliya yaa a Amariya biiga, t’a Amariya yaa a Ezekɩyaas biiga. A yeel-a lame:
2 “Mam na n menesa bũmb fãa tẽn-gãongã zugu.”+ Yaa a Zeova n yeele.
3 “Mam na n menesa ninsaalbã ne rũmsã.
Mam na n menesa bõn-yɩgdɩ wã sẽn yɩgd yĩngrã, zĩmã sẽn be mogrã pʋgẽ wã,+
bũmb nins sẽn kɩtd tɩ ned lak n lʋɩ wã,*+ n paas nin-wẽnsã.
Mam na n yiisa ninsaalbã tẽn-gãongã zugu.” Yaa a Zeova n yeele.
4 “Mam na n tẽega m nug n zab ne Zida,
la m zab ne Zerizalɛm nebã fãa.
Mam na n menesa a Baal bũmb nins sẽn ket zĩ-kãnga wã zãnga.+
Mam na n menesa wẽn-sãamsã maan-kʋʋdbã yʋy ne maan-kʋʋdbã mense,+
5 n paas neb nins sẽn wõgemded rot zut n waoogd bũmb nins sẽn be saasẽ wã,*+
ne neb nins sẽn wõgemded n pʋlemd a Zeova tɩ b na n maana sɩd ne-a,+
n yaool n pʋlemd a Malkam me tɩ b na n maana sɩd ne-a wã.+
6 Mam na n menesa neb nins sẽn basd a Zeova tũubu,+
la sẽn pa baood a Zeova wall b pa sokd-a n na n bãng a raabã.”+
7 Pa-y sɩɩ a Zeova sẽn yaa Zu-soab sẽn ka to wã taoore, bala a Zeova daarã kolgame.+
A Zeova segla maoongo. A welga a sẽn bool b rãmbã toore.*
8 “Maam a Zeova maoongã daare, mam na n soka nanambsã,
rĩmã kambã,+ ne neb nins fãa sẽn yer bu-zẽms futã.
9 Daar-n-kãnga, mam na n soka neb nins fãa sẽn dʋʋd zĩ-zãntlgã,*
neb nins fãa sẽn kɩt tɩ b zu-soben-dãmbã zags pid ne nen-kɛglem la zãmbã.”
10 A Zeova yeelame: “Baraare,
kɛleng rãamd n na n yi Zĩmã rignoorẽ.+
Wiisg rãamd n na n yi tẽngã sak a yiib-n-soabã pʋgẽ,+
tɩ lʋɩɩs rãamd sẽn tar pãng yi kunkubẽ wã.
12 Wakat kãnga, mam na n maaga m yĩng n vaees Zerizalɛm ne fɩtl-dãmba.
Mam na n soka sek-m-mens rãmbã sẽn yet b sũyẽ wã yaa:
‘A Zeova pa na n maan sẽn sõmbe, a pa na n maan sẽn yaa wẽng me ye.’+
13 Neb n na n zɛ b paoongã, la b sãam b rotã.+
B na n mee roto, la b kõn zĩnd b pʋsẽ ye.
