SEBR B SẼN TOOL ROM DÃMBÃ

1 Maam a Poll yaa Kirist Zeezi yamba, la ned b sẽn bool t’a lebg tẽn-tʋmda, b sẽn welg toor Wẽnnaam koe-noogã yĩnga,+ 2 koe-noog ning a sẽn da kɩt t’a no-rɛɛsdbã pĩnd n togs Gʋls-sõamyã pʋgẽ wã. 3 Koe-no-kãng gomda a Biigã sẽn dog n yaa a Davɩɩd+ yagengã* yelle, 4 la sẽn vʋʋg n yi kũ-rãmb sʋk+ ne vʋʋsem sõngã pãnga, tɩ wilg t’a yaa Wẽnnaam Biigã.+ Bi-kãng yaa tõnd Zu-soab a Zeezi Kiristi. 5 Yẽ maasem yĩnga, mam paama Wẽnnaam barka,* la m paam t’a yãk-m tɩ m yaa tẽn-tʋmd+ sẽn na yɩl tɩ buud fãa neb+ tõog n wilg tɩ b tara tẽeb la b sak-a, a yʋʋrã pẽgr yĩnga. 6 B boola yãmb me bu-kãens sʋk tɩ y yɩ a Zeezi Kirist rẽnda. 7 Maam n gʋls seb-kãngã n tool neb nins fãa sẽn be Rom n yaa Wẽnnaam nin-nongdse, la neb b sẽn bool tɩ b yɩ nin-sõamyã:

Bɩ bark* la laafɩ sẽn yit Wẽnnaam sẽn yaa tõnd Ba wã nengẽ, la Zu-soab a Zeezi Kirist nengẽ wã zĩnd ne yãmba.

8 Nananda, mam pʋʋsda m Wẽnnaamã bark yãmb fãa wɛɛngẽ a Zeezi Kirist maasem yĩnga. Bala b gomda yãmb tẽebã yell dũniyã gill zugu. 9 Wẽnnaam ning mam sẽn sakd ne m sũur fãa, n moond koe-noog ning sẽn gomd a Biigã yellã yaa mam kaset soab tɩ wakat fãa, mam pʋʋsdame n gomd yãmb yell n pa basdẽ,+ 10 n bõosdẽ tɩ sã n tõe bɩ m yaa n wa yãmb nengẽ, sã n zemsa ne Wẽnnaam daabo. 11 Bala mam data ne m sũur fãa n yã yãmba, n kõ-y kũun sẽn yit Wẽnnaam nengẽ* tɩ y tẽebã paam pãnga. 12 Mam sẽn dat n yeelã yaa tɩ ned kam fãa tẽeb na n kenga a to raoodo.+ Yãmb tẽebã keng mam daoodo, tɩ ma-me tẽebã keng yãmb raoodo.

13 M saam-biisi, mam datame tɩ y bãng tɩ naoor wʋsgo, mam magame n na n wa yãmb nengẽ, sẽn na yɩl n yã koɛɛgã m sẽn na n moon be wã bi-sõma, wa sẽn yɩ to-to buud a taabã nengẽ wã me. La hal tɩ ta masã mam paama gɩdgre. 14 Mam tara Gɛrk-rãmbã ne sãambã* samde, la yam dãmbã ne sẽn be-b zɩɩlem pʋgẽ wã samde. 15 Rẽ n kɩt tɩ mam dat ne m sũur fãa n moon yãmb me sẽn be Rommã+ koe-noogã. 16 Bala mam pa zoet yãnd ne koe-noogã ye.+ Sɩd-sɩda, a yaa bũmb Wẽnnaam sẽn tũnugd ne n wilgd a pãngã sẽn na yɩl n wa ne fãagr ned ning fãa sẽn tẽed yĩnga,+ ne Zʋɩf pipi,+ la ne Gɛrk me.+ 17 Koe-noogã maasem yĩnga, Wẽnnaam tɩrlmã lebgda vẽeneg ne tẽebo, la tẽeb yĩnga,+ wa b sẽn gʋlsã: “La nin-tɩrg na n vɩɩmda tẽeb yĩnga.”+

18 Wẽnnaam sũ-puugrã+ yita saasẽ n sigd wẽn-kɩɩsdbã la tʋʋm-wẽns-maandbã sẽn tũnugd ne manesem sẽn pa zems sẽn na yɩl tɩ nebã ra bãng sɩdã zutu.+ 19 Bala bũmb nins nebã sẽn tõe n bãng Wẽnnaam zugã yaa vẽenes bãmb sʋka, Wẽnnaam sẽn kɩt tɩ b lebg vẽenes ne-bã yĩnga.+ 20 Baa ned sẽn pa tõe n yã Wẽnnaamã, hal dũniyã naaneg tɛka, ninsaal tõe n bãngame tɩ Wẽnnaam yaa pãng sẽn ka sɛt soaba,+ la t’a sɩd yaa Wẽnnaam,+ rẽ sẽn yaa vẽeneg bõn-naandsã sʋkã yĩnga.+ Rẽ n so tɩ nin-kãensã pa tõe n padem n yi ye. 21 Bala baa ne b sẽn bãng Wẽnnaamã, b pa pẽg-a a sẽn yaa Wẽnnaamã yĩnga, wall b pʋʋs-a bark ye. La b tagsa wã lebga tags-vɩɩdo, tɩ b sũyã sẽn be zɩɩlem pʋgẽ wã lebg lika.+ 22 Baa b sẽn yet tɩ b tara yamã, b lebga yalemba, 23 n dɩk Wẽnnaam sẽn ka kiidã ziirã n tek ne bõn-naands sẽn wõnd ninsaal sẽn yaa kiidã, la bõn-yɩgdɩ, la rũms sẽn tar nao a naase, la bõn-vuudsi.+

24 Rẽ n so tɩ b sẽn dat n tũ b sũyã ratmã yĩnga, Wẽnnaam bas-b lame tɩ b tʋmd dẽgd n paoogd b yĩnsã. 25 B rɩka Wẽnnaam sɩdã n tek ne ziri, la b bas Naandã n waoogd* bõn-naandsã la b sakd-b ne b sũur fãa. La yaa Naandã bal n so pẽgr wakat fãa. Ãmiina. 26 Yaa rẽ yĩng la Wẽnnaam sẽn bas-b tɩ yoobã tʋlsem sẽn loog nug soog-bã.+ Bala b pagbã teka pag ne rao lageng ning sẽn zemsã ne sẽn pa zems baa-baa.+ 27 Woto me, rapã basa pagbã gãag sẽn zemsã, n tʋlg taab ne tʋlsem-kãseng tɩ rao ne rao tʋmd wɩɩbdo,+ n deegd b tudgrã yaood* zãng b mens yĩnsã pʋsẽ.+

28 B sẽn pa ges tɩ zemsame tɩ b bao n bãng Wẽnnaamã yĩnga, Wẽnnaam bas-b-la ne b tags-wẽnsã, sẽn na yɩl tɩ b maan bũmb nins sẽn pa zemsã.+ 29 La b sũyã pida ne sẽn pa tɩrg+ buud fãa, ne wẽnem, ne rat-tɩ-looge,*+ la ne tʋʋm-wẽns buud fãa, n pid ne sũ-kiiri,+ ne nin-kʋʋre,+ ne zaba, ne zãmbo,+ la ne pʋ-toogo.+ B yaa wɩtba, 30 munaafɩgse,+ neb sẽn kis Wẽnnaam, tɩta-neba, waoog-m-mens rãmba, wuk-m-mens rãmba, mag-wẽns rãmba,* neb sẽn kɩɩsd b ba-rãmb la b ma-rãmba,+ 31 neb sẽn pa wʋmd bũmb võor nana,+ neb sẽn pa pidsd b sẽn pʋlme, neb sẽn pa mi rogem yĩn-sidga, la neb sẽn pa tar nimbãan-zoeere. 32 Nin-kãens mii vẽeneg tɩ Wẽnnaam sẽn yaa tɩrgã yĩnga, a yeelame tɩ neb nins sẽn maand bõn-kãensã segda ne kũum.+ Baasgo, b ket n maanda rẽ, la b pʋd n pẽgd neb nins sẽn maand bõn-kãensa wã.

2 Woto yĩnga, foom a ninsaala, fo sẽn yaa ned ning fãa,+ fo sã n kaood f to bʋʋdo, fo kõn paam bũmb n dõd n yi ye. Fo sã n wa kaood ned bʋʋdo, fo ningda f meng taale. Bala foom a ned ning sẽn kaood bʋʋdã me maanda bũmb nins nin-kãng sẽn maandã.+ 2 La tõnd miime tɩ Wẽnnaam kaooda neb nins sẽn maand bõn-kãensa wã bʋʋdo, n wilgdẽ tɩ b zemsa ne sɩbgre, la tɩ Wẽnnaam bʋ-kaoorã zemsa ne sɩdã.

3 La foom a ninsaala, fo tẽedame tɩ fo sẽn kaood neb nins sẽn maand bõn-kãens bʋʋd la f wẽneg n maand bõn-kãensã, fo na n põsa Wẽnnaam bʋ-kaoorã la? 4 Bɩ fo paoogda Wẽnnaam sõmblmã+ ne a sũ-marã*+ la a maag-m-mengã+ sẽn yaa wʋsgã, fo sẽn pa mi tɩ Wẽnnaam sẽn yaa sõmblem soabã rat n sõnga foo tɩ f tek yam n kos sugrã yĩng bɩ?+ 5 La fo sũurã sẽn diglmi, la f sẽn pa tek yam n kos sugrã yĩnga, fo na n sika Wẽnnaam sũ-puugrã f meng zugu. Wẽnnaam na n wilga sũ-pu-kãng daar ning a sẽn na n kao bʋʋdã ne tɩrlmã.+ 6 La a na n keoo ned kam fãa wa sẽn zems a tʋʋma:+ 7 A na n kõo neb nins sẽn modgd ne sẽn yaa sõma maanego, n baood ziir la waoogr la yĩng sẽn pa tõe n põogã+ vɩɩm sẽn ka sɛta. 8 La sã n yaa ne sẽn nong-b no-koɛɛmã, la sẽn pa sakd-b tũud sɩdã la sẽn maand-b sẽn pa tɩrgã, Wẽnnaam sũ-puugrã la a sũ-yikrã+ na n siga b zugu. 9 Toog la sũ-sãang na n zĩnda ned ning fãa* sẽn maand sẽn yaa wẽngã zugu, pipi yaa Zʋɩfe, la Gɛrk me. 10 La ned ning fãa sẽn maand sẽn yaa sõma na n paama ziiri, waoogr la laafɩ, pipi yaa Zʋɩfe,+ la Gɛrk me.+ 11 Bala Wẽnnaam pa bakd ned ye.+

12 Neb nins fãa sẽn pa bãng tõogã la b maand yel-wẽnã na n kiime, baa b sẽn pa bãng tõogã.+ La neb nins fãa sẽn mi tõogã la b maand yel-wẽnã, b na n tika tõogã zug n kao b bʋʋdo.+ 13 Bala pa tõogã kɛlgdb n yaa tɩrs Wẽnnaam nifẽ ye. Yaa sẽn sakd-b tõogã la Wẽnnaam na n yeel tɩ b yaa tɩrse.+ 14 Baa bu-zẽmsã neb sẽn pa mi Wẽnnaam tõodã,+ b maanda bũmb nins tõodã sẽn yetã. Baa b sẽn pa mi tõodã, tõ-kãens bee b sũyã pʋsẽ. 15 Yaa nin-kãens mens n wilgd tɩ tõogã sẽn yetã gʋlsa b sũyã pʋsẽ, tɩ b sũur-kasetã* naag bãmb n kõt kaseto, la ne bãmb mens tagsa wã b ningda b mens taale, wall b pʋd n kõt b mens bʋʋm. 16 Mam sẽn yet bũmb ningã na n zĩnda daar ning Wẽnnaam sẽn na n tũnug ne Kirist Zeezi n kao ninsaalbã bõn-solgdsã bʋʋdo,+ sẽn zems ne koe-noog ning mam sẽn moondã.

