A AAZE SEBRE

1 Rĩm a Daryuus naamã yʋʋm a yiib-n-soabã kiuug a yoob-n-soabã pipi daarã, a Zeova tũnuga ne no-rɛɛs a Aaze*+ n gom ne a Seyatiyɛll biig a Zorobabɛll+ sẽn yaa Zida guvɛrneerã, la ne a Yehozadak biig a Zozuwe sẽn yaa maan-kʋʋdb kãsmã, n yeele:

2 “Ad a Zeova sẽn yaa tãb-biis naabã sẽn yeele: ‘Nin-kãensã yetame yaa: “A Zeova roogã meeb* wakat nan pa ta ye.”’”+

3 A Zeova le tũnuga ne no-rɛɛs a Aaze+ n yeele: 4 “Rẽ yĩnga, masã yaa wakat yãmb sẽn tog n be y ro-neebã pʋsẽ, tɩ ro-kãngã yaool n yaa raboog sɩda?+ 5 Ad a Zeova sẽn yaa tãb-biis naabã sẽn yeele: ‘Tags-y y manesmã zug neer n gese. 6 Yãmb bʋda bõn-buud wʋsgo, la yãmb kẽebda bilfu.+ Yãmb rɩtame la y pa tɩgd ye. Yãmb yũudame, la pa sekd yãmb ye. Yãmb yera futu, la ned baa a ye waood pa yit ye. Ned sẽn tʋmd n deegd yaood ningda a yaoodã korg sẽn tar võy wʋsg pʋgẽ.’”

7 “Ad a Zeova sẽn yaa tãb-biis naabã sẽn yeele: ‘Tags-y y manesmã zug neer n gese.’

8 “‘Rʋ-y tãngã zug n bao raad n wa.+ Me-y roogã+ sẽn na yɩl tɩ mam sũur yɩ noog ne-a, la tɩ m paam waoogre.’+ Yaa a Zeova n yeele.”

9 “A Zeova sẽn yaa tãb-biis naabã yeelame: ‘Yãmb saagdame tɩ y na n paama bũmb wʋsgo, la y paamda bilfu. Yãmb sã n tall-a n kẽ y rotẽ wã, mam fʋʋsd-a lame t’a meneme.+ Bõe yĩnga? Bala mam doogã yaa raboogo, tɩ yãmb ned kam fãa yaool n tãndgd a meng roog yĩnga.+ 10 Rẽ n kɩt tɩ saasã sẽn be yĩngrã pa le sikd meenem yãmb zutu, tɩ tẽngã me pa le womd biisã. 11 Mam kɩtame tɩ war be yãmb pʋtẽ wã ne tãensã zutu. Yaa rẽ n so tɩ koodo, divẽ-paalga, kaam, tɩɩs la mood pa le be wã. Yãmb ne rũmsã fãa namsdame. Yãmb sẽn tʋmd wʋsgã fãa yaa zaalem.’”

12 A Seyatiyɛll+ biig a Zorobabɛlle,+ a Yehozadak+ biig a Zozuwe sẽn yaa maan-kʋʋdb kãsmã ne nebã fãa kelga b Wẽnnaam a Zeova koɛɛgã, la no-rɛɛs a Aaze goamã, sẽn yaa b Wẽnnaam a Zeova n tʋm-a wã yĩnga. Rẽ kɩtame tɩ nin-buiidã sɩng a Zeova zoeese.

13 Rẽ poore, a Zeova koe-taasd a Aaze goma ne nin-buiidã wa sẽn zems a Zeova sẽn tʋm-a wã, n yeele: “A Zeova yeelame yaa: ‘Mam bee ne yãmba.’”+

14 Woto, a Zeova kenga a Seyatiyɛll biig a Zorobabɛll sẽn yaa Zida guvɛrneerã raoodo,+ n keng a Yehozadak biig a Zozuwe sẽn yaa maan-kʋʋdb kãsmã raoodo,+ la a keng nebã fãa raoodo. B waame, n le sɩng b Wẽnnaam a Zeova sẽn yaa tãb-biis naabã roog meebo.+ 15 Yɩɩ rĩm a Daryuus naamã yʋʋm a yiib-n-soabã kiuug a yoob-n-soabã rasem pisi la a naasã daare.+

2 Kiuug a yopoe-n-soabã rasem pisi la a ye wã daare, a Zeova goma ne no-rɛɛs a Aaze+ n yeel yaa: 2 “M bõos tɩ f sok a Seyatiyɛll biig a Zorobabɛll+ sẽn yaa Zida guvɛrneerã,+ a Yehozadak+ biig a Zozuwe+ sẽn yaa maan-kʋʋdb kãsmã la nebã fãa yaa: 3 ‘Ãnda n be yãmb sʋkã n yã ro-kãngã* a pĩnd ziirã pʋgẽ?+ A yaa wãn to ne yãmb masã? B sã n dɩk-a n mak ne pĩndã, pa wõnd a yaa zaalem sɩda?’+

4 “A Zeova yeelame yaa: ‘La masã, Zorobabɛlle, tall raoodo. A Yehozadak biig a Zozuwe sẽn yaa maan-kʋʋdb kãsmã, fo-me tall raoodo.’