B na n sela viyn tɩɩse, la b kõn yũ b divẽ wã ye.+
14 A Zeova ra-kãsengã kolgame!+
A kolgame, n wat ne tʋʋlem wʋsgo!*+
A Zeova daarã na n yɩɩ rabeem daare.+
Daar-n-kãnga, zabr gãndaad na n kelmame.+
15 Daar-n-kãng yaa sũ-puugr daare,+
toog la sũ-sãang daare,+
sob-kãseng la sãoong daare,
lik la libsg daare,+
la sawat la lik bida daare.+
16 Baraare, nebã na n peeba baorg la b kaas zabr kaasgo,+
n zab ne tẽns nins sẽn gũbg lalsã, la ne gasd nins sẽn lugi, n be gõad zĩisẽ wã.+
17 Mam na n kɩtame tɩ toog paam ninsaalbã,
tɩ b kẽnd wa zoense,+
bala b maana yel-wẽn n beeg a Zeova.+
18 B wanzuri wã ne b sãnemã pa na n tõog n fãag-b a Zeova sũ-puugrã daar ye.+
Mam yẽesmã sẽn dɩt wa bugmã yĩnga, tẽngã tõr na n dɩɩ bugum.+
Bala mam na n sãama tẽngã nebã fãa. Na n sɩd yɩɩ sãoong meng-menga.”+
2 Nand tɩ noor ning Wẽnnaam sẽn yiisã pidsi,
nand tɩ daarã loog wa wudgu,
nand t’a Zeova sũ-pu-kãsengã wa yãmb zutu,+
nand t’a Zeova sũ-puugrã daar ta yãmb yĩnga,
3 bɩ y bao a Zeova,+ yãmb a dũniyã sik-m-mens rãmbã fãa
sẽn tũud a noyã sẽn yaa tɩrsã.*
Bao-y tɩrlem la y bao sik-m-menga.
Daar ninga,* b na n solga yãmb a Zeova sũ-puugrã daare.+
4 Bala Gaaza na n lebga tẽng b sẽn daag n base,
tɩ Askalon lebg raboogo.+
B na n diga Asdood nebã ne wĩnto-sʋka,
la b sãam Ekron zãnga.+
5 “Toog be ne Kerɛt nebã sẽn be mogrã noorã!+
A Zeova ninga yãmb taale.
Foom a Kanaã sẽn yaa Filisti nebã soolmã, mam na n sãama foo
tɩ ned baa a ye pa kell ye.
6 Mogrã noor na n lebga rũms wãbneg zĩisi,
tɩ buls be be pe-kɩɩmbã yĩnga, n paas yãg sẽn maan ne kug piisã yĩnga.
7 Be na n lebga Zida buudã neb nins sẽn ketã soolem.+
B na n paamda rɩɩb be.
Zaabre, b na n gõee Askalon rotã pʋsẽ.
Bala b Wẽnnaam a Zeova na n gesa b yelle,
la a tall b yembsã n lebg n wa.”+
8 “Mam wʋma Mowaab nebã paoogr goamã,+ la Amon nebã tʋyã,+
b sẽn yaal mam nin-buiidã la b gom gom-bɛd b soolmã wɛɛngẽ wã.”+
9 Israyɛll Wẽnnaam a Zeova sẽn yaa tãb-biis naabã yeelame yaa: “Mam wẽenda ne m meng
tɩ Mowaab na n lebga wa Sodomme,+
tɩ Amon lebg wa Gomoore,+
rat n yeel tɩ gõos zĩiga, yamsem bok la zĩ-vɩʋʋg wakat fãa yĩnga.+
Mam nin-buiidã neb nins sẽn ketã na n zɛɛ b teedã.
Mam buudã neb nins sẽn ketã na n deega b paoongã n sooge.
10 Woto n yaa bũmb ning sẽn na n paam-ba, b wuk-m-mengã yĩnga,+
bala b yaala tãb-biis naab a Zeova nin-buiidã la b wuk b mens ne-ba.
11 A Zeova na n kẽes-b-la rabeem wʋsgo.
Bala a na n kɩtame tɩ tẽngã wẽnnaam-dãmbã fãa lebg zaalem.*
Ko-sʋk tẽnsã buud toɛy-toɛyã neb na n wõgemda a taoore.*+
Ned fãa na n paa a zĩigẽ n wõgemde.
12 Yãmb a Etiyopi neba, mam sʋʋgã na n kʋʋ yãmb me.+
13 Mam na n tẽega m nugã n tees rɩtg sẽnese, n sãam Asiiri.
Mam na n kɩtame tɩ Niniiv lebg raboogo,+ la zĩig sẽn yaa koɛɛng wa we-rasempʋɩɩga.
14 Rũms sul na n gãanda a pʋgẽ. Na n yɩɩ we-rũms buud fãa.*
Yʋngo, pelikã-rãmb* la sẽema na n gãanda a ra-lugsã sẽn lʋɩ wã sʋka.