17 La b sã n boond foo tɩ Zʋɩfe,+ tɩ fo teeg tõogã n wukd f meng fo sẽn yaa Wẽnnaam nin-buiidã nin-yendã yĩnga, 18 n mi Wẽnnaam raabã, la f tõe n bãng bũmb nins sẽn yaa sõma wʋsgã n bak b sẽn zãms foo Tõogã yĩnga,+ 19 n kɩs sɩd tɩ f yaa ned sẽn wilgd zoens sore, tɩ f yaa vẽenem sẽn be-b likẽ wã yĩnga, 20 tɩ f yaa sẽn pa tar-b yamã remsda, tɩ f yaa kom-bõoneg karen-saamba, la tɩ f tara bãngrã la sɩdã halhaalã Tõogã pʋgẽ . . . 21 La foom a soab ning sẽn zãmsd neb a taabã, fo pa zãmsd f meng la?+ Foom a soab ning sẽn moond n yetẽ: “Ra zu ye.”+ Bõe yĩng tɩ fo zuuda? 22 Fo moondame n yetẽ: “Ra yo ye.”+ La bõe yĩng tɩ fo yooda? Foom a soab ning sẽn kis bõn-naandsã,* bõe yĩng tɩ fo zuud bõn-naandsã rotã teedo? 23 Foom a soab ning sẽn wukd a meng ne tõogã, bõe yĩng tɩ fo kɩɩsd Tõogã n paoogd Wẽnnaam? 24 Bala “Wẽnnaam yʋʋrã paamda paoogr bu-zẽmsã sʋk yãmb yĩnga,” wa b sẽn gʋlsã.+

25 Sɩd-sɩda, bãongã kõom+ yõod yaa f sẽn na n tũud tõogã.+ La fo sã n kɩɩsd tõogã, fo bãongã kõom lebga wa f sẽn pa kẽ bãongo. 26 Woto wã, ned sẽn pa kẽ bãong+ sã n tũud Tõogã noyã sẽn yaa tɩrsã, b kõn geelg a sẽn pa kẽ bãongã wa bãong kõom sɩda?+ 27 Ned ning sẽn pa kẽ bãongã sã n tũud Tõogã sẽn yetã, a na n wilgame tɩ fo yaa kɩɩsda, fo sẽn tar tõogã la f sẽn kẽ bãong n yaool n kɩɩsd tõogã yĩnga. 28 Bala pa sẽn yaa-a Zʋɩf nif gesg pʋgẽ wã n yaa Zʋɩf ye.+ Bãong kõom me pa bũmb ning b sẽn maand ned yĩngẽ wã ye.+ 29 La yaa sẽn yaa-a Zʋɩf a sũur pʋgẽ wã n yaa Zʋɩfe.+ La a bãongã kõom yaa sũurã rẽnda,+ vʋʋsem sõngã sẽn maane, la pa sẽn zems ne tõog b sẽn gʋls ye.+ Nin-kãng pẽgr yita Wẽnnaam nengẽ, pa ninsaalbã nengẽ ye.+

3 La woto wã, yɩ Zʋɩf yõod yaa bõe, wall bãong yõod yaa bõe? 2 B yõodã waoogame. Pipi, yaa Zʋɩf-rãmbã la b gũnug Wẽnnaam koeesã.+ 3 La Zʋɩf-rãmb kẽer sẽn pa tall tẽebã wɛɛngẽ, d na n yeelame tɩ bõe? B sẽn pa tall tẽebã rat n yeelame tɩ nebã pa le tõe n kɩs Wẽnnaam sɩd bɩ? 4 A bada! La baa ninsaalbã fãa sã n yagd ziri,+ Wẽnnaam na n yɩɩ sɩd soaba,+ wa sẽn gʋlsã: “Fo goamã na n wilgame tɩ f yaa tɩrga, la baa sẽn wa n yaa bũmb ning fãa la nebã rõt foo, fo na n wilgame tɩ b ka bʋʋm ye.”+ 5 La tõnd sẽn pa nin-tɩrsã sã n kɩtame tɩ Wẽnnaam tɩrlmã puk vẽenega, d na n yeelame tɩ bõe? Wẽnnaam sã n wa sɩbgd nin-wẽnsã, a maanda sẽn pa tɩrg bɩ? (Mam gomda ninsaal goama.) 6 A bada! Sã n pa rẽ, Wẽnnaam na n yɩɩ wãn n kao dũniyã bʋʋdo?+

7 La mam ziri wã maasem yĩnga, Wẽnnaam sɩdã sã n maneg n lebg vẽeneg tɩ kõt-a ziiri, bõe yĩng masã tɩ b kaood mam bʋʋd n yetẽ tɩ m yaa yel-wẽn-maanda? 8 La bõe yĩng tɩ d pa na n yeel wa neb kẽer sẽn yagd ziri n yetẽ tɩ tõnd yetame: “Bɩ d tʋm tʋʋm-wẽnse, tɩ bõn-sõma wa” wã? B sẽn kao nin-kãens bʋʋd to-to wã yaa tɩrga.+

9 La woto rat n yeelame tɩ tõnd yellã sãoo neb a taabã bɩ? Lae-lae! Bala yel-wẽndã soo Zʋɩf-rãmbã ne Gɛrk-rãmbã fãa wa d sẽn zoe n yeelã.+ 10 Yaa wa b sẽn gʋlsã: “Nin-tɩrg kae ye. Baa nin-yɛng menga.+ 11 Ned yam sẽn wek kae ye. Ned sẽn baood Wẽnnaam kae ye. 12 Nebã fãa bʋdgame. B fãa lebga neb sẽn ka yõodo. Ned sẽn maand neer kae ye. Baa a ye.”+ 13 “B kokorã yaa wa yaoog sẽn pake. B belga neb ne b zɩlmã.”+ “Põeer zẽnem n be b no-bɩmsẽ wã.”+ 14 “La b noorã pida ne kãab-wẽns la sũ-to-goama.”+ 15 “B naoã tʋʋla ne zɩɩm daagre.”+ 16 “Sãoong ne yel-beed n be bãmb soayã zutu. 17 Bãmb pa bãng laafɩ sorã ye.”+ 18 “B pa tol n mi wẽn-zoeer ye.”+

19 Masã, tõnd miime tɩ bũmb nins fãa Tõogã sẽn yetã, yaa neb nins sẽn tũud Tõogã la b taas sẽn na yɩl tɩ nebã fãa noy mumi, la tɩ dũniyã fãa paam taal Wẽnnaam taoore.+ 20 Rẽnd ned* baa a ye pa na n paam tɩ b yeel t’a yaa tɩrg Wẽnnaam taoor tõogã tʋʋm yĩng ye.+ La tõogã kɩtdame tɩ d wʋmd yel-wẽndã võor sõma.+

21 La lebga vẽeneg masã tɩ ned tõe n yɩɩ tɩrg Wẽnnaam nifẽ+ tɩ pa a sẽn tũ Tõogã yĩnga, wa Tõogã ne No-rɛɛsdbã sɛbã sẽn kõt kasetã.+ 22 N-ye. Neb nins fãa sẽn tẽedã yaa tɩrs Wẽnnaam nifẽ, b sẽn tẽed a Zeezi Kiristã yĩnga. Bala welgr kae ye.+ 23 Bala nebã fãa maana yel-wẽna, n pa tõe n ta Wẽnnaam ziirã ye.+ 24 La kũun ning Wẽnnaam sẽn kõt zaalmã+ yaa t’a barkã* yĩnga, a wilgdame tɩ nebã yaa tɩrse,+ yaood* ning Kirist Zeezi sẽn yao n na n fãag tõndã maasem yĩnga.+ 25 Wẽnnaam rɩka a Zeezi n kõ t’a yɩ maoongo,*+ sẽn na yɩl tɩ neb nins sẽn na n tẽ a Zeezi zɩɩmã+ tõe n lebg Wẽnnaam zo-rãmba. Wẽnnaam maana rẽ n na n wilg a meng tɩrlmã. Bala a sũ-marã* yĩnga, a ra kõta neb nins sẽn da maan yel-wẽn pĩnd wẽndẽ wã sugri. 26 Leb n yaa sẽn na n wilg a meng tɩrlmã+ rũndã-rũndã, sẽn na yɩl t’a yɩ tɩrga, baa a sã n wa yetẽ tɩ ned ning sẽn tẽed a Zeezi yaa tɩrga.+

27 Woto wã, ned tõe n wuka a meng bɩ? Lae-lae. Yaa tõ-bʋg n kɩt t’a pa wukd a menga? Tõog ning sẽn wilgd t’a sẽn maand bũmb ninsã n tar yõodã bɩ?+ Ayo. Yaa tõog ning sẽn wilgd t’a segd n talla tẽebã. 28 Bala tõnd tagsdame tɩ yaa tẽeb yĩng la b wilgd tɩ ned yaa nin-tɩrga, tɩ pa tũ ne tõogã sẽn dat t’a tʋm tʋʋm ninsã ye.+ 29 Bɩ Wẽnnaam yaa Zʋɩf-rãmbã bal Wẽnnaam?+ A pa bu-zẽmsã neb Wẽnnaam me sɩda?+ N-ye. A yaa bu-zẽmsã neb Wẽnnaam me.+ 30 Wẽnnaam sẽn yaa ye tãa wã yĩnga,+ a na n yeelame tɩ sẽn kẽ-b bãongã yaa tɩrs+ tẽeb maasem yĩnga, la a yeel me tɩ sẽn pa kẽ-b bãongã yaa tɩrs+ b tẽebã maasem yĩnga. 31 Woto wã, tõnd tẽebã kɩtdame tɩ tõogã lebg zaalem bɩ? A bada! Tõnd pʋd n teenda tõogã.+

4 Sẽn mik tɩ yaa woto wã, bõe la d na n yeel d yaab a Abrahaam wɛɛngẽ? Bõe la a paam-yã? 2 Wala makre, sã n da yaa tʋʋmã yĩng la b yeel t’a Abrahaam yaa nin-tɩrga, a ra na n paama bũmb a sẽn tõe n tik n pẽg a menga, la a pa tõe n pẽg a meng Wẽnnaam taoor ye. 3 Bõe la Gʋls-sõamyã yeta? A yetame yaa: “A Abrahaam tẽe a Zeova,* la b geelga a tẽebã wa tɩrlem yẽ yĩnga.”+ 4 Sã n yaa ne ned sẽn tʋmde, b pa na n geelg a yaoodã wa kũun ye. La yaa bũmb b sẽn segd n kõ-a.* 5 La sã n yaa ne ned ning sẽn pa teeg a meng tʋʋma, la sẽn tẽed Soab ning sẽn yet tɩ koangdb yaa nin-tɩrsã, b geelgda a tẽebã wa tɩrlem.+ 6 Yaa wa a Davɩɩd me sẽn wilg tɩ ned ning Wẽnnaam sẽn ges t’a yaa tɩrg tɩ pa tũ ne tʋʋmã tara sũ-noogã. A yeelame: 7 “Sũ-noog rãmb la neb nins sẽn paam tɩ b kõ-b sugr b tʋʋm-wẽnsã yĩnga, la b lud b yel-wẽnã.* 8 Sũ-noog soab la ned ning a Zeova* sẽn bas a yel-wẽnd taalã.”+

9 La sũ-no-kãng yaa sẽn kẽ-b bãongã yĩng bal bɩ, bɩ yaa sẽn pa kẽ-b bãongã yĩng me?+ Bala tõnd yeelame yaa: “B geelga a Abrahaam tẽebã wa tɩrlem yẽ yĩnga.”+ 10 Yɩɩ wakat bʋg la b geelg rẽ wa tɩrlem? A bãongã kõom poor bɩ, bɩ a sẽn wa n nan pa kẽ bãongã wakate? Yɩɩ a sẽn da nan pa kẽ bãongã wakate. 11 La b kõ-a-la bãnde,+ rat n yeel tɩ bãongã, tɩ yɩ tɩrlem kaset a sẽn paame, a sẽn tall tẽeb a sẽn wa n nan pa kẽ bãongã wakatã yĩnga. Woto, a lebga neb nins fãa sẽn pa kẽ bãong tɩ Wẽnnaam yeel tɩ b yaa nin-tɩrs b tẽebã yĩngã ba.+ 12 Sẽn paase, a Abrahaam tõe n yɩɩ neb sẽn kẽ bãong ba, la pa sẽn gãd-b bãongã kõom dem-demã bal ba ye. Tõnd ba a Abrahaam+ yaa neb nins sẽn kẽnd sõma ne tẽeb wa yẽ sẽn tall tẽeb a sẽn wa n nan pa kẽ bãongã wakatã me ba.