“A Zeova yeelame yaa: ‘Yãmb a soolmã neb fãa, tall-y raood n tʋme.’+

“‘Bala mam bee ne yãmba.’+ Yaa a Zeova sẽn yaa tãb-biis naabã n yeele. 5 ‘Tẽeg-y bũmb ning mam sẽn pʋlem yãmb y sẽn wa n yi Ezɩptã.+ Sẽn paase, mam vʋʋsmã ket n bee y sʋka.*+ Ra zoe-y rabeem ye.’”+

6 “Ad a Zeova sẽn yaa tãb-biis naabã sẽn yeele: ‘Ka la bilfu, mam na n le miima saasã la tẽngã, mogrã la tẽn-koɛɛngã.’+

7 “‘Sẽn paase, mam na n miima buud toɛy-toɛyã fãa, la buud toɛy-toɛyã fãa bõn-sõma wã* na n wa kẽe ro-kãngã pʋgẽ.+ Mam na n kɩtame t’a pid ne ziiri.’+ Yaa a Zeova sẽn yaa tãb-biis naabã n yeele.

8 “‘Wanzuri wã yaa maam n so. Sãnemã me yaa maam n so.’ Yaa a Zeova sẽn yaa tãb-biis naabã n yeele.

9 “‘Ro-kãngã ziir ning sẽn watã na n yɩɩ kãseng n yɩɩg pĩnd soabã.’+ Yaa a Zeova sẽn yaa tãb-biis naabã n yeele.

“‘Mam na n kɩtame tɩ laafɩ zĩnd zĩ-kãngã.’+ Yaa a Zeova sẽn yaa tãb-biis naabã n yeele.”

10 A Daryuus naamã yʋʋm a yiib-n-soabã, kiuug a wɛ soabã rasem pisi la a naasã daare, a Zeova goma ne no-rɛɛs a Aaze+ n yeele: 11 “Ad a Zeova sẽn yaa tãb-biis naabã sẽn yeele: ‘M bõos tɩ f sok maan-kʋʋdbã tõogã wɛɛngẽ yaa:+ 12 “Ned sã n zãad nemd sẽn yaa sõng a fuugẽ, tɩ fuugã sɩɩs buri, zẽedo, divẽ, kaam wall rɩɩb buud fãa, bõn-kãng na n lebga sõng bɩ?”’”

Maan-kʋʋdbã leokame yaa: “Ayo!”

13 Rẽ poore, a Aaze sokame yaa: “Ned sẽn yaa rẽgd a sẽn sɩɩs kũum* yĩng sã n sɩɩs bõn-kãensã a ye, bõn-kãng na n lebga rẽgd bɩ?”+

Maan-kʋʋdbã leokame yaa: “A na n lebga rẽgdo.”

14 Dẽ, a Aaze yeelame yaa: “Ad a Zeova sẽn yeele: ‘Nin-buiidã yaa woto. Bu-kãngã yaa woto mam taoore. Bãmb nusã tʋʋm fãa me yaa woto. Bũmb ning fãa b sẽn wat n kõt be wã yaa rẽgdo.’

15 “‘La masã, m bõos tɩ y tags bõn-kãngã zug neer rũndã tɛka: Nand tɩ b rɩk kugr n dogl kugr zug a Zeova roogã meeb yĩnga,+ 16 yɛlã ra yaa wãn to? Ned sã n da kolg kood sẽn dʋr n tẽed tɩ yaa pet pisi, a mikdame tɩ yaa pet piig bala. Ned sã n da kolg divẽ wẽkr bokã n na n toog divẽ yʋy pis-nu, a mikdame tɩ yaa yʋy pisi bala.+ 17 Mam sãama yãmb nusã tʋʋm fãa. Mam kɩtame tɩ pems-tʋʋlga, kood bãas la sapɩlem wa yãmb soolmẽ wã.+ La yãmb ned baa a ye pa lebg n wa mam nengẽ ye.’ Yaa a Zeova n yeele.

18 “‘M bõos tɩ y tags bõn-kãngã zug neer rũndã tɛka, kiuug a wɛ soabã rasem pisi la a naasã daar tɛka, a Zeova roogã yẽbgrã daar tɛka.+ Tags-y bõn-kãngã zug neere: 19 Bõn-buud ket n bee baoorẽ wã* bɩ?+ Viyn tɩɩsã, kankamsã, gernaad tɩɩsã ne oliiv tɩɩsã nan pa wom ye. Bɩ bõe? Rũndã tɛka, mam na n ninga yãmb barka.’”+

20 A Zeova le goma ne a Aaze kiuugã rasem pisi la a naasã daare,+ n yeele: 21 “Yeel a Zorobabɛll sẽn yaa Zida guvɛrneerã yaa: ‘Mam na n miima saasã la tẽngã.+ 22 Mam na n luba rĩm-dãmbã gɛyã, la m kɩt tɩ buud toɛy-toɛyã rĩmdã pãng sa.+ Mam na n luba saar-dãmbã* ne neb nins sẽn zao b zutã. Wed-moosã na n kiime, tɩ b rʋʋdbã wẽneg n kʋ taab ne sʋʋse.’”+

23 “A Zeova sẽn yaa tãb-biis naabã yeelame yaa: ‘Foom a Seyatiyɛll+ biig a Zorobabɛll+ sẽn yaa mam tʋm-tʋmdã, baraare, mam na n dɩka foo, n kɩt tɩ f lebg wa nugbĩng sẽn tar n ningd bãnde. Bala foo n yaa mam sẽn yãk a soabã.’ Yaa a Zeova n yeele. Yaa woto la a Zeova sẽn yaa tãb-biis naabã yeel-yã.”