Bõn-yɩgdɩ* n na n yãbd fenetrẽ wã.
Sãoong n na n zĩnd rigno-koakẽ wã.
Bala mam na n kɩtame tɩ sɛɛdr daadã kaadr-dãmb rɩg vɩʋʋgẽ.
15 Tẽng ning sẽn da wukd a meng la a zĩ ne bãanã la woto,
tẽng ning sẽn da yete: ‘Mam pa tar to ye. Mam pa tar mak-n-taag ye.’
Ad a sɩd lebga bũmb sẽn kẽesd rabeem,
zĩig we-rũms sẽn wat n gãe!
Ned ning fãa sẽn na n loog a sɛɛgẽ na n fɩɩlame la a gil a nug n tees-a.”+
3 Toog bee ne tẽng ning sẽn yaa tõata, rẽgdo, la sẽn weoogd a nebã!+
2 A pa kelg ned baa a ye koɛɛg ye.+ A pa sak kiblg ye.+
A pa teeg a Zeova ye.+ A pa bao n na n kolg a Wẽnnaamã ye.+
3 A nanambsã sẽn be a pʋgẽ wã yaa wa gɩgma sẽn kelemde.+
A bʋ-kaoodbã yaa wa we-baas sẽn yi yʋng n baood rũnga.
B pa basd kõbr meng tɩ vẽeg beoog ye.
4 A no-rɛɛsdbã yaa tɩta-neb la zãmb dãmba.+
5 A Zeova bee tẽngã pʋgẽ n yaa tɩrga.+ A pa maand wẽng ye.
Yibeoog fãa, a wilgda a noyã+
n pa vaandẽ, wa beoogã vẽegr sẽn pa vaandã.
La nin-wẽnsã pa mi yãnd baa bilf ye.+
6 “Mam sãama buud toɛy-toɛya. B gõadã zĩisẽ gasdã sãamame.
Mam sãama b soayã hal tɩ ned pa le tũud be ye.
B galʋ-tẽnsã lebga raboodo, tɩ ned pa le be b pʋsẽ ye.+
7 Mam yeelame yaa: ‘Vẽenega, fo na n zoee maam, la f sak kiblgu,’*+
La b ra maneg n nonga wẽng maanego.+
8 ‘Woto wã, bɩ y kell n segl y mens* n gũ maam,+
hal n tãag daar ning mam sẽn na n yik n zɛ teedã,*
bala mam kaoo bʋʋd n yãk yam n na n tigim buud toɛy-toɛyã ne rĩmdã,
sẽn na yɩl n kiig m sũ-puugrã b zutu, m sũ-pu-kãsengã fãa.+
Bala mam yẽesmã sẽn dɩt wa bugmã yĩnga, tẽngã tõr na n dɩɩ bugum.’+ Yaa a Zeova n yeele.
9 ‘Rẽ poore, mam na n toeema buud toɛy-toɛyã buud-goamã tɩ lebg buud-gomd sẽn yaa yɩlemde,
sẽn na yɩl tɩ b fãa bool a Zeova yʋʋrã,
10 Neb nins sẽn yõkd maam sɛɛgã, rat n yeel tɩ mam neb nins sẽn sãeegã
na n talla kũun n yi Etiyopi kʋɩlsã soolmẽ wã n wa kõ maam.+
11 Baraare, fo pa na n paam yãnd
bũmb nins fãa fo sẽn maan n kɩɩs maamã yĩng ye.+
Bala mam na n yiisa neb nins sẽn waoogd b mens wʋsgã fo pʋgẽ.
Fo kõn tol n le wuk f meng mam tãn-sõngẽ wã ye.+
12 Mam na n basame tɩ sik-m-mens rãmb la sũ-maasem dãmb zĩnd fo pʋgẽ.+
B na n baoo koglg maam a Zeova nengẽ.
13 Israyɛll neb nins sẽn ketã+ pa na n maan sẽn pa tɩrg ye.+
B pa na n yag ziri, wall b tall b zɩlma wã n zãmb ned ye.