13 Bala pa ne tõogã maasem yĩng la b pʋlem a Abrahaam wall a yagensã t’a na n paama dũni tɩ yɩ a pʋɩɩr ye.+ La yɩɩ ne tɩrlem ning tẽeb sẽn wat ne wã maasem.+ 14 Pʋlen-kãng sã n yaa neb nins sẽn sakd Tõogã bal yĩnga, tẽeb pa le tar yõodo, la pʋlengã me lebga zaalem. 15 Sɩd-sɩda, Tõogã wata ne Wẽnnaam sũ-puugri,+ la zĩig ning tõog sẽn ka be, beegr me kae ye.+

16 Yaa rẽ n so la sẽn yaa tẽeb maasem yĩnga, sẽn na yɩl tɩ yɩ Wẽnnaam barkã*+ yĩnga, tɩ pʋlengã yɩ waazib a yagensã fãa yĩnga.+ La pa sẽn sakd-b Tõogã yĩng bal ye. Yaa sẽn tar-b a Abrahaam tẽebã buudã yĩng me. Yẽ yaa tõnd fãa ba.+ 17 (Yaa wa sẽn gʋlsã: “Mam kɩtame tɩ fo lebg buud wʋsg ba.”)+ Rẽ yɩɩ Wẽnnaam sẽn yaa soab ning a sẽn da tẽedã taoore, soab ning sẽn kɩtd tɩ kũum vʋʋge, la sẽn gomd bũmb nins sẽn nan pa pidsã yell wa b zoe n pidsame wã.* 18 A ra kɩsa sɩd t’a na n yɩɩ buud wʋsg ba, baa sẽn da wõnd rẽ pa tõe wã. A ra tẽeda bũmb ning b sẽn yeel-a wã: “Woto la fo yagensã na n yɩ.”+ 19 La baa a tẽebã pãng sẽn pa boogã, a tagsa a yĩngã sẽn da kolg kũumã yelle, (bala a ra kolga yʋʋm koabga,)+ la a ra miime me t’a Saara kʋʋla wʋsg ne kamb rogem.*+ 20 La Wẽnnaam pʋlengã yĩnga, a pa maan sãmb-sãmb tẽeb kaalem yĩng ye. La a paama pãng wʋsg a tẽebã yĩnga, n pẽg Wẽnnaam 21 n da kɩs sɩd zãng-zãng tɩ Wẽnnaam tõe n pidsa bũmb ning a sẽn pʋlmã.+ 22 Woto yĩnga, “b geelga a tẽebã wa tɩrlem yẽ yĩnga.”+

23 La goam nins sẽn yeel tɩ “b geelga a tẽebã wa tɩrlem yẽ yĩngã” pa gʋls yẽ yĩng bal ye.+ 24 La yaa tõnd yĩng me. Wẽnnaam na n geelga tõnd tẽebã wa tɩrlem, d sẽn tẽed a sẽn vʋʋg tõnd Zu-soab a Zeezi n yiis kũ-rãmb sʋkã yĩnga.+ 25 Wẽnnaam rɩka a Zeezi n kõ tõnd yel-wẽnã yĩnga,+ la a vʋʋga a Zeezi sẽn na yɩl tɩ d tõe n paam tɩ b yeel tɩ d yaa nin-tɩrse.+

5 La masã, b sẽn yeel tɩ tõnd yaa nin-tɩrs tẽeb yĩngã,+ bɩ d kɩt tɩ laafɩ kell n zĩnd tõnd ne Wẽnnaam sʋka,* tõnd Zu-soab a Zeezi Kirist maasem yĩnga.+ 2 Yaa yẽ maasem yĩng me la sor pak-yã, tɩ d tõe n paam Wẽnnaam barkã* d sẽn tẽed-a wã yĩnga. D paamda bark-kãng masã.+ Bɩ d kɩdem sũ-noogo,* d sẽn gũud ziir ning Wẽnnaam sẽn na n kõ-dã yĩnga. 3 La pa rẽ bal ye. Bɩ d kɩdem sũ-noog* d sẽn wat n namsdẽ,+ bala d miime tɩ namsg kɩtdame tɩ ned tõogd toogo,+ 4 tɩ d sã n tõogd toog bɩ sõngd tõnd tɩ d tat Wẽnnaam yam,+ tɩ rẽ kɩtdẽ tɩ d saagdẽ tɩ manegr n wate.+ 5 La saagr pa belgd ned ye.+ Bala b pʋdga Wẽnnaam nonglmã tõnd sũyã pʋsẽ ne vʋʋsem sõngã b sẽn kõ tõndã maasem.+

6 Sɩd me, tõnd sẽn wa n ket n ka pãngã,+ wakat ning b sẽn yãkã sẽn ta, Kirist kii wẽn-kɩɩsdb yĩnga. 7 Bala yaa toog tɩ ned sak n ki nin-tɩrg yĩnga. Daar ninga, nina na sak n ki nin-sõng yĩnga. 8 La ad Wẽnnaam sẽn wilg to-to tɩ yẽ mengã nonga tõndo: Tõnd sẽn da ket n yaa yel-wẽn-maandba, Kirist kii tõnd yĩnga.+ 9 Dẽ, tõnd sẽn paam masã tɩ b yeel tɩ tõnd yaa nin-tɩrs a zɩɩmã maasem yĩngã,+ yaa vẽeneg t’a maasem yĩnga, tõnd na n põsa Wẽnnaam sũ-puugrã.+ 10 Bala tõnd sẽn da yaa Wẽnnaam bɛɛbã, tõnd manega d yellã ne Wẽnnaam a Biigã kũumã maasem yĩnga.+ Woto, tõnd sẽn maneg d yell ne Wẽnnaam masã wã, d tõe n kɩsa sɩd ne d sũur fãa me tɩ d na n paama fãagr a Biigã vɩɩmã yĩnga. 11 La pa rẽ bal ye. Tõnd maanda sũ-noog d sẽn paam Wẽnnaam zood tõnd Zu-soab a Zeezi Kirist maasem yĩngã. Leb n yaa yẽ maasem yĩng la tõnd sẽn paam n maneg d yell ne Wẽnnaam masã wã.+

12 Yaa woto la yel-wẽndã tũ ne rao a yembr n kẽ dũni wã, tɩ kũum tũ ne yel-wẽndã n wa,+ tɩ kũum ta nebã fãa, b fãa sẽn maan yel-wẽnã yĩnga.+ 13 Bala sẽn deng Tõogã, yel-wẽndã ra bee dũniyã, la tõog sã n ka be, b pa ningd ned baa a ye taal a yel-wẽnd yĩng ye.+ 14 Baasgo, sẽn sɩng a Ãdem wakatã n tãag a Moyiiz wakatã, kũum da rɩta naam wa rĩm nebã fãa zutu, baa b sẽn pa maan a Ãdem yel-wẽndã buudã. A Ãdem ra wõnda soab ning sẽn da segd n wa wã.+

15 La kũunã pa wõnd beegrã ye. Bala neb wʋsg sã n kii rao a ye beegr yĩnga, neb wʋsg+ paama Wẽnnaam barkã,* ne kũun ning a sẽn kõ zaalem a Zeezi Kirist barkã* maasem yĩngã tɩ seke.*+ 16 Sẽn paase, kũun ning b sẽn kõ zaalmã sẽn wat ne bũmb ningã pa wõnd rao a yembrã yel-wẽndã sẽn wat ne bũmb ningã ye.+ Bala bʋ-kaoor ning sẽn pʋgl beeg-yɛngã yɩɩ taal ningri,+ la kũun ning b sẽn kõ beegr wʋsg poorã kɩtame tɩ b yeel tɩ neb wʋsg yaa nin-tɩrse.+ 17 Bala rao a yembrã yel-wẽndã yĩnga, kũum dɩta naam wa rĩma.+ La Wẽnnaam barkã* ne kũun ning b sẽn kõ zaalem sẽn na yɩl tɩ d tõe n yɩ nin-tɩrsã yaa kãseng la sõma n yɩɩda.+ Neb nins sẽn paamd bõn-kãensa wã na n vɩɩmda a Zeezi Kirist maasem yĩnga,+ la b na n yɩɩ rĩm-dãmb n dɩ naam.+

18 Dẽ, beegr a yembr n kɩt tɩ neb buud fãa kiidẽ.+ Woto me, tɩrlem tʋʋmd a yembr yĩnga, neb buud fãa tõe n paamame tɩ b yeel tɩ b yaa nin-tɩrse,+ la b paam vɩɩm.+ 19 Bala rao a yembr kɩɩsg yĩnga, neb wʋsg lebga yel-wẽn-maandba.+ Woto me, ned a yembr sakr yĩnga, neb wʋsg na n lebga nin-tɩrse.+ 20 La Tõogã waa sẽn na yɩl tɩ nebã bãng tɩ b yel-wẽnã yaa wʋsgo.+ La zĩig ning yel-wẽnã sẽn yɩ wʋsgã, Wẽnnaam barkã* yɩɩ wʋsg n yɩɩge. 21 Bõe yĩnga? Yaa sẽn na yɩl tɩ wa yel-wẽndã ne kũumã sẽn dɩ naam wa rĩm-dãmbã,+ Wẽnnaam barkã* me na rɩ naam wa rĩm ne tɩrlem, n wa ne vɩɩm sẽn ka sɛt tõnd Zu-soab a Zeezi Kirist maasem yĩnga.+

6 Woto wã, d na n yeelame tɩ bõe? D segd n ket n maanda yel-wẽnã sẽn na yɩl n dɩ Wẽnnaam barkã* nafa wʋsg bɩ? 2 Lae-lae! Sẽn mik tɩ tõnd kii yel-wẽndã wɛɛngẽ wã,+ d na n yɩɩ wãn n ket n vɩ a pʋgẽ?+ 3 Bɩ yãmb pa mi tɩ tõnd fãa sẽn lis Kirist Zeezi pʋgẽ wã,+ d lisa a kũumã pʋgẽ me la?+ 4 Rẽnd b naaga tõnd ne-a n mumi, d sẽn paam lisg a kũumã pʋgẽ wã maasem yĩnga, sẽn na yɩl tɩ wa Kirist sẽn vʋʋg n yi kũ-rãmb sʋk Ba wã pãngã sẽn be ziirã maasem yĩngã, tõnd me na vɩɩmd vɩ-paalga.+ 5 Tõnd sã n lebga yembr ne yẽ d sẽn ki a kũumã buudã+ yĩnga, yaa vẽeneg tɩ tõnd na n lebga yembr ne-a d sẽn na n wa vʋʋg a vʋʋgrã buudã+ yĩng me. 6 Bala tõnd miime tɩ b naaga tõnd nin-kʋdgã ne yẽ n ka ra-lukã zugu.+ Woto, tõnd yĩngã ratem-wẽnsã pa le so tõndo, la d pa le yaa yel-wẽndã yembs ye.+ 7 Bala ned sẽn ki paamame tɩ b bas a yel-wẽnã taale.*

8 Sẽn paase, tõnd sã n naaga Kiristã n ki, d tẽedame me tɩ d na naag-a n vɩɩmde. 9 Tõnd miime tɩ Kirist sẽn vʋʋg n yi kũ-rãmb sʋk masã wã,+ a pa le tõe n ki ye.+ Kũum pa le so-a ye. 10 Bala kũum ning a sẽn ki wã, a ki-a-la vugr wakat fãa yĩng yel-wẽndã yẽesg yĩnga.+ La vɩɩm ning a sẽn vɩ wã, a vɩ-a-la Wẽnnaam yĩnga. 11 Woto me, bɩ y ges y mens wa neb sẽn ki yel-wẽndã wɛɛngẽ, la sẽn vɩ Wẽnnaam daabã maaneg yĩnga, Kirist Zeezi maasem yĩnga.+

12 Woto wã, da bas-y yel-wẽndã t’a ket n dɩt naam wa rĩm yãmb yĩn-kiidsã pʋsẽ,+ n kɩtdẽ tɩ y sakd y yĩn-kiidsã raabã ye. 13 Ra le rɩk-y y yĩnsã* me n kõ yel-wẽndã tɩ yɩ tʋʋm-kɛg zab-teed ye. Rɩk-y y mens n kõ Wẽnnaam wa neb sẽn vʋʋg n yi kũ-rãmb sʋka, la y rɩk y yĩnsã* me n kõ Wẽnnaam tɩ yɩ tɩrlem zab-teedo.+ 14 Bala yel-wẽndã pa segd n soog yãmba, tõogã sẽn pa so yãmba yĩnga,+ la y sẽn paam Wẽnnaam barkã*+ yĩnga.

15 La d na n yeelame tɩ bõe? D na n maana yel-wẽnde, tõogã sẽn pa le so tõndo, la d sẽn paam Wẽnnaam barkã*+ yĩngã bɩ? A bada! 16 Yãmb pa mi tɩ y sã n dɩk y mens n kõ ned n na n sak-a wa yembse, yãmb yaa ned ning y sẽn sakdã yembs la?+ Yãmb sã n yaa yel-wẽndã yembse,+ na n baasa ne kũum.+ La yãmb sã n yaa Wẽnnaam yembse, y na n yɩɩ neb sẽn kẽnd tɩrlem pʋgẽ. 17 La bark Wẽnnaam, bala baa yãmb sẽn da yaa yel-wẽndã yembsã, masã, yãmb sakda zãmsg ning b sẽn kõ yãmbã ne y sũy fãa. 18 Sɩda, sẽn mik tɩ b yiisa yãmb yel-wẽndã yembdẽ wã,+ yãmb lebga tɩrlem yembse.+ 19 Mam gomda ninsaal goama, yãmb yĩngã pãn-komsmã yĩnga. Bala yãmb sẽn da rɩk y yĩnsã wil n kõ tɩ yɩ rẽgd la tʋʋm-wẽns yembs tɩ wa ne tʋʋm-wẽnsã, woto me, bɩ y rɩk y yĩnsã wil n kõ tɩ yɩ tɩrlem yembse, tɩ wa ne tʋʋm sẽn tat Wẽnnaam yam.+ 20 Bala yãmb sẽn wa n yaa yel-wẽndã yembsã, tɩrlem da pa so yãmb ye.

21 La bõe biis la yãmb da womd wakat kãnga? Yaa bũmb toor-toor sẽn yaa yãnd ne yãmb rũndã-rũndã. Bala bõn-kãens baasda ne kũum.+ 22 La b sẽn yiis yãmb yel-wẽndã yembdẽ masã tɩ y lebg Wẽnnaam yembsã, yãmb biisã yaa y sẽn yaa sõamyã wã,+ la rẽ wata ne vɩɩm sẽn ka sɛta.+ 23 Bala yel-wẽndã yaood yaa kũum,+ la kũun ning Wẽnnaam sẽn kõtã yaa vɩɩm sẽn ka sɛta,+ tõnd Zu-soab a Kirist Zeezi maasem yĩnga.+

7 M saam-biisi, yãmb pa mi tɩ Tõogã soo ned a vɩɩm tɛk la? (Bala mam gomda ne neb nins sẽn mi tõogã.) 2 Wala makre, pag sã n kẽ kãadem, tõogã loet-a-la ne a sɩdã, a sɩdã yõor tɛka. La a sɩdã sã n ki, a paama a meng ne a sɩdã tõogã.+ 3 Woto yĩnga, a sã n lebg rao a to pag a sɩdã sẽn ket n vɩ sasa, b na n bool-a lame tɩ pʋg-yoodre.+ La a sɩdã sã n ki, a paama a meng ne a sɩdã tõogã, tɩ kɩt t’a sã n lebg rao a to pag bɩ a pa pʋg-yoodr ye.+

4 M saam-biisi, yãmb me kii Tõogã wɛɛngẽ Kirist yĩngã maasem yĩnga, sẽn na yɩl n lebg ned a to rẽnda,+ soab ning b sẽn vʋʋg n yiis kũ-rãmb sʋkã rẽnda.+ Yaa sẽn na yɩl tɩ d tõe n wom biis Wẽnnaam yĩnga.+ 5 Bala tõnd sẽn wa n vɩ yĩngã ratem sakr yĩngã, yĩngã tʋls-wẽnsã Tõogã sẽn kɩt tɩ b lebg vẽenesã ra tara pãng tõnd yĩnsã* pʋsẽ, tɩ b womd biis kũum yĩnga.+ 6 La masã, tõnd paama d mens ne Tõogã,+ bala bũmb ning sẽn da so tõndã wɛɛngẽ tõnd kiime, sẽn na yɩl n da yɩ yembs Tõogã sẽn so tõnd yĩnga,+ la yaa vʋʋsem sõngã sẽn so tõndã yĩnga.+

7 Woto wã, d na n yeelame tɩ bõe? Tõogã yaa yel-wẽnd bɩ? A bada! Sɩd-sɩda, sã n da pa tũ ne Tõogã, mam da pa na n bãng yel-wẽnd sẽn yaa a soab ye.+ Wala makre, mam da pa na n bãng to bũmb tʋlgr sẽn yaa a soaba, Tõogã sã n da pa yeele: “Ra tʋlg f to bũmb ye.”+ 8 La yel-wẽndã tũu sor ning noorã sẽn pakã n kɩt tɩ mam tʋlg bũmb buud toor-toore. Tõogã sẽn wa n ka be wã, yel-wẽndã ra kiime.+ 9 Sɩd me, tõogã sẽn wa n ka be wã, mam da vɩɩme. La noorã sẽn wa wã, yel-wẽndã vʋʋgame, tɩ mam ki.+ 10 La noorã sẽn da tog n wa ne vɩɩmã,+ mam yãame t’a waa ne kũum. 11 Bala yel-wẽndã tũu sor ning noorã sẽn pakã n belg maam la a tũnug ne noorã n kʋ maam. 12 Rẽnd Tõogã meng yaa sõngo, tɩ noorã me yaa sõngo, tɩrg la neere.+

13 Woto wã, bũmb ning sẽn yaa neerã waa ne mam kũum bɩ? A bada! La yaa yel-wẽndã n kʋ maam. Yel-wẽndã tũnuga ne bõn-neer n kʋ maam,+ sẽn na yɩl n wilg a sẽn yaa a soaba. La noorã wilgdame tɩ yel-wẽndã yaa wẽng wʋsgo.+ 14 Tõnd miime tɩ Tõogã yita Wẽnnaam nengẽ, la mam yaa ninsaal bal b sẽn koos ne yel-wẽndã.+ 15 Bala mam pa wʋmd m sẽn maandã võor ye. M pa maand bũmb ning m sẽn datã ye. La yaa m sẽn kisã la m maanda. 16 La mam sã n maand bũmb ning m sẽn pa ratã, mam sak n deegame tɩ Tõogã yaa sõma wʋsgo. 17 La masã, pa le yaa maam n maand rẽ ye. Yaa yel-wẽndã sẽn be mam pʋgẽ wã.+ 18 Bala mam miime tɩ mam pʋgẽ wã, rat n yeel tɩ mam yĩngã pʋgẽ, bõn-sõng ka be ye. Bala mam tʋll n maana sẽn yaa sõma, la m pa tar tõog n na n maan dẽ ye.+ 19 Bala mam pa maand bõn-sõng ning mam sẽn datã ye. La bõn-wẽng ning mam sẽn pa ratã, yaa rẽ la mam maanda. 20 Dẽ, mam sã n maand bũmb ning mam sẽn pa ratã, pa le yaa maam n maand rẽ ye. Yaa yel-wẽndã sẽn be mam pʋgẽ wã.

21 Woto wã, ad tõog ning sẽn be mam pʋgẽ wã: Mam sã n wa rat n maan sẽn yaa sõma, sẽn yaa wẽng bee ne maam.+ 22 Mam sũurã pʋgẽ, mam sɩd nonga Wẽnnaam tõogã,+ 23 la mam yãta tõog a to mam yĩngã* pʋgẽ, sẽn zabd ne tõog ning sẽn be mam yamẽ wã,+ n kɩtdẽ tɩ mam lebgd yel-wẽndã tõogã sẽn be mam yĩngẽ* wã yamba.+ 24 Mam yaa nimbãan-ned bala! Ãnda n na n fãag maam ne yĩn-kãngã sẽn na n wa ne mam kũumã? 25 Bark Wẽnnaam, tõnd Zu-soab a Zeezi Kirist maasem yĩnga! Rẽnd mam yamã pʋgẽ, mam yaa Wẽnnaam tõogã yamba, la mam yĩngã pʋgẽ, mam yaa yel-wẽndã tõogã yamba.+

8 Rẽnd neb nins sẽn be Kirist Zeezi pʋgẽ wã pa tar taal ye. 2 Vʋʋsem sõngã tõogã sẽn kõt vɩɩm Kirist Zeezi pʋgẽ wã kɩtame tɩ fo paam f meng+ ne yel-wẽndã tõog la ne kũumã tõogã. 3 Bala yĩngã pãn-komsmã+ sẽn da gɩdgd Tõogã t’a pa tõe n maan bũmb ningã,+ Wẽnnaam maana bõn-kãnga, a sẽn tʋm a Biigã+ t’a yɩ wa ninsaal sẽn yaa yel-wẽn-maand+ sẽn na yɩl n menes yel-wẽndã. Woto, Wẽnnaam ningda yel-wẽndã sẽn be yĩngã pʋgẽ wã taale. 4 Yaa sẽn na yɩl tɩ Tõogã sẽn dat bũmb ningã sẽn yaa tɩrgã pids tõnd pʋsẽ,+ tõnd sẽn vɩ vʋʋsem sõngã sakr yĩnga,+ la pa yĩngã ratem sakr yĩngã. 5 Bala neb nins sẽn vɩ yĩngã ratem sakr yĩngã tagsda yĩngã yɛl yelle.+ La neb nins sẽn vɩ vʋʋsem sõngã sakr yĩngã tagsda vʋʋsem sõngã yɛl yelle.+ 6 Yĩngã ratem yell tagsg wata ne kũum.+ La vʋʋsem sõngã yell tagsg wata ne vɩɩm la laafɩ.+ 7 Bala yĩngã ratem yell tagsg kɩtdame tɩ ned lebg Wẽnnaam bɛya,+ yĩngã sẽn pa sakd Wẽnnaam tõogã yĩnga, la a pʋd n pa tõe n sak-a meng ye. 8 Rẽnd neb nins sẽn vɩ yĩngã ratem sakr yĩngã pa tõe n ta Wẽnnaam yam ye.

9 La yãmb pa vɩ yĩngã sakr yĩng ye. Wẽnnaam vʋʋsem sõngã sã n sɩd bee yãmb pʋsẽ, yãmb vɩɩ vʋʋsem sõngã sakr yĩnga.+ La ned sã n pa tar Kirist yamã buudu, a pa Kiristã rẽnd ye. 10 La Kiristã sã n bee yãmb pʋsẽ,+ baa yel-wẽndã sã n kɩtame tɩ yãmb yĩngã ki, vʋʋsem sõngã kõta yãmb vɩɩm, y sẽn yaa tɩrsã yĩnga. 11 La sẽn vʋʋg-a a Zeezi n yiis kũ-rãmb sʋkã vʋʋsem sõngã sã n bee yãmb pʋsẽ, soab ning sẽn vʋʋg Kirist Zeezi n yiis kũ-rãmb sʋkã+ na n kɩtame me tɩ yãmb yĩn-kiidsã vʋʋge,+ a vʋʋsem sõngã sẽn be yãmb pʋsẽ wã maasem yĩnga.

12 Woto wã, m saam-biisi, tõnd tara samde, la pa yĩngã ratem samde, n segd n vɩ yĩngã ratem sakr yĩng ye.+ 13 Yãmb sã n vɩ yĩngã ratem sakr yĩnga, yaa vẽeneg tɩ y na n kiime. La y sã n kʋ yĩngã tʋʋm+ ne vʋʋsem sõngã maasem, yãmb na n vɩɩmdame.+ 14 Bala neb nins fãa Wẽnnaam vʋʋsem sõngã sẽn wilgd sorã sɩd yaa Wẽnnaam kom-dibli.+ 15 Wẽnnaam vʋʋsem sõngã pa kẽes yãmb yembd pʋgẽ tɩ kẽesd-y rabeem ye. A kɩtame tɩ y lebg Wẽnnaam kom-dibli, tɩ d zẽkd d koees n yetẽ: “Aba,* Ba!”+ 16 Vʋʋsem sõngã mengã kõta kaset ne tõnd sũyã*+ tɩ d yaa Wẽnnaam kamba.+ 17 La tõnd sã n yaa Wẽnnaam kamba, d na n paama rogem-pʋɩɩre, rogem-pʋɩɩr ning Wẽnnaam sẽn na n kõ wã. La tõnd na n naaga Kirist n paam rogem-pʋɩɩrã.+ La yaa d sã n naag-a n namse,+ sẽn na yɩl n naag-a n paam ziir me.+

18 Mam tagsdame tɩ d sã n mak namsg nins d sẽn paamd masã wã ne ziir ning sẽn na n puk tõnd zugã, b pa zem baa fʋɩ ye.+ 19 Bala bõn-naandsã gũuda Wẽnnaam kom-dibli wã pukr ne b sũur fãa.+ 20 Bala b kẽesã bõn-naandsã faoolem pʋgẽ,+ la pa tũ ne b mens raab ye. Tũu ne soab ning sẽn kẽes-b faoolem pʋgẽ wã raabo. La yẽ soabã le pʋlem-b-la bũmb b sẽn tõe n saage: 21 Yaa tɩ bõn-naandsã na n wa paama b mens+ ne yel-wẽndã la ne kũumã yembdo, n paam Wẽnnaam kambã lohormã sẽn be ziirã. 22 Bala tõnd miime tɩ hal n tãag masã, bõn-naandsã fãa naaga taab n wõosdẽ, la b naag taab n namsdẽ. 23 La pa rẽ bal ye. Tõnd me sẽn paam keoorã reng-n-lɛmbgã sẽn yaa vʋʋsem sõngã, tõnd wõosda d sũyã pʋsẽ,+ n gũud wakat ning Wẽnnaam sẽn na n wa kɩt tɩ d lebg a kom-dibli+ wã ne d sũur fãa. Wẽnnaam tõe n maana rẽ, bala Kiristã yaoo yaoodã sẽn na yɩl tɩ d paam d mens ne d yĩnsã. 24 B fãaga tõnd d sẽn wa n saagdẽ tɩ d na n paama rẽ wã sasa. La f sã n saagdẽ tɩ f na n paama bũmb f sẽn ne, rẽ pa saagr ye. Bala ned sã n ne bũmbu, a le saagdame t’a na n paama bõn-kãng sɩda? 25 La tõnd sã n saagdẽ+ tɩ d na n paama bũmb d sẽn pa ne,+ d gũuda bõn-kãng ne d sũur fãa, la d tõogd toogo.+

26 Sẽn paase, Wẽnnaam vʋʋsem sõngã tõe n sõnga tõnd d pãn-komsem wakate.+ Wakat tõe n wa zĩndame tɩ d pa mi d sẽn segd n pʋʋs n kos bũmb ningã ye. Sã n wa yaa woto, baa d sẽn pa tar gom-biis n na n bilg d sirã, vʋʋsem sõngã yõkda Wẽnnaam sɛɛg tõnd yĩnga. 27 La Wẽnnaam sẽn feesd tõnd sũyã+ mii bũmb nins vʋʋsem sõngã sẽn kot nin-sõamyã wã yĩnga, bala a kotame tɩ zemsd Wẽnnaam raabã.

28 Tõnd miime tɩ Wẽnnaam kɩtdame tɩ bũmb fãa naagd taab n tʋmd neb nins sẽn nong yẽ wã neer yĩnga, rat n yeel tɩ neb nins b sẽn bool wa sẽn zems a raabã.+ 29 Bala hal sɩngrẽ, Wẽnnaam da mii neb nins buud a sẽn na n yãkã. A yãka yam tɩ na n yɩ neb sẽn wõnd a Biigã,+ sẽn na yɩl t’a Biigã yɩ bi-kãseng+ ba-biis wʋsg sʋka.+ 30 Sẽn paase, yaa neb nins a sẽn deng n yãkã+ me la a bool-yã.+ La yaa neb nins a sẽn boolã me la a sẽn yeel tɩ b yaa nin-tɩrsã.+ Sẽn na n baase, yaa neb nins a sẽn yeel tɩ b yaa nin-tɩrsã me la a sẽn kõ ziirã.+

31 La bõn-kãensã wɛɛngẽ, d na n yeelame tɩ bõe? Wẽnnaam sã n be ne tõndo, ãnda n tõe n tõog-do?+ 32 Sẽn mik t’a pa bas a meng Biigã, la a sẽn dɩk-a n kõ tõnd fãa yĩngã,+ yẽ kõn naag bũmb a taabã fãa ne a Biigã n kõ tõnd ne yamleoog sɩda? 33 Ãnda n na n dõd Wẽnnaam nin-tũusdsã?+ Wẽnnaam n yaa soab ning sẽn yet tɩ b yaa tɩrsã.+ 34 Ãnda n na n ning-b taale? Kirist Zeezi n yaa soab ning sẽn ki wã. Sẽn yɩɩd rẽ menga, yẽ n yaa soab ning b sẽn vʋʋge, sẽn be Wẽnnaam nug-rɩtgo,+ la sẽn yõkd Wẽnnaam sɛɛg tõnd yĩngã.+

35 Bõe n na n welg tõnd ne Kirist nonglmã?+ Toog bɩ? Sũ-sãang bɩ? Namsg d tẽebã yĩng bɩ? Kom bɩ? Fut sẽn paoog-d yĩng bɩ? Yel-pakr bɩ? Ned sẽn dat n kʋ tõnd bɩ?+ 36 Yaa wa b sẽn gʋlsã: “Yãmb yĩnga, b kʋʋda tõnd daarã tõre. B geta tõnd wa piis b sẽn na n koode.”+ 37 La tõnd paamda tõogr hakɩɩk bõn-kãensã fãa pʋsẽ,+ soab ning sẽn nong tõndã maasem yĩnga. 38 Bala mam kɩsa sɩd tɩ kũum, vɩɩm, malɛgse, pãn-soaadba, bũmb sẽn be, bũmb sẽn wate, pãens rãmba,+ 39 zãntlem, zulum, bɩ bõn-naandg a to pa na n tõog n welg tõnd ne Wẽnnaam nonglmã sẽn be tõnd Zu-soab a Kirist Zeezi pʋgẽ wã ye.

9 Mam togsda sɩd Kirist pʋgẽ, mam pa yagd ziri ye. Bala mam sũur-kasetã* kõta kaset ne maam vʋʋsem sõngã maasem yĩnga: 2 Sũ-sãan-kãseng la toog sẽn pa sat n be m sũurẽ wã. 3 Bala mam pʋd n seglame n sa n na n sak tɩ b welg maam ne Kiristã wa ned b sẽn kãab wẽnga, sẽn na yɩl n sõng m ba-biisã sẽn yaa mam buudã nebã. 4 Yaa Israyɛll nebã. B paamame tɩ Wẽnnaam kɩt tɩ b lebg a kom-dibli,+ n waoog-b n maan kaool toor-toor+ ne-ba, la a kõ-b Tõogã.+ B paama zu-noog n tũud Wẽnnaam,+ tɩ Wẽnnaam pʋlem-b bũmb toor-toor me.+ 5 Sẽn paase, b yaa Kiristã yaab-rãmbã yagense.+ Bɩ Wẽnnaam sẽn yɩɩd bũmb fãa wã paam pẽgr wakat fãa. Ãmiina.

6 La pa rat n yeel tɩ Wẽnnaam gomdã lʋɩɩ vɩʋʋgẽ ye. Bala pa neb nins fãa a Israyɛll sẽn dogã n sɩd yaa Israyɛll neb ye.+ 7 Leb n pa b sẽn yaa a Abrahaam yagensã yĩng la b fãa sɩd yaa a kamb ye.+ La yaa wa sẽn gʋlsã: “Neb nins b sẽn na n bool tɩ fo yagensã na n yii a Izaak pendẽ wã.”+ 8 Woto rat n yeelame tɩ pa a Abrahaam kom-dogdsã fãa n sɩd yaa Wẽnnaam kamb ye.+ La yaa sẽn dog-b pʋlengã maasem yĩngã+ n yaa a Abrahaam kamb hakɩɩka. 9 Bala Wẽnnaam pʋlmame n yeel yaa: “Vẽer woto wẽnde m na n lebg n waame, la a Saara na n doga bi-ribla.”+ 10 La pa rẽ bal ye. Leb n yɩɩ woto, a Rebeka sẽn wa n dɩk nin-yɛng sẽn yaa tõnd yaab a Izaak pʋg n na n dog kinkirsã.+ 11 Nand tɩ kom-kãens roge, n nan pa maan baa fʋɩ sẽn yaa sõma wall wẽngã, Wẽnnaam reng n wilga a sẽn na n yãk a soabã. Bala Wẽnnaam yãkda a sẽn dat a soaba, la pa be ne a soabã tʋʋm ye. 12 Yaa rẽ yĩng la b yeel a Rebeka yaa: “Kãsmã na n yɩɩ yaoã yamba.”+ 13 Yaa wa b sẽn gʋlsã: “Mam da nonga a Zakoobe, la m kisga a Ezayu.”+

14 Woto wã, d na n yeelame tɩ bõe? Wẽnnaam maanda sẽn pa tɩrg bɩ? Lae-lae!+ 15 Bala Wẽnnaam yeela a Moyiiz yaa: “Mam na n maana m sẽn dat a soab lohorem, la m zoe m sẽn dat a soab nimbãanega.”+ 16 Rẽnd pa be ne ned raab wall a modgr ye.* Bee ne Wẽnnaam sẽn maand lohormã.+ 17 Bala Gʋls-sõamyã yeela a Farawõ yaa: “Ad bũmb ning yĩng mam sẽn bas foo tɩ f ket n vɩ wã: Yaa sẽn na n tũnug ne foo n wilg m pãngã, la sẽn na yɩl tɩ b moon mam yʋʋrã dũniyã gill zugu.”+ 18 Rẽnd Wẽnnaam maanda ned ning a sẽn dat lohorem, la a basd ned ning a sẽn dat t’a sũur riglmi.+

19 La fo na n soka maam yaa: “Bõe yĩng t’a ket n ningd nebã taale? Bala ãnda n kɩɩs a raabo?” 20 La foom a ninsaala, fo yaa ãnda n lemsd Wẽnnaam?+ Bũmb ning b sẽn yagã na n soka a yagdã yaa: “Bõe yĩng tɩ fo yag maam woto?”+ 21 Rẽ yĩnga yagdã pa tar noor tãndã zugu,+ n tõe n yãk tãndã n yag laok sẽn tar n maand bũmb sẽn be waoogre, la a le yãk tãndã n yag laok sẽn tar n maand bũmb sẽn pa be waoogr sɩda? 22 La Wẽnnaam sã n dat n wilg a sũ-puugri, la a kɩt tɩ b bãng a pãngã, la a sã n maana sũ-mar ne lagd nins sẽn zems ne sũ-puugr n tog ne sãoongã, d na n yeelame tɩ bõe? 23 La a sã n maana rẽ sẽn na yɩl n wilg a ziir-kãsengã, lagd nins sẽn zems ne lohorem+ a sẽn deng n segl tɩ b na n paam ziirã yĩnga, 24 rat n yeel tɩ tõnd sẽn yaa neb nins a sẽn boolã, d na n yeelame tɩ bõe? La pa Zʋɩf-rãmbã sʋk bal la a bool-d ye. Yaa bu-zẽmsã sʋk me.+ 25 Yaa wa a sẽn yeel bũmb ning a Ooze sebrã pʋgẽ wã: “Neb nins sẽn pa mam nin-buiidã,+ m na n bool-b lame tɩ ‘mam nin-buiidu,’ la m bool pag ning b sẽn da pa nongã tɩ ‘pʋg-nongre.’+ 26 La zĩig ning b sẽn da yeel-ba: ‘Yãmb pa mam nebã,’ be, b na n bool-b lame tɩ ‘Wẽnnaam ning sẽn vɩ wã kom-dibli.’”+

27 Sẽn paase, a Ezayi goma Israyɛll yell n yeel yaa: “Baa Israyɛll nebã sõor sã n yaa wa mogrã bĩisri, yaa neb bilf* bal n na n paam fãagre.+ 28 Bala a Zeova* na n kaoo neb nins sẽn be dũniyã zugã bʋʋdo, la a na n maana rẽ n baas tao-tao.”+ 29 Leb n yaa wa a Ezayi sẽn da reng n togsã: “Sã n pa tãb-biis naab a Zeova* sẽn bas tõnd yagens kẽer tɩ b põsã, tõnd da na n lebga wa Sodomme, la d ra na n wõnega Gomoore.”+

30 La d na n yeelame tɩ bõe? Baa bu-zẽmsã neb sẽn pa baood n na n lebg nin-tɩrsã, b paam n lebga nin-tɩrs+ tẽeb maasem yĩnga.+ 31 La baa Israyɛll nebã sẽn baood n na n tũ tɩrlem tõogã, b pa tõog n tũ tõ-kãngã ye. 32 Bõe yĩnga? Bala b ra baoodame n na n yɩ tɩrs b tʋʋmã maasem yĩnga, la pa tẽeb maasem yĩng ye. B laka “kug-lakdgã”+ 33 wa sẽn gʋlsã: “Ade! Mam dɩgenda kug-lakdg Siyõ,+ n paas pĩig sẽn kɩtd tɩ neb lʋɩtẽ. La ned ning sẽn na n yẽbg a tẽeb kug-kãng zug pa na n paam yãnd ye.”+

10 M saam-biisi, mam sẽn dat bũmb ning ne m sũur fãa, la m sẽn yõkd Wẽnnaam sɛɛg n kot bũmb ning b yĩng yaa b we n paam fãagre.+ 2 Mam kõta kaset tɩ bãmb tara yẽesem Wẽnnaam yĩnga,+ la pa yẽesem sẽn zems ne bãngr hakɩɩkã ye. 3 Bala b pa mi yɩ nin-tɩrg Wẽnnaam nifẽ sẽn dat n yɛɛlg ye.+ La b sẽn baood b sẽn na n maan to-to n yɩ tɩrs b mens nifẽ wã yĩnga,+ b pa sakd Wẽnnaam noyã sẽn yaa tɩrsã ye.+ 4 Kirist yaa Tõogã tɛka,+ sẽn na yɩl tɩ ned ning fãa sẽn tẽed tõe n yɩ tɩrg Wẽnnaam nifẽ.+

5 Bala a Moyiiz gʋlsame n gom tɩrlem ning Tõogã sẽn wat ne wã yell n yeele: “Ned ning sẽn maand bõn-kãense, a na n vɩɩmda bãmb maasem yĩnga.”+ 6 La tɩrlem ning tẽeb sẽn wat ne wã yetame yaa: “Ra yeel fo sũurẽ+ tɩ ‘ãnda n na n dʋ saasẽ?’+ rat n yeel tɩ n tɩ sik Kiristã, 7 pa rẽ bɩ ‘ãnd n na n sig bog-zulungẽ wã?’+ rat n yeel tɩ n tɩ vʋʋg Kiristã n yiis kũ-rãmb sʋk ye.” 8 La bõe la Gʋls-sõamyã yeta? “Gomdã pẽe yãmba, n be y noorẽ la y sũurẽ wã.”+ Yaa gomd ning sakr sẽn tũud ne tẽebã, tõnd sẽn moond a soabã. 9 Fo sã n kõ kaset ne f noor nebã taoor t’a Zeezi yaa Zu-soaba,+ la f tẽed f sũurẽ wã tɩ Wẽnnaam vʋʋg-a lame n yiis kũ-rãmb sʋka, fo na n paama fãagre. 10 Bala yaa sũur pʋgẽ la ned tẽed n paam n yɩ nin-tɩrga, la yaa ne noor la a kõt kaset nebã taoor+ sẽn na yɩl n paam fãagre.

11 Bala Gʋls-sõamyã yetame: “Ned ning fãa sẽn na n yẽbg a tẽeb a zug pa na n paam yãnd ye.”+ 12 Welgr pa be Zʋɩf ne Gɛrk sʋk ye.+ Yaa Zu-soben-yɛng n so b fãa. A wilgda neb nins fãa sẽn pʋʋsd n kot-a wã t’a yaa kõata.* 13 Bala “ned ning fãa sẽn pʋʋsd ne a Zeova* yʋʋrã na n paama fãagre.”+ 14 La b sã n pa tẽed-a, b na n yɩɩ wãn n pʋʋs ne a yʋʋre? La b na n yɩɩ wãn n tẽ soab ning b sẽn pa wʋm a kibare? La b na n yɩɩ wãn n wʋme, ned sã n kae n na n moone? 15 La neb na n yɩɩ wãn n moone, sã n pa b tʋm-b lame?+ Yaa wa sẽn gʋlsã: “Ad neb nins sẽn moond koe-noog n gomd bõn-sõma yellã nao sɩd bee rasãnde!”+

16 Baasgo, pa b fãa n sak koe-noogã ye. Bala a Ezayi yeelame: “Zeova,* ãnda n tẽ bũmb ning tõnd sẽn togsã?”*+ 17 Rẽnd yaa bũmb ning ned sẽn wʋmã n wat ne tẽebo,+ la bũmb ning ned sẽn wʋmã tũuda ne koɛɛg ning sẽn gomd Kirist yellã. 18 La m sokdame yaa: B wʋma koɛɛgã. Bɩ bõe? Sɩd-sɩda, “b rãamdã yita tẽngã gill fãa, tɩ koɛɛg ning b sẽn moondã tat dũniyã kɩremsã fãa.”+ 19 La m sokdame yaa: Israyɛll nebã bãngame. Bɩ bõe?+ Pipi, a Moyiiz yeelame: “Mam na n tũnuga ne neb sẽn pa buudu, n kɩt tɩ sũ-kiir yõk yãmba. Mam na n tũnuga ne buud sẽn pa tar yam n kɩt tɩ y sũur yik wʋsgo.”+ 20 La a Ezayi paama raood wʋsg n yeel yaa: “Neb nins sẽn da pa baood maamã yãa maam.+ Neb nins sẽn da pa sokd mam yellã bãnga maam.”+ 21 La a goma Israyɛll nebã yell n yeele: “Daarã tõre, mam tẽega m nus n tees neb sẽn yaa kɩɩsdba, la neb sũy sẽn diglmi.”+

11 La mam sokdame yaa: Wẽnnaam raaga a nin-buiidã n bas bɩ?+ Lae-lae! Bala ma-me yaa Israyɛll neda, n yaa a Abrahaam yagenga, la m yaa a Bẽnzame buudã neda. 2 Wẽnnaam pa raag a nebã a sẽn deng n bãngã n bas ye.+ Yãmb pa mi bũmb ning Gʋls-sõamyã sẽn yet a Eli zugã la? A pʋʋsa Wẽnnaam n wilg t’a sũur pa noom ne Israyɛll nebã n yeele: 3 “Zeova,* b kʋʋ yãmb no-rɛɛsdbã, b luba yãmb tẽn-kugã, la yaa maam m ye bal n kete. La masã, b baooda maam* n na n kʋ.”+ 4 La Wẽnnaam leok-a lame tɩ bõe? A yeelame yaa: “Mam ket n tara m neb tus a yopoe sẽn pa yĩgimd a Baal taoor ye.”+ 5 Yaa woto rũndã-rũndã me. Israyɛll neb kell n be,+ n yaa neb Wẽnnaam sẽn yãk a barkã* maasem yĩnga. 6 Yãkrã sã n yaa Wẽnnaam barkã*+ maasem yĩnga, pa le yaa tʋʋmã maasem yĩng ye.+ Sã n pa rẽ, Wẽnnaam barkã pa na n le yɩ bark ye.

7 D na n yeelame tɩ bõe? Bũmb ning Israyɛll nebã sẽn baood ne b sũur fãa wã, b pa paam ye. La b sẽn tũus b rãmbã paam-a lame.+ Sẽn kell-bã riglma b sũyã+ 8 wa sẽn gʋlsã: “Wẽnnaam kɩtame tɩ b lebg wa neb sẽn gõe tamm.+ A kɩtame tɩ b ninã pa neẽ, tɩ b tʋbã me pa wʋmdẽ ye. Yaa woto hal n tãag rũndã.”+ 9 Sẽn paase, a Davɩɩd yeelame: “Bɩ b taablã* lebg tãoog la bẽdgo, bũmb sẽn kɩtd tɩ ned lʋɩ, la sɩbgr bãmb yĩnga. 10 Bɩ b ninã menem tɩ b pa le tõe n yã, la bɩ y kɩt tɩ b kẽnd n kuud wakat fãa.”+

11 Woto wã, mam sokdame yaa: B lakame n lʋɩ n pa le tõe n yik bɩ? Lae-lae! B kongrã waa ne fãagr bu-zẽmsã neb yĩnga, sẽn na yɩl tɩ sũ-kiir yõk-ba.+ 12 La b kongrã sã n wata ne bark toor-toor dũniyã neb yĩnga, tɩ b sõorã sẽn boogã wat ne bark toor-toor bu-zẽmsã neb yĩnga,+ b sõorã sã n pidi, kõn wa ne bark n yɩɩd sɩda?

13 Masã, mam gomda ne yãmb sẽn yaa bu-zẽms nebã. Mam sẽn yaa tẽn-tʋmd b sẽn tʋm bu-zẽmsã neb nengẽ wã,+ mam waoogda m tʋʋmdã+ 14 sẽn na yɩl tɩ sã n tõe bɩ m kɩt tɩ sũ-kiir yõk mam meng buudã neba,* n fãag neb kẽer bãmb sʋkã. 15 Bala b basbã+ sã n kɩtdame tɩ dũniyã neb paamd n manegd b yell ne Wẽnnaam, b reegrã na n waa ne bõe tɩ sã n pa kũ-rãmb vʋʋgre? 16 Sẽn paase, zom-nagdg ning b sẽn yãk tɩ yaa dẽenem biisã sã n yaa sõngo, zom-nagdgã fãa me yaa sõngo. La yẽgrã sã n yaa sõngo, wilã me yaa sõamyã.

17 La b sã n kɛɛ wil kẽer la b rɩk foo n tong wilã sʋk baa fo sẽn yaa weoogẽ oliiv tɩɩgã, tɩ fo-me paamd oliiv tɩɩgã yẽgrã sũmã, 18 bɩ f ra wuk f meng* ne wilã ye. La fo sã n wuk f meng* ne-ba,+ bɩ f tẽeg tɩ fo pa zãad yẽgrã ye. Yaa yẽgrã n zãad foom. 19 La fo na n yeelame yaa: “Wil la b kɛ sẽn na yɩl n tong maam tɩɩgã zugu.”+ 20 Yaa sɩda! Yaa b sẽn pa tall tẽebã yĩng la b sẽn kɛ-bã.+ La yaa fo sẽn tar tẽebã yĩng la fo sẽn yasã.+ Ra wuk f meng ye. Maan dabeem. 21 Bala Wẽnnaam sã n pa bas tɩɩgã wil meng-mengã, a pa na n bas fo-me ye. 22 Woto wã, tags Wẽnnaam sõmblmã+ la a toolmã yelle. A yaa toaag ne neb nins sẽn lʋɩ wã,+ la a wilgda foom a sõmblmã, sã n mikame tɩ fo kell n paa a sõmblmã pʋgẽ. Sã n pa rẽ, b na n kɛɛga fo-me. 23 La bãmb me sã n pa kell n pa tẽeb kaalem pʋgẽ, Wẽnnaam na n tong-b lame.+ Bala Wẽnnaam tõe n lebs n tong-b-la tɩɩgã zugu. 24 Wẽnnaam sẽn kɛɛg foo weoogẽ oliiv tɩɩgã zugã, a tonga foom oliiv tɩɩg b sẽn sel zugu. Sɩd-sɩda, pa woto la b wae n tongd tɩɩs ye. La yɩɩ woto la Wẽnnaam tong foom. Rẽnd a tõe n lebs n tonga oliiv tɩɩgã wil meng-mengã oliiv tɩɩgã zug n yɩɩda!

25 Bala m saam-biisi, mam pa rat tɩ yãmb zɩ bõn-kãngã sẽn yaa yel-soalgdg sẽn yaa sõngã,+ sẽn na yɩl tɩ y ra tags tɩ y tara yam wʋsg ye: Israyɛll neb kẽer sũy riglmame, la yaa hal tɩ bu-zẽmsã neb nins sẽn segd n wa wã sõor pidi. 26 Yaa ne manesem kãngã la Israyɛll tõrã+ na n paam fãagre. Yaa wa sẽn gʋlsã: “Fãagdã na n yii Siyõ,+ la a na n kɩtame t’a Zakoob yagensã wẽn-kɩɩsgã sa. 27 La wakat ning mam sẽn na n yẽes b yel-wẽnã,+ mam na n maana kaool ne-ba.”+ 28 Yaa sɩd tɩ koe-noogã wɛɛngẽ, b yaa Wẽnnaam bɛɛb yãmb nafr yĩnga. La Wẽnnaam yãkrã wɛɛngẽ, b yaa Wẽnnaam nin-nongdse, b yaab-rãmbã yĩnga.+ 29 Bala Wẽnnaam pa na n maan a bãngẽ bũmb nins a sẽn kõtã wɛɛngẽ, la neb nins a sẽn boondã poorẽ ye. 30 Bala yaa wa yãmb sẽn da kɩɩsd Wẽnnaam pĩndã+ tɩ b zoe yãmb nimbãaneg masã,+ Zʋɩf-rãmbã kɩɩsgã yĩngã.+ 31 Rẽnd nin-kãens me kɩɩsa Wẽnnaam tɩ wat ne nimbãan-zoeer yãmb yĩnga, sẽn na yɩl tɩ bãmb me tõe n paam tɩ b zoe b nimbãaneg masã. 32 Bala Wẽnnaam naaga b fãa n bas b kɩɩsgã pʋgẽ,+ sẽn na yɩl n tõog n zoe b fãa nimbãanega.+

33 Ad Wẽnnaam sɩd yaa kõata!* Ad a yamã la a bãngrã waooga! Ned pa tõe n wʋm a bʋ-kaoor toor-toorã võore, la ned pa tõe n bãng a soayã ye! 34 Bala “ãnda n tõog n bãng a Zeova* tagsgo, wall ãnda n lebg a sagenda?”+ 35 Pa rẽ bɩ “ãnda n yɩ pipi n kõ-a bũmb tɩ b segd n keo a soaba?”+ 36 Bala bũmb fãa yita a nengẽ, la b bee a maasem yĩnga, la yẽ yĩnga. Bɩ a paam ziir wakat fãa. Ãmiina.

12 Woto yĩnga, m saam-biisi, mam bõosda yãmb Wẽnnaam nimbãan-zoeerã yĩnga, tɩ y kõ y yĩnsã+ tɩ yɩ maoong sẽn vɩ, sẽn yaa sõngo,+ sẽn tat Wẽnnaam yam, rat n yeel tɩ y tʋm Wẽnnaam tʋʋmdã ne y yamã.+ 2 Bɩ y ra le bas tɩ dũni-kãngã* neb kɩt tɩ y yɩ wa bãmb ye. Bɩ y maneg y yamã tɩ kɩt tɩ y toeeme,+ n tõog n kɩs sɩd+ tɩ Wẽnnaam daabã yaa sõma, tɩ sakda ne-a, la tɩ zemsa zãnga.

3 Wẽnnaam barkã* b sẽn kõ maamã maasem yĩnga, mam yeta yãmb ned kam fãa t’a ra tags t’a tara yõod wʋsg ye.+ La bɩ a tagsa wã yɩ tagsa sẽn wilgd t’a tara yam-sõngo, wa sẽn zems tẽeb ning Wẽnnaam sẽn kõ-a wã.*+ 4 Yaa wa tõnd yĩngã sẽn tar wil wʋsgo,+ tɩ wilã fãa tʋʋm yaa toor-toorã. 5 Woto me, baa tõnd sẽn yaa wʋsgã d yaa yĩng a yembr Kirist pʋgẽ, la tõnd ned kam fãa yaa will sẽn so a to.+ 6 Rẽnd tõnd tara kũun sẽn yaa toor-toore, wa sẽn zems Wẽnnaam barkã* b sẽn kõ tõndã. Woto wã, sã n yaa bãngr-goam togsg kũun la b kõ tõndo,+ bɩ d togs bãngr-goamã wa sẽn zems tõnd tẽebã sẽn yaa to-to. 7 Sã n yaa tʋʋmd la b kõ-do, bɩ d wɩng ne tʋʋm-kãnga. Bɩ ned ning sẽn zãmsd a taab wɩng ne a zãmsgã.+ 8 Bɩ ned ning sẽn kengd a taab raood* wɩng ne raood kengre.*+ Bɩ ned ning sẽn kõt* kõ ne yamleoogo,+ tɩ ned ning sẽn lʋɩt taoor maan rẽ sõma,*+ tɩ ned ning sẽn zoet a taab nimbãaneg maan dẽ ne sũ-noogo.+

9 Bɩ yãmb nonglmã yɩ nonglem sẽn pa naag ne pʋ-lika.+ Kisg-y sẽn yaa wẽnga,+ la y gãd sẽn yaa sõma kãn-kãe. 10 Nong-y taab wʋsg wa zag-yɛng neba. Yɩt-y pipi n waoogd taaba.+ 11 Bɩ y yɩ neb sẽn tʋmd wʋsgo,* la y ra yɩ kʋɩɩmb ye.*+ Bɩ y bas tɩ vʋʋsem sõngã kɩt tɩ y tall yẽesem.+ Tʋm-y-yã a Zeova* tʋʋmdã wa yembse.+ 12 Maan-y sũ-noog ne bũmb ning y sẽn saagd n na n wa paamã. Tõog-y toog namsg sasa.+ Wɩng-y ne pʋʋsgo.+ 13 Pʋɩ-y y sẽn tarã ne nin-sõamyã wã tɩ ned kam fãa paam sẽn yaa tɩlɛ ne-a.+ Kɩt-y tɩ sãamb-reegr lebg y minungu.+ 14 Ningd-y neb nins sẽn namsd yãmbã zut barka.+ Ning-y barka, la y ra kãab wẽng ye.+ 15 Maan-y sũ-noog ne neb nins sẽn maand sũ-noogã, la y yãb ne neb nins sẽn yãbdã. 16 Ges-y neb a taabã wa y sẽn get y meng to-to wã. Ra tagsd-y bõn-kãsems yell ye.* Bas-y tɩ y yamã kẽ bũmb nins sẽn pa bõn-kãsemsã.+ Ra tags-y tɩ y tara yam wʋsg ye.+

17 Ra maan-y ned baa a ye wẽng n lebs ye.+ Tagsd-y bũmb nins sẽn yaa sõma nebã fãa nifẽ wã yelle. 18 Sã n tõeyã, la sã n bee ne yãmb bɩ y kɩt tɩ laafɩ zĩnd yãmb ne nebã fãa sʋka.+ 19 M nin-nongdse, da rok-y y sũur y toor ye. Bas-y weer n kõ sũ-puugrã.*+ Bala b gʋlsame: “A Zeova* yeelame yaa: ‘Sũ-dokr yaa maam n so. Maam n na n keo.’”+ 20 La “kom sã n tar f bɛ bɩ f kõ-a rɩɩb t’a rɩ. Ko-yũud sã n tar-a, bɩ f kõ-a koom t’a yũ. Bala fo sã n maand woto, yaa wa fo samda bug-saal a zugẽ.”*+ 21 Da bas tɩ wẽng tõog foom ye. Bɩ f kell n maan neer n tõog wẽnga.+

13 Bɩ ned kam fãa* sak nanambsã,+ bala naam ka be tɩ sã n pa Wẽnnaam n bas tɩ beẽ ye.+ Tɩ bõe, nanambs nins sẽn be n dɩt naam toor-toorã yaa Wẽnnaam n bas tɩ b rɩt naam.+ 2 Woto wã, ned ning sẽn kɩɩsd naab noor kɩɩsda Wẽnnaam sẽn sigl yɛlã to-to wã. Neb nins sẽn kɩɩsd nanambsã maanda bũmb sẽn na n kɩt tɩ b kao b bʋʋd n ning-b taale. 3 Bala nebã zoeta sẽn dɩt-b naamã. La pa neb nins sẽn maand sẽn yaa sõma wã n zoet-b ye. Yaa neb nins sẽn maand sẽn yaa wẽngã.+ Fo ratame n da zoe naab bɩ? Bɩ f ket n maand sẽn yaa sõma,+ tɩ f na paam a pẽgre. 4 Bala a yaa Wẽnnaam tʋm-tʋmd fo neer yĩnga. La fo sã n maand sẽn yaa wẽng bɩ f maan dabeem, tɩ bõe, pa zaalem yĩng la a sẽn tar sʋʋgã ye. A yaa Wẽnnaam tʋm-tʋmda, n yaa soab ning sẽn wat ne sũ-puugr* sẽn maand-a wẽngã zugu.

5 Rẽnd yãmb segd n saka naaba, la pa sɩbgrã* yĩng bal ye. Yaa yãmb sũur-kasetã* yĩng me.+ 6 Yaa rẽ yĩng me la yãmb sẽn yaood lampo-rãmbã. Bala nanambsã yaa Wẽnnaam tʋm-tʋmdb nin-buiidã nafr yĩnga, sẽn tʋmd wakat fãa bõn-kãng yĩnga. 7 Bɩ y kõ b fãa bũmb ning b sẽn segd ne wã: Sẽn yet-a tɩ b kõ-a lampo bɩ y kõ-a lampo,+ sẽn yet-a tɩ b kõ-a fadg* bɩ y kõ-a fadgo, sẽn yet-a tɩ b zoe-a bɩ y zoe-a,+ la sẽn yet-a tɩ b waoog-a bɩ y waoog-a.+

8 Da tall-y ned baa a ye samd n zʋʋg y sẽn segd n nong taabã ye.+ Bala ned ning sẽn nong a to pidsa tõogã.+ 9 Bala b tõe n kʋmsa tõogã noy nins sẽn yeele: “Fo pa segd n yo ye.+ Fo pa segd n kʋ ye.+ Fo pa segd n zu ye.+ Fo pa segd n tʋlg f to bũmbu,”+ la noy a taabã fãa ne gom-kãngã: “Fo segd n nonga f to wa f menga.”+ 10 Nonglem pa maand a to wẽng ye.+ Rẽnd nonglem yaa tõogã pidsgu.+

11 Maan-y bõn-kãense, yãmb sẽn mi sẽn yaa wakat ningã yĩnga. Yãmb miime tɩ wakat zoe n taame tɩ y segd n nek n bas gõeem.+ Bala tõnd fãagrã kolgame masã n yɩɩd wakat ning tõnd sẽn lebg tẽedbã. 12 Zĩigã zʋʋga wʋsgo. Beoogã kolga vẽegre. Woto wã, bɩ d yeeg tʋʋm nins sẽn yaa lik rẽndã n lobe,+ la d bob vẽenem zab-teedã.+ 13 Bɩ d kẽn sõma+ wa neb sẽn kẽnd wĩndga. D lak d mens ne reem sẽn naag ne tʋʋm-yoodo,* la rã-tɩgre. D zãag d mens ne yoob la nin-yoolem,*+ la d lak d mens ne zab la sũ-kiiri.+ 14 La bɩ y yeelg Zu-soab a Zeezi Kiristã,+ la y ra magd y sẽn na n maan to-to n pids yĩngã tʋls-wẽnsã ye.+

14 Reeg-y ned ning tẽeb pãng sẽn pa waoogã sõma,+ la y ra kao ned bʋʋd a tagsa sẽn yaa toor ne yãmb yĩng ye. 2 Nina tara tẽeb n tõe n dɩ bũmb fãa, la ned ning tẽeb sẽn pa tar pãng rɩta bũmb nins b sẽn kood zẽed zĩisẽ wã bala. 3 Ned ning sẽn dɩt bũmb fãa wã pa segd n paoog sẽn dɩt-a bũmb nins b sẽn kood zẽed zĩisẽ wã balã ye. La sẽn dɩt-a bũmb nins b sẽn kood zẽed zĩisẽ wã me pa segd n kao sẽn dɩt-a bũmb fãa wã bʋʋdo, bala Wẽnnaam sak n deega nin-kãng me. 4 Fo yaa ãnda n na n kao ned a to tʋm-tʋmd bʋʋdo?+ A yas t’a lʋɩt me, yaa a zu-soabã yĩnga.+ Sɩd me, b na n kɩtame t’a yalse, bala a Zeova* tõe n kɩtame t’a yalse.

5 Nina tagsdame tɩ daar n be n yɩɩd ray a taabã,+ t’a to tagsdẽ tɩ daar pa be n yɩɩd a taabã ye. Bɩ ned kam fãa kɩs sɩd zãng ne bũmb ning a sẽn tagsdã. 6 Ned ning sẽn tagsd tɩ daar n be n yɩɩd a taabã maanda rẽ a Zeova* yĩnga. Ned ning sẽn dɩt bũmb fãa wã maanda rẽ a Zeova* yĩnga, bala a pʋʋsda Wẽnnaam barka.+ Ned ning sẽn dɩt bũmb nins b sẽn kood zẽed zĩisẽ wã balã maanda rẽ a Zeova* yĩnga, bala yẽ me pʋʋsda Wẽnnaam barka.+ 7 Sɩd me, tõnd ned baa a ye pa vɩ a mengã yĩng bal ye.+ Sẽn paase, ned baa a ye pa kiid a mengã yĩng bal ye. 8 Bala tõnd sã n vɩ, d vɩɩ a Zeova* yĩnga.+ La d sã n ki, d kii a Zeova* yĩnga. Rẽnd d sã n vɩ wall d sã n ki, d yaa a Zeova* rẽnda.+ 9 Yaa rẽ yĩng la Kiristã sẽn ki la a lebs n vʋʋg sẽn na yɩl n tõog n yɩ sẽn vɩ-bã la sẽn ki-bã Zu-soabã.+

10 La yaa bõe yĩng tɩ fo kaood f saam-biig bʋʋdo?+ Wall bõe yĩng tɩ fo paoogd f saam-biiga? Tõnd fãa na n yalsa Wẽnnaam bʋʋdã kaoob geer taoore.+ 11 Bala b gʋlsame: “A Zeova* yeelame yaa: ‘M wẽenda ne m menga,+ tɩ rũmã fãa na n yĩgimda mam taoore, la tɩ zɩlemd fãa na n yeela vẽeneg t’a sak n deegame tɩ yaa maam la Wẽnnaam.’”+ 12 Rẽnd tõnd ned kam fãa na n yalsa Wẽnnaam taoor t’a kao a bʋʋd wa sẽn zems a tʋʋma.+

13 Woto wã, bɩ d ra le kao taab bʋʋd ye.+ La bɩ d modg n da tol n maan bũmb sẽn tõe n kɩt tɩ saam-biig lak n lʋɩ wall a bʋdg ye.+ 14 Mam miime, la m kɩsa sɩd Zu-soab a Zeezi pʋgẽ tɩ baa fʋɩ pa rẽgd a meng yĩng ye.+ La yaa ned sã n wa tagsdẽ tɩ bũmb yaa rẽgd la bõn-kãng yaa rẽgd ne-a. 15 Bala fo sã n sãam f saam-biig sũur dɩɩb poorẽ, fo pa le kẽnd wa sẽn zems nonglem ye.+ Ra sak tɩ fo rɩɩbã kɩt tɩ ned Kiristã sẽn ki a yĩng sãam ye.+ 16 Woto wã, bɩ y ra maan bũmb y sẽn tẽed tɩ yaa sõma, tɩ yaool n tõe n kɩt tɩ b gom yãmb wẽng ye. 17 Bala Wẽnnaam Rĩungã pʋgẽ kõom pa tũud ne rɩɩb la yũub ye.+ La tũuda ne f sẽn na n yaa tɩrga, n tar laafɩ ne neb a taabã,* la f tar sũ-noog ning vʋʋsem sõngã sẽn kõtã. 18 Ned ning sẽn yaa Kiristã yamb la sẽn tar zʋg-sõma-kãens tata Wẽnnaam yam, la a paamd ninsaalbã pẽgr me.

19 Woto yĩnga, bɩ d baood bũmb nins sẽn wat ne laafɩ wã,+ la bũmb nins sẽn sõngd tɩ d fãa tẽebã pãng paasdẽ wã.+ 20 Da le sãam-y Wẽnnaam tʋʋmd rɩɩb yĩng bal ye.+ Yaa sɩd tɩ bũmb fãa yaa yɩlemde, la ned sã n dɩt rɩɩb tɩ wat ne neb a taab lʋɩɩse, rẽ yaa wẽnga.+ 21 Sẽn são yaa fo ra wãb nemd wall f yũ divẽ,* bɩ n maan bũmb baa a ye sẽn kɩtd tɩ f saam-biig lak n lʋɩ ye.+ 22 Tẽeb ning fo sẽn tarã, kell n tall-a f meng yĩng Wẽnnaam taoore. Sũ-noog soab la ned ning sẽn pa ningd a meng taale, bũmb a sẽn get tɩ zemsame yĩng ye. 23 La a sã n sãmbdẽ la a baas n dɩ, a zoe n tara taale, bala a pa rɩ ne tẽeb ye. Sɩd me, bũmb ning fãa sẽn pa maan ne tẽeb yaa yel-wẽnde.

15 La tõnd a neb nins tẽeb sẽn tar pãngã segd n sõnga neb nins tẽeb sẽn pa tar pãngã tɩ b mao ne b pãn-komsmã,+ la d ra maand sẽn noom tõnd mengã ye.+ 2 Bɩ d ned kam fãa maan sẽn noom a to, a to wã neer yĩnga, n paas a tẽebã pãnga.+ 3 Bala baa Kiristã pa maan sẽn noom a meng ye.+ La wa sẽn gʋlsã: “Neb nins sẽn tʋʋd yãmbã tʋy lʋɩɩ mam zugu.”+ 4 Bala bũmb nins fãa b sẽn gʋls pĩndã gʋlsa tõnd zãmsg yĩnga,+ sẽn na yɩl tɩ ne tõnd sẽn tõogd toogã maasem,+ la ne Gʋls-sõamyã belsgã maasem, d tõe n saag tɩ manegr n wate.+ 5 La bɩ Wẽnnaam sẽn sõngd tõnd tɩ d tõogd toogo, la sẽn belsd tõndã sõng yãmb tɩ y tall yam ning Kirist Zeezi sẽn da tarã yãmb sʋka, 6 sẽn na yɩl tɩ y naag taab noor a yembre,+ n pẽg tõnd Zu-soab a Zeezi Kirist Wẽnnaamã sẽn yaa a Ba me wã.

7 Woto wã, bɩ y reegd* taab sõma+ wa Kiristã me sẽn deeg yãmb sõma,+ Wẽnnaam waoogr yĩngã. 8 Bala mam yeta yãmb tɩ Kiristã lebga sẽn kẽ-b bãongã tʋm-tʋmda,+ sẽn na yɩl n wilg tɩ Wẽnnaam yaa sɩd soaba, la a wilg tɩ pʋlems nins Wẽnnaam sẽn pʋlem b yaab-rãmbã yaa sɩda,+ 9 la sẽn na yɩl tɩ bu-zẽmsã pẽg Wẽnnaam a nimbãan-zoeerã yĩnga.+ Yaa wa sẽn gʋlsã: “Yaa rẽ yĩng la mam sẽn na n pẽg yãmb bu-zẽmsã sʋka, la m yɩɩl n pẽg y yʋʋrã.”+ 10 A le yeelame: “Yãmb a buud toɛy-toɛyã fãa neba, naag-y-yã a nin-buiidã n kɩdem sũ-noogo.”+ 11 La a le yeele: “Yãmb a bu-zẽmsã fãa, pẽg-y-yã a Zeova,* la bɩ buud toɛy-toɛyã fãa pẽg-a.”+ 12 A Ezayi me yeelame: “A Zese yẽgrã na n pukame,+ yẽgr sẽn na n yik n soog bu-zẽmsã.+ La bu-zẽmsã na n teeg-a lame.”+ 13 Bɩ Wẽnnaam sẽn sõngd tõnd tɩ d saagd manegrã pids yãmb sũyã ne sũ-noog la laafɩ, yãmb sẽn kɩs-a sɩdã yĩnga, sẽn na yɩl tɩ ne vʋʋsem sõngã pãnga, yãmb tõe n saag manegr ne y sũy fãa.+

14 La m saam-biisi, mam mengã kɩsa sɩd tɩ yãmb me pida ne sõmblem la bãngre, la tɩ yãmb tõe n sagla* taaba. 15 Baasgo, Wẽnnaam barkã* a sẽn kõ maamã yĩnga, mam gʋlsa yãmb n gom bũmb kẽer yell vẽenega, n na n le tẽeg yãmba. 16 A kõo maam bark-kãng sẽn na yɩl tɩ m yɩ Kirist tʋm-tʋmd n moon bu-zẽmsã+ Wẽnnaam koe-noogã. La mam tʋmda tʋʋm-kãng sẽn yaa sõngã+ sẽn na yɩl tɩ bu-zẽmsã yɩ maoong sẽn tat Wẽnnaam yam, maoong vʋʋsem sõngã sẽn kɩt tɩ lebg sõngo.

17 Rẽnd m tara bʋʋm n na n kɩdem sũ-noog Kirist Zeezi pʋgẽ, bũmb nins sẽn kẽed ne Wẽnnaamã wɛɛngẽ. 18 Bala mam pa na n saag n gom bũmb a to yell n zʋʋg bũmb nins Kirist sẽn tũnug ne maam n maan sẽn na yɩl tɩ bu-zẽmsã yɩ sakdbã ye. A maana rẽ ne mam goamã la m tʋʋmã maasem, 19 ne bãn la yel-soalem pãnga,+ la ne vʋʋsem sõngã pãnga. Mam sɩnga Zerizalɛm n gilg n ta hal Iliri soolmẽ wã, n moon Kiristã koe-noogã sõma.+ 20 Woto, mam modgame n pa moon koe-noogã zĩis nins b sẽn zoe n kɩt tɩ nebã bãng Kiristã yʋʋrã, sẽn na yɩl n da me ned a to yẽbgr zug ye. 21 La wa sẽn gʋlsã: “Neb nins sẽn da pa paam tɩ b gom a yell ne-bã na n yãa-a lame, la neb nins sẽn da pa wʋm a kibarã na n wʋma a võore.”+

22 Yaa rẽ me yĩng la mam sẽn paam gɩdgr naoor wʋsg n pa tõog n wa yãmb nengẽ wã. 23 La masã, mam pa le tar zĩig m sẽn pa moon soolem-kãens pʋsẽ ye. La yaa na maan yʋʋm wʋsg* masã la mam sẽn dat n wa yãmb nengẽ ne m sũur fãa wã. 24 Rẽ n so tɩ m saagdẽ tɩ m sã n wa rabd Ɛspayn, m na n yãa yãmba. La m sã n zĩnd ne-y n kaoos bilfu, y na yãag-m bilf tɩ m kẽng be. 25 La masã, m dat n kẽnga Zerizalɛm n tɩ sõng nin-sõamyã wã.+ 26 Bala neb nins sẽn be Masedoan ne Akayi wã kõo kũun ne sũ-noogo, naong rãmb nins sẽn be nin-sõamyã wã sʋk Zerizalɛmmã yĩnga.+ 27 Yaa sɩd tɩ b maana rẽ ne sũ-noogo, la sɩd-sɩda, b ra tara nin-sõamyã wã samde. Bala bu-zẽmsã sã n paama pʋɩɩr bũmb nins nin-sõamyã wã sẽn deeg Wẽnnaam nengẽ wã pʋgẽ, bãmb me segd n sõng-b-la ne b paoongã.+ 28 Rẽnd m sã n maan bõn-kãng n sa la m kõ-b kũunã,* m na n tũu yãmb nengẽ n kẽng Ɛspayn. 29 Sẽn paase, mam miime tɩ m sã n wa wat yãmb nengẽ, m na n waa ne bark wʋsg sẽn yit Kiristã nengẽ.

30 Masã, m saam-biisi, mam kota yãmb tõnd Zu-soab a Zeezi Kirist maasem yĩnga, la ne nonglem ning vʋʋsem sõngã sẽn kõtã maasem yĩnga, tɩ y naag maam n pʋʋs Wẽnnaam ne y sũy fãa mam yĩnga,+ 31 sẽn na yɩl tɩ b fãag maam+ Zide neb nins sẽn pa tẽedã nusẽ, la sẽn na yɩl tɩ nin-sõamyã wã reeg kũunã mam sẽn tar n na n tɩ kõ-bã ne sũ-noogo,+ 32 la tɩ sã n ta Wẽnnaam daabo, bɩ m wa yãmb nengẽ ne sũ-noogo, n naag yãmb n paam raood kengre. 33 Bɩ Wẽnnaam sẽn kõt laafɩ wã zĩnd ne yãmb fãa.+ Ãmiina.

16 Mam dat n goma d saam-bi-poak a Feebe yell ne yãmba. A tʋmda wʋsg Sãnkre+ tigingã pʋgẽ. 2 Bɩ y reeg-a neer Zu-soabã pʋgẽ wa b sẽn tog n deeg nin-sõamyã wã, la y sõng-a ne sõngr ning fãa a sẽn date.+ Bala yẽ me teela saam-biis wʋsgo, baa mam mengã.

3 Pʋʋs-y-yã a Priska ne a Akila+ sẽn yaa mam tʋmd-n-taas Kirist Zeezi pʋgẽ wã n kõ-ma. 4 B gẽnega b yõy mam* yĩnga.+ Mam pʋʋsd-b-la barka, la pa maam bal ye. Bu-zẽmsã tigims fãa me pʋʋsd-b-la barka. 5 Sẽn paase, pʋʋs-y tiging ning sẽn tigimd bãmb zakẽ wã.+ Pʋʋs-y m nin-nongr a Epenɛte. Yẽ naaga Aazi soolmã neb nins sẽn yɩ pipi n lebg Kiristã karen-biisã. 6 Pʋʋs-y-yã a Maari sẽn tʋm wʋsg yãmb yĩngã. 7 Pʋʋs-y-yã a Ãndronikus ne a Zuniyaas sẽn yaa mam roagdba,+ la neb sẽn naag maam n kẽ bãens roogã. B yaa neb tẽn-tʋmdbã sẽn mi sõma, la sẽn kaoos Kiristã pʋgẽ n yɩɩd maam.

8 Pʋʋs-y-yã a Ampiliyatus sẽn yaa mam nin-nongr Zu-soabã pʋgẽ wã n kõ-ma. 9 Pʋʋs-y-yã a Urbẽ sẽn yaa tõnd tʋmd-n-taag Kirist pʋgẽ wã, la y pʋʋs m nin-nongr a Estakiisi. 10 Pʋʋs-y-yã a Apelɛs sẽn yaa ned sẽn ta Kiristã yamã. Pʋʋs-y-yã a Aristobull zakã rãmba. 11 Pʋʋs-y-yã a Eroodiyõ sẽn yaa mam roagdã. Pʋʋs-y-yã a Narsis zakã neb nins sẽn be Zu-soabã pʋgẽ wã. 12 Pʋʋs-y-yã a Tirfɛn ne a Tirfooz sẽn yaa pagb sẽn tʋmd wʋsg Zu-soabã pʋgẽ wã. Pʋʋs-y-yã a Pɛrsis sẽn yaa tõnd nin-nongrã, bala a tʋma wʋsg Zu-soabã pʋgẽ. 13 Pʋʋs-y-yã a Rufus sẽn yaa nin-tũusdg Zu-soabã pʋgẽ wã, la y pʋʋs a ma wã sẽn yaa ma-me ma wã. 14 Pʋʋs-y-yã a Asẽnkirit ne a Felegõ, n paas a Ɛrmes ne a Patrobaase, la a Ɛrmaas ne saam-biis nins sẽn be ne bãmbã. 15 Pʋʋs-y-yã a Filolog ne a Zili, a Neere ne a tão wã, la a Olimpas ne nin-sõamyã nins fãa sẽn be ne bãmbã. 16 Pʋʋs-y taab ne pʋ-peelem mokre. Kiristã tigimsã fãa pʋʋsda yãmba.

17 Masã, m saam-biisi, mam sagenda yãmb tɩ y gũus ne neb nins sẽn wat ne welsgo, la sẽn wat ne bũmb sẽn kɩtd tɩ ned lak n lʋɩ wã. Bõn-kãens pa zems ne zãmsg ning yãmb sẽn paamã ye. Lak-y y mens ne nin-kãense.+ 18 Bala nin-kãens buudã yaa yembse, la b pa tõnd Zu-soab a Kirist yembs ye. B yaa b pʋsã* yembse, la b tũnugda ne no-noom la belgre, n tudgd neb nins sẽn pa maand gũusgã. 19 Nebã fãa bãnga yãmb sakrã, tɩ rẽ kɩt tɩ mam kɩdemd sũ-noog yãmb yĩnga. La mam datame tɩ y yɩ yam dãmb neerã wɛɛngẽ, la y yɩ neb sẽn pa tar yell wẽngã wɛɛngẽ.+ 20 La ka la bilfu, Wẽnnaam sẽn kõt laafɩ wã na n bedsa a Sʋɩtãan+ yãmb naoã tẽngre. Bɩ tõnd Zu-soab a Zeezi barkã* zĩnd ne yãmba.

21 A Tɩmote sẽn yaa mam tʋmd-n-taagã pʋʋsda yãmba. A Lisiyus ne a Zaazõ n paas a Sozipatɛɛr sẽn yaa mam roagdbã me pʋʋsda yãmba.+

22 Maam a Tɛrtiyus sẽn gʋls seb-kãnga wã pʋʋsda yãmb Zu-soabã pʋgẽ.

23 A Gayus+ sẽn yaa mam gãag soabã, n le yaa tigingã tõr gãag soabã pʋʋsda yãmba. A Erast sẽn yaa tẽngã ligdã gũudã* pʋʋsda yãmba. A ba-biig a Kartus me pʋʋsda yãmba. 24* ——

25 Wẽnnaam tõe n sõnga yãmb tɩ y yals kãn-kãe, wa koe-noog ning mam sẽn moondã sẽn yetã, la wa koɛɛg ning sẽn gomd a Zeezi Kirist yellã sẽn yetã. Koe-no-kãens zemsa ne yel-soalgdgã sẽn yaa sõngã+ Wẽnnaam sẽn pukã. Yel-soalgd-kãng ra solga hal daar zãra, 26 la masã, b kɩtame t’a lebg vẽenega.* La Gʋls-sõamyã bãngr-goamã maasem yĩnga, bu-zẽmsã fãa bãnga Wẽnnaam yel-soalgdgã. Rẽ zemsa ne Wẽnnaam sẽn vɩ wakat fãa wã noorã. A raabã yaa tɩ bu-zẽmsã fãa tẽ-a la b sak-a. 27 Bɩ Wẽnnaam a ye tãa sẽn yaa yam soabã+ paam ziir wakat fãa a Zeezi Kirist maasem yĩnga. Ãmiina.