B na n dɩɩme* la b gãande, tɩ ned kae n na n kẽes-b rabeem ye.”+
14 Foom a Siyõ bi-pugla, kaas ne sũ-noogo!
Yãmb a Israyɛll neba, kɩdm-y sũ-noogo!+
Foom a Zerizalɛm bi-pugla, maan sũ-noog la f kɩdem ne f sũur fãa!+
15 A Zeova basa fo sɩbgre.+
A kɩtame tɩ fo bɛ wã loog n bas foo.+
A Zeova sẽn yaa Israyɛll Rĩmã bee fo pʋgẽ.+
Fo pa na n le zoe yel-beed ye.+
16 Baraare, b na n yeela Zerizalɛm yaa:
“Foom a Siyõ, ra zoe rabeem ye.+
Ra koms raood ye.*
17 Fo Wẽnnaam a Zeova bee fo pʋgẽ.+
A yaa Pãng soab n na n fãag foo.
A na n kɩdma fo yĩng ne sũ-no-kãsenga.+
A na n paa sɩddd* a nonglmã yĩnga.
A na n kɩdma fo yĩng ne sũ-noog kaasgo.
18 Mam na n tigma neb nins sẽn maand sũ-sãang b sẽn pa tõog n wa fo tigã yĩngã.+
B pa wa fo nengẽ, b sẽn da paamd paoogr yembd weoogã yĩnga.+
19 Wakat kãnga, mam na n sɩbga sẽn weoogd-b foomã fãa.+
Mam na n fãaga sẽn keoosd-bã,+
la m tigim sẽn da sãeeg-bã.+
Soolem ning b sẽn paam yãndã fãa pʋgẽ,
mam na n kɩtame tɩ b lebg buud b sẽn pẽgde, la buud yʋʋr sẽn yi.
20 Wakat kãnga, mam na n talla yãmb n lebg n wa.
Wakat kãnga, mam na n tigma yãmba.
Mam sã n wa tigim yãmb neb nins sẽn be yembdã yãmb nifẽ,+
mam na n kɩtame tɩ yãmb lebg buud yʋʋr sẽn yi, la buud b sẽn pẽgd+ tẽngã buud toɛy-toɛyã fãa sʋka.” Yaa a Zeova n yeele.
Rat n yeel t’a “Zeova n solge, (n bĩngi.)”
Tog n yaa teed nins b sẽn maan bõn-naandsã pʋʋsg yĩnga, la bũmb nins b sẽn maand bõn-naandsã pʋʋsg wɛɛngẽ wã.
Ebre, “saasẽ tãb-biisã.” Vẽenega, yaa wĩndgã, kiuugã la ãdsã yell la b sẽn gomdã.
Bɩ, “A yɩlga a sẽn bool b rãmbã.”
Tõe tɩ yaa zĩig b sẽn maneg tɩ zẽk rĩmã geer yĩnga.
Wõnda yaa Zerizalɛm sak sẽn pẽ Zĩmã rignoore.
Bɩ, “toandbã.”
Ebre, “b kɩtame tɩ lɛɛbdbã fãa sĩndi.”
Bɩ, “tao-tao ne tʋʋlem!”
Ebre, “yãadã.”
Ebre, “a bʋ-kaoorã.”
Bɩ, “Tõe tɩ.”
Bɩ, “wagle.”
Bɩ, “na n waoog-a lame.”
Ebre, “buud a yembr rũms fãa.”
Yaa liuul buudu.
Tõe me tɩ yaa sobgã rãamd wall we-rũng yãbre.
Bɩ, “remsgo.”
Bɩ, “sɩbg-a-la.”
Bɩ, “maag y mens.”
Pa rẽ bɩ, “yik n kõ kasetã.”
Ebre, “tũ maam bãok ne bãoko.”
Bɩ, “wãbame.”
Ebre, “Ra bas tɩ f nusã lʋɩ ye.”
Bɩ, “A yam na n gãanda bãan